Nawẹ Sinsẹ̀n-Bibasi Mítọn Sọgan Hẹn Homẹ Jiwheyẹwhe Tọn Hùn Gbọn?

Dile mí dọ do to nupinplọn he jẹnukọn mẹ, e ma yin sinsẹ̀n lẹpo wẹ nọ hẹn homẹ Jiwheyẹwhe tọn hùn. Ṣigba, mí sọgan basi sinsẹ̀n hlan Mẹdatọ mítọn to aliho he nọ hẹn homẹ etọn hùn mẹ. “Wunmẹ sinsẹ̀n-bibasi tọn [kavi sinsẹ̀n]” tẹwẹ nọ hẹn homẹ etọn hùn? (Jakọbu 1:27, po nudọnamẹ odò tọn po) Pọ́n nuhe Biblu plọnmẹ.

1. Etẹ ji wẹ sinsẹ̀n-bibasi mítọn dona sinai do?

Sinsẹ̀n-bibasi mítọn dona sinai do Biblu ji. Jesu dọna Jiwheyẹwhe dọmọ: “Ohó towe wẹ nugbo.” (Johanu 17:17) Sinsẹ̀n delẹ nọ gbẹkọ nugbo he tin to Ohó gbọdo Jiwheyẹwhe tọn, yèdọ Biblu mẹ go. Yé nọ yí nuplọnmẹ po aṣa gbẹtọ tọn lẹ po do diọtẹnna ẹn. Amọ́, homẹ Jehovah tọn ma nọ hùn do mẹhe nọ “gbẹ́ gbedide Jiwheyẹwhe tọn dai” lẹ go. (Hia Malku 7:9.) To alọ devo mẹ, mí nọ hẹn Jiwheyẹwhe jaya eyin mí tẹdo Biblu go, bo nọ hodo ayinamẹ etọn lẹ.

2. Nawẹ mí dona nọ basi sinsẹ̀n hlan Jehovah gbọn?

Na Jehovah wẹ Mẹdatọ mítọn wutu, ewọ jẹna mẹdezejo mlẹnmlẹn mítọn. (Osọhia 4:11) Ehe zẹẹmẹdo dọ mí dona yiwanna ẹn, bo nọ basi sinsẹ̀n hlan ewọ kẹdẹ, bo ma dona nọ yí yẹdide kavi boṣiọ depope zan to sinsẹ̀n-bibasi mítọn mẹ.—Hia Isaia 42:8.

Sinsẹ̀n-bibasi mítọn dona yin “wiwe, [bo] yin alọkẹyi” gbọn Jehovah dali. (Lomunu lẹ 12:1) Ehe zẹẹmẹdo dọ mí dona nọ setonuna osẹ́n he e do gando walọ dagbe go lẹ to gbẹzan mítọn mẹ. Di apajlẹ, mẹhe yiwanna Jehovah lẹ nọ yiwanna osẹ́n he e do gando alọwle go lẹ bosọ nọ yìn yé. Podọ yé nọ dapana aṣa gblezọn lẹ, taidi azọ̀-nùnù, ahàn kavi amasin adínọ lẹ ṣiṣizan.a

3. Naegbọn mí dona nọ pli dopọ hẹ yisenọ hatọ lẹ nado basi sinsẹ̀n hlan Jehovah?

Opli he mí nọ basi to sẹmẹsẹmẹ lẹ nọ hùn dotẹnmẹ dote na mí nado “pà Jehovah . . . to agun mẹ.” (Salmu lẹ 111:1, 2) Aliho dopo he mẹ mí nọ wàmọ te wẹ nado nọ jihàn pipà tọn lẹ hlan Jiwheyẹwhe. (Hia Salmu lẹ 104:33.) Jehovah biọ to mí si nado nọ yì opli lẹ, na e yiwanna mí, bosọ yọnẹn dọ opli lẹ na gọalọna mí nado duvivi ogbẹ̀ tọn kakadoi wutu. Whenue mí pli dopọ nado na tuli ode awetọ, mílọsu nọ mọaleyi taun.

DINDONANU DOGỌ

4. Mí ma dona nọ yí yẹdide lẹ zan to sinsẹ̀n-bibasi mítọn mẹ

VIDEO: Be Jiwheyẹwhe Kẹalọyi Dọ Mí Ni Nọ Zan Boṣiọ lẹ Do Sẹ̀n Emi Ya? (3:26)

• Etẹwẹ jọ to hohowhenu whenue omẹ Jiwheyẹwhe tọn delẹ tẹnpọn nado yí boṣiọ de zan do basi sinsẹ̀n hlan ẹn?

Mẹdelẹ nọ mọdọ eyin emi na dọnsẹpọ Jiwheyẹwhe, emi dona yí yẹdide lẹ zan to sinsẹ̀n-bibasi emitọn mẹ. Amọ́, be e yọnbasi dọ mọwiwà nisọ zọ́n bọ Jiwheyẹwhe na dẹn do yé dogọ ya? Hia Eksọdusi 20:4-6 gọna Salmu lẹ 106:35, 36, enẹgodo dọhodo kanbiọ ehelẹ ji:

• Nuyizan kavi yẹdide tẹlẹ wẹ a ko mọdọ mẹlẹ nọ yizan to sinsẹ̀n-bibasi yetọn mẹ?

• Nukun tẹwẹ Jehovah nọ yí do pọ́n yẹdide lẹ yiyizan?

• Etẹwẹ hiẹ lẹn gando yẹdide lẹ yiyizan go?

5. Sinsẹ̀n-bibasi hlan Jehovah kẹdẹ nọ tún mí dote sọn linlẹn lalo lẹ si

VIDEO: N’Yin Tuntundote Gbọn Nugbo lọ Dali (5:16)

Hia Salmu lẹ 91:14, enẹgodo dọhodo kanbiọ ehe ji:

• Etẹwẹ Jehovah dopà dọ emi na wà na mí eyin mí dohia dọ mí yiwanna ẹn gbọn sinsẹ̀n-bibasi hlan ewọ kẹdẹ dali?

6. Mí nọ basi sinsẹ̀n hlan Jiwheyẹwhe to opli agun tọn lẹ whenu

Mí nọ pà Jehovah bosọ nọ vọ́ huhlọnna ode awetọ gbọn hànjiji gọna gblọndo lẹ nina to opli agun tọn lẹ ji dali. Hia Salmu lẹ 22:22, enẹgodo dọhodo kanbiọ ehelẹ ji:

• Be a nọ yiwanna gblọndo he a nọ sè to opli lẹ ji lẹ ya?

• Be e na jlo hiẹ lọsu nado wleawu bo na gblọndo dopo ya?

7. Homẹ nọ hùn Jehovah eyin mí má nuhe plọn mí te lẹ hẹ mẹdevo lẹ

Aliho susu mẹ wẹ mí sọgan má nugbo Biblu tọn lẹ hẹ mẹdevo lẹ te. Hia Salmu lẹ 9:1 gọna 34:1, enẹgodo dọhodo kanbiọ ehe ji:

• Etẹwẹ yin nuhe a ko plọn to Biblu mẹ he e na jlo we nado dọhodeji hẹ mẹdevo?

BLADOPỌ

Mí nọ hẹn homẹhun Mẹdatọ mítọn eyin mí sẹ̀n ewọ kẹdẹ, nọ pà ẹ to opli agun tọn lẹ whenu, bosọ nọ má nuhe mí plọn lẹ hẹ mẹdevo lẹ.

Dogbapọn

• Nawẹ mí na wagbọn do yọ́n lehe mí na sẹ̀n Jiwheyẹwhe to aliho he ewọ kẹalọyi mẹ do?

• Naegbọn mí dona basi sinsẹ̀n hlan Jehovah kẹdẹ?

• Naegbọn mí dona nọ basi sinsẹ̀n dopọ hẹ mẹdevo he jlo na hẹn homẹhun Jiwheyẹwhe lẹ?

PỌ́N NUDỌNAMẸ DEVO LẸ

To otàn lọ “N’Masọ Yin Afanumẹ Boṣiọ lẹ Tọn Ba” mẹ, pọ́n lehe nawe de penugo bo doalọtena boṣiọ-sinsẹ̀n do.

“Biblu Nọ Diọ Gbẹzan Mẹtọn” (Atọ̀họ̀-Nuhihọ́ lọ Tọn, octobre-décembre 2011 tọn)

Gbadopọnna nuhe gán gọalọna we nado nọ na gblọndo to opli agun tọn lẹ whenu.

“Nọ Pà Jehovah to Agun Mẹ” (Atọ̀họ̀-Nuhihọ́ lọ Tọn, janvier 2019 tọn)

Pọ́n lehe dẹpẹ de mọaleyi sọn opli agun tọn lẹ mẹ do, dile etlẹ yindọ e nọ vẹawuna ẹn nado tin to otẹn lọ mẹ.

Jehovah Penukundo Go E (3:07)

Mẹsusu wẹ nọ mọ satin di ohia sinsẹ̀n Klistiani tọn de, amọ́ be mí dona nọ yí i zan to sinsẹ̀n-bibasi mítọn mẹ wẹ ya?

“Naegbọn Kunnudetọ Jehovah Tọn lẹ Ma Nọ Yí Satin Zan to Sinsẹ̀n-Bibasi Yetọn Mẹ?” (Hosọ Intẹnẹt ji tọn)