Kanbiọ lẹ sọn Wehiatọ lẹ Dè

Mẹmẹsunnu de he visunnu etọn hù ede kanse dọ: ‘Be Jehovah yọnẹn jẹnukọn dọ yẹn po asi ṣie po na penugo nado doakọnna okú visunnu mítọn tọn wẹ ya? Be enẹ jọ na Jiwheyẹwhe basi dide dọ mí sọgan doakọnna ẹn wutu wẹ ya?’ Be whẹwhinwhẹ́n nujọnu tọn de tin dọ Jehovah nọ deanana gbẹzan mítọn to aliho tangan mọnkọtọn lẹ mẹ wẹ ya?

Dogbigbapọnna hogbe Paulu tọn he tin to 1 Kọlintinu lẹ 10:13 mẹ lẹ yinukọn dogọ hẹn mí wá tadona ehe kọ̀n: Whẹwhinwhẹ́n sinai do Owe-wiwe ji depope ma tin nado yise dọ Jehovah nọ yọ́n whlepọn he mí sọgan doakọnna lẹ jẹnukọn, podọ enẹgodo nọ de dehe na wá mí ji lẹ. Mì gbọ mí ni gbadopọnna whẹwhinwhẹ́n ẹnẹ he wutu mí sọgan wá tadona enẹ kọ̀n lẹ.

Tintan, Jehovah na gbẹtọvi lẹ nunina mẹdekannujẹ nudide bibasi tọn. E jlo dọ mílọsu ni de gbẹzan he mí jlo na zan. (Deut. 30:19, 20; Jọṣ. 24:15) Eyin mí de nado zan gbẹzan dagbe, mí sọgan ganjẹ Jehovah go nado deanana afọdide mítọn lẹ. (Howh. 16:9) Ṣigba, eyin mí de nado zan gbẹzan ylankan, mí na pehẹ kọdetọn etọn lẹ dandan. (Gal. 6:7) Na nugbo tọn, eyin Jehovah nọ de whlepọn he na wá mí ji lẹ wẹ, be enẹ ma na dohia dọ ewọ sọ to nunina mẹdekannujẹ nudide bibasi tọn lọ yí sọn mí si ya?

Awetọ, Jehovah ma nọ basi hihọ́na mí sọn “ojlẹ po kosọ po” mẹ. (Yẹwh. 9:11) Asidan sinsinyẹn de sọgan jọ bo hẹn kọdetọn vẹadi lẹ wá, na mí tin to nọtẹn de mẹ to ojlẹ nujijọ ylankan de tọn whenu wutu. Jesu dọho gando nugbajẹmẹji de go, he whenu atọ̀họ̀ de họ́ jẹ gbẹtọ 18 ji bo hù yé, bo wá dohia dọ nugbajẹmẹji madonukun enẹlẹ ma yin ojlo Jiwheyẹwhe tọn gba. (Luku 13:1-5) Be e sọgbe hẹ lẹnpọn dagbe nado lẹndọ Jiwheyẹwhe nọ magbe mẹhe na gán po mẹhe na kú lẹ po tọn jẹnukọnna nujijọ ajiji lẹ ya?

Atọ̀ntọ, dopodopo mítọn go wẹ whẹho tenọgligo-hinhẹn tọn gando. Flindọ Satani diọnukunsọ tenọgligo-hinhẹn mẹhe nọ sẹ̀n Jehovah lẹpo tọn, bo sọalọakọ́n dọ mí ma nasọ yin nugbonọ na Jehovah ba to whlepọn lẹ glọ. (Jobu 1:9-11; 2:4; Osọ. 12:10) Eyin Jehovah nọ glọnalina whlepọn delẹ nado wá mí ji na e mọdọ mí ma na penugo nado doakọnna wutu, be enẹ ma na nọgodona whẹsadokọnamẹ Satani tọn dọ mí to Jiwheyẹwhe sẹ̀n na ṣejannabi wutu ya?

Ẹnẹtọ, Jehovah ma to dandannu glọ nado yọ́n nuhe na jọ do mí go lẹpo jẹnukọn. Linlẹn lọ dọ Jiwheyẹwhe nọ de whlepọn he mí na pehẹ lẹ jẹnukọn dohia dọ ewọ dona yọ́n nulẹpo gando sọgodo mítọn go. Ṣigba, pọndohlan enẹ ma sọgbe hẹ Owe-wiwe lẹ. Nugbo wẹ dọ Jiwheyẹwhe sọgan yọ́n sọgodo. (Isa. 46:10) Ṣigba Biblu dohia dọ nuhe e jlo lẹ wẹ e nọ de nado na ayidonugo gando nujijọ sọgodo tọn lẹ go. (Jen. 18:20, 21; 22:12) Gbọnmọ dali, e nọ yí nugopipe etọn nado yọ́n sọgodo zan ṣogan bo nọ na sisi nunina mẹdekannujẹ nudide bibasi tọn mítọn to ojlẹ dopolọ mẹ. Be e ma yin nuhe mí sọgan donukun sọn Jiwheyẹwhe si, yèdọ mẹhe yọ́n pinpẹn mẹdekannujẹ mítọn tọn bosọ nọ yí nugopipe etọn lẹ zan to aliho jlẹkaji tọn pipé de mẹ to whepoponu niyẹn ya?—Deut. 32:4; 2 Kọl. 3:17.

Eyin mọ wẹ, etẹwẹ hogbe Paulu tọn lẹ he dọmọ: “Jiwheyẹwhe . . . ma na dike mì ni yin whiwhlepọn zẹ̀ nuhe mì sọgan doakọnna go” zẹẹmẹdo lo? Tofi, nuhe Jehovah nọ wà to whlepọn lẹ whenu hodọ wẹ Paulu te, e ma yin nuhe e nọ wà jẹnukọnna whlepọn lẹ gba. Hogbe apọsteli lọ tọn lẹ hẹn mí deji dọ mahopọnna whlepọn depope he mí na pehẹ to gbẹzan mítọn mẹ, Jehovah na gọalọna mí eyin mí dejido ewọ go. (Salm. 55:22) Hogbe homẹmiọnnamẹ tọn Paulu tọn lẹ sinai do nugbo titengbe awe delẹ ji.

Tintan, whlepọn he mí nọ pehẹ lẹ yin dehe “to paa mẹ na gbẹtọ lẹ.” Enẹwutu, whlepọn he gbẹtọ lẹ nọ pehẹ to paa mẹ lẹ wẹ mí nọ pehẹ. Whlepọn mọnkọtọn lẹ ma nọ zẹ̀ nugopipe mítọn nado doakọnnanu go—eyin mí gbẹ́ ganjẹ Jiwheyẹwhe go. (1 Pita 5:8, 9) To lẹdo hodidọ 1 Kọlintinu lẹ 10:13 tọn mẹ, Paulu dlẹnalọdo whlepọn he Islaelivi lẹ pehẹ to danfafa ji lẹ. (1 Kọl. 10:6-11) Depope to whlepọn enẹlẹ mẹ ma zẹ̀ numimọ gbẹtọvi tọn go kavi hugan nuhe Islaelivi nugbonọ lẹ sọgan doakọnna. Whla ẹnẹ wẹ Paulu dọ dọ “delẹ to yé mẹ” vẹtoli. E blawu dọ Islaelivi delẹ joawuna ojlo ylankan na yé gboawupo nado ganjẹ Jiwheyẹwhe go wutu.

Awetọ, “nugbonọ wẹ Jiwheyẹwhe.” Kandai lehe Jiwheyẹwhe yinuwa hẹ omẹ etọn lẹ do tọn dohia dọ ewọ nọ do owanyi nugbo etọn hia “mẹhe yiwanna ẹn bosọ nọ yìn gbedide etọn lẹ.” (Deut. 7:9) Kandai enẹ sọ dohia dọ Jiwheyẹwhe nọ hẹn opagbe etọn lẹ di to whepoponu. (Jọṣ. 23:14) Dile kandai nugbonọ-yinyin tọn etọn to hohowhenu dohia do, mẹhe yiwanna ẹn bo nọ setonuna ẹn lẹ sọgan deji dọ ewọ na hẹn opagbe awe he gando whlepọn he yé sọgan pehẹ go ehelẹ di: (1) Ewọ ma na dike whlepọn depope ni zẹ̀ nuhe yé sọgan doakọnna go, (2tọ) “ewọ nasọ deali de” na yé.

To whlepọn lẹ nukọn, nawẹ Jehovah nọ deali de na mẹhe ganjẹ ewọ go lẹ gbọn? Na nugbo tọn, eyin e jlo e, ewọ sọgan de whlepọn de sẹ̀ poun. Ṣigba flin hogbe Paulu tọn lẹ he dọmọ: “Ewọ [Jehovah] nasọ deali de, na mìwlẹ nido penugo nado doakọnna ẹn.” Enẹwutu, to whẹho susu mẹ, ewọ nọ “deali de” gbọn awuwiwlena nuhe mí do hudo etọn nado sọgan doakọnna whlepọn lẹ po kọdetọn dagbe po dali. Lẹnnupọndo aliho he mẹ Jehovah sọgan deali de na mí te lẹ ji:

• Ewọ “nọ miọnhomẹna mí to whlepọn mítọn lẹpo mẹ.” (2 Kọl. 1:3, 4) Jehovah sọgan hòhuwhẹ ayiha, ahun po numọtolanmẹ mítọn lẹ po gbọn Ohó etọn, gbigbọ wiwe etọn po núdùdù gbigbọmẹ tọn he afanumẹ nugbonọ lọ nọ wleawuna lẹ po gblamẹ.—Mat. 24:45; Joh. 14:16, Odò; Lom. 15:4.

• E sọgan deanana mí gbọn gbigbọ wiwe gblamẹ. (Joh. 14:26) To whenue whlepọn lẹ fọ́n, gbigbọ lọ sọgan gọalọna mí nado flin otàn Biblu tọn lẹ po nunọwhinnusẹ́n lẹ po, podọ nado yọ́n afọdide nuyọnẹn tọn he mí na ze lẹ.

• Ewọ sọgan yí angẹli etọn lẹ zan do ota mítọn mẹ.—Heb. 1:14.

• E sọgan gọalọna mí gbọn yisenọ hatọ lẹ gblamẹ, yèdọ mẹhe sọgan yin “alọgọ mẹhẹnlodo tọn” na mí gbọn ohó po nuyiwa yetọn lẹ po gblamẹ.—Kol. 4:11, Odò.

To whelọnu lo, tadona tẹ kọ̀n wẹ mí sọgan wá gando zẹẹmẹ hogbe Paulu tọn lẹ he yin kinkandai to 1 Kọlintinu lẹ 10:13 mẹ go? Jehovah ma nọ de whlepọn he na wá mí ji lẹ. Ṣigba, eyin whlepọn lẹ fọ́n to gbẹzan mítọn mẹ, mí sọgan kudeji dọ: Eyin mí dejido Jehovah go mlẹnmlẹn, ewọ ma na dike gbede whlepọn mítọn lẹ ni zẹ̀ nuhe gbẹtọvi sọgan doakọnna go; e na nọ deali de to whepoponu na mí nido penugo nado doakọnna yé. Linlẹn homẹmiọnnamẹ tọn nankọ die!