Jehovah Nọ Whlá Mẹhe Tindo Todido to Ewọ mẹ Lẹ
“Na dagbewanyi towe po nugbo towe po ni nọ [whlá mi to whepoponu].”—PSALM 40:11.
1. Etẹwẹ Ahọlu Davidi biọ to Jehovah si, podọ nawẹ obiọ enẹ to gblọndo mọyi gbọn todin?
AHỌLU DAVIDI Islaeli hohowhenu tọn “yí homẹfifa do nọtepọn OKLUNỌ” bosọ yin whinwhàn nado dọ dọ Jehovah “dotoai hlan [emi], bosọ sè yiylọ [emitọn] na alọgọ.” (Psalm 40:1) E tindo numimọ lehe Jehovah nọ whlá mẹhe yiwanna Ẹn lẹ do tọn whlasusu. Abajọ Davidi sọgan biọ dọ Jehovah ni nọ whlá emi to whepoponu. (Psalm 40:11) Taidi dopo to sunnu po yọnnu nugbonọ lẹ po he na mọaleyi sọn “fọnsọnku he yọnwhanpẹ hú” de mẹ, Davidi tin to hihọ́ glọ to oflin Jehovah tọn mẹ todin taidi mẹhe na mọ ahọsumẹ enẹ yí. (Heblu lẹ 11:32-35) Gbọnmọ dali, todido etọn na sọgodo yin hinhẹn diun to aliho dagbe hugan mẹ. Yinkọ etọn yin kinkàn do “owe oflin tọn” Jehovah tọn mẹ.—Malaki 3:16.
2. Nawẹ Owe-wiwe gọalọna mí nado mọnukunnujẹ nuhe e zẹẹmẹdo nado yin whiwhla gbọn Jehovah dali mẹ gbọn?
2 Dile etlẹ yindọ nugbonọ he yin nùdego to Heblu lẹ weta 11 mẹ lẹ nọgbẹ̀ whẹpo Jesu Klisti do wá aigba ji, ayihaawe ma tin dọ yé nọgbẹ̀ sọgbe hẹ nuplọnmẹ Jesu tọn he dọmọ: “Mẹhe yiwanna alindọn etọn na hẹn ẹn bu; mẹhe sọ gbẹwanna alindọn etọn to aihọn he mẹ na whlá ẹ hlan ogbẹ̀ madopodo.” (Johanu 12:25) Enẹwutu, yinyin whiwhla gbọn Jehovah dali ma zẹẹmẹdo dọ mí ma na tindo numimọ yajiji kavi homẹkẹn tọn gba. Kakatimọ e zẹẹmẹdo dọ mí na yin hihọ́-basina to gbigbọ-liho nado sọgan hẹn haṣinṣan dagbe de go hẹ Jiwheyẹwhe.
3. Nawẹ mí wagbọn do yọnẹn dọ Klisti Jesu yin whiwhla gbọn Jehovah dali, podọ etẹwẹ yin kọdetọn lọ?
3 Jesu lọsu tindo numimọ homẹkẹn vẹadi po vlẹko po tọn, podọ wagbọwagbọ etọn, kẹntọ etọn lẹ hù i to aliho winyandomẹ po yasanamẹ hugan po tọn mẹ. Ṣogan, ehe ma zẹẹmẹdo dọ Jiwheyẹwhe ma hẹn opagbe etọn nado whlá Mẹssia lọ di gba. (Isaia 42:1-6) Fọnsọnku Jesu tọn to azán atọ̀ntọ gbè to okú winyandomẹ tọn etọn godo dohia dọ Jehovah sè awhágbe etọn na alọgọ—kẹdẹdile Jehovah ko sè Davidi tọn do. Taidi kọdetọn de, Jehovah na huhlọn Jesu nado hẹn tenọgli etọn go. (Matiu 26:39) Na Jesu yin whiwhla to aliho enẹ mẹ wutu, e mọ jọmaku yí to olọn lẹ mẹ, podọ livi susu gbẹtọvi lẹ tọn he yí yise zan to ofligọ lọ mẹ tindo todido ogbẹ̀ madopodo tọn.
4. Jidide tẹwẹ yin nina Klistiani yiamisisadode lẹ po “lẹngbọ devo” lẹ po?
4 Mí sọgan deji dọ Jehovah jlo bosọ penugo nado whlá devizọnwatọ etọn lẹ to azán mítọn gbè kẹdẹdile e ko wà do to azán Davidi po Jesu po tọn lẹ gbè. (Jakobu 1:17) Mẹmẹsunnu yiamisisadode Jesu tọn vude he pò to aigba ji lẹ sọgan ganjẹ opagbe Jehovah tọn go dọmọ: “Gudu magble, maflu, he ma nọ kupẹ́ [yin whiwhla na mì] to olọn mẹ, mẹhe yè whlá gbọn huhlọn Jiwheyẹwhe tọn dali, gbọn yise mẹ hlan whlẹngán he to yiyá nado hẹn sọawuhia to ojlẹ godo tọn mẹ.” (1 Pita 1:4, 5) Mọdopolọ, “lẹngbọ devo” he tindo todido aigba ji tọn lẹ sọgan dejido Jiwheyẹwhe po opagbe etọn he e dó gbọn psalm-kantọ lọ gblamẹ po go dọmọ: “Mì yiwanna OKLUNỌ, mì mẹwiwe etọn emi: OKLUNỌ yí yisenọ lẹ whlá.”—Johanu 10:16; Psalm 31:23.
Yin Whiwhla to Gbigbọ-Liho
5, 6. (a) Nawẹ omẹ Jiwheyẹwhe tọn lẹ ko yin whiwhla to azán mítọn gbè gbọn? (b) Haṣinṣan tẹwẹ mẹyiamisisadode lẹ tindo hẹ Jehovah, podọ etẹwẹ dogbọn mẹhe tindo todido aigba ji tọn lẹ dali?
5 To egbehe, Jehovah ko basi tito lẹ nado whlá omẹ etọn lẹ to gbigbọ-liho. Dile e ma tlẹ nọ basi hihọ́na yé sọn homẹkẹn kavi awusinyẹnnamẹnu po nugbajẹmẹji he gbayipe to egbehe lẹ po mẹ, e ko gbọn nugbonọ-yinyin dali na yé alọgọ po tulinamẹ he jẹ po nado sọgan whlá haṣinṣan pẹkipẹki he yé tindo hẹ ẹ. Yise yetọn to awuwledainanu owanyinọ Jiwheyẹwhe tọn he yin ofligọ lọ mẹ wẹ yin dodonu he ji yé ze haṣinṣan ehe sinai do. Delẹ to Klistiani nugbonọ ehelẹ mẹ ko yin dide gbọn gbigbọ Jiwheyẹwhe tọn dali nado lẹzun gandutọgbẹ́ hẹ Klisti to olọn mẹ. Yé ko yin lilá di dodonọ taidi ovi gbigbọmẹ Jiwheyẹwhe tọn lẹ, podọ yewlẹ go wẹ ohó helẹ mọ hẹndi do dọmọ: “Mẹhe sọ whlẹn mí sọn huhlọn zinvlu tọn mẹ, bosọ diọ mí do ahọludu Ovi vivẹ etọn tọn mẹ; mẹhe mẹ míwlẹ do ofligọ te gbọn ohùn etọn mẹ, yèdọ jona ylando tọn.”—Kọlọsinu lẹ 1:13, 14.
6 Livi susu Klistiani nugbonọ devo lẹ tọn yin hinhẹn deji dọ yelọsu sọgan mọaleyi sọn awuwledainanu Jiwheyẹwhe tọn he yin ofligọ lọ mẹ. Mí hia dọmọ: “Ovi gbẹtọ tọn ma wá nado yin mẹyilizọnna gba, ṣigba nado yilizọnna omẹ, podọ nado jo ogbẹ̀ etọn na ofligọ na mẹsusu.” (Malku 10:45) Klistiani enẹlẹ to nukọnpọnhlan ojlẹ sisọ lọ whenue yé na duvivi “mẹdekannujẹ he do gigo ovi Jiwheyẹwhe tọn lẹ tọn.” (Lomunu lẹ 8:21) Todin whẹ́, yé nọ wlebòna haṣinṣan pẹkipẹki he yé tindo hẹ Jiwheyẹwhe bosọ nọ wà nuhe go yé pé lẹpo nado hẹn haṣinṣan enẹ lodo.
7. Aliho tẹwẹ Jehovah nọ yizan to egbehe nado whlá dagbemẹninọ gbigbọmẹ tọn omẹ etọn lẹ tọn?
7 Jehovah nọ whlá dagbemẹninọ gbigbọmẹ tọn omẹ etọn lẹ tọn gbọn awuwiwlena tito-to-whinnu nuplọnmẹ tọn he to nukọnzindo de dali. Ehe nọ hẹn yé penugo nado tindo oyọnẹn he pegan nugbo tọn ganji. Jehovah sọ nọ wleawuna anademẹ to whepoponu gbọn Ohó etọn, titobasinanu etọn, po gbigbọ wiwe etọn po gblamẹ. To anademẹ “afanumẹ nugbonọ, nuyọnẹntọ” lọ tọn glọ, omẹ Jiwheyẹwhe tọn lẹ tin taidi whẹndo akọjọpli tọn de lẹdo aihọn pé. Pipli afanumẹ lọ tọn nọ penukundo nuhudo gbigbọmẹ tọn whẹndo devizọnwatọ Jehovah tọn lẹ tọn go bosọ nọ wàmọ na yé to agbasa-liho eyin e biọ domọ—mahopọnna akọta he mẹ yé wá sọn kavi otẹn he mẹ yé tin te.—Matiu 24:45.
8. Jidide tẹwẹ Jehovah tindo to nugbonọ etọn lẹ mẹ, podọ nujikudo etẹ tọn wẹ e na yé?
8 Jehovah ma nọ basi hihọ́na Klistiani lẹ to egbehe to agbasa-liho sọn mẹgbeyinyan kẹntọ yetọn lẹ tọn si kẹdẹdile E ma wà na Jesu do. Ṣigba ehe ma dohia dọ Jiwheyẹwhe ma hùnhomẹ do yé go gba. Dẹn do enẹ! Kakatimọ, e dohia dọ Jiwheyẹwhe deji dọ yé na nọgodona ẹn to whẹho titengbe hugan nupojipetọ-yinyin tọn lọ mẹ. (Job 1:8-12; Howhinwhẹn lẹ 27:11) Jehovah ma na gbẹkọ mẹhe yin nugbonọ hlan ẹn lẹ go pọ́n gbede, ‘na Jehovah yiwanna whẹdida dodo, bo masọ nọ gbẹ́ nugbonọ etọn lẹ dai; yè na nọ yí yé whlá kakadoi.’—Psalm 37:28.
Yin Whiwhla Gbọn Dagbewanyi po Nugbo po Dali
9, 10. (a) Nawẹ nugbo Jehovah tọn nọ whlá omẹ etọn lẹ gbọn? (b) Nawẹ Biblu dohia dọ Jehovah nọ yí dagbewanyi etọn do whlá nugbonọ etọn lẹ gbọn?
9 To odẹ̀ Davidi tọn he yin kinkàndai to Psalm 40 mẹ, e biọ dọ Jehovah ni yí dagbewanyi po nugbo etọn po do whlá emi. Nugbo Jehovah tọn po owanyi etọn na dodowiwa po biọ dọ e ni basi zẹẹmẹ nujinọtedo etọn lẹ tọn hezeheze. Mẹhe nọ nọgbẹ̀ sọgbe hẹ nujinọtedo ehelẹ nọ yin whiwhla to obá daho de mẹ sọn ayimajai, obu, po nuhahun he nọ sayana mẹhe nọ gbẹkọ yé go lẹ po si. Di apajlẹ, mí sọgan basi hihọ́na mídelẹ po mẹyiwanna mítọn lẹ po sọn nuhahun he nọ hẹnmẹ jẹflumẹ susu mẹ eyin mí dapana amasin adínọ po ahàn sinsinyẹn ṣiṣizan po, gọna gbẹzan fẹnnuwiwa po danuwiwa tọn po. Podọ mẹhe tlẹ danbú sọn aliho nugbo Jehovah tọn ji lẹ—dile Davidi wà to ojlẹ delẹ mẹ do—tindo nujikudo lọ dọ Jiwheyẹwhe gbẹ́ yin “bẹtẹn” de na ylanwatọ he lẹnvọjọ lẹ. Omẹ mọnkọtọn lẹ sọgan dawhá jẹgbonu po ayajẹ po dọmọ: “Hiẹ na yí mi whlá sọn tukla mẹ.” (Psalm 32:7) Dohia dagbewanyi Jiwheyẹwhe tọn nankọtọn die!
10 Apajlẹ dagbewanyi Jiwheyẹwhe tọn devo wẹ avase he E nọ na devizọnwatọ etọn lẹ nado nọla na aihọn ylankan he ewọ na vasudo to madẹnmẹ lọ. Mí hia dọmọ: “Mì yiwanna aihọn blo, kavi nuhe tin to aihọn mẹ. Eyin mẹde yiwanna aihọn, owanyi Otọ́ tọn ma tin to ewọ mẹ gba. Na nuhe tin to aihọn mẹ lẹpo, wantuntun agbasalan tọn, wantuntun nukun tọn, po gigovọ́ ogbẹ̀ tọn po, e ma tin to Otọ́ tọn mẹ gba, ṣigba aihọn tọn wẹ.” Eyin mí setonuna avase ehe bosọ yinuwa sọgbe hẹ ẹ, mí sọgan whlá ogbẹ̀ mítọn kakadoi, na wefọ lọ zindonukọn dọmọ: “Aihọn sọ to jujujei po wantuntun etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.”—1 Johanu 2:15-17.
Yin Whiwhla Gbọn Nugopipe Nulẹnpọn Tọn, Wuntuntun, po Nuyọnẹn po Dali
11, 12. Basi zẹẹmẹ lehe nugopipe nulẹnpọn tọn, wuntuntun, po nuyọnẹn po nọ whlá mí do tọn.
11 Sọlọmọni he yin visunnu Davidi tọn yin gbigbọdo nado wlanwe hlan mẹhe jlo nado mọ nukundagbe Jiwheyẹwhe tọn yí lẹ dọmọ: “Zinzin [kavi nugopipe nulẹnpọn tọn] na whlá we, wuntuntun nasọ yí we whlá.” E sọ dotuhomẹnamẹ dọmọ: “Tindo nuyọnẹn . . . A gbẹ́ ẹ dai blo, e na whlẹn we: yiwanna ẹn, e nasọ yí we whlá.”—Howhinwhẹn lẹ 2:11; 4:5, 6.
12 Mí na yí nugopipe nulẹnpọn tọn zan eyin mí nọ lẹnayihamẹpọn do nuhe mí plọn sọn Ohó Jiwheyẹwhe tọn mẹ ji. Mọwiwà nọ gọalọna mí nado tindo wuntuntun dogọ bo penugo nado ze yanwle he sọgbe lẹ dai. Nujọnu wẹ ehe yin, na suhugan mítọn wẹ sọgan ko tindo numimọ etọn dọ nuhahun lẹ nọ fọ́n eyin gbẹtọ lẹ ze yanwle he ma sọgbe lẹ dai sọn ojlo mẹ wá kavi to mayọnẹn mẹ. Adọkunnu lẹ, yindidi, po huhlọn po wẹ yanwle he aihọn Satani tọn nọ zedonukọnna mí lẹ, to whenuena Jehovah nọ na tuli mí nado doafọna yanwle gbigbọmẹ tọn he yin nujọnu hugan lẹ. Awugbopo nado ze ayidonugo lẹpo do adà he yin alọdlẹndo gbọngodo ehe ji sọgan gbà whẹndo lẹ kija, hẹn họntọnjiji lẹ gble, bo hẹn yanwle gbigbọmẹ tọn lẹ dózin. Taidi kọdetọn de, mẹde sọgan mọdọ onú dopo he pò na emi wẹ nugbo blawu he Jesu dohia to whenuena e dọmọ: “Ale tẹwẹ e do na gbẹtọ de, nado tindo aihọn lẹpo, bosọ gú alindọn etọn?” (Malku 8:36) Nuyọnẹnnu wẹ e na yin dọ mí ni hodo ayinamẹ Jesu tọn dọmọ: “Mì dín ahọludu Jiwheyẹwhe tọn, po dodo etọn po whẹ́; onú helẹ pó wẹ yè na dogọ hlan mì.”—Matiu 6:33.
Owù He Tin to Ṣejannabinọ-Yinyin Mẹ
13, 14. Etẹwẹ e zẹẹmẹdo nado yin ṣejannabinọ, podọ etẹwutu e ma yin nuyọnẹnnu nado yinmọ?
13 Gbẹtọ lẹ nọ tindo ojlo to yede mẹ to jọwamọ-liho. Ṣigba, eyin nujlomẹ po yanwle mẹdetiti tọn lẹ po wá lẹzun tọ́ntlọ́ngbọ́n to gbẹzan mẹde tọn mẹ, nuhahun lẹ nọ jẹ awusọhia ji. Enẹwutu, nado whlá họntọnjiji mítọn hẹ Jehovah, ewọ na mí tuli dọ mí ni dapana walọ ṣejannabi tọn. Hogbe ehe zẹẹmẹdo “nado yin ahunmẹduna dogbọn nujlomẹ, nuhudo, kavi yanwle mẹdetiti tọn lẹ kẹdẹ dali.” Be enẹ ma sọgbe pẹpẹ hẹ walọ he mẹsusu nọ yizan to egbehe ya? Na taun tọn, Biblu dọ dọdai dọ ‘to azán godo tọn’ aihọn ylankan Satani tọn lẹ mẹ, “gbẹtọ lẹ na lẹzun wanyina yede tọ́,” kavi na lẹzun ṣejannabinọ.—2 Timoti 3:1, 2.
14 Klistiani lẹ mọnukunnujẹemẹ dọ nuyọnẹnnu wẹ e yin nado setonuna gbedide Biblu tọn nado nọ do ojlo hia to mẹdevo lẹ mẹ bo yiwanna yé dile mẹde nọ yiwanna edetiti do. (Luku 10:27; Filippinu lẹ 2:4) Gbẹtọ lẹ to paa mẹ sọgan lẹndọ ehe ma yin nuyọnẹnnu gba, ṣogan dandannu wẹ e yin eyin mí jlo na duvivi alọwle kọdetọn dagbenọ, haṣinṣan whẹndo ayajẹnọ, po họntọnjiji dagbe lẹ po tọn. Enẹwutu, devizọnwatọ Jehovah tọn nugbo de ma dona dike ojlo jọwamọ ṣejannabi tọn ni yitẹn to onú titengbe hugan lẹ si to gbẹzan etọn mẹ pọ́n gbede, enẹ wẹ azọ́n he tindo kanṣiṣa hẹ sinsẹ̀n-bibasi etọn dohlan Jehovah Jiwheyẹwhe lẹ.
15, 16. (a) Fie wẹ walọ ṣejannabi tọn sọgan planmẹ yì, podọ apajlẹ mẹnu lẹ tọn wẹ do ehe hia? (b) Na nugbo tọn, etẹwẹ mẹhe nọ yawu dawhẹna mẹdevo lẹ to wiwà?
15 Walọ ṣejannabi tọn sọgan zọ́n bọ mẹde na lẹzun dodonọ-jlatọ, he sọgan wá hẹn ẹn zun hẹngogonọ podọ saklanọ. Biblu dọ po gbesisọ po dọmọ: “Mamọdọnọ wẹ hiẹ dawe nẹ, mẹdepope he hiẹ yin he to whẹda: na ehe mẹ hiẹ to owhẹ̀ mẹdevo tọn dá te, hiẹ to whẹgbledo dewe; na hiẹ mẹhe to whẹda to onú dopolọ wà wutu.” (Lomunu lẹ 2:1; 14:4, 10) Sinsẹ̀ngán azán Jesu gbè tọn lẹ kudeji dọ yé yin dodonọ sọmọ bọ yé mọ yedelẹ di mẹhe jẹ nado mọhodọdo Jesu po hodọtọ etọn lẹ po go. Gbọn mọwiwà dali, yé lá yedelẹ di whẹdatọ. Na yé ma penugo nado mọ nuṣiwa yede titi tọn lẹ wutu, yé hẹn whẹgbledomẹ wá yedelẹ ji.
16 Juda, hodotọ Jesu tọn he de e hia, jo ede do nado wá lẹzun mẹhe to whẹdana mẹdevo lẹ. To gbèdopo to Betani, whenuena Malia, nọviyọnnu Lazalọsi tọn to nusisá akuẹgegenu de sá na Jesu, Juda jẹagọdo nuyiwa etọn sinsinyẹn. E do homẹgble etọn hia gbọn whẹjijọ dindin dali dọ: “Etẹwutu wẹ yè ma sà nusisá he yin fatakakuẹ fọdekanweko, bo yin nina hlan wamọnọ lẹ?” Ṣigba kandai lọ basi zẹẹmẹ yinukọn dogọ dọ: “E dọ ehe dinvie, e ma yin dọ e hò wamọnọ lẹ [tọn] pọ́n wutu gba; ṣigba dọ ewọ yin ajotọ de wutu, podọ tintindo apò lọ, nọ bẹ nuhe yè bẹ do e mẹ lẹ yì.” (Johanu 12:1-6) Mì ma dike mí ni yinuwa taidi Juda kavi sinsẹ̀ngán lẹ gbede blo, he nọ yawu dawhẹna mẹdevo lẹ, kiki nado hẹn whẹgbledomẹ wá yede ji.
17. Na apajlẹ de nado do owù he tin to glòlò-jijlá kavi jidide do mẹdetiti go zẹjlẹgo mẹ hia.
17 Dile etlẹ yindọ Klistiani dowhenu tọn delẹ ma yin ajotọ taidi Juda, e blawu dọ yé joawuna goyiyi, bo lẹzun glòlò-jlatọ. Jakobu wlanwe gando yé go dọmọ: “Mì to awagundo to goyiyi mìtọn mẹ.” Enẹgodo e yidogọ dọ: “Awagundido mọnkọtọn lẹpo wẹ oylan.” (Jakobu 4:16) Nùgo yíyí na nuhe mí ko wadotana lẹ kavi lẹblanulọkẹyi he mí tindo to sinsẹ̀nzọn Jehovah tọn mẹ lẹ wutu nọ hẹn aijijẹ wá. (Howhinwhẹn lẹ 14:16) Mí flin nuhe jọ do apọsteli Pita go to whenuena e dejido ede go zẹjlẹgo to ojlẹ de mẹ bo doawagun dọmọ: “Eyin yè na hẹn mẹpopo dahli to hiẹ mẹ, yè ma to na hẹn yẹn dahli gbede. . . . Yèdọ eyin yẹn mananọma kú po hiẹ po, yẹn ma na mọ́n we gbede.” Nado dọ hójọhó, mí ma tindo onú dopo tata he mẹ mí sọgan doawagun te to mídelẹ mẹ. Nuhe mí nọ duvivi etọn lẹpo yọnbasi kiki na Jehovah do dagbewanyi etọn hia mí wutu. Nugbo ehe finflin na gọalọna mí ma nado lẹzun glòlò-jlatọ.—Matiu 26:33-35, 69-75.
18. Nukun tẹwẹ Jehovah nọ yí do pọ́n goyiyi?
18 “Sakla wẹ nọ jẹnukọnna husudo, ayiha [goyiyi tọn] nọ jẹnukọnna aijijẹ,” wẹ Biblu dọna mí. Etẹwutu? Jehovah na gblọndo dọmọ: “Goyiyi . . . wẹ yẹn gbẹwanna.” (Howhinwhẹn lẹ 8:13; 16:18) Abajọ Jehovah do gblehomẹ na “ayiha sinsinyẹn ahọlu Assilia tọn tọn, po gigo goyiyi nukun etọn tọn po” wutu! (Isaia 10:12) Jehovah hẹn ẹn nado dogbè. To madẹnmẹ, aihọn Satani tọn blebu, to pọmẹ hẹ nukọntọ goyitọ, glòlò-jlatọ etọn lẹ, yèdọ yinukundomọ po mayinukundomọ po, na yin hinhẹn nado dogbè ga. Na mí ni ma hodo apajlẹ tasinsinyẹn kẹntọ Jehovah tọn lẹ tọn gbede blo!
19. Linlẹn tẹ mẹ wẹ omẹ Jiwheyẹwhe tọn lẹ nọ doawagun bosọ nọ gbọṣi whiwhẹnọ-yinyin mẹ te?
19 Klistiani nugbo lẹ tindo whẹwhinwhẹ́n lẹpo nado doawagun dọ yé yin devizọnwatọ Jehovah tọn lẹ. (Jẹlemia 9:24) To ojlẹ dopolọ mẹ, yé tindo whẹwhinwhẹ́n lẹpo nado gbọṣi whiwhẹnọ-yinyin mẹ. Etẹwutu? Na “omẹ pó wẹ waylan, bosọ whete do gigo Jiwheyẹwhe tọn go.” (Lomunu lẹ 3:23) Enẹwutu nado whlá teninọ mítọn taidi devizọnwatọ Jehovah tọn lẹ, mí dona tindo pọndohlan dopolọ hẹ apọsteli Paulu, he dọ dọ “Klisti Jesu wá aihọn he mẹ nado whlẹn ylandonọ; mẹhe mẹ yẹn yin gángánsu te.”—1 Timoti 1:15.
20. Nawẹ Jehovah nọ whlá omẹ etọn lẹ gbọn todin, podọ nawẹ e na whlá yé gbọn to sọgodo?
20 Na omẹ Jehovah tọn lẹ ko yí homẹhunhun do sisẹ́ nujlomẹ yede titi tọn lẹ do apadopo nado sọgan ze ojlo Jiwheyẹwhe tọn do otẹn tintan mẹ wutu, mí sọgan deji dọ Jehovah na to yé whlá zọnmii to gbigbọ-liho. Mí sọ sọgan deji dọ to whenuena nukunbibia daho lọ na gbajẹgbonu, Jehovah na whlá omẹ etọn lẹ, e ma yin to gbigbọ-liho kẹdẹ gba ṣigba to agbasa-liho ga. To whenuena yé na ko biọ aihọn yọyọ Jiwheyẹwhe tọn mẹ, yé na penugo nado dawhá jẹgbonu dọmọ: “Pọ́n ẹn, ehe wẹ Jiwheyẹwhe mítọn; míwlẹ ko nọtepọn ẹn, e nasọ whlẹn mí. [Jehovah] wẹ ehe: míwlẹ ko nọtepọn ẹn, mí na to ayajẹ, homẹ mítọn nasọ to hùnhùn to whlẹngán etọn mẹ.”—Isaia 25:9.
Be Hiẹ Flin Ya?
• Nawẹ Ahọlu Davidi po Jesu Klisti po yin whiwhla gbọn?
• Nawẹ omẹ Jehovah tọn lẹ nọ yin whiwhla gbọn to egbehe?
• Naegbọn mí ma dona yin ṣejannabinọ?
• Naegbọn mí sọgan doawagun bosọ gbọṣi whiwhẹnọ-yinyin mẹ?
[Yẹdide lẹ to weda 9]
Nawẹ Jehovah whlá Davidi po Jesu po gbọn?
[Yẹdide lẹ to weda 10, 11]
Aliho tẹlẹ mẹ wẹ omẹ Jiwheyẹwhe tọn lẹ nọ yin whiwhla to gbigbọ-liho te to egbehe?
[Yẹdide lẹ to weda 12]
Dile etlẹ yindọ mí nọ doawagun dọ mí yin devizọnwatọ Jehovah tọn, mí dona gbọṣi whiwhẹnọ-yinyin mẹ