Jehovah, Jiwheyẹwhe de He “Wleawu Nado Jona”
“Hiẹ, OKLUNỌ, yin dagbe, bosọ nọ wleawu nado jona.”—PSALM 86:5.
1. Agbàn pinpẹn tẹwẹ Ahọlu Davidi didá, podọ nawẹ e mọ homẹmimiọn na ahún etọn heyin tuklado gbọn?
AHỌLU DAVIDI Islaeli hohowhenu tọn yọ́n lehe ayihadawhẹnamẹnu whẹhuhu tọn sọgan yin agbàn pinpẹn do. E wlan dọmọ: “Oylanwiwa ṣie ṣinyọ́n ota na mi; di agbàn pinpẹn, e pẹn hugan mi. Yẹn daku, yè sọ finyọ́n mi gbahugbahu: Yẹn ko to gbigbó na winwẹn ayiha ṣie tọn wutu.” (Psalm 38:4, 8) Ṣigba, Davidi mọ homẹmimiọn na ahún magbọjẹnọ etọn. E yọnẹn dọ dile etlẹ yindọ Jiwheyẹwhe nọ gbẹwanna ylando, e ma nọ gbẹwanna ylanwatọ lọ gba—eyin omẹ lọ lẹnvọjọ bosọ gbẹ́ aliho ylandonọ tọn etọn dai na nugbo tọn. (Psalm 32:5; 103:3) Po yise gigọ́ po to ojlo tintindo Jiwheyẹwhe tọn mẹ nado dlẹnkan lẹblanu tọn hlan mẹhe lẹnvọjọ lẹ, Davidi dọmọ: “Hiẹ, OKLUNỌ, yin dagbe, bosọ nọ wleawu nado jona.”—Psalm 86:5.
2, 3. (a) To whenuena mí wà ylando, agbàn pinpẹn tẹwẹ mí sọgan didá taidi kọdetọn etọn, podọ naegbọn ehe do yin alenu de? (b) Owù tẹwẹ tin to ‘yinyin titlọ’ gbọn whẹhuhu dali mẹ? (c) Jidide tẹwẹ Biblu na mí dogbọn ojlonọ-yinyin Jehovah tọn nado jona dali?
2 To whenuena mí wà ylando, mí lọsu sọgan hẹn agbàn pinpẹn ayihadawhẹnamẹnu he tin to awufiẹsa mẹ de tọn taidi kọdetọn de. Numọtolanmẹ awubla tọn ehe yin nuhe sọgbe, bo tlẹ yin alenu. E sọgan whàn mí nado ze afọdide dagbe lẹ nado basi vọjlado na nuṣiwa mítọn lẹ. Nalete, Klistiani delẹ ko tlọ pete gbọn whẹhuhu dali. Ahún whẹgbledo-mẹdetiti tọn yetọn sọgan tẹkudeji dọ Jiwheyẹwhe ma na jona yé to gigọ́ mẹ gba, mahopọnna lehe yé sọgan lẹnvọjọ sọ. “Numọtolanmẹ budonamẹ tọn de wẹ e yin to whenuena hiẹ lẹndọ Jehovah ma sọgan yiwanna we bà,” wẹ mẹmẹyọnnu de, to nulinlẹnpọn do nuṣiwa he e ko basi wayi de ji dọ. Etlẹ yin to whenuena e ko lẹnvọjọ bosọ kẹalọyi ayinamẹ alọgọnamẹ tọn sọn mẹho agun tọn lẹ dè godo, e gbẹ́ to numọtolanmẹ mẹhe ma jẹ na jona Jiwheyẹwhe tọn tindo. E basi zẹẹmẹ dọmọ: “Azán dopo ma nọ juwayi he yẹn ma nọ biọ jona sọn Jehovah dè gba.” Eyin mí yin “titlọ” gbọn whẹhuhu dali, Satani sọgan tẹnpọn nado hẹn mí jogbe, nado mọtolanmẹ dọ mí ma jẹ na sinsẹ̀n-bibasi Jehovah tọn ba.—2 Kọlintinu lẹ 2:5-7, 11.
3 Ṣigba enẹ mayin lehe Jehovah nọ pọ́n whẹho lẹ hlan gbọn gba! Ohó etọn na jide mí dọ to whenuena mí do lẹnvọjọ nujọnu tọn sọn ahún mẹ wá hia, Jehovah nọ jlo, mọwẹ nọ wleawu, nado jona. (Howhinwhẹn lẹ 28:13) Enẹwutu eyin jona Jiwheyẹwhe tọn ko taidi nuhe yè ma sọgan jẹ e kọ̀n gbede hlan we, vlavo nuhe nuhudo tin na wẹ nukunnumọjẹnumẹ nuhewutu po lehe e nọ jona mẹ do tọn.
Naegbọn Jehovah Do “Wleawu Nado Jona”?
4. Etẹwẹ Jehovah nọ flin gando ninọmẹ mítọn go, podọ nawẹ ehe nọ yinuwa do lehe e nọ yinuwa hẹ mí do ji gbọn?
4 Mí hia dọmọ: “Dile whezẹtẹn dẹn do whèyihọ do, dẹn sọmọ wẹ ewọ do ze sẹ́nmẹjẹ mítọn yì dẹn sọn mí dè. Taidile otọ́ de nọ blawuna ovi etọn lẹ do, mọwẹ OKLUNỌ nọ blawuna yé he dibusi i lẹ do.” Naegbọn Jehovah do yin whinwhan nado do lẹblanu hia? Wefọ he bọdego na gblọndo dọmọ: “Na ewọ yọ́n didá mítọn; e sọ flin dọ okọgudu wẹ mí.” (Psalm 103:12-14) Mọwẹ, Jehovah ma wọnji dọ nudida gbẹ̀te okọgudu tọn wẹ mí yin gba, he tindo madogán lẹ, kavi awugbopo lẹ, taidi kọdetọn mapenọ-yinyin tọn. Hodidọ lọ dọ ewọ yọ́n “didá mítọn” flin mí dọ Biblu yí Jehovah jlẹdo zẹ́nmẹtọ de go podọ míwlẹ do alọnuzọn he e basi lẹ go.a (Jẹlemia 18:2-6) Zẹ́nmẹtọ de nọ yinuwa hẹ nuyizan okò tọn etọn lẹ gligli ṣogan po sọwhiwhe po, nọ yin ahunmẹduna dogbọn ninọmẹ yetọn dali to whepoponu. Mọdopolọ, ga, Jehovah, Zẹ́nmẹtọ Daho lọ, nọ hẹn nuyiwa etọn lẹ hẹ mí sọgbe hẹ ninọmẹ madogán ylandonọ tọn mítọn.—Yijlẹdo 2 Kọlintinu lẹ 4:7 go.
5. Nawẹ owe Lomunu lẹ basi zẹẹmẹ nuyiwadomẹji huhlọnnọ ylando tọn do agbasa mape mítọn ji gbọn?
5 Jehovah mọnukunnujẹ lehe ylando tindo huhlọn do sọ mẹ. Owe wiwe lẹ basi zẹẹmẹ ylando tọn taidi huhlọn daho de he hẹn gbẹtọ do ofẹn okú tọn etọn mẹ. Na taun tọn nawẹ nugohinhẹn ylando tọn yin nuhe sinyẹn sọ? To owe Lomunu lẹ tọn mẹ, apọsteli Paulu heyin gbigbọdo lọ basi zẹẹmẹ ehe tọn to hogbe yẹdenanu tọn lẹ mẹ dọmọ: Mí tin “to ylando glọ,” taidi awhànfuntọ lẹ to nukọntọ yetọn glọ (Lomunu lẹ 3:9); e ko “duahọlu” do gbẹtọvi ji taidi ahọlu de (Lomunu lẹ 5:21); e “nọnọ̀,” kavi to ‘ninọ,’ mí mẹ (Lomunu lẹ 7:17, 20); “osẹ́n” etọn tin to azọ́nji to whepoponu to mí mẹ, yèdọ to tintẹnpọn nado deanana nuyiwa mítọn. (Lomunu lẹ 7:23, 25) Avunhiho sinsinyẹn nankọtọn die mí tindo nado nọavunte sọta nugohinhẹn huhlọnnọ ylando tọn do agbasa mape mítọn ji!—Lomunu lẹ 7:21, 24.
6. Nawẹ Jehovah nọ pọ́n mẹhe dín lẹblanu etọn po ahún awubla tọn lẹ po gbọn?
6 Enẹwutu, Jiwheyẹwhe lẹblanunọ mítọn yọnẹn dọ tonusise mlẹnmlẹn ma yọnbasi na mí gba, mahopọnna lehe ahún mítọn sọgan jlo nado na hlan ẹn sọ. (1 Ahọlu lẹ 8:46) Po owanyi po e na jide mí dọ eyin mí dín lẹblanu otọ́-yinyin tọn etọn po ahún he nọ blawu do ylando ji de po, ewọ na dlẹnkan jona tọn. Psalmkantọ Davidi dọmọ: “Avọ́ Jiwheyẹwhe tọn wẹ otù gbigbà; ayiha gbigbà finfinyọn, Jiwheyẹwhe E, hiẹ ma to na vlẹ gba.” (Psalm 51:17) Jehovah ma na gbẹ́, kavi tùn, ayiha gbigbà heyin finfinyọn gbọn agbàn pinpẹn numọtolanmẹ whẹhuhu tọn dali dogodo gbede gba. Lehe enẹ basi zẹẹmẹ awuwiwle Jehovah tọn nado jonamẹ to aliho whanpẹnọ de mẹ do sọ!
7. Naegbọn mí ma dona yí nukunpẹvi do pọ́n lẹblanu Jiwheyẹwhe tọn?
7 Ṣigba, be ehe zẹẹmẹdo, dọ mí sọgan yí nukunpẹvi do pọ́n lẹblanu Jiwheyẹwhe tọn, bo yí ninọmẹ ylando tọn mítọn zan taidi whẹwhinwhẹ́n de na oylan wẹ ya? E mayin mọ paali! Jehovah ma nọ yin anadena gbọn numọtolanmẹ tata dali gba. Lẹblanu etọn tindo dogbo. E ma na jona mẹhe yí tasinsinyẹn do to nukọnzindo to kanyinylan mẹ, yèdọ ylanwiwa sọn ojlo mẹ matin lẹnvọjọ gba. (Heblu lẹ 10:26-31) To alọ devo mẹ, to whenuena e mọ ahun ‘gbigbà po finfinyọn po,’ ewọ nọ “wleawu nado jona.” (Howhinwhẹn lẹ 17:3) Mì gbọ mí ni gbadopọnna hodidọ zẹẹmẹ basinanu tọn he Biblu yizan nado basi zẹẹmẹ mlẹnmlẹn-yinyin jona sọn olọn mẹ wá tọn delẹ.
Nawẹ Jehovah nọ Jonamẹ Mlẹnmlẹn Gbọn?
8. Etẹwẹ Jehovah nọ wà, eyin e jo ylando mítọn lẹ na mí, podọ nugandomẹgo tẹwẹ ehe dona tindo do mí ji?
8 Ahọlu Davidi he lẹnvọjọ dọmọ: “Yẹn yigbe tasinyẹn ṣie tọn hlan we, oylanwiwa ṣie wẹ yẹn ma sọ yí whlá. Yẹn dọmọ, yẹn na yigbe oylan hoho ṣie tọn hlan OKLUNỌ: Hiẹ sọ jo oylanwiwa ylando ṣie tọn na mi.” (Psalm 32:5, wekun flinflin lẹ yin mítọn) Hogbe lọ ‘jona’ yin lẹdogbedevomẹ hogbe Heblu tọn de he na taun tọn zẹẹmẹdo “ze daga,” “doakọnna, hẹn.” Yizan etọn tofi dlẹnalọdo ‘nado dè whẹhuhu, ylando, osẹ́nhẹngba sẹ̀.’ Enẹwutu Jehovah ze ylanwiwa Davidi tọn lẹ daga bosọ ze yé yì, dile e te do. (Yijlẹdo Levitiku 16:20-22 go.) Matin ayihaawe ehe dè numọtolanmẹ whẹhuhu tọn he Davidi ko to hinhẹn pò. (Yijlẹdo Psalm 32:3 go.) Mílọsu sọgan tindo jidide gigọ́ to Jiwheyẹwhe he nọ jo ylanwa mẹhe dín jona etọn to dodonu yise yetọn to avọ́sinsan ofligọ Jesu Klisti tọn ji mẹ. (Matiu 20:28; yijlẹdo Isaia 53:12 go.) Ylando mẹhe tọn Jehovah gbọnmọ dali ze daga bosọ nọ ze yì lẹ ma tindo nuhudo nado to nukọnzindo to agbàn pinpẹn numọtolanmẹ whẹhuhu tọn hẹn na ylando he ko juwayi lẹ tọn gba.
9. Etẹwẹ yin zẹẹmẹ hogbe Jesu tọn lẹ heyin: “Jó ahọ́ mítọn lẹ na mí” tọn?
9 Jesu yí haṣinṣan akuẹ-yannamẹtọ po ahọ́tọnọ lẹ tọn po zan nado basi dohia lehe Jehovah nọ jonamẹ do tọn. Di apajlẹ, Jesu dotuhomẹna mí nado hodẹ̀ dọmọ: “Jo ahọ́ mítọn lẹ na mí.” (Matiu 6:12) Gbọnmọ dali Jesu yí “ylando” jlẹdo “ahọ́” go. (Luku 11:4) To whenuena mí wà ylando, mí nọ lẹzun “ahọ́tọnọ” hlan Jehovah. Hogbe nuyiwa tọn Glẹki tọn heyin lilẹdo “jonamẹ” sọgan zẹẹmẹdo “nado gbọ ni yì, nado wọnji, ahọ́ de, gbọn ma biọ ẹ ba dali.” To linlẹn de mẹ, to whenuena Jehovah jonamẹ, e nọ zẹhù do ahọ́ lọ he na ko yin hihia dokọna mí ji. Gbọnmọ dali ylandonọ he lẹnvọjọ lẹ sọgan mọ homẹmimiọn yí. Jehovah ma na biọ ahọ́ he ewọ ko zẹhudeji pọ́n gbede ba!—Psalm 32:1, 2; yijlẹdo Matiu 18:23-35 go.
10, 11. (a) Etẹwẹ yin yẹdenanu heyin didohia gbọn hodidọ lọ ‘nido yin súnsún sẹ̀,’ heyin mimọ to Owalọ lẹ 3:19 mẹ dali? (b) Nawẹ mlẹnmlẹn-yinyin jona Jehovah tọn yin didohia gbọn?
10 To Owalọ lẹ 3:19 mẹ, Biblu yí hogbe yẹhiadonu tọn devo zan nado basi zẹẹmẹ jona Jiwheyẹwhe tọn: “Mì lẹnvọjọ na enẹwutu, na yè ni diọ mì, na yè nido súnsún ylando mìtọn sẹ̀.” Hodidọ lọ ‘nado súnsún sẹ̀’ basi zẹẹmẹ hogbe nuyiwa tọn Glẹki tọn de he, to whenuena e yin yiyizan to yẹhiadonu liho, sọgan zẹẹmẹdo nado “súnsún sẹ̀, matin ba, zẹhudeji kavi vasudo.” Sọgbe hẹ weyọnẹntọ delẹ, linlẹn heyin didohia lọ yin nukinkan de súnsúnsún sẹ̀ tọn. Nawẹ ehe yọnbasi gbọn? Wekansin he nọ saba yin yiyizan to ojlẹ hohowhenu tọn lẹ mẹ yin nuṣakadopọ he bẹ akán, gọmú, po osin po hẹn. To wekinkan po wekansin enẹlẹ po godo tlolo, mẹde sọgan yí tèkan fifá bo súnsún nukinkan lọ sẹ̀.
11 Tofi mí mọ zẹẹmẹ whanpẹnọ mlẹnmlẹn-yinyin jona Jehovah tọn. Eyin ewọ jo ylando mítọn lẹ na mí, e nọ taidi dọ ewọ yí tèkan de bo súnsún yé sẹ̀. Mí ma dona to budi dọ ewọ na hia ylando mọnkọtọn lẹ dokọna mí to sọgodo gba, na Biblu do nudevo hia dogbọn lẹblanu Jehovah tọn dali he jẹ na ayidego na nugbo tọn: Eyin ewọ jonamẹ, e nọ wọnji e go!
“Ylando Yetọn Wẹ Yẹn Ma Sọ to Na Flin bà Gba”
12. To whenuena Biblu dọ dọ Jehovah nọ wọnji ylando mítọn lẹ go, be e zẹẹmẹdo dọ ewọ ma penugo nado flin yé bà wẹ, podọ naegbọn gblọndo towe do yin mọ?
12 Gbọn yẹwhegan Jẹlemia dali, Jehovah dopagbe gando mẹhe tin to alẹnu yọyọ lọ mẹ lẹ go dọmọ: “Yẹn na jona oylanwa yetọn, ylando yetọn wẹ yẹn ma sọ to na flin bà gba.” (Jẹlemia 31:34) Be ehe zẹẹmẹdo dọ eyin Jehovah jonamẹ e ma sọ nọ penugo nado flin ylando lẹ ba wẹ? E vẹawu dọ enẹ ni yin whẹho lọ. Biblu dọna mí gando ylando mẹsusu he Jehovah jona lẹ tọn go, po Davidi tọn po ga. (2 Samuẹli 11:1-17; 12:1-13) E họnwun dọ Jehovah gbẹsọ yọ́n nuṣiwa he yé basi lẹ, mọdopolọ wẹ míwlẹ lọsu dona basi do. Kandai ylando yetọn lẹ tọn, po lẹnvọjọ yetọn lẹ tọn po gọna jona Jiwheyẹwhe tọn, ko yin sisẹdo na alè mítọn. (Lomunu lẹ 15:4) To whelọnu lo, etẹ dọ wẹ Biblu te to whenuena e dọ dọ Jehovah ma nọ “flin” ylando mẹhe e jona lẹ tọn?
13. (a) Etẹwẹ yin yiyidogọ zẹẹmẹ hogbe nuyiwa Heblu tọn lọ heyin didiọ do “Yẹn nasọ flin”? (b) To whenuena Jehovah dọmọ, “Yẹn ma na flin ylando yetọn bà,” jide etẹ tọn wẹ e to nina mí?
13 Hogbe nuyiwa tọn Heblu tọn heyin lilẹdo “Yẹn na flin” zẹẹmẹdo hugan nado flin nuhe ko juwayi poun. Sọgbe hẹ Theological Wordbook of the Old Testament, e bẹ “nugandomẹgo dogọ zize afọdide nuyiwa he sọgbe tọn” hẹn. Enẹwutu to linlẹn ehe mẹ, nado “flin” ylando bẹ afọdide nuyiwa jẹagọdo ylanwatọ lẹ hẹn. To whenuena yẹwhegan Hosea dọ gando Islaelivi tasinyẹntọ lẹ go dọmọ, “Ewọ [Jehovah] na flin oylanwa yetọn,” yẹwhegan lọ to didọ poun dọ Jehovah na yinuwa jẹagọdo yé na lẹnvọjọ matindo yetọn. Gbọnmọ dali, pipotọ wefọ lọ tọn yidogọ dọmọ: “Ewọ nasọ dla ylando yetọn lẹ pọ́n.” (Hosea 9:9) To alọ devo mẹ, to whenuena Jehovah dọmọ, “Ylando yetọn wẹ yẹn ma sọ to na flin ba gba,” e to jide na mí dọ eyin emi jona ylanwatọ he lẹnvọjọ de, emi ma to na yinuwa jẹagọdo e na ylando enẹlẹ to ojlẹ sọgodo tọn mẹ bà gba. (Ezekiẹli 18:21, 22) Gbọnmọ dali e wọnji to linlẹn lọ mẹ dọ e ma nọ hẹn ylando mítọn lẹ wá oflin mẹ gbọzangbọzan nado sawhẹdokọna mí kavi sayana mí pludopludo gba. Jehovah gbọnmọ dali ze apajlẹ whanpẹnọ de dai na mí nado hodo to nuyiwa mítọn hẹ mẹdevo lẹ mẹ. To whenuena gbèmanọpọ lẹ fọ́n, e na yọ́n hugan ma nado nọ flin nuṣiwa he ko juwayi bọ hiẹ ko yigbe wayi nado jona lẹ.
Etẹwẹ Dogbọn Kọdetọn lẹ Dali?
14. Naegbọn jonamẹ ma do zẹẹmẹdo dọ ylandonọ he lẹnvọjọ de ko vò sọn aliho ylankan etọn tọn lẹpo mẹ gba?
14 Be awuwiwle Jehovah tọn nado jonamẹ zẹẹmẹdo dọ ylanwatọ he lẹnvọjọ de vò sọn kọdetọn nuṣiwa etọn tọn lẹpo mẹ wẹ? Paali. Mí ma sọgan wà ylando matin yasanamẹ gba. Paulu wlan dọmọ: “Nudepope gbẹtọ do, enẹ wẹ e na gbẹ̀n ga.” (Galatianu lẹ 6:7) Mí sọgan pannukọn kọdetọn nuyiwa kavi nuhahun mítọn delẹ tọn, ṣigba to kandindlẹnna jona godo, Jehovah ma nọ hẹn yajiji wá mí ji gba. To whenuena nuhahun lẹ fọ́n, Klistiani de ma dona tindo numọtolanmẹ dọ, ‘Vlavo Jehovah wẹ to yasana mi na ylando he ko wayi lẹ wutu’ gba. (Yijlẹdo Jakobu 1:13 go.) To alọ devo mẹ, Jehovah ma nọ basi hihọ́ na mí sọn nugandomẹgo nuyiwa nuṣiwa mítọn tọn lẹpo si gba. Gbẹdai, hòmimọ he yè ma jlo, asamẹzọ̀n, jidide kavi sisi hinhẹn bú—ehe lẹpo sọgan yin kọdetọn blawu ylando tọn lẹ, podọ Jehovah ma na whlá mí sọn yé mẹ gba. Flin dọ dile etlẹ yindọ e jona Davidi na ylando etọn lẹ to kọndopọmẹ hẹ Bati-ṣeba po Ulia po do sọ, Jehovah ma basi hihọ́ na Davidi sọn kọdetọn nugbajẹmẹji he bọdego lẹ tọn mẹ gba.—2 Samuẹli 12:9-14.
15, 16. Nawẹ osẹ́n lọ heyin kinkandai to Levitiku 6:1-7 mẹ yin alenu na mẹhe go nujọdo po whẹhutọ lọ po gbọn?
15 Ylando mítọn lẹ sọgan tindo kọdetọn devo lẹ ga. Di apajlẹ, gbadopọnna linlin he tin to Levitiku, weta 6 mẹ. Tofi Osẹ́n Mose Tọn dọhodo ninọmẹ lọ ji eyin mẹde basi nuṣiwa sinsinyẹn gbọn huhlọn do yí nutindo Islaelivi hatọ de tọn lẹ gbọn ajojijẹ, alọslonamẹ, kavi mẹhodu dali. To enẹgodo ylanwatọ lọ mọ́n dọ emi ma huwhẹ, yèdọ tlẹ ze ede do owù whiwhle lalo tọn mẹ. Whẹho he matindo kunnudenu sọn adà awe lẹpo mẹ wẹ ehe eyin. Ṣigba, to nukọn mẹ, eyin ayihadawhẹnamẹnu ylanwatọ lọ tọn wá dotukla ẹ bọ ewọ yigbe ylando etọn tọn. Nado mọ jona Jiwheyẹwhe tọn yí, e dona wà onú atọ̀n devo lẹ dogọ: gọ̀ nuhe e ko yí lọ jó, suahọ 20 to kanweko ji na mẹhe go nujọdo lọ, bo na agbò dopo na nunina whẹhuhu tọn. Enẹgodo, osẹ́n lọ dọmọ: “Yẹwhenọ lọ bo na basi ovẹsè na ẹn to OKLUNỌ lọ nukọn, ewọ nasọ yin jijona.”—Levitiku 6:1-7; yijlẹdo Matiu 5:23, 24 go.
16 Osẹ́n ehe yin nuwleawudainanu lẹblanu tọn sọn Jiwheyẹwhe dè. E nọ na alè mẹhe yè ṣinuwado lọ, nutindo mẹhe tọn yin gigọ jó podọ mẹhe matin ayihaawe nọ tindo numọtolanmẹ kọgbọ tọn to whenuena whẹhutọ lọ wá yigbe na ylando etọn to godo mẹ. To ojlẹ dopolọ mẹ, osẹ́n lọ nọ na alè mẹhe ayihadawhẹnamẹnu etọn whan ẹn nado yigbe whẹhuhu etọn tọn bo basi vọjlado nuṣiwa etọn tọn to godo mẹ. Na nugbo tọn, eyin ewọ gbẹ́ nado wà mọ, jona depope ma na tin na ẹn sọn Jiwheyẹwhe dè gba.
17. Eyin ylando mítọn gbleawuna mẹdevo lẹ, etẹwẹ Jehovah nọ donukun mí nado wà?
17 Dile etlẹ yindọ mí ma tin to Osẹ́n Mose Tọn glọ, e nọ na mí wuntuntun họakuẹ do linlẹn Jehovah tọn ji, gọna nujinọtedo etọn do jona ji. (Kọlọsinu lẹ 2:13, 14) To whenuena mẹdevo lẹ ko yin awugblena kavi yin nuyiwadeji agọ̀ gbọn ylando mítọn lẹ dali, homẹ Jehovah tọn nọ hùn eyin mí wà nuhe go mí pé nado ‘jla nuṣiwa lọ do.’ (2 Kọlintinu lẹ 7:11) Ehe bẹ ylando mítọn yinyọnẹn, gbeyiyi na whẹhuhu mítọn, podọ etlẹ yin nado vẹvẹ na mẹhe yè ṣinuwa do lọ hẹn. Whenẹnu mí sọgan biọ jona sọn Jehovah dè to dodonu avọ́sinsan Jesu tọn ji bo nasọ tindo numimọ pọngbọ ayihadawhẹnamẹnu wiwe de tọn po jidide lọ po dọ mí ko yin jijona gbọn Jiwheyẹwhe dali.—Heblu lẹ 10:21, 22.
18. Mẹplọnlọ tẹwẹ sọgan zọnpọ hẹ jona Jehovah tọn?
18 Taidi mẹjitọ wanyinọ depope, Jehovah sọgan na jona to pọmẹ po mẹplọnlọ jẹ obá de mẹ po. (Howhinwhẹn lẹ 3:11, 12) Klistiani he lẹnvọjọ de sọgan hẹn azọngban devizọnwiwa taidi mẹho, devizọnwatọ lizọnyizọnwiwa tọn, kavi gbehosọnalitọ tọn de bu. E sọgan vẹ́ na ẹn nado hẹn lẹblanulọkẹyi heyin nuhọakuẹ hlan ẹn lẹ bú na ojlẹ de. Ṣigba, mẹplọnlọ mọnkọtọn, ma zẹẹmẹdo dọ e ko hẹn nukundagbe Jehovah tọn bú kavi dọ Jehovah ko dọ̀n jona do godo gba. To yidogọ mẹ, mí dona flin dọ mẹplọnlọ sọn Jehovah dè yin dohia owanyi etọn tọn hlan mí. Alọkikẹyi i po yiyi i do yizan mẹ po yin na dagbe mítọn podọ sọgan planmẹ sọyi ogbẹ̀ madopodo mẹ.—Heblu lẹ 12:5-11.
19, 20. (a) Eyin hiẹ ko wà ylando, naegbọn hiẹ ma dona tindo numọtolanmẹ dọ hiẹ ma sọgan mọ lẹblanu Jehovah tọn? (b) Etẹwẹ na yin hodọdeji to hosọ he ja lọ mẹ?
19 Lehe e yin kọfanamẹnu do sọ nado yọnẹn dọ mí to Jiwheyẹwhe de he “wleawu nado jona” sẹ̀n! Jehovah nọ mọnu zẹ̀ ylando po nuṣiwa mítọn lẹ po go. (Psalm 130:3, 4) E nọ yọ́n nuhe tin to ahún mítọn lẹ mẹ. Eyin hiẹ tindo numọtolanmẹ dọ ahún towe yin gbigbà bosọ yin finfinyọn na ylando he ko juwayi lẹ tọn wutu, ma wá tadona lọ kọ̀n dọ hiẹ ma sọgan jẹ lẹblanu Jehovah tọn kọ̀n blo. Mahopọnna nuṣiwa he hiẹ sọgan ko basi lẹ, eyin hiẹ ko lẹnvọjọ na nugbo tọn, bo ko ze afọdide lẹ nado jlọ nuṣiwa lọ, bosọ hodẹ̀ vivẹ́ na jona Jehovah tọn to dodonu hùnsọndai Jesu tọn ji, hiẹ sọgan tindo jidide gigọ́ dọ ohó 1 Johanu 1:9 tọn lẹ gando go we he dọmọ: “Eyin mí yigbe ylando mítọn lẹ tọn, nugbonọ, dodonọ wẹ ewọ nado jo ylando mítọn lẹ na mí, podọ nado klọ́ mí sọn mawadodo lẹpo mẹ.”
20 Biblu na tuli mí nado hodo apajlẹ jonamẹ Jehovah tọn to nuyiwa mítọn lẹ hẹ ode awetọ mẹ. Ṣigba, obá tẹ mẹ wẹ mí sọgan yin nukundo nado jona bosọ wọnji jẹ to whenuena mẹdevo lẹ wà ylando do mí? Ehe na yin hodọdeji to hosọ he bọdego lọ mẹ.
[Nudọnamẹ Odò Tọn]
a Po awuvivi po, hogbe Heblu tọn lọ heyin lilẹdogbedevomẹ do “didá mítọn” yin yiyizan gando nuyizan okò tọn lẹ heyin awuwlena gbọn zẹ́nmẹtọ de dali.—Isaia 29:16.
Nawẹ Hiẹ Na Na Gblọndo Gbọn?
◻ Naegbọn Jehovah do “wleawu nado jona” mẹ?
◻ Nawẹ Biblu basi zẹẹmẹ mlẹnmlẹn-yinyin jona Jehovah tọn gbọn?
◻ Eyin Jehovah jona mẹ, to linlẹn tẹ mẹ wẹ e nọ wọnji te?
◻ Etẹwẹ Jehovah nọ donukun dọ mí ni wà eyin mẹdevo lẹ ko yin awugblena gbọn ylando mítọn lẹ dali?
[Yẹdide to weda 23]
Eyin mẹdevo lẹ ko yin awugblena gbọn ylando mítọn lẹ dali, Jehovah nọ donukun dọ mí ni basi vọjlado lẹ