Be Kunnudetọ Jehovah Tọn lẹ Tindo Todohukanji Sinima, Owe Kavi Ohàn Tangan Delẹ Tọn He Yé Nọ Gbẹdai Wẹ Ya?

Lala. Titobasinanu mítọn ma nọ gbadopọnna sinima, owe, kavi ohàn tangan delẹ nado sọgan dosẹ́n na hagbẹ agun lọ tọn lẹ na yé nido dapana yé. Etẹwutu?

Biblu na tuli omẹ dopodopo nado “plọn huhlọn wuntuntun tọn” etọn nado sọgan yọ́n vogbingbọn to dagbe po oylan po ṣẹnṣẹn.—Heblu lẹ 5:14.

Owe-wiwe lẹ ze nunọwhinnusẹ́n dodonu tọn lẹ dai, ehe Klistiani de sọgan nọ hodo to whenue e jlo na de ayidedai etọn lẹ.a To adà gbẹzan mítọn tọn lẹpo mẹ, yanwle mítọn wẹ nado “nọ to dodinna nuhe Oklunọ kẹalọyi lẹ zọnmii.”—Efesunu lẹ 5:10.

Biblu dọ dọ tatọ́ whẹndo tọn lẹ tindo aṣẹpipa jẹ obá de mẹ, enẹwutu yé sọgan basi dide gando ayidedai he hagbẹ whẹndo yetọn tọn lẹ sọgan kẹalọyi lẹ go. (1 Kọlintinu lẹ 11:3; Efesunu lẹ 6:1-4) Etomọṣo, mẹdepope ma tindo aṣẹpipa nado do sinima, ohàn kavi hànsinọ tangan delẹ hia taidi nuhe hagbẹ agun lọ tọn lẹ ma dona kẹalọyi.—Galatianu lẹ 6:5.