Gbẹ́ Linlẹn Agọ̀ lẹ Dai!

TO WHENUENA adán to tọgbo Job gbò badabada, họntọn etọn atọ̀n lẹ, Elifazi, Bildadi, po Zofali po dla ẹ pọ́n. Yé wá nado vẹawu i podọ nado miọnhomẹna ẹn. (Job 2:11) Mẹhe nuyiwadomẹji etọn sinyẹn hugan bosọ sọgan ko whẹ́n mẹho hugan to yé mẹ wẹ Elifazi. Ewọ wẹ dọho jẹnukọn bosọ dọho hugan to yé mẹ. Linlẹn nankọtọn wẹ sọawuhia to adà atọ̀n hodidọ Elifazi tọn lẹpo mẹ?

To numimọ jiawu he ewọ mọ de finflin mẹ, Elifazi dọmọ: “Gbọfufu [kavi gbigbọ] de jugbọn oji e wayi; ofún agbasalan ṣie go tọn jlọ nọte. E ṣite ṣúdúdú, ṣigba yẹn ma sọgan fọyẹ̀ awusọhia etọn tọn gba; ojlẹmọ de tin to nukun ṣie lẹ nukọn: yẹn sè ogbè abọẹ de, yẹn sọ sè ogbè de.” (Job 4:15, 16) Gbigbọ nankọtọn wẹ yinuwado lẹnpọn Elifazi tọn ji? Hogbe whẹgbledomẹ tọn he bọdego lẹ dohia po nujikudo po dọ gbigbọ lọ ma yin dopo to angẹli dodonọ Jiwheyẹwhe tọn lẹ mẹ gba. (Job 4:17, 18) Nudida gbigbọnọ ylankan de wẹ. Eyin e ma yinmọ, naegbọn Jehovah na wọhẹ Elifazi po hagbẹ etọn awe lẹ po dọ yé dolalo? (Job 42:7) Mọwẹ, aovi de ko yinuwado lẹnpọn Elifazi tọn ji. Hodidọ etọn lẹ do lẹnpọn agọ̀ hia.

Linlẹn tẹlẹ wẹ sọgan yin didesọn nuhe Elifazi dọ lẹ mẹ? Naegbọn e do yin nujọnu dọ mí ni gbẹ́ linlẹn agọ̀ dai? Podọ afọdide tẹlẹ wẹ mí sọgan ze nado nọavunte sọta ẹ?

“E Ma Yí Tudido de do Devi Etọn lẹ mẹ Gba”

To adà atọ̀n hodidọ Elifazi tọn lẹpo mẹ, e do linlẹn lọ hia dọ Jiwheyẹwhe fiẹ sọmọ bọ nuhe devizọnwatọ etọn lẹ nọ wà depope ma nọ yọ́n to nukun etọn mẹ. “Doayi e go, e ma yí tudido [kavi yise] de do devi etọn lẹ mẹ gba,” wẹ Elifazi dọna Job, “podọ angẹli lẹ wẹ e sọ yí ylanwa do dowhẹ̀.” (Job 4:18) To enẹgodo Elifazi dọ gando Jiwheyẹwhe go dọmọ: “Ewọ ma tudido [kavi yise] de do to omẹ wiwe etọn lẹ mẹ gba; mọwẹ olọn lẹ ma yin wiwe to nukun etọn mẹ gba.” (Job 15:15) Podọ e kanse dọ: “Be homẹhun de tin hlan Ganhunupo, dọ hiẹ yin dodonọ?” (Job 22:3) Bildadi kọngbedopọ hẹ pọndohlan ehe, na e dọmọ: “Yèdọ osun ma tindo hinhọ́n de, podọ sunwhlẹvu lẹ masọ yin wewe to nukun [Jiwheyẹwhe tọn] mẹ gba.”—Job 25:5.

Mí dona tin to aṣeji ma nado dike linlẹn mọnkọtọn lẹ ni yinuwado mí ji. E sọgan zọ́n bọ mí na lẹndọ Jiwheyẹwhe nọ biọ nususu zẹjlẹgo sọn mí si. Pọndohlan ehe nọ bẹpla haṣinṣan pẹkipẹki he mí tindo hẹ Jehovah. Humọ, eyin mí joawuna linlẹn mọnkọtọn, nawẹ mí na yinuwa gbọn eyin mí mọ mẹplọnlọdomẹgo he jẹ yí? Kakati nado kẹalọyi wọhẹ lọ po whiwhẹ po, ayiha mítọn sọgan “gblehomẹ do OKLUNỌ go,” bo tlẹ sọgan hẹn mí nado dokẹ̀n ẹn. (Howhinwhẹn lẹ 19:3) Nugbajẹmẹji gbigbọmẹ tọn nankọtọn die enẹ na yin!

“Be Gbẹtọ de Sọgan Yin Alenọ Hlan Jiwheyẹwhe?”

Linlẹn lọ dọ Jiwheyẹwhe nọ biọ nususu zẹjlẹgo to mẹsi tindo kanṣiṣa pẹkipẹki hẹ pọndohlan lọ dọ ewọ nọ pọ́n gbẹtọvi lẹ hlan taidi nuvọ́nọ. Adà atọ̀ntọ hodidọ Elifazi tọn bẹ kanbiọ lọ hẹn dọ: “Be gbẹtọ de sọgan yin alenọ hlan Jiwheyẹwhe? Nugbo ewọ he yin nuyọnẹntọ yin alenọ hlan ede.” (Job 22:2) Nuhe dọ Elifazi te wẹ yindọ gbẹtọ ma yọn-na-yizan na Jiwheyẹwhe. Mọdopolọ, Bildadi lọsu dọnnu dọ: “Nawẹ gbẹtọ sọgan yin nugbonọ to Jiwheyẹwhe nukọn do? Kavi nawẹ ewọ he yè ji sọn yọnnu de mẹ sọgan yin wiwe do?” (Job 25:4) Sọgbe hẹ pọndohlan enẹ, etẹwẹ na hẹn Job, he yin gbẹtọ tata de, nado lẹn gbede dọ ewọ tindo teninọ dodo tọn to Jiwheyẹwhe nukọn?

To egbehe, numọtolanmẹ agọ̀ he mẹdelẹ tindo gando yedelẹ go nọ gbidikọna yé. Ninọmẹ lẹ taidi oplọn he yin mimọyi to whẹndo mẹ, kọgbidinamẹnu gbẹ̀mẹ tọn lẹ, kavi oyà wangbẹna akọ̀ kavi hẹnnu tọn jiji sọgan ko yidogọna ehe. Ṣigba Satani po aovi etọn lẹ po sọ nọ mọ awuvivi to obu didona gbẹtọ lẹ mẹ. Eyin yé sọgan yinuwado mẹde ji nado lẹndọ nuhe ewọ nọ wà depope ma yọ́n to nukun Jiwheyẹwhe Ganhunupotọ lọ tọn mẹ, e na bọawu dọ mẹlọ ni jai jẹ omọ̀ flumẹjijẹ tọn mẹ. To nukọn mẹ, omẹ mọnkọtọn sọgan buali, bo tlẹ yì sọn Jiwheyẹwhe ogbẹ̀nọ lọ dè.—Heblu lẹ 2:1; 3:12.

Mẹhowhe po nuhahun agbasalilo tọn lẹ po nọ de nugopipe mítọn pò. E sọgan taidi dọ nuhe mí wà nado nọgodona Ahọluduta lọ whè tlala to yijlẹdo nuhe mí nọ wà dai to whenuena mí gbẹ́ pò to jọja mẹ bo dohuhlọn, bọ agbasa mítọn ló ganji go. Lehe e yin nujọnu nado yọnẹn dọ Satani po aovi etọn lẹ po wẹ jlo dọ mí ni tindo numọtolanmẹ lọ dọ Jiwheyẹwhe ma yọ́n pinpẹn nuhe mí to wiwà lẹ tọn do sọ! Mí dona gbẹ́ linlẹn mọnkọtọn dai.

Lehe Mí Sọgan Gbẹ́ Linlẹn Agọ̀ lẹ Dai Do

Mahopọnna oyà he Satani Lẹgba hẹnwa Job ji, e dọmọ: “Kaka yẹn [nado] kú yẹn ma na de walọpipe ṣie sọn dè e gba.” (Job 27:5) Na Job yiwanna Jiwheyẹwhe wutu, e magbe nado hẹn tenọgli etọn go mahopọnna nudepope he sọgan jọ, podọ e kúdo gbemima etọn ji. Onú titengbe dopo niyẹn he sọgan gọalọna mí nado gbẹ́ linlẹn agọ̀ lẹ dai. Mí dona mọnukunnujẹ owanyi Jiwheyẹwhe tọn mẹ ganji bo yọ́n pinpẹn etọn po ahun lẹpo po. Mí sọ dona hẹn owanyi mítọn na ẹn siso dogọ. Mí sọgan wà ehe eyin mí nọ plọn Ohó Jiwheyẹwhe tọn to gbesisọmẹ bo nọ lẹnayihamẹpọn to odẹ̀ mẹ do nuhe mí plọn lẹ ji.

Di apajlẹ, Johanu 3:16 dọmọ: “Jiwheyẹwhe yiwanna aihọn sọmọ bọ e yí Ovi detọ́n etọn dopo akàn namẹ.” Jehovah tindo owanyi he siso na aihọn gbẹtọvi tọn, podọ aliho he mẹ e ko yinuwa hẹ gbẹtọvi lẹ te kakajẹ din do owanyi enẹ hia. Ayihamẹlinlẹnpọn do apajlẹ hohowhenu tọn lẹ ji dona yidogọna pinpẹn-nutọn-yinyọnẹn mítọn na Jehovah bo hẹn owanyi he mí tindo na ẹn siso dogọ, bosọ gbọnmọ dali gọalọna mí nado gbẹ́ linlẹn agọ̀ lẹ dai.

Lẹnnupọndo aliho he mẹ Jehovah yinuwa hẹ Ablaham te ji to whenuena vasudo Sọdọmi po Gọmọla po tọn to unklẹn. Ablaham kanhose Jehovah whla ṣinatọ̀n gando whẹdida Etọn go. Jehovah ma do homẹgble hia whla dopo tata gba. Kakatimọ, gblọndo etọn vọ́ jide na Ablaham bo miọnhomẹna ẹn. (Gẹnẹsisi 18:22-33) To whenuena Jiwheyẹwhe whlẹn Lọti po whẹndo etọn po sọn Sọdọmi godo, Lọti biọgbè nado họnyi tòdaho he tin to yakẹ de mẹ kakati nado họnyi osó lẹ ji. Jehovah yigbe dọ: “Pọ́n, yẹn ko kẹalọyi we gbọn onú he tọn dali ga, dọ yẹn ma na gbà otò lọ he hiẹ dọho etọn sudo.” (Gẹnẹsisi 19:18-22) Be kandai ehelẹ do Jehovah hia nado yin gandutọ fifiẹtọ, kanylantọ, aṣẹ glanglan panamẹtọ de ya? Lala. Yé do e hia nado yin omẹ he nkọ ewọ yin na taun tọn—yèdọ Nupojipetọ owanyinọ, homẹdagbenọ, lẹblanunọ, he nọ hò mẹtọn pọ́n.

To Islaeli hohowhenu tọn mẹ, apajlẹ Aalọn, Davidi, po Manassẹ po tọn jẹagọdo linlẹn lọ dọ Jiwheyẹwhe yin aklọ̀n-dintọ, he gbẹtọ depope ma yọn-na-yizan na. Owhẹ̀ ylanwiwa sinsinyẹn atọ̀n tọn wẹ Aalọn hù. E basi oyìnvu sika tọn, kọnawudopọ hẹ nọviyọnnu etọn Miliami to homọdọdo Mose go mẹ, bosọ gboawupo nado klan Jiwheyẹwhe do wiwe bo pagigona ẹn to Mẹliba. Etomọṣo, Jehovah mọ jẹhẹnu dagbe lẹ to ewọ mẹ bo jo e do nado to sinsẹ̀nzọnwa zọnmii taidi yẹwhenọ daho kakajẹ okú etọn whenu.—Eksọdusi 32:3, 4; Osọha lẹ 12:1, 2; 20:9-13.

Ahọlu Davidi wà ylando sinsinyẹn lẹ to gandudu etọn whenu. Ehelẹ bẹ ayọdide, sébibla nado sọ̀n ohùn homẹvọnọ tọn dai, podọ mẹhihia he jẹagọdo osẹ́n hẹn. Etomọṣo, Jehovah doayi lẹnvọjọ Davidi tọn go bo yin nugbonọ hlan alẹnu Ahọluduta lọ tọn gbọn dotẹnmẹ nina ẹn nado wadevizọn taidi ahọlu kakajẹ okú etọn whenu dali.—2 Samuẹli 12:9; 1 Otannugbo lẹ 21:1-7.

Ahọlu Juda tọn Manassẹ dó agbà lẹ ai na Baali, hẹn visunnu etọn lẹ jugbọn miyọ́n mẹ, nọgodona afinyọnnuwiwa, bo tùn agbà sinsẹ̀n lalo tọn lẹ do awánu tẹmpli lọ tọn lẹ mẹ. Etomọṣo, to whenuena e lẹnvọjọ sọn ahun mẹ wá godo, Jehovah jona ẹn, bo tún in dote sọn kanlinmọgbenu, bosọ gọ̀ gánzinpo etọn jo na ẹn. (2 Otannugbo lẹ 33:1-13) Be nuyiwa Jiwheyẹwhe he mẹde ma yọn-na-yizan na tọn wẹ ehelẹ yin ya? Paali!

Whẹsadokọnamẹtọ Lalonọ lọ Lọsu Huwhẹ̀

Mí dona mọnukunnujẹemẹ dọ Satani wẹ tindo jijọ he e sọalọakọ́n dọ Jehovah tindo enẹlẹ. Satani yin fifiẹtọ bosọ nọ biọ nususu zẹjlẹgo to mẹsi. Aṣa ovivu lẹ yíyí do sanvọ́ tọn he tindo kanṣiṣa hẹ sinsẹ̀n-bibasi lalo to hohowhenu do ehe hia hezeheze. Islaelivi atẹṣitọ lẹ nọ mẹ̀n visunnu po viyọnnu yetọn lẹ po to miyọ́n mẹ—yèdọ nude he ma ko wá ayiha Jehovah tọn mẹ gbede.—Jẹlemia 7:31.

Satani wẹ yin aklọ̀n-dintọ, e ma yin Jehovah gba. Osọhia 12:10 dlẹnalọdo Satani taidi “mẹslẹtọ mẹmẹsunnu mítọn lẹ tọn . . . , he nọ to owhẹ̀ yetọn jẹ to Jiwheyẹwhe mítọn nukọn to okle po ozán po.” To alọ devo mẹ, psalm-kantọ lọ jihàn gando Jehovah go dọmọ: “[Jehovah] E, mẹnu wẹ sọgan ṣite, eyin hiẹ, OKLUNỌ na payiha ylando go? Ṣigba jona tin to dè we.”—Psalm 130:3, 4.

Whenue Linlẹn Agọ̀ lẹ Ma Na Tin Ba

Kọgbọ nankọtọn die he nudida angẹli gbigbọnọ lẹ na ko tindo to whenuena Satani Lẹgba po aovi etọn lẹ po yin yinyan sọn olọn mẹ! (Osọhia 12:7-9) To enẹgodo, gbigbọ ylankan ehelẹ ma sọgan yinuwado nuwiwa whẹndo angẹli olọn mẹ tọn Jehovah tọn lẹ tọn ji to aliho depope mẹ ba.—Daniẹli 10:13.

Whenu pẹẹde dogọ todin mẹhe tin to aigba ji lẹpo na jaya. To madẹnmẹ, angẹli de he tindo họnhungan odò mapote tọn bo jẹte sọn olọn mẹ ja odò bosọ hẹn kọgàn daho de to alọ mẹ na blá Satani po aovi etọn lẹ po bo dlan yé do odò mapote nudemayiwà tọn lọ mẹ. (Osọhia 20:1-3) Kọgbọ nankọtọn die mí na mọ to whenuena enẹ na jọ!

Todin whẹ́, mí dona tin to aṣeji sọta linlẹn agọ̀ lẹ. Whedepopenu he mí mọ dọ linlẹn agọ̀ lẹ to lìnlìn biọ ayiha mítọn mẹ, mí dona nọavunte sọta yé gbọn ayiha mítọn zizedo owanyi Jehovah tọn ji dali. Eyin mí wàmọ, ‘jijọho Jiwheyẹwhe tọn he hú linlẹn lẹpo na whlá ayiha mítọn po huhlọn nulẹnpọn tọn mítọn lẹ po.’—Filippinu lẹ 4:6, 7.

[Yẹdide to weda 26]

Job gbẹ́ linlẹn agọ̀ lẹ dai

[Yẹdide to weda 28]

Lọti mọ dọ Nupojipetọ he nọ hò mẹtọn pọ́n wẹ Jehovah yin