Nọ Dọ Ohó He Nọ Hẹn Homẹ Jehovah Tọn Hùn Lẹ

Whenue Jehovah dá mí, e na mí nugopipe lọ nado nọ dọho, ehe yin nunina jiawu de. Amọ́, be lehe mí nọ yí nunina enẹ zan do nọ duahunmẹna ẹn ya? Gbau! (Hia Jakọbu 1:26.) Enẹwutu, nawẹ mí sọgan nọ yí nugopipe hodidọ tọn he mí tindo zan to aliho he na hẹn homẹ Jehovah tọn hùn mẹ gbọn?

1. Nawẹ mí dona nọ yí nunina hodidọ tọn he mí tindo zan gbọn?

Biblu dọna mí dọ mí ni “nọ to tulina ode awetọ bo nọ to ode awetọ hẹn lodo.” (1 Tẹsalonikanu lẹ 5:11) Be a sọgan lẹnnupọndo mẹdelẹ ji he do hudo tulinamẹ tọn ya? Etẹlẹ wẹ a sọgan wà nado hẹn nulẹ pọnte na yé dogọ? Nọ hẹn yé deji dọ onú yetọn nọ duahunmẹna we. Vlavo a gán nọ dọna yé nuhewutu a do yiwanna yé lẹ. Be a sọgan lẹnnupọndo wefọ de ji he a na yizan nado na tuli mẹyinyọnẹn towe de ya? Wefọ he a gán yizan lẹ ma whè. Sọ flindọ, aliho he mẹ yè dọ ohó de te sọgan yinuwado mẹdevo lẹ ji sisosiso hugan hogbe he yè yizan lẹ lọsu. Enẹwutu, nọ tẹnpọn nado nọ yí homẹdagbe po walọmimiọn po do dọho to whepoponu.—Howhinwhẹn lẹ 15:1.

2. Hodidọ alọpa tẹlẹ wẹ mí dona nọ dapana?

Biblu dọmọ: “Mì dike ohó gbigble de tọ́njẹgbonu sọn onù mìtọn mẹ blo.” (Hia Efesunu lẹ 4:29.) Ehe zẹẹmẹdo dọ e ma sọgbe dọ mí ni nọ zan hogbe agbàagba lẹ, kavi nọ dọho po kanyinylan po podọ to aliho he na sọwhán mẹdevo lẹ bo hẹn awufiẹsa wá na yé mẹ. Mí sọ dona nọ dapana mẹnudidọ po hodidọ mẹhẹngble tọn lẹ po.—Hia Howhinwhẹn lẹ 16:28.

3. Etẹwẹ na gọalọna mí nado nọ dọho he na jlọmẹdote lẹ?

Nuhe mí dọtọ́n sọn nùmẹ lẹ nọ saba do nuhe to ahun mítọn kavi ayiha mítọn mẹ lẹ hia. (Luku 6:45) Enẹwutu, e biọ dọ mí ni dovivẹnu sinsinyẹn nado sọgan nọ ze ahun po ayiha mítọn po do nuhe sọgbe lẹ ji—enẹ wẹ do nuhe yin dodo, nuhe yin wiwe, nuhe jẹna owanyi bosọ jẹna pipà lẹ ji. (Filipinu lẹ 4:8) Eyin enẹ na pà mí, mí dona nọ payi ayidedai mítọn lẹ go gọna mẹhe mí nọ jihọntọn hẹ lẹ. (Howhinwhẹn lẹ 13:20) Mọwiwà nasọ gọalọna mí nado nọ yiagbọji bo lẹnnupọn whẹpo do dọho. Aliho he mẹ nuhe mí dọ lẹ na yinuwado mẹdevo lẹ ji te nisọ nọ duahunmẹna mí. Biblu dọmọ: “Ohó he yè ma lẹnnupọn whẹpo do dọ nọ taidi ohísọmẹ, ṣigba, odẹ́ nuyọnẹntọ tọn nọ hẹnazọ̀ngbọ.”—Howhinwhẹn lẹ 12:18.

DINDONANU DOGỌ

4. Nọ pọ́n ohó do dọ

Mímẹpo wẹ nọ dọ nudelẹ he nọ wá vẹna mí to godo mẹ. (Jakọbu 3:2) Hia Galatianu lẹ 5:22, 23, enẹgodo dọhodo kanbiọ ehelẹ ji:

• Detẹ to jẹhẹnu ehelẹ mẹ wẹ a gán biọ to odẹ̀ mẹ na a nido sọgan nọ payi lehe a nọ dọho do go? Ale tẹwẹ jẹhẹnu enẹlẹ gán hẹnwa na we?

Hia 1 Kọlintinu lẹ 15:33, enẹgodo dọhodo kanbiọ ehe ji:

• Nawẹ mẹhe a nọ jihọntọn hẹ lẹ gọna ayidedai towe lẹ gán bẹpla aliho he mẹ a nọ dọho te gbọn?

Hia Yẹwhehodọtọ 3:1, 7, enẹgodo dọhodo kanbiọ ehe ji:

• Whetẹnu wẹ e sọgan yin nuyọnẹnnu dọ yè ni nabọẹ kavi nọte jẹ ojlẹ dagbe de mẹ whẹpo do dọho te?

5. Nọ dọ mẹdevo lẹ sin ohó dagbe

VIDEO: Nọ Dọ Nuhe “Yọ́n Na Mẹjlọdote” Lẹ (4:07)

• To video lọ mẹ, naegbọn mẹmẹsunnu ehe do jlo na diọ aliho he mẹ e nọ dọho gando mẹdevo lẹ go te?

• Etẹwẹ e wà nado basi vọjlado?

Hia Yẹwhehodọtọ 7:16, enẹgodo dọhodo kanbiọ ehe ji:

• Etẹwẹ mí dona nọ flin eyin mí ja ohó ylankan dọ gbé gando mẹde go?

Hia Yẹwhehodọtọ 7:21, 22, enẹgodo dọhodo kanbiọ ehe ji:

• Nawẹ wefọ ehelẹ sọgan gọalọna we gbọn ma nado nọ gblehomẹ eyin mẹde dọho towe ylankan?

6. Nọ dọhona whẹndo towe to aliho he jọmẹ mẹ

VIDEO: Owanyi po Sisi po Nọ Kọ̀n Whẹndo lẹ Dopọ (3:08)

• Etẹwẹ na gọalọna we nado nọ dọhona whẹndo towe to aliho he jọmẹ mẹ?

Hia Efesunu lẹ 4:31, 32, enẹgodo dọhodo kanbiọ ehe ji:

• Aliho tẹ mẹ wẹ a sọgan nọ dọhona hagbẹ whẹndo tọn towe lẹ te nado jlọ yé dote?

Jehovah dọ numọtolanmẹ etọn lẹ na Visunnu etọn Jesu. Hia Matiu 17:5, enẹgodo dọhodo kanbiọ ehe ji:

• Nawẹ a sọgan hodo apajlẹ Jehovah tọn gbọn to aliho he mẹ a nọ dọhona hagbẹ whẹndo tọn towe lẹ te mẹ?

BLADOPỌ

Ohó he mí nọ dọ lẹ sọgan jlọmẹdote kavi hẹnmẹ gbọjọ. Enẹwutu, mí dona nọ yiagboji bo lẹnnupọndo nuhe mí na dọ, whenue mí na dọ ẹ po lehe mí na dọ ẹ do po ji.

Dogbapọn

• Aliho tẹlẹ mẹ wẹ a sọgan nọ yí nunina hodidọ tọn towe zan nado gọalọna mẹdevo lẹ te?

• Hodidọ alọpa tẹlẹ wẹ e na jlo we nado nọ dapana?

• Etẹwẹ gán gọalọna mí nado nọ dọho to whepoponu to aliho he jọmẹ bo jlọmẹdote mẹ?

PỌ́N NUDỌNAMẸ DEVO LẸ

Etẹwẹ sọgan gọalọna mí nado nọ dọho dagbe he na na tuli mẹdevo lẹ?

Wleawuna Odẹ́ Nuyọnẹntọ Tọn (8:04)

Gbadopọnna nuhe sọgan gọalọna we nado nọ dapana hodidọ he ma sọgbe lẹ.

“Be Nugbo Wẹ Dọ Mẹzunzun Ylan Taun Ya?” (Hosọ Intẹnẹt ji tọn)

Pọ́n nuhe mí sọgan wà ma nado jai jẹ omọ̀ mẹnudidọ mẹhẹngble tọn mẹ.

Nawẹ N’Gán Doalọtena Mẹnudidọ Gbọn? (2:36)

Pọ́n lehe Jehovah ko gọalọna dawe de nado doalọtena hogbe agbàagba lẹ yiyizan do.

“Nuhe N’Yí Ogbẹ̀ Ṣie Do to Wiwà Jẹ Ahunmẹduna Mi Ji Sinsinyẹn” (Alọnuwe Atọ̀họ̀-Nuhihọ́ lọ Tọn, 1^er août 2013 tọn)