Mẹnu Wẹ Dá Jiwheyẹwhe?

Yí nukun homẹ tọn do pọ́n otọ́ de he to hodọ hẹ visunnu etọn he tindo owhe ṣinawe. E dọ dọ, “Sọn ojlẹ dindẹn die, Jiwheyẹwhe dá aigba, po nuhe tin to e ji lẹpo po, podọ e dá owhè, osun, po sunwhlẹvu lẹ po.” Visunnu lọ lẹnnupọn na ojlẹ kleun de bo kanse dọ, “Papa, bọ mẹnu wẹ dá Jiwheyẹwhe?”

Otọ́ lọ gblọnna ẹn dọ, “Mẹde ma dá Jiwheyẹwhe nẹ. E ma tindo bẹjẹeji.” Gblọndo kleun enẹ hẹn pekọ wá na ovi lọ to ojlẹ enẹ mẹ. Ṣigba, dile ovi lọ to whinwhẹ́n, kanbiọ enẹ sọ jẹ ahunmẹduna ẹn ji. E vẹawuna ẹn nado mọnukunnujẹ linlẹn lọ mẹ dọ mẹde sọgan tin, bo ma tindo bẹjẹeji. Wẹkẹ mítọn lọsu tlẹ tindo bẹjẹeji. Enẹwutu, ovi lọ to kinkanse ede dọ, ‘Fie wẹ Jiwheyẹwhe wá sọn taun?’

Gblọndo tẹwẹ Biblu na? Do glido, nuhe nkọ otọ́ lọ gblọnna ovi etọn to apajlẹ lọ mẹ wẹ Biblu dọ. Mose wlan dọmọ: ‘OKLUNỌ, whẹpo yè do hẹn osó lẹ tọ́njẹgbonu wá, kavi whẹpo hiẹ do hẹn aigba po wẹkẹ po tọ́nkun, yèdọ sọn madopodo jẹ madopodo, hiẹ wẹ Jiwheyẹwhe.’ (Psalm 90:1, 2) Yẹwhegán Isaia lọsu dọmọ: ‘Hiẹ ma ko yọnẹn? Hiẹ ma ko sè, dọ Jiwheyẹwhe madopodo, OKLUNỌ, nudàtọ aigba pòdo lẹpo tọn’ wẹ Jiwheyẹwhe! (Isaia 40:28) Podọ, wekanhlanmẹ Juda tọn dlẹnalọdo Jiwheyẹwhe taidi mẹhe ko tin “sọn ojlẹ madopodo.”—Juda 25.

Wefọ enẹlẹ dohia dọ Jiwheyẹwhe yin “Ahọlu madopodo” dile apọsteli Paulu basi zẹẹmẹ etọn do. (1 Timoti 1:17) Ehe zẹẹmẹdo dọ Jiwheyẹwhe ma tindo bẹjẹeji. Podọ e nasọ tin tẹgbẹ. (Osọhia 1:8) Enẹwutu, dopo to nuhe dohia dọ Jiwheyẹwhe yin Ganhunupotọ lọ lẹ mẹ wẹ yindọ e yin madopodo.

Naegbọn e do nọ vẹawuna mí nado mọnukunnujẹ ehe mẹ? Na gbẹzan mítọn he tindo dogbó nọ zọ́n bọ pọndohlan mítọn gando ojlẹ go nọ gbọnvo pete na Jehovah tọn. Na Jiwheyẹwhe yin madopodo wutu, owhe fọtọ́n nọ taidi azán dopo to nukun etọn mẹ. (2 Pita 3:8) Di apajlẹ: Be obọ̀ he nọ nọgbẹ̀ na azán 50 poun sọgan mọnukunnujẹemẹ dọ mí gbẹtọvi lẹ nọ nọgbẹ̀ yì owhe 70 kavi 80 ya? E na vẹawu! Na nugbo tọn, Biblu basi zẹẹmẹ dọ mí taidi obọ̀ yijlẹdo Mẹdatọ Daho mítọn go. Nugopipe mítọn nado lẹnnupọn ma sọtẹ́n yijlẹdo Jiwheyẹwhe tọn go. (Isaia 40:22; 55:8, 9) Enẹwutu, e ma yin nupaṣamẹ dọ onú delẹ tin he gando Jehovah go bọ mí gbẹtọvi lẹ ma sọgan mọnukunnujẹemẹ to gigọ́ mẹ.

Dile etlẹ yindọ e sọgan vẹawuna mí nado mọnukunnujẹemẹ dọ Jiwheyẹwhe yin madopodo, mí nọ mọdọ linlẹn lọ sọgbe. Eyin mẹdevo ko dá Jiwheyẹwhe wẹ, be omẹ enẹ wẹ na yin Mẹdatọ lọ. Ṣigba dile Biblu basi zẹẹmẹ do, Jehovah wẹ yin mẹhe “dá onú lẹpo.” (Osọhia 4:11) Humọ, mí yọnẹn dọ to ojlẹ de mẹ, wẹkẹ lọ ma tin. (Gẹnẹsisi 1:1, 2) Fie wẹ wẹkẹ lọ wá sọn? Mẹhe dá ẹ dona ko tin jẹnukọn. Ewọ ko sọ tin jẹnukọnna nudida nuyọnẹntọ depope taidi Visunnu dopo akàn etọn po angẹli lẹ po. (Job 38:4, 7; Kọlọsinu lẹ 1:15) Enẹwutu, e họnwun dọ ewọ kẹdẹ wẹ tin to tintan whenu. E ma sọgan yin didá na nudida depope ma ko tin he sọgan dá ẹ.

E họnwun dọ Jiwheyẹwhe yin madopodo, na ewọ wẹ dá mí bosọ dá wẹkẹ lọ blebu. Mẹhe dá wẹkẹ gblagada mítọn bosọ wleawuna osẹ́n he nọ deanana ẹn lẹ dona ko tin sọn madopodo. Ewọ kẹdẹ wẹ sọgan gbọ̀ gbọfufu ogbẹ̀ tọn do nuhe to ogbẹ̀ lẹpo mẹ.—Job 33:4.