Nuyọnẹntọ Nọ Dín “Anademẹ Nuyọnẹn Tọn” — WESẸDOTẸN INTẸNẸT JI TỌN Watchtower Tọn

Nuyọnẹntọ Nọ Dín “Anademẹ Nuyọnẹn Tọn”

Gbẹzan gbẹtọ tọn sọgan yin yiyijlẹdo gbejizọnlin de go. Ṣigba, nuyọnẹn gbẹtọvi lẹ tọn ma nọ saba hẹn yé penugo nado zingbejizọnlin ogbẹ̀ tọn po kọdetọn dagbe po. Kẹdẹdile yujẹhọn sọgan siọ bato de do, mọ wẹ nuhahun gbẹ̀mẹ tọn lẹ ko tlọ mẹsusu do niyẹn. (Ps. 107:23, 27) Naegbọn nuyijlẹdonugo enẹ do sọgbe?

To hohowhenu, gbejizọnlin bibasi gbọn ohù ji yin avùnnukundiọsọmẹnu de he nọ biọ dọ yè ni tindo numimọ. Humọ, e nọ biọ nugopipe vonọtaun, podọ bato-kùntọ lẹ kavi mẹhe gọalọna yé na ojlẹ dindẹn lẹ wẹ nọ saba plọnmẹ azọ́n enẹ. (Owalọ 27:9-11) Nado zinnudo azọ́n sinsinyẹn ogán bato tọn lẹ tọn ji, yẹdide hohowhenu tọn lẹ nọ do yé hia taidi mẹhe tọ́nalùn hugan azọ́nwatọ bato mẹ tọn he pò lẹ. Azọ́nwatọ bato mẹ tọn lẹ nọ plọnnu gando sunwhlẹvu, jẹhọn po ohia tangan devo lẹ po go. Abajọ Biblu dlẹnalọdo bato-kùntọ delẹ taidi gbẹtọ “nuyọnẹntọ” lẹ.—Ezek. 27:8.

To egbehe, pipehẹ nuhahun lẹ sọgan vẹawu sọ gbejizọnlin bibasi gbọn ohù ji to hohowhenu. Ṣigba, nawẹ mí sọgan duto nuhahun enẹlẹ ji gbọn?

NAWẸ MÍ SỌGAN MỌ “ANADEMẸ NUYỌNẸN TỌN” GBỌN?

Po nuyijlẹdonugo lọ po to ayiha mẹ dọ ogbẹ̀ taidi gbejizọnlin de, lẹnnupọndo nugbo Biblu tọn ehe ji: “Nuyọnẹntọ na dotoai bo mọ nuplọnmẹ susu dogọ yí, podọ mẹhe tindo nukunnumọjẹnumẹ wẹ nọ kẹalọyi anademẹ nuyọnẹn tọn.” (Howh. 1:5, 6, NW) Hogbe Heblu tọn he yin lilẹdo “anademẹ nuyọnẹn tọn” tofi sọ sọgan yin yiyizan na anadidena bato de to hohowhenu. Mọwiwà nọ biọ dọ bato-kùntọ lọ ni deanana bato etọn hlan fie sọgbe.

E nọ biọ vivẹnudido nado mọ “anademẹ nuyọnẹn tọn.” Ṣigba, mí sọgan jẹ yanwle enẹ kọ̀n bo gbọnmọ dali plọn nado nọ duto nuhahun gbẹ̀mẹ tọn lẹ ji dile bato-kùntọ lẹ nọ basi gbejizọnlin gbọn ohù ji po kọdetọn dagbe po do. Dile owe Howhinwhẹn lẹ tọn dohia do, mí dona dike “nuyọnẹn,” “wuntuntun” po “zinzin” po ni deanana gbẹzan mítọn. (Howh. 1:2-6; 2:1-9) Humọ, mí dona nọ dín anademẹ Jiwheyẹwhe tọn to ninọmẹ lẹpo mẹ kakati nado nọ yí “linlẹn” mítọn lẹ zan nado jẹ yanwle he ma sọgbe lẹ kọ̀n dile mẹylankan lẹ nọ wà do.—Howh. 12:5.

Enẹwutu, nujọnu wẹ e yin dọ mí ni nọ plọn Ohó Jiwheyẹwhe tọn to gbesisọ mẹ. Enẹ na gọalọna mí nado tindo oyọnẹn họakuẹ gando Jehovah po Jesu Klisti, mẹhe hodo apajlẹ Etọn hugan lọ po go. (Joh. 14:9) Mí nọ mọ ayinamẹ nuyọnẹn tọn susu yí to opli Klistiani tọn lẹ ji. Humọ, mí sọgan plọnnu sọn numimọ mẹdevo lẹ po mẹjitọ mítọn lẹ po tọn mẹ.—Howh. 23:22.

NỌ MỌNÚ HLAN NUKỌN BO NỌ WLEAWUDAI

Dile e nọ biọ nuyọnẹn vonọtaun nado deanana bato de to whenue yujẹhọn de fọ́n do, mọdopolọ wẹ mí nọ tindo nuhudo “anademẹ nuyọnẹn tọn” taun to whenue mí pannukọn whlepọn lẹ do niyẹn. Ayihaawe tintindo gando nuhe mí dona wà to whenue mí pannukọn whlepọn lẹ go sọgan hẹn mí biọ bẹwlu mẹ, podọ enẹ sọgan hẹn kọdetọn vẹadi lẹ wá.—Jak. 1:5, 6.

E jẹna ayidego dọ hodidọ lọ he yin lilẹdo “anademẹ nuyọnẹn tọn” sọ nọ yin yiyizan gando awhànfunfun go. Biblu dọmọ: “Linlẹn dagbe ga wẹ a nido gbawhàn, podọ to susu tòhódọtọ lẹ tọn mẹ wẹ gingán te.”—Howh. 20:18; 24:6.

Dile awhànfuntọ lẹ nọ wleawudaina awhàn do, mílọsu dona nọ lẹnnupọn jẹnukọn do nudepope he sọgan ze haṣinṣan mítọn hẹ Jehovah do owù mẹ ji bo nọ wleawudaina whlepọn lẹ. (Howh. 22:3) Di apajlẹ, e sọgan yindọ agbasazọ́n yọyọ kavi ogántẹn de wẹ yin zizedonukọnna we bọ hiẹ dona basi dide eyin a na kẹalọyi kavi lala. E họnwun dọ hiẹ na lẹnnupọndo sunmẹ-kuẹ, whenu he a na yizan na azọ́n lọ mẹ yìyì po kọlilẹ po gọna onú devo lẹ ji. Ṣigba, whẹho devo lẹ sọ jẹna ayidego: Be azọ́n lọ sọgbe hẹ nunọwhinnusẹ́n Biblu tọn lẹ ya? Be azọ́n-gànmẹ lọ kavi ojlẹ voovo he mẹ a dona yì azọ́nmẹ te lẹ na glọnalina nuwiwa Klistiani tọn towe lẹ wẹ ya?—Luku 14:28-30.

Loretta he yin Kunnudetọ Jehovah tọn de tindo agbasazọ́n he pekuẹ. To whenue ogán etọn lẹ basi dide nado diọtẹnna ajọwhé lọ, yé ze otẹn daho de donukọnna ẹn to ofi yọyọ lọ bo dọna ẹn dọmọ: “Dotẹnmẹ hundote vonọtaun de wẹ ehe yin na we. Podọ Plitẹnhọ Ahọluduta tọn de tlẹ tin to lẹdo lọ mẹ.” Ṣigba, ojlo Loretta tọn wẹ nado hẹn gbẹzan etọn bọawu bo sẹ̀n Mẹdatọ etọn to gigọ́ mẹ. Enẹwutu, e mọdọ eyin emi kẹalọyi otẹn yọyọ enẹ, emi ma na tindo whenu susu na nuwiwa Klistiani tọn lẹ. Mahopọnna dọ dopo to ogán lọ lẹ mẹ tlẹ dọna ẹn to nuglọ dọ ewọ kẹdẹ wẹ azọ́nwatọ he yé jlo na hẹn do azọ́n lọ mẹ, e jo azọ́n lọ do. Loretta ko yin gbehosọnalitọ whepoponu tọn na nudi owhe 20 todin, podọ e kudeji dọ emi tindo kọdetọn dagbe to sinsẹ̀nzọn lọ mẹ, na emi hodo “anademẹ nuyọnẹn tọn” he tin to Biblu mẹ wutu. Taidi kọdetọn de, e hẹn haṣinṣan etọn hẹ Jehovah sinyẹn deji bosọ gọalọna mẹsusu nado kẹalọyi nugbo lọ.

Whẹndo lẹ lọsu tindo nuhudo “anademẹ nuyọnẹn tọn.” Nukunpipedo ovi lẹ go whẹ́n yin azọ́n ojlẹ gaa tọn de, podọ nudide mẹjitọ lẹ tọn gando gbigbọnu lẹ kavi agbasanu lẹ go nọ yinuwado sọgodo whẹndo lọ blebu tọn ji. (Howh. 22:6) Di dohia, mẹjitọ Klistiani lẹ sọgan nọ kanse yede dọ: ‘Be hodọdopọ po apajlẹ mítọn po to alọgọna ovi mítọn lẹ nado mọnukunnujẹemẹ dọ haṣinṣan dagbe tintindo hẹ Jehovah na gọalọna yé nado duto nuhahun he yé na pehẹ to whenue yé na whẹ́n lẹ ji ya? Be gbẹzan mítọn to alọgọna ovi lẹ nado tindo pekọ to gbẹzan he bọawu zinzan mẹ bo na ayidonugo lizọnyizọn lọ ya?’—1 Tim. 6:6-10, 18, 19.

Na taun tọn, kọdetọn dagbe tintindo to gbẹ̀mẹ ma sinai do yanwle agbasa tọn lẹ kavi yindidi he mẹhe tin to aihọn mẹ lẹ nọ saba doafọna ji. Ahọlu Sọlomọni mọnukunnujẹ nugbo ehe mẹ bo wlan to gbọdo glọ dọmọ: “E na yọ́n na yé he dibusi Jiwheyẹwhe lẹ, he dibu to nukọn etọn.” (Yẹwh. 8:12) Hogbe ehelẹ dohia dọ alenu wẹ e yin nado nọ dín “anademẹ nuyọnẹn tọn” he tin to Biblu mẹ.—2 Tim. 3:16, 17.

[Yẹdide to weda 30]

Nado zinnudo azọ́n sinsinyẹn ogán bato tọn lẹ tọn ji, yẹdide hohowhenu tọn lẹ nọ do yé hia taidi mẹhe tọ́nalùn hugan azọ́nwatọ bato mẹ tọn he pò lẹ

[Asisa Yẹdide tọn]

Su concessione del Ministero per i Beni e le Attività Culturali. It is forbidden to reproduce or duplicate this image in any way or by any means.