Mẹnu Wẹ Jiwheyẹwhe?

Diblayin to whenuho gbẹtọvi lẹ tọn blebu mẹ wẹ yé ko basi sinsẹ̀n hlan yẹwhe po yẹwhe-yọnnu voovo lẹ po. Amọ́, Biblu dọho gando yẹwhe dopo go he “klo hugan yẹwhe devo lẹpo,” enẹ wẹ Jiwheyẹwhe. (2 Otànnugbo lẹ 2:5) Mẹnu wẹ ewọ? Podọ etẹwẹ hẹn ẹn nado klohugan yẹwhe devo lẹpo he gbẹtọ lẹ nọ sẹ̀n? To nupinplọn ehe mẹ, a na mọ lehe Jiwheyẹwhe jlo dọ a ni yọ́n ewọ do.

1. Nawẹ Jiwheyẹwhe nọ yin, podọ etẹwẹ dohia nugbo dọ e jlo dọ mí ni yọ́n yinkọ etọn?

Jiwheyẹwhe do omẹ nankọ he ewọ yin hia mí to Biblu mẹ. E dọmọ: “Yẹn wẹ Jehovah. Yinkọ ṣie niyẹn.” (Hia Isaia 42:5, 8.) Yinkọ lọ “Jehovah” yin lẹdogbedevomẹ yinkọ Heblugbe tọn de tọn he gán zẹẹmẹdo “E Nọ Hẹn Nado Lẹzun.” Jehovah jlo dọ mí ni yọ́n yinkọ emitọn. (Eksọdusi 3:15) Nawẹ mí wagbọn do yọ́n enẹ taun? Ewọ hẹn ẹn diun dọ yinkọ etọn sọawuhia to Biblu mẹ hugan whla 7 000!a Mẹhe yin “Jiwheyẹwhe nugbo lọ to olọn mẹ aga podọ to aigba ji to odò” kẹdẹ wẹ tindo yinkọ lọ Jehovah to ota.—Deutelonomi 4:39.

2. Etẹwẹ Biblu plọn mí gando Jehovah go?

Biblu dọ dọ to yẹwhe he gbẹtọ lẹ nọ sẹ̀n lẹpo mẹ, Jehovah wẹ yin Jiwheyẹwhe nugbo dopo akàn lọ. Etẹwutu? Whẹwhinwhẹ́n susu wẹ tin. Jehovah tindo aṣẹpipa daho hugan, podọ ewọ dopo kẹdẹ wẹ yin “Gigogán to aigba lẹpo ji.” (Hia Salmu lẹ 83:18.) Ewọ wẹ “Ganhunupotọ lọ,” na e dohuhlọn bo gán wà nudepope he jlo e. Ewọ wẹ “dá nulẹpo,” yèdọ wẹkẹ lọ gọna nuhe to aigba ji lẹpo. (Osọhia 4:8, 11) To vogbingbọn mẹ na mẹdevo depope, Jehovah ma do bẹjẹeji kavi vivọnu, podọ ewọ na tin kakadoi.—Salmu lẹ 90:2.

3. Jiwheyẹwhe tindo tẹnmẹ-yinkọ susu, amọ́ yinkọ dopo wẹ e do

Nado mọ vogbingbọn he to tẹnmẹ-yinkọ mẹde tọn po yinkọ etọn titi po ṣẹnṣẹn, hò VIDEO lọ, enẹgodo dọhodo kanbiọ ehe ji:

VIDEO: Tẹnmẹ-Yinkọ Susu, Amọ́ Yinkọ Dopo (0:41)

• Vogbingbọn tẹwẹ tin to tẹnmẹ-yinkọ de, taidi “Oklunọ” po yinkọ jọnun de po ṣẹnṣẹn?

Biblu dohia dọ gbẹtọ lẹ nọ sẹ̀n yẹwhe po oklunọ susu lẹ po. Hia Salmu lẹ 136:1-3, enẹgodo dọhodo kanbiọ ehe ji:

• Mẹnu wẹ yin “Jiwheyẹwhe yẹwhe lẹ tọn” podọ “Oklunọ oklunọ lẹ tọn”?

4. Jehovah jlo dọ a ni yọ́n yinkọ emitọn bo nọ yí i zan

VIDEO: Be Jiwheyẹwhe Tindo Yinkọ de Ya?—Adà Kleun De (3:11)

• Be a lẹndọ Jehovah jlo dọ mí ni yọ́n yinkọ emitọn ya? Naegbọn a do lẹnmọ?

Jehovah jlo dọ gbẹtọ lẹ ni nọ yí yinkọ etọn zan. Hia Lomunu lẹ 10:13, enẹgodo dọhodo kanbiọ ehelẹ ji:

• Nawẹ yinkọ Jiwheyẹwhe tọn lọ, Jehovah yiyizan yin nujọnu sọ?

• Nawẹ e nọ ṣí na we, to whenue mẹde flin yinkọ towe bo yí i do ylọ we?

• Nawẹ a lẹndọ e nọ ṣí na Jehovah, eyin mí yí yinkọ etọn do ylọ ẹ?

5. Jehovah jlo dọ a ni yin họntọn emitọn

VIDEO: Lehe N’Dín Jiwheyẹwhe Nugbo lọ Gbọn (8:18)

• To video lọ mẹ, nawẹ yinkọ Jiwheyẹwhe tọn he Soten wá yọnẹn yinuwadeji sisosiso gbọn?

To paa mẹ, yè nọ yọ́n yinkọ mẹde tọn whẹpo do nọ jihọntọn hẹ ẹ. Hia Jakọbu 4:8a, enẹgodo dọhodo kanbiọ ehelẹ ji:

• Etẹwẹ Jehovah to bibiọ to asi we nado wà?

• Eyin a yọ́n yinkọ Jiwheyẹwhe tọn bosọ nọ yí i zan, nawẹ enẹ gán hẹn we zun họntọn etọn dogọ gbọn?

BLADOPỌ

Jehovah wẹ yin yinkọ Jiwheyẹwhe nugbo dopo akàn lọ tọn. Ewọ jlo dọ mí ni yọ́n yinkọ enẹ, bosọ nọ yí i zan, ehe gán zọ́n bọ mí na jihọntọn hẹ ẹ.

Dogbapọn

• Nawẹ Jehovah gbọnvona yẹwhe devo lẹ he mẹlẹ nọ sẹ̀n gbọn?

• Naegbọn mí dona nọ yí yinkọ Jiwheyẹwhe tọn zan?

• Etẹwẹ dohia dọ Jehovah jlo dọ mí ni jihọntọn hẹ emi?

PỌ́N NUDỌNAMẸ DEVO LẸ

Gbadopọnna whẹwhinwhẹ́n dolido atọ́n delẹ he dohia dọ Jiwheyẹwhe tin nugbonugbo.

“Be Jiwheyẹwhe Tin Ya?” (Hosọ Intẹnẹt ji tọn)

Pọ́n nuhewutu e sọgbe hẹ lẹnpọn dagbe nado yise dọ Jiwheyẹwhe ma do bẹjẹeji.

“Mẹnu Wẹ Dá Jiwheyẹwhe?” (Atọ̀họ̀-Nuhihọ́ lọ Tọn, octobre- décembre 2014 tọn)

Plọnnu gando nuhewutu mí dona yí yinkọ Jiwheyẹwhe tọn zan go, eyin mí ma tlẹ yọ́n lehe e nọ yin hihia do to hohowhenu.

“Mẹnu Wẹ Yin Jehovah?” (Hosọ Intẹnẹt ji tọn)

Be dandan wẹ dọ mí ni nọ yí yinkọ tangan de do ylọ Jiwheyẹwhe ya? Pọ́n nuhewutu mí sọgan dọ dọ yinkọ mẹdetiti tọn dopo gee wẹ e tindo.

“Yinkọ Nẹmu Wẹ Jiwheyẹwhe Tindo?” (Hosọ Intẹnẹt ji tọn)