Mì Nọ Pọ́n Whẹho lẹ Hlan Dile Jiwheyẹwhe Nọ Wà Do — WESẸDOTẸN INTẸNẸT JI TỌN Watchtower Tọn

Mì Nọ Pọ́n Whẹho lẹ Hlan Dile Jiwheyẹwhe Nọ Wà Do

AZÁN yozònọ owhè ṣádada tọn de wẹ 14 septembre 2002 yin to New York, États-Unis. To gbenẹgbe, gbẹtọgun 6 521 he wá sọn ofi voovo lẹ pli dopọ to Weplọntẹn Patterson tọn po azọ́nwatẹn Kunnudetọ Jehovah tọn lẹ tọn awe devo po to lẹdo lọ mẹ. Yé pli na gbedewema-yíyí klasi 113tọ Wehọmẹ Biblu Pinplọn Watchtower Giliadi tọn. Wehọmẹvi lọ lẹ wá sọn aigba 14 ji bo ko yí osun atọ́n he wayi lẹ zan nado wleawuna sinsẹ̀nzọn mẹdehlan tọn yì otò 19 he mẹ yé yin didohlan lẹ mẹ.

Carey Barber, he tin to owhe 98tọ etọn mẹ bosọ yin Hagbẹ Anademẹtọ Kunnudetọ Jehovah tọn lẹ tọn de, yinuwa taidi azinponọ tito-to-whinnu lọ tọn. E dọ̀n ayidonugo wá diblayi owhe 60 Wehọmẹ Giliadi tọn ji, he ko hẹn omẹ fọtọ́n susu pegan nado tọ́nyi azọ́ndenamẹ mẹdehlan tọn mẹ. Mẹmẹsunnu Barber dọmọ: “E mayin hopàdọ gba dọ kọdetọn dagbe lẹ ko wá sọn azọ́nplọnmẹ dogọ yetọn mẹ. To paa mẹ fọtọ́n kanweko homẹmimiọnnọ lẹ tọn ko klan gbẹzan yetọn do wiwe hlan Jehovah lẹdo aihọn pé bo ko kẹalọyi sinsẹ̀n-bibasi wiwe-ṣeke nugbo lọ, na mẹdehlan heyin azọ́nplọn lẹ ko gọalọna yé wutu.”

Whẹpo yé do wá Giliadi, susu wehọmẹvi lọ lẹ tọn ko do ojlo hia to lizọnyizọn yetọn hinhẹn gblodeji mẹ. Asu po asi po de ko yí hugan owhe dopo zan to ogbè Mandarin tọn pinplọn mẹ nado sọgan jẹ mẹsusu he nọ dó Chine-gbè to lẹdo yetọn mẹ to Canada lẹ dè. Asu po asi po devo jẹ Albanie-gbè plọn ji na yede bo sẹtẹn yì Albanie to godo mẹ nado penukundo ojlo he to jijideji to Biblu mẹ to finẹ go. Wehọmẹvi klasi lọ tọn delẹ wá sọn Hongrie, Guatemala, po République Dominicaine po, to fie yé ko sẹtẹn yì nado sẹ̀n to fie nuhudo sù na Ohó Jiwheyẹwhe tọn plọnmẹtọ dogọ lẹ te.

Todin, whẹpo yé do yì azọ́ndenamẹ yetọn lẹ mẹ to Aflika, Whèzẹtẹn-waji Europe tọn, Ṣẹnṣẹn po Hùwaji Amelika tọn po, gọna Otò Asie tọn lẹ, wehọmẹvi he mọ gbedewema yí lọ lẹpo yin tulina nado hẹn Jiwheyẹwhe do ayiha mẹ bo nọ lẹhlan ẹn to nuhe yé to wiwà lẹpo mẹ.

Mì Nọ Pọ́n Whẹho lẹ Hlan Dile Jiwheyẹwhe Nọ Wà Do

To hodidọ kuavọdonamẹ etọn tọn godo, Mẹmẹsunnu Barber ylọ Maxwell Lloyd, heyin dopo to Wedegbẹ́ Alahọ États-Unis tọn mẹ wá oplò ji. Lloyd dọhodo hosọ lọ ji heyin “Mì Nọ Pọ́n Whẹho Lẹpo Hlan Dile Jiwheyẹwhe Nọ Wà Do.” Mẹmẹsunnu lọ dọ̀n ayidonugo wá apajlẹ Davidi po Jesu, Ovi Jiwheyẹwhe tọn po tọn ji. (1 Samuẹli 24:6; 26:11; Luku 22:42) To finflin wehọmẹvi lọ lẹ dọ Biblu pinplọn osun atọ́n tọn yetọn ko plọnazọn yé nado nọ pọ́n onú lẹ hlan dile Jiwheyẹwhe nọ wà do godo, hodọtọ lọ kanse dọ: “Eyin mì to anadena plọnmẹ Biblu lẹ hẹ gbẹtọ lẹ to azọ́ndenamẹ yọyọ mìtọn mẹ, be mì na nọ gọalọna yé nado lẹnayihamẹpọn do whẹho lẹ ji dile Jiwheyẹwhe nọ wà do ya?” Podọ gando ayinamẹ nina mẹdevo lẹ go, e na avase wehọmẹvi lọ lẹ dọmọ: “Mì ma nọ dọ, ‘To pọndohlan ṣie mẹ, yẹn lẹndọ . . . ’ blo. Kakatimọ, mì gọalọna yé nado yọ́n nuhe yin pọndohlan Jiwheyẹwhe tọn. Eyin mì wà ehe, mì na yin dona nujọnu tọn na mẹhe mì to gbẹdohẹ to azọ́ndenamẹ mìtọn mẹ lẹ.”

Mẹhe bọdego to tito-to-whinnu lọ ji wẹ Gerrit Lösch, heyin Hagbẹ Anademẹtọ devo. To hodidọ do hosọ lọ “Yẹn Tin Hẹ We” ji mẹ, e dọ̀n ayidonugo wá nujijọ susu ji to whenuena Jehovah dọna devizọnwatọ nugbonọ etọn lẹ dọ, ‘Yẹn tin hẹ we’ ji. (Gẹnẹsisi 26:23, 24; 28:15; Jọṣua 1:5; Jẹlemia 1:7, 8) To egbehe, mí sọgan tindo jidide dopolọ to Jehovah mẹ eyin mí gbọṣi nugbonọ-yinyin mẹ. Mẹmẹsunnu Lösch dọmọ: “Be a nọ to nuhà dọ a ma na mọ mẹhe a na plọn Biblu hẹ lẹ wẹ ya? Flin, Jehovah dọmọ, ‘Yẹn tin hẹ we.’ Be a nọ to nuhà dọ a ma na tindo agbasanu susu wẹ ya? Jehovah dọmọ: ‘Yẹn ma to na jo we dai gbede, kavi gbẹ́ we gba.’ ” (Heblu lẹ 13:5) Mẹmẹsunnu Lösch dotana gbọn finflin wehọmẹvi lẹ dali dọ Jesu dopagbe nado tin hẹ hodotọ nugbonọ etọn lẹ to azọ́n gbẹtọ lẹ hinhẹn zun devi tọn mẹ.—Matiu 28:20.

“Be A Na Lùn Whlepọn Sinsinyẹn lọ Tọ́n Ya?” wẹ yin hosọ Lawrence Bowen heyin mẹplọntọ Giliadi tọn tọn. E dọ dọ na whẹho heyin finfọndote to Edẹni mẹ lẹ wutu, mẹhe jlo na ze yede jo hlan Jehovah mlẹnmlẹn lẹ ko to pipehẹ awusinyẹnnamẹnu lẹ podọ, whlepọn sinsinyẹn to whedelẹnu. E na tuli wehọmẹvi lọ lẹ nado hodo apajlẹ Jesu tọn, mẹhe mọ hihọ́ nujọnu tọn yí gbọn ginganjẹ Jehovah go mlẹnmlẹn po alọkikẹyi whlepọn sinsinyẹn he Jehovah na dotẹnmẹ nado hẹn tonusise Ovi etọn tọn pegan lẹ po dali. (Heblu lẹ 5:8, 9) Mí sọgan yí Jehovah jlẹdo mẹhe nọ klọ́ sika de go, he nọ yí miyọ́n he sọgbe lọ do de dihó lẹ sẹ. Nugbo wẹ dọ, yise heyin whiwhlepọn de nọ wleawu hihọ́ daho tọn hugan sika heyin kinkọ̀n de. Etẹwutu? “Na yise heyin kiklọwé de sọgan doakọnna whlepọn depope,” wẹ Mẹmẹsunnu Bowen dọ, “podọ e nọ hẹn mí pegan nado doakọnnanu kakajẹ ‘opodo.’ ”—Matiu 24:13.

Mark Noumair, heyin mẹplọntọ Giliadi tọn devo kanse dọ: “Be Hiẹ Na Yin Mẹyiwanna de Ya?” Hosọ etọn sinai do hodidọ 1 Samuẹli 2:26 tọn lẹ ji, he dohia dọ Samuẹli “tin to nukundagbe mẹ to OKLUNỌ dè podọ to gbẹtọ lẹ dè.” To dogbigbapọnna apajlẹ Samuẹli tọn godo, Mẹmẹsunnu Noumair, he yí hugan owhe 10 zan to sinsẹ̀nzọn mẹdehlan tọn mẹ to Aflika, dọmọ: “Mìlọsu sọgan lẹzun mẹyiwanna taun lẹ to nukun Jiwheyẹwhe tọn lẹ mẹ gbọn titẹdo azọ́n he Jiwheyẹwhe ko de na mì go po nugbonọ-yinyin po dali. E ko de azọ́n họakuẹ mẹdehlan tọn na mì.” Enẹgodo Mẹmẹsunnu Noumair na tuli mẹhe to gbedewema yí lẹ nado pọ́n azọ́ndenamẹ yetọn lẹ hlan taidi azọngban wiwe de he Jiwheyẹwhe ze do alọmẹ na yé bo tindo pọndohlan Jiwheyẹwhe tọn to azọ́ndenamẹ yetọn lẹ hinhẹndi mẹ.

To whenuena yé tin to Giliadi, wehọmẹvi lọ lẹ tindo dotẹnmẹ hundote susu to sẹfifo lẹ nado má “azọ́n huhlọnnọ Jiwheyẹwhe tọn” he tin to Biblu mẹ lẹ hẹ mẹhe tin to lẹdo lọ mẹ lẹ. (Owalọ lẹ 2:11) Na nugbo tọn, yé penugo nado dọho gando onú ehelẹ go to ogbè voovo ao mẹ. Wallace Liverance, heyin mẹplọntọ Giliadi tọn devo, kanhose pipli wehọmẹvi lẹ tọn de he dọ numimọ yetọn lẹ to hosọ lọ glọ heyin “ ‘Azọ́n Huhlọnnọ Jiwheyẹwhe Tọn Lẹ’ Dozolanmẹna Gbẹtọ lẹ Nado Yinuwa.” E dọmọ: “Gbigbọ whàn mẹhe tin to abò aga tọn mẹ to azán Pẹntikọsti tọn gbè lẹ nado dọho gando ‘azọ́n huhlọnnọ Jiwheyẹwhe tọn’ lẹ go. Gbigbọ enẹ dopolọ to azọ́nwa to egbehe to devizọnwatọ nugbonọ Jiwheyẹwhe tọn lẹpo mẹ.” Mẹdelẹ tlẹ ko yin whinwhàn nado plọn ogbè yọyọ lẹ nado sọgan dekunnuna mẹsusu dogọ.

Ayinamẹ Yọn-na-Yizan lẹ do Whẹho lẹ Pinpọnhlan Dile Jiwheyẹwhe Nọ Wà Do Ji

Bọdo hodidọ bẹjẹeji tọn lẹ go, Gary Breaux po William Young po, heyin hagbẹ whẹndo Bẹtẹli États-Unis tọn lẹ kanhose wedegbẹ́ alahọ tọn voovo he wá sọn aigba he ji mẹdehlan lẹ to devizọnwa te todin lẹ gọna asu po asi po de he ko yí owhe 41 zan to sinsẹ̀nzọn mẹdehlan tọn mẹ. Ayidonugo dopo heyin nina wẹ yindọ: “Mẹhe ma nọ jlonú hugan lẹ wẹ nọ dẹn to azọ́ndenamẹ yetọn mẹ. Yé nọ ze ayidonugo do nuhewutu yé wá finẹ ji. Yé nọ yọnẹn dọ nado dọyẹwheho wẹndagbe lọ tọn bo gọalọna gbẹtọ lẹ nado yọ́n Jehovah wutu wẹ yé wá.”

David Splane he sọ yin dopo to Hagbẹ Anademẹtọ lẹ mẹ, dotana tito-to-whinnu lọ gbọn hodidọ do “Fie Mì to Yìyì Ma Dẹn Hugan!” ji dali. Etẹ dọ wẹ e te, to whenuena e yindọ adà dindẹn aihọn lọ tọn mẹ wẹ gbedewema-yitọ 46 lẹ to yinyin didohlan todin? E basi zẹẹmẹ dọmọ: “Mahopọnna fie mì tin te to aigba ji, mì na tin to ohọ̀ Jiwheyẹwhe tọn mẹ tẹgbẹ̀ dile e na dẹnsọ bọ mì to nugbonọ yin.” Mọwẹ, fidepope he Klistiani nugbonọ lẹpo tin te to aihọn lọ mẹ, yé to sinsẹ̀nzọnwa to apadewhe tẹmpli, kavi ohọ̀ daho gbigbọmẹ Jiwheyẹwhe tọn mẹ, he wá aimẹ to baptẹm Jesu tọn whenu to owhe kanweko tintan mẹ. (Heblu lẹ 9:9) Lehe e miọnhomẹ na mẹplidopọ lẹ sọ nado yọnẹn dọ Jehovah ma dẹn do devizọnwatọ nugbonọ etọn he to aigba ji lẹpo! Kẹdẹdile Jehovah tindo ojlo to Jesu mẹ to whenuena e tin to aigba ji do, mọwẹ E tindo ojlo to mímẹpo po sinsẹ̀nzọn mítọn hlan Ẹn po mẹ do, mahopọnna fie mí sọgan tin te. Enẹwutu to whẹho sinsẹ̀n-bibasi tọn lẹ mẹ, mí ma dẹn do míde podọ do Jehovah po Jesu po gba.

To whenuena nudọdomẹ he wá sọn adà aihọn lọ tọn lẹpo mẹ ko yin hihia, bọ azọ́ndenamẹ lẹ yin lilá, bọ wekanhlanmẹ klasi lọ tọn he dopẹ́ na azọ́nplọnmẹ he yé mọyi to Giliadi ko yin hihia godo, azinponọ lọ hẹn tito-to-whinnu lọ wá tadona dagbe de kọ̀n. E na tuli mẹdehlan yọyọ lọ lẹ nado zindonukọn to azọ́n dagbe yetọn mẹ bo to ayajẹ to sinsẹ̀nzọn Jehovah tọn mẹ.—Filippinu lẹ 3:1.

[Apotin to weda 23]

SỌHA NULINLẸN KLASI TỌN

Sọha otò he mẹ yé wá sọn tọn: 14

Sọha otò he mẹ yé yin didohlan tọn: 19

Sọha wehọmẹvi lẹ tọn 46

Madozẹnzẹn owhe mẹhodido tọn: 35.0

Madozẹnzẹn owhe to nugbo mẹ tọn: 17.2

Madozẹnzẹn owhe lizọnyizọn whenu-gigọ́ tọn: 13.7

[Yẹdide to weda 24]

Gbedewema-Yíyí Klasi 113tọ Wehọmẹ Biblu Pinplọn Watchtower Giliadi Tọn

To yinkọ he to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.