Dọnsẹpọ Jiwheyẹwhe

‘Yè Na Hẹn Ahọluduta Towe Lodo Kakadoi’

2 Samuẹli 7:1-16

TO WHENUHO gbẹtọvi tọn mẹ, gandutọ susu ko yin didesẹ sọn ogántẹn yetọn mẹ. Mẹdelẹ ko yin didesẹ gbọn vòbibla dali, to whenuena mẹdevo lẹ ko yin hinhẹn po huhlọn po nado jo ogántẹn yetọn do. Etẹwẹ dogbọn Jesu Klisti, yèdọ Ahọlu Ahọluduta olọn mẹ tọn Jiwheyẹwhe tọn dali? Be nudepope sọgan glọnalina ẹn ma nado dugán taidi Ahọlu dide Jiwheyẹwhe tọn wẹ ya? Mí sọgan mọ gblọndo lọ to ohó he Jehovah dọ to hohowhenu na Ahọlu Davidi mẹ to 2 Samuẹli weta 7 mẹ.

To bẹjẹeji weta lọ tọn, mí mọdọ Davidi to nuhà, na ewọ he yin ahọlu de, yèdọ gbẹtọvi de poun, nọ nọ̀ họ̀nmẹ whanpẹnọ de, to whenuena aki Jiwheyẹwhe tọn tin to gòhọ pẹvi tata de mẹ.a Davidi do ojlo etọn hia nado gbá ohọ̀ he jẹ de, kavi tẹmpli de na Jehovah. (Wefọ 2) Ṣigba, e ma yin Davidi wẹ na gbá ohọ̀ lọ. Gbọn yẹwhegán Natani gblamẹ, Jehovah dọna Davidi dọ ovi etọn wẹ na gbá tẹmpli lọ.—Wefọ 4, 5, 12, 13.

Ojlo ahundopo tọn Davidi tọn whàn Jehovah bọ e sọ yọ́n pinpẹn etọn. Nado suahọ mẹdezejo Davidi tọn podọ to kọndopọ mẹ hẹ lẹndai Etọn, Jiwheyẹwhe basi alẹnu de hẹ Davidi dọ Emi na de mẹde sọn hukan gandudu Davidi tọn mẹ he na dugán kakadoi. Natani dọ opagbe vonọtaun Jiwheyẹwhe tọn na Davidi dọmọ: ‘Owhé towe po ahọludu towe po yè na hẹn ẹn lí kakadoi to nukọn towe: yè na hẹn ahọluduta towe lodo kakadoi.’ (Wefọ 16) Mẹnu wẹ yin Gudutọ tẹgbẹ tọn alẹnu ehe tọn—yèdọ Mẹhe na dugán kakadoi lọ?—Psalm 89:20, 29, 34-36.

Jesu Nazalẹti tọn yin dopo to kúnkan Davidi tọn lẹ mẹ. To whenue angẹli de to jiji Jesu tọn lá, e dọmọ: “Jehovah Jiwheyẹwhe na yí ofìn Davidi otọ́ etọn tọn na ẹn, ewọ nasọ duahọlu do owhé Jakọbu tọn ji kakadoi, podọ ahọluduta etọn ma na wá opodo.” (Luku 1:32, 33) Enẹwutu, alẹnu he Jiwheyẹwhe basi hẹ Davidi mọ hẹndi to Jesu Klisti mẹ. Gbọnmọ dali, opagbe vonọtaun Jiwheyẹwhe tọn dọ Jesu na dugán kakadoi wẹ na ẹn jlọjẹ lọ nado dugán, e ma yin vòbibla gbẹtọvi lẹ tọn gba. Podọ e jẹ dọ mí ni flindọ opagbe Jiwheyẹwhe tọn lẹ nọ mọ hẹndi janwẹ.—Isaia 55:10, 11.

Onú họakuẹ awe wẹ mí sọgan plọn sọn 2 Samuẹli weta 7 mẹ. Tintan, mí sọgan deji dọ nudepope podọ mẹdepope ma sọgan glọnalina Jesu Klisti nado dugán. Enẹwutu, mí sọgan tindo nujikudo dọ ewọ na hẹn lẹndai he wutu e to gandu di, enẹ wẹ nado hẹn ojlo Jiwheyẹwhe tọn yin wiwà to gigọ́ mẹ to aigba ji kẹdẹdi to olọn mẹ.—Matiu 6:9, 10.

Awetọ, kandai lọ plọn mí nude he whànmẹ gando Jehovah go. Flindọ Jehovah mọ linlẹn ahun mẹ tọn Davidi tọn bo yọ́n pinpẹn etọn. Tulinamẹnu wẹ e yin nado yọnẹn dọ Jehovah nọ yọ́n pinpẹn ojlo he mí tindo nado ze míde jo to sinsẹ̀n-bibasi etọn mẹ tọn. To ninọmẹ delẹ mẹ, onú delẹ tin he nọ zẹ̀ nugopipe mítọn go, taidi agbasamalo kavi yọnhowhe, bọ enẹ sọgan glọnalina mí nado wà nuhe ahun mítọn jlo lẹpo to sinsẹ̀nzọn Jiwheyẹwhe tọn mẹ. Eyin mọ wẹ, mì dike mí ni flindọ Jehovah nọ mọ linlẹn ahun mẹ tọn mítọn lẹ he gọ́ na ojlo lọ nado ze míde jo to sinsẹ̀n-bibasi etọn mẹ. Podọ mì gbọ ehe ni nọ miọnhomẹna mí.

[Nudọnamẹ odò tọn]