Adà He Gbigbọ Wiwe Nọ Yiwà to Lẹndai Jehovah Tọn Hinhẹndi Mẹ

“Ohó ṣie he tọ́n sọn onù ṣie . . . na wà dagbe to nuhe mẹ yẹn do e hlan te.”—ISA. 55:11.

 1. Na apajlẹ de nado do vogbingbọn he tin to tito po lẹndai po ṣẹnṣẹn hia.

MÍ NI dọ dọ sunnu awe to awuwle nado tọ́nwhẹ̀n po mọto yetọn titi po. Omẹ tintan lọ de yẹdide ali dopo gee he yì fie e jei lọ tọn po nudọnamẹ gigọ́ ali lọ tọn lẹ po do wema ji. Omẹ awetọ lọ yọ́n fie e jei ganji to ayiha mẹ, bosọ yọ́n ali susu devo he yì filọ. Eyin e wá jọ bọ nuhahun de fọ́n to ali ji, e yọ́n lehe e na yawu ze ali devo do. To linlẹn delẹ mẹ, afọdide voovo he sunnu ehelẹ jlo na ze nado jẹ fie yé jei, do vogbingbọn he tin to tito po lẹndai po ṣẹnṣẹn hia. Tito de bibasi sọgan yin yiyijlẹdo yẹdide alidohiamẹ tọn he bẹ nudọnamẹ gigọ́ hẹn de dide go, to whenuena lẹndai sọgan zẹẹmẹdo yanwle de tintindo to ayiha mẹ ṣigba bọ e ma yin dandan dọ aliho dopo gee janwẹ na yin hihodo nado jẹ e kọ̀n.

2, 3. (a) Etẹwẹ lẹndai Jehovah tọn bẹhẹn, podọ nawẹ e yinuwa do to whenuena Adam po Evi po waylando? (b) Naegbọn mí dona yọ́n lẹndai Jiwheyẹwhe tọn bo nọ yinuwa to kọndopọ mẹ hẹ aliho he mẹ e nọ hẹn ẹn di te?

² Nado hẹn ojlo etọn di, Jehovah ma tindo tito he ma nọ diọ de gba, ṣigba e tindo lẹndai de he nọ yin hinhẹndi vudevude. (Efe. 3:11) Lẹndai ehe bẹ nuhe e jlo na gbẹtọvi lẹ po aigba po to dowhenu hẹn—enẹ wẹ yindọ aihọn lọ  blebu ni lẹzun paladisi de, fie gbẹtọvi pipé lẹ na nọ jijọho po ayajẹ po mẹ kakadoi te. (Gẹn. 1:28) To whenuena Adam po Evi po waylando, Jehovah de aliho devo lẹ nado hẹn ẹn diun dọ lẹndai etọn na yin hinhẹndi. (Hia Gẹnẹsisi 3:15.) Jehovah hẹn ẹn diun dọ yọnnu yẹhiadonu tọn etọn de “okún,” kavi Visunnu de tọ́n he na wá và nuhẹngbletọ lọ, Satani sudo, bo na jla nuhe e ko hẹngble lẹpo do.—Heb. 2:14; 1 Joh. 3:8.

³ Huhlọn depope ma tin to olọn mẹ kavi to aigba ji he sọgan glọnalina lẹndai Jiwheyẹwhe tọn ma nado mọ hẹndi. (Isa. 46:9-11) Naegbọn mí do dọ mọ? Na gbigbọ wiwe Jehovah tọn nọ yí adà de wà wutu wẹ. Huhlọn jiawu enẹ yin kunnudenu de dọ lẹndai Jiwheyẹwhe tọn “na wà dagbe” kavi tindo kọdetọn dagbe dandan. (Isa. 55:10, 11) E jẹ dọ mí ni yọ́n lẹndai Jiwheyẹwhe tọn bo nọ yinuwa to kọndopọ mẹ hẹ aliho he mẹ e nọ hẹn ẹn di te. Todido mítọn nado nọgbẹ̀ to sọgodo sinai do hẹndi lẹndai lọ tọn ji. Humọ, ayidido lehe Jehovah nọ yí gbigbọ wiwe etọn zan do go na hẹn yise mítọn lodo. Enẹwutu, mì gbọ mí ni gbadopọnna adà he gbigbọ wiwe yiwà—to hohowhenu, to yiyiwà to egbehe, po dehe e na yiwà to sọgodo po—to lẹndai Jehovah tọn hinhẹndi mẹ.

Adà He Gbigbọ Wiwe Yiwà to Hohowhenu

 4. Nawẹ Jehovah de lẹndai etọn hia vudevude gbọn?

⁴ Jehovah de lẹndai etọn hia vudevude to hohowhenu. To tintan whenu, Okún dopagbe lọ yin “aṣli wiwe de.” (1 Kọl. 2:7) Nudi owhe 2000 godo wẹ Jehovah ṣẹṣẹ wá donù okún de go. (Hia Gẹnẹsisi 12:7; 22:15-18.) Jehovah dopagbe he gbloada de na Ablaham. Hogbe lọ “to okún towe mẹ” dohia hezeheze dọ Okún lọ na wá taidi gbẹtọvi de, yèdọ sọn kúnkan Ablaham tọn mẹ. E họnwun dọ Satani yí linlẹn ylankan do to pinpọn lehe lẹndai lọ na yin didehia to gigọ́ mẹ do. Matin ayihaawe, yanwle Kẹntọ enẹ tọn wẹ nado và kúnkan Ablaham tọn sudo bo gbọnmọ dali glọnalina lẹndai Jiwheyẹwhe tọn ma nado mọ hẹndi. Ṣigba e ma pà Satani, na gbigbọ wiwe Jiwheyẹwhe tọn glọnalina ẹn wutu. To aliho tẹlẹ mẹ?

5, 6. Nawẹ Jehovah yí gbigbọ wiwe etọn do basi hihọ́na mẹdelẹ to whẹndo he mẹ Okún lọ wá sọn mẹ gbọn?

⁵ Jehovah yí gbigbọ wiwe etọn do basi hihọ́na mẹdelẹ to whẹndo he mẹ Okún lọ wá sọn mẹ. Jehovah dọna Ablam (Ablaham) dọmọ: “Yẹn wẹ awọ̀yinu towe.” (Gẹn. 15:1) Hogbe enẹlẹ ma yin nùmẹ-yozò de poun gba. Di apajlẹ, pọ́n nuhe jọ to nudi 1919 J.W.M. to whenuena Ablaham po Sala po yì nọ Gelali na ojlẹ kleun de. Na Abimelẹki ahọlu Gelali tọn ma yọnẹn dọ asi Ablaham tọn wẹ Sala yin wutu, e yí i po linlẹn lọ po nado do asi. Be Satani wẹ to anadena whẹho lọ bo to tintẹnpọn nado glọnalina Sala nado de okún Ablaham tọn tọ́n ya? Biblu ma dọ gba. Nuhe e dọ poun wẹ yindọ Jehovah dádo whẹho lọ mẹ. E gbẹnuna Abimelẹki to odlọ mẹ ma nado doalọ Sala go.—Gẹn. 20:1-18.

⁶ E ma yin whla dopo he Jehovah basi hihọ́na yé niyẹn gba. Whlasusu wẹ Jehovah whlẹn Ablaham po whẹndo etọn po. (Gẹn. 12:14-20; 14:13-20; 26:26-29) Abajọ psalm-kàntọ lọ sọgan dọ gando Ablaham po kúnkan etọn po go dọmọ: “E [Jehovah] ma dike mẹde bianukunna yé: nugbo, e wọhẹ ahọlu lẹ na yetọn wutu; dọmọ, Mì doalọ mẹyiamisisadode ṣie go blo, mì sọ wadanu de do yẹwhegán ṣie lẹ go blo.”—Ps. 105:14, 15.

 7. Aliho tẹlẹ mẹ wẹ Jehovah basi hihọ́na akọta Islaeli tọn te?

⁷ Gbọn gbigbọ wiwe etọn gblamẹ, Jehovah basi hihọ́na akọta Islaeli hohowhenu tọn he mẹ Okún dopagbe lọ yin jiji te. Jehovah na Osẹ́n Islaelivi lẹ gbọn gbigbọ etọn gblamẹ podọ Osẹ́n lọ basi hihọ́na sinsẹ̀n-bibasi nugbo bosọ basi hihọ́na Ju lẹ ma nado yin hinhẹnflu to gbigbọ-liho, to walọyizan-liho, podọ to agbasa-liho. (Eks. 31:18; 2 Kọl. 3:3) To azán Whẹdatọ lẹ tọn gbè, gbigbọ Jehovah tọn na huhlọn sunnu delẹ nado whlẹn Islaelivi lẹ sọn kẹntọ yetọn lẹ si. (Whẹ. 3:9, 10) Owhe kanweko lẹ jẹnukọnna jiji Jesu he yin adà tintan okún Ablaham tọn gblamẹ, gbigbọ wiwe dona ko yí adà de wà nado basi hihọ́na Jelusalẹm, Bẹtlẹhẹm, po tẹmpli lọ po—ehelẹ yí adà de wà nado hẹn dọdai he gando Jesu go lẹ di.

 8. Etẹwẹ dohia dọ gbigbọ wiwe wẹ deanana gbẹzan Ovi Jiwheyẹwhe tọn tlọlọ podọ to lizọnyizọn etọn whenu?

⁸ Gbigbọ wiwe wẹ deanana gbẹzan Jesu tọn tlọlọ podọ to lizọnyizọn etọn whenu. Gbigbọ wiwe yinuwado vidọ̀ Malia tọn ji, bo wà nude he ma ko jọ pọ́n. E hẹn yọnnu mapenọ de nado mọhò bo ji Visunnu pipé de, mẹhe ji okú Adam tọn ma tindo huhlọn do. (Luku 1:26-31, 34, 35) To nukọn mẹ, gbigbọ lọ basi-hihọ́na Jesu, whenue e gbẹ́ pò to ovu pẹnyẹn-pẹnyẹn bọ e ma do kú azán mapemape. (Mat. 2:7, 8, 12, 13) To whenuena Jesu tindo nudi owhe 30, Jiwheyẹwhe yí gbigbọ wiwe do de e, bo de e nado yin whédutọ ofìn Davidi tọn bosọ deazọ́nna ẹn nado dọyẹwheho. (Luku 1:32, 33; 4:16-21) Gbigbọ wiwe na huhlọn Jesu nado wà azọ́njiawu voovo lẹ, e hẹnazọ̀ngbọna gbẹtọ lẹ, na núdùdù gbẹtọgun lẹ, bo fọ́n oṣiọ lẹ sọnku. Apajlẹ dona he mí to nukundo to gandudu Jesu tọn glọ lẹ tọn wẹ azọ́njiawu enẹlẹ yin.

9, 10. (a) Nawẹ gbigbọ wiwe yinuwado devi Jesu tọn lẹ ji to owhe kanweko tintan whenu gbọn? (b) Gando aliho he mẹ Jehovah nọ hẹn lẹndai etọn di te go, onú yọyọ tẹwẹ yin didehia to owhe kanweko tintan W.M.?

⁹ Bẹsọn Pẹntikọsti 33 W.M., Jehovah yí gbigbọ wiwe etọn do de adà awetọ okún Ablaham tọn lọ, he susu yetọn ma wá sọn kúnkan Ablaham tọn mẹ. (Lom. 8:15-17; Gal. 3:29) Gbigbọ wiwe yinuwado devi Jesu tọn lẹ ji to owhe kanweko tintan whenu, bo gọalọna yé nado dọyẹwheho po zohunhun po podọ nado wà azọ́n huhlọnnọ lẹ. (Owalọ 1:8; 2:1-4; 1 Kọl. 12:7-11) Gbọn nunina jiawu enẹlẹ gblamẹ, gbigbọ wiwe de onú yọyọ de hia gando aliho he mẹ Jehovah na hẹn lẹndai etọn di te go. Jehovah masọ jlo dọ gbẹtọ lẹ ni nọ basi sinsẹ̀n hlan emi to aliho dopolọ he e ko zedai na owhe kanweko susu to tẹmpli Jelusalẹm tọn mẹ ba. E ko gbẹkọ Islaeli agbasalan tọn go bo do nukundagbe etọn hia agun Klistiani tọn he ṣẹṣẹ yin didoai lọ. Sọn whenẹnu gbọ́n, Jehovah ko to yíyí agun yí gbigbọ do de enẹ zan nado hẹn lẹndai etọn di.

¹⁰ Hihọ́-basinamẹ, huhlọn ninamẹ, podọ nado yin dide—ehelẹ yin vude poun to aliho he mẹ Jehovah yí gbigbọ wiwe zan te to hohowhenu nado hẹn ẹn diun dọ lẹndai etọn mọ hẹndi. Egbehe lo? Nawẹ Jehovah nọ yí gbigbọ etọn zan to egbehe na lẹndai etọn nido mọ hẹndi gbọn? E jẹ dọ mí ni yọnẹn, na mí jlo na yinuwa to kọndopọ mẹ hẹ gbigbọ enẹ. Enẹwutu, mì gbọ mí ni lẹnnupọndo aliho ẹnẹ he mẹ Jehovah nọ yí gbigbọ etọn zan te to egbehe lẹ ji.

Adà He Gbigbọ Wiwe to Yiyiwà to Egbehe

11. Etẹwẹ dohia dọ gbigbọ wiwe yin huhlọn de he nọ gọalọna omẹ Jiwheyẹwhe tọn lẹ nado nọ wiweji, podọ nawẹ hiẹ sọgan dohia dọ a to gbekọndopọ hẹ gbigbọ lọ gbọn?

¹¹ Tintan, gbigbọ wiwe yin huhlọn de he nọ gọalọna omẹ Jiwheyẹwhe tọn lẹ nado nọ wiweji. Mẹhe nọ yí adà de wà to lẹndai Jehovah tọn mẹ lẹ dona nọ wiweji to walọyizan-liho. (Hia 1 Kọlintinu lẹ 6:9-11.) Delẹ to mẹhe lẹzun Klistiani nugbo lẹ mẹ ko nọ doalọ to walọ mawé lẹ mẹ taidi galilọ, ayọdide, po zanhẹmẹ to omẹ vijinu dopolọ lẹ ṣẹnṣẹn po mẹ dai. E nọ saba vẹawu nado duto ojlo ylanwiwa tọn ji taun. (Jak. 1:14, 15) Ṣogan, omẹ mọnkọtọn lẹ “ko yin kiklọwé,” bo dohia dọ yé ko basi diọdo he jẹ lẹ to gbẹzan yetọn mẹ nado hẹn homẹ Jiwheyẹwhe tọn hùn. Etẹwẹ nọ gọalọna mẹhe yiwanna Jiwheyẹwhe lẹ nado nọavunte sọta ojlo ylankan lẹ po kọdetọn dagbe po? “Gbigbọ wiwe Jiwheyẹwhe mítọn tọn,” wẹ 1 Kọlintinu lẹ 6:11 dọ. Eyin hiẹ nọ wiweji to walọyizan-liho, enẹ na dohia dọ a na dotẹnmẹ gbigbọ lọ nado yinuwado gbẹzan towe ji.

12. (a) Sọgbe hẹ numimọ Ezekiẹli tọn, nawẹ Jehovah nọ deanana titobasinanu etọn gbọn? (b) Nawẹ hiẹ sọgan dohia dọ a to nuyiwa to kọndopọ mẹ hẹ gbigbọ wiwe gbọn?

¹² Awetọ, Jehovah nọ yí gbigbọ etọn do deanana titobasinanu etọn hlan fie jlo e. To numimọ Ezekiẹli tọn mẹ, adà olọn mẹ tọn titobasinanu Jehovah tọn yin yiyijlẹdo awhànkẹkẹ olọn mẹ tọn de go he to nukọnzindo madoalọte nado hẹn lẹndai Jehovah tọn di. Etẹwẹ nọ zọ́n bọ awhànkẹkẹ lọ do nọ to nukọnzindo yì fie Jehovah jlo? Gbigbọ wiwe wẹ. (Ezek. 1:20, 21) Mì gbọ mí ni hẹn do ayiha mẹ dọ adà awe ji wẹ titobasinanu Jehovah tọn tin te, dopo to olọn mẹ podọ awetọ tin to aigba ji. To whenuena e yindọ gbigbọ wiwe wẹ nọ deanana adà olọn mẹ tọn lọ, nudopolọ wẹ e dona yin gando adà aigba ji tọn go. Eyin hiẹ nọ setonu bosọ nọ yin nugbonọ na anademẹ he a nọ mọyi sọn adà aigba ji titobasinanu Jiwheyẹwhe tọn dè lẹ, enẹ na dohia dọ hiẹ to zọnlinzin afọsu-afọsi hẹ awhànkẹkẹ olọn mẹ tọn Jehovah tọn bosọ to nuyiwa to kọndopọ mẹ hẹ gbigbọ wiwe etọn.—Heb. 13:17.

13, 14. (a) Mẹnu lẹ wẹ Jesu ylọdọ “whẹndo ehe”? (b) Na apajlẹ de he dohia dọ gbigbọ wiwe wẹ nọ gọalọ nado hẹn nugbo Biblu tọn lẹ họnwun dogọ. (Pọ́n apotin lọ “Be Hiẹ to Hihodo Hinhọ́n He to Wunhọ́n Dogọ lọ Ya?”)

¹³ Atọ̀ntọ, gbigbọ wiwe wẹ nọ gọalọ nado hẹn nugbo Biblu tọn lẹ họnwun dogọ. (Howh. 4:18) E ko dẹn bọ “afanumẹ nugbonọ podọ nuyọnẹntọ lọ” ko to linlinnamẹwe ehe yizan taidi asisa tangan he nọ tá hinhọ́n do nugbo Biblu tọn lẹ ji. (Mat. 24:45) Di apajlẹ, lẹnnupọndo nukunnumọjẹnumẹ he mí wá tindo todin gando mẹhe Jesu ylọdọ “whẹndo ehe,” lẹ go ji. (Hia Matiu 24:32-34.) Whẹndo tẹ hodọ wẹ Jesu te? Hosọ lọ “Tintin Tofi Klisti Tọn—Etẹwẹ E Zẹẹmẹdo Na We?” dohia dọ Jesu ma to alọdlẹndo mẹylankan lẹ gba, ṣigba devi etọn he na wá yin dide gbọn gbigbọ wiwe dali lẹ hodọ wẹ e te.a Hodotọ yiamisisadode owhe kanweko tintan whenu Jesu tọn lẹ po egbehe tọn lẹ po wẹ na mọ ohia lọ bo nasọ tunwun zẹẹmẹ etọn go dọ Jesu ‘ko sẹpọ, bo to ohọ̀n ji.’

¹⁴ Etẹwẹ zẹẹmẹ ehe to didohia mí? Dile etlẹ yindọ mí ma sọgan dọ ojlẹ he “whẹndo ehe” na nọgbẹ̀ dẹnsọ taun, e na yọ́n nado hẹn nususu do ayiha mẹ gando hogbe lọ “whẹndo” go. E nọ saba dlẹnalọdo mẹhe tindo owhe voovo bo nọgbẹ̀ to ojlẹ tangan de mẹ lẹ; e ma na dẹn zẹjlẹgo; podọ e na wá opodo. (Eks. 1:6) Eyin mọ wẹ, etẹ dọ wẹ Jesu te to whenuena e dọho gando “whẹndo ehe” go? E họnwun dọ nuhe dọ e te wẹ yindọ mẹyiamisisadode he to ogbẹ̀ whenue ohia lọ jẹ awusọhia ji to 1914 lẹ, po mẹyiamisisadode devo he na mọ bẹjẹeji nukunbibia daho lọ tọn lẹ po, na nọgbẹ̀ to ojlẹ de mẹ dopọ whẹpo mẹyiamisisadode he mọ 1914 lẹpo na vọ̀ sọn aigba ji. Whẹndo enẹ tindo bẹjẹeji, podọ jide tin dọ e na wá opodo. Adà ohia lọ tọn voovo he mọ hẹndi lẹ dohia hezeheze dọ nukunbibia lọ dona ko sẹpọ. Eyin hiẹ yọ́n niyaniya-yinyin ojlẹ he mẹ mí to gbẹnọ te tọn bo to alihọ́, hiẹ na dohia dọ a to hihodo hinhọ́n he to wunhọ́n dogọ lọ po anademẹ gbigbọ wiwe tọn po.—Malku 13:37.

15. Etẹwẹ dohia dọ gbigbọ wiwe wẹ nọ na mí huhlọn nado lá wẹndagbe lọ?

¹⁵ Ẹnẹtọ, gbigbọ wiwe wẹ nọ na mí huhlọn nado lá wẹndagbe lọ. (Owalọ 1:8) Nudevo tẹwẹ na ko gọalọ nado lá wẹndagbe lọ lẹdo aihọn pé? Yí nukun homẹ tọn do pọ́n. Vlavo hiẹ sọgan ko yin dopo to mẹhe nọ kuwinyan dai kavi nọ dibu taun lẹ mẹ bo nọ dọ dọ,‘E na vẹawuna mi nado nọ dọyẹwheho sọn whédegbè jẹ whédegbè!’ Ṣigba todin, hiẹ to mahẹ zohunhun tọn tindo to azọ́n enẹ mẹ.b Kunnudetọ Jehovah tọn susu wẹ ko yí nugbonọ-yinyin do zindonukọn to yẹwhehodidọ mẹ mahopọnna nukundiọsọmẹ kavi homẹkẹn. Gbigbọ wiwe Jiwheyẹwhe tọn kẹdẹ wẹ sọgan na mí huhlọn nado duto aliglọnnamẹnu sinsinyẹn lẹ ji podọ nado wà nuhe go huhlọn mítọn ma pé lẹ. (Mika 3:8; Mat. 17:20) Eyin hiẹ nọ tindo mahẹ gigọ́ to azọ́n yẹwhehodidọ tọn mẹ, e na dohia dọ a to gbekọndopọ hẹ gbigbọ wiwe.

Adà He Gbigbọ Wiwe Na Yiwà to Sọgodo

16. Naegbọn mí sọgan deji dọ Jehovah na basi-hihọ́na omẹ etọn lẹ to nukunbibia daho lọ whenu?

¹⁶ Jehovah na yí gbigbọ wiwe etọn zan to aliho ayidego tọn mẹ nado hẹn lẹndai etọn di to sọgodo. Mì gbọ mí ni lẹnnupọndo whẹho hihọ́-basinamẹ tọn ji whẹ́. Dile mí ko mọ do, Jehovah yí gbigbọ wiwe etọn zan to hohowhenu nado basi-hihọ́na mẹdelẹ podọ na akọta Islaeli tọn blebu. Enẹwutu, mí tindo whẹwhinwhẹ́n lẹpo nado yise dọ e na yí gbigbọ huhlọnnọ dopolọ zan nado basi-hihọ́na omẹ etọn lẹ to nukunbibia daho he to sisẹpọ lọ whenu. Mí ma dona pàhodọ do lehe Jehovah na penukundo mí go do taun to ojlẹ enẹ mẹ ji gba. Kakatimọ, mí sọgan pọ́n sọgodo hlan po jide po, bo yọnẹn dọ Jehovah na yí gbigbọ wiwe etọn do basi-hihọ́na mẹhe yiwanna ẹn lẹ mahopọnna fidepope he yé tin te.—2 Otan. 16:9; Ps. 139:7-12.

17. Nawẹ Jehovah na yí gbigbọ wiwe etọn zan to aihọn yọyọ lọ mẹ gbọn?

¹⁷ Nawẹ Jehovah na yí gbigbọ wiwe etọn zan to aihọn yọyọ he ja lọ mẹ gbọn? Gbigbọ wiwe wẹ na gọalọ nado wleawuna owe-hihá he na yin hùnhùn to ojlẹ enẹ mẹ lẹ. (Osọ. 20:12) Etẹwẹ owe-hihá ehelẹ na bẹhẹn? E họnwun dọ, e na bẹ nubiọtomẹsi gigọ́ Jehovah tọn lẹ na mí to owhe fọtọ́n lọ whenu hẹn. Be hiẹ to jejeji nado gbadopọnna nuhe owe-hihá enẹlẹ na bẹhẹn ya? Apàpà nọ sọ́ mí nado mọ aihọn yọyọ enẹ. E na vẹawu nado dọ lehe gbẹninọ na te do to ojlẹ ayajẹ tọn enẹ mẹ to whenue Jehovah na yí gbigbọ wiwe etọn zan nado hẹn lẹndai etọn na aigba po mẹhe tin to e ji lẹ po di.

18. Etẹwẹ yin gbemima towe?

¹⁸ Mì gbọ mí ni ma wọnji gbede blo dọ lẹndai Jehovah tọn he e dehia vudevude lọ na mọ hẹndi dandan, na gbigbọ wiwe etọn—yèdọ huhlọn he yiaga hugan to wẹkẹ mẹ lọ—wẹ e to yiyizan nado hẹn ẹn di. Lẹndai enẹ gando gowe. Enẹwutu, magbe nado nọ vẹ̀ Jehovah bo biọ gbigbọ wiwe etọn bosọ yinuwa to kọndopọ mẹ hẹ anademẹ gbigbọ lọ tọn. (Luku 11:13) Gbọnmọ dali, hiẹ sọgan tindo todido lọ nado nọgbẹ̀ sọgbe hẹ lẹndai Jehovah tọn na gbẹtọvi lẹ nado nọgbẹ̀—kakadoi to Paladisi mẹ to aigba ji.

[Nudọnamẹ odò tọn]

Be Hiẹ Flin Ya?

• Aliho tẹlẹ mẹ wẹ Jehovah yí gbigbọ wiwe etọn zan te to hohowhenu nado hẹn lẹndai etọn zindonukọn?

• Nawẹ Jehovah to gbigbọ wiwe etọn yizan to egbehe gbọn?

• Nawẹ Jehovah na yí gbigbọ wiwe etọn zan to sọgodo nado hẹn lẹndai etọn di gbọn?

[Apotin to weda 10]

Be Hiẹ to Hihodo Hinhọ́n He to Wunhọ́n Dogọ lọ Ya?

Jehovah gbẹ́ pò to hinhọ́n tá do nugbo Biblu tọn lẹ ji na omẹ etọn lẹ. Etẹwẹ yin delẹ to vọjlado he ko yin bibasi to zinjẹgbonu Atọ̀họ̀-Nuhihọ́ lọ Tọn mẹ lẹ mẹ?

▪ To apajlẹ Jesu tọn de mẹ, nawẹ e do otọ́n hia to aliho dagbe mẹ nado zinnudo jideji gbigbọmẹ tọn ji gbọn? (Mat. 13:33)—15 juillet 2008, weda 19-20.

▪ Whetẹnu wẹ oylọ Klistiani lẹ tọn hlan todido olọn mẹ tọn doalọte?—1^er mai 2007, weda 30-31.

▪ Etẹwẹ e zẹẹmẹdo nado basi sinsẹ̀n hlan Jiwheyẹwhe “to gbigbọ mẹ”? (Joh. 4:24)—15 juillet 2002, weda 15.

▪ Awánu tẹ mẹ wẹ gbẹtọ susugege lọ to sinsẹ̀nzọn wà te? (Osọ. 7:15)—1^er mai 2002, weda 30-31.

▪ Whetẹnu wẹ lẹngbọ lẹ po gbọgbọẹ lẹ po na yin kinklandovo? (Mat. 25:31-33)—1^er novembre 1995, weda 8-18.