“Mẹnu Wẹ Ko de Kùnkùn Ahún Tọn Tọ́n?”

LINLINNATỌ owhe kanweko 19tọ tọn de basi zẹẹmẹ kùnkùn ahún tọn taidi “aṣọdonu osin aigba tọn, he nọ yin awuwlena gbọn jẹhọn dali.” Mẹdatọ mítọn kanse tọgbo hohowhenu tọn lọ Job dọmọ: “Mẹnu wẹ ko de kùnkùn ahún tọn tọ́n?” (Job 38:28) Jiwheyẹwhe to hinhẹnflin Job gando bẹjẹeji sọn olọn mẹ wá ahún họakuẹ lọ tọn go.

Gbọnvona sisẹ́, yèdọ whanpẹ taidi aṣọdonu etọn, ahún yin kinkọndopọ to Biblu mẹ hẹ dona, jìjìgbà, susugege, gọna ogbẹ̀ hinhẹndote. (Gẹnẹsisi 27:28; Deutelonomi 33:13, 28; Zekalia 8:12) To ojlẹ yozo Islaeli tọn, yèdọ akúdido whenu, “ahún Helmọni tọn” nọ hẹn omá aigba lọ tọn lẹ dote, podọ omẹ etọn lẹ ga. Zungbo Osó Helmọni tọn po osin-go po nọ yiaga bo gbẹ́ nọ wleawuna azọ̀ zanmẹ tọn he nọ lẹzun ahún susugege. Psalmkantọ Davidi yí kọfanamẹ he nọ yin hinhẹnwa gbọn ahún ehe dali jlẹdo numimọ awuvivinamẹ tọn heyin azọnwiwa to kọndopọmẹ hẹ hatọ sinsẹ̀n-basitọ Jehovah tọn lẹ go.—Psalm 133:3.

Ayinamẹ yẹwhegan Mose tọn hlan Islaeli yin dagbe po kọfanamẹ tọn po, taidi kùnkùn ahún tọn. E dọmọ: “Hogbe ṣie na to jija dì ahún lọ; di ojikùn finfán lọ to ogbé kikọ́ lọ ji.” (Deutelonomi 32:2) To egbehe, Kunnudetọ Jehovah tọn lẹ to wẹndagbe ogbẹ̀-namẹtọ heyin Ahọluduta Jiwheyẹwhe tọn lá jẹ opodo aigba lọ tọn lẹ. (Matiu 24:14) Jiwheyẹwhe to kandlẹnna oylọ basinamẹ lọ dọmọ: “Wá. Podọ mẹhe nugblahu gbọ e ni wá. Ewọ he jlo, gbọ e ni yí osìn ogbẹ̀ tọn lọ vọnu.” (Osọhia 22:17) Gbẹtọ livi susu sọn akọta lẹpo mẹ wẹ to alọkẹyi nuzedonukọnnamẹ kọfanamẹ gbigbọmẹ tọn ehe sọn Jiwheyẹwhe dè, ehe sọgan hẹn ogbẹ̀ dote kakadoi.