Opodo Ylanwiwa Tọn Na Wá Dandan!

JIWHEYẸWHE na mí Ohó gbọdo etọn he do nuhewutu gbẹtọ lẹ nọ wà nuylankan hia mí. E ko sọ na mí mẹdekannujẹ nudide bibasi tọn po nugopipe nado do mawazẹjlẹgo hia po, bo gbọnmọ dali hẹn ẹn yọnbasi na mí nado basi nudide ma nado wà nuylankan. (Deutelonomi 30:15, 16, 19) Enẹwutu, po nugopipe ehelẹ po, mí sọgan doayi mẹwhinwhàn agọ̀ depope he mí sọgan tindo go bo ze afọdide he sọgbe nado basi vọjlado. Eyin mí dapana nuylankan wiwà, e na hẹn ayajẹ wá na mí po mẹhe lẹdo mí lẹ po to godo mẹ.—Psalm 1:1.

Etomọṣo, mahopọnna lehe dopodopo mítọn na dovivẹnu nado duto nuylankan wiwà ji sọ, nuylankan he gbẹtọvi lẹ nọ wà na gbẹ́ to susudeji to aihọn lọ mẹ. Biblu na avase dọmọ: “Hiẹ ni yọ́n ehe, dọ to azán godo tọn lẹ mẹ, ojlẹ awusinyẹn tọn he vẹawu nado pehẹ lẹ na wá tin.” Nado do nuhe na hẹn azán lọ lẹ “vẹawu nado pehẹ” hia, e zindonukọn dọmọ: “Gbẹtọ lẹ na yin wanyina mẹdetiti tọ́, wanyina akuẹtọ, mẹdezedagatọ, saklanọ, nùzantọ, tolivẹtọ do mẹjitọ go, mayọndagbenọ, nugbomadọtọ, owanyi jọwamọ tọn matindotọ, mẹhe ma nọ tindo gbigbọ gbekọndopọ tọn, mẹhẹngbletọ, wazẹjlẹgonọ, kanylantọ, mẹhe ma tindo owanyi na dagbewà, mẹdehiatọ, tasinyẹntọ, mẹhe nọ gbọn kikla dali yigo, wanyina gbẹdudu tọ́ kakati nido yin wanyina Jiwheyẹwhe tọ́, yé tindo awusọhia mẹdezejo na Jiwheyẹwhe tọn ṣigba yé mọ́n huhlọn etọn; podọ omẹ ehelẹ dè wẹ hiẹ ni joagọ sọn.”—2 Timoti 3:1-5.

Vlavo hiẹ na ko doayi hogbe lọ “azán godo tọn lẹ” go to ohó dọdai tọn he tin to aga lọ mẹ. Etẹwẹ e zẹẹmẹdo na we? Dile e yin nukunnumọjẹemẹ to paa mẹ do, eyin yè dọ “azán godo tọn lẹ,” e nọ dohia dọ nude jlo na wá vivọnu. Etẹwẹ e sọgan yin? Pọ́n nuhe Jiwheyẹwhe dopagbe etọn lẹ to Ohó etọn mẹ.

Mẹylankan lẹ na yin sinsánsẹ mlẹnmlẹn.

“Na whenu pẹẹde, mẹylankan lẹ ma na tin ba: Nugbo, hiẹ na yí sọwhiwhe do lẹn otẹn etọn pọ́n, e ma nasọ tin. Ṣigba homẹmimiọnnọ lẹ na dugu aigba tọn; yé na hẹn homẹhun yede to jijọho susu mẹ.”—PSALM 37:10, 11.

‘OKLUNỌ to hihọ́-basina yé he yiwanna ẹn lẹ: ṣigba mẹylankan lẹpo wẹ e na husudo.’—PSALM 145:20.

Awusinyẹn ma nasọ tin ba.

‘E na whlẹn agbátọnọ lọ whenu e to awhádo; oyànọ ga, podọ ewọ he ma tindo alọgọnamẹtọ de. Ewọ na fli ayiha yetọn sọn awusinyẹn po danuwiwa po mẹ.’—PSALM 72:12, 14.

“Nudida lọsu na ede nido yin hinhẹn jẹ mẹdekannu sọn afanumẹ-yinyin na gbigble mẹ bo tindo mẹdekannujẹ gigonọ he yin ovi Jiwheyẹwhe tọn lẹ tọn.”—LOMUNU LẸ 8:21.

Nuhudo gbẹtọ lẹ tọn na yin pekọhẹnwana to agbasa-liho.

“Yé na sinai omẹ dopodopo to vẹntin etọn glọ podọ to ovòtin etọn glọ; podọ mẹde ma nasọ hẹn yé savò gba.”—MIKA 4:4.

“Yé na gbá ohọ̀, bosọ nọ nọ̀ yé mẹ, yé na do vẹngle, bosọ dù sinsẹ́n yetọn. Yé ma na gbá ohọ̀ bọ mẹdevo na nọ̀ e mẹ; yé ma na do bọ mẹdevo na dù: na dile azán atin tọn te wẹ azán omẹ ṣie lẹ tọn na te, omẹ ṣie lẹ na dugbẹ azọ́n alọ yetọn mẹ tọn dẹn.”—ISAIA 65:21, 22.

Whẹdida dodo na gbayipe.

“To whelọnu lo, na nugbo tọn, be Jiwheyẹwhe ma na hẹn whẹdida dodo nado yin bibasi na mẹdide etọn lẹ he to awhádo hlan ẹn to okle po ozán po . . . ? Yẹn dọna mì dọ, Ewọ na hẹn whẹdida dodo nado yin bibasi na yé po awuyiya po.”—LUKU 18:7, 8.

‘OKLUNỌ yiwanna whẹdida, bo masọ nọ gbẹ́ mẹwiwe etọn lẹ dai; yè na nọ yí yé whlá kakadoi.’—PSALM 37:28.

Dodowiwa na diọtẹnna ṣejannabi.

“Mẹhe to aihọn mẹ lẹ na plọn dodo.”—ISAIA 26:9.

“Kẹdẹdi opagbe etọn, olọn yọyọ lẹ po aigba yọyọ de po tin he míwlẹ to tenọpọn, podọ ofi ehelẹ wẹ dodowiwa na nọ nọ̀.”—2 PITA 3:13.

Gbẹtọ lẹ to Didiọ —Etlẹ Yin to Alọnu Din

Ayihaawe ma tin dọ opagbe mọnkọtọn lẹ na hẹn homẹ mímẹpo tọn hùn. Ṣigba jide tẹwẹ tin dọ yé na mọ hẹndi? Na nugbo tọn to alọnu din, mí tindo kunnudenu he dohia dọ opagbe Jiwheyẹwhe tọn lẹ na mọ hẹndi. Kunnudenu tẹwẹ? Enẹ wẹ nugbo lọ dọ gbẹtọ livi susu lẹdo aihọn pé to egbehe ko tindo kọdetọn dagbe na yé duto ṣejannabi, mawé, kavi jijọ danuwiwa tọn ji bo ko plọn nado yin nugbodọtọ, jijọho-dintọ, podọ homẹdagbenọ wutu. To egbehe, Kunnudetọ Jehovah tọn lẹ he sọha yetọn ko hugan livi ṣinawe yin mẹmẹsunnu lẹdo aihọn pé de he duto aliglọnnamẹnu he sinmẹ agbasa tọn, akọ̀ ṣinṣinyan, owanyi akọta tọn, tonudidọ, po ninọmẹ akuẹzinzan tọn po nọ hẹnwa lẹ ji, ehe ko hẹn wangbẹna, danuwiwa, po hùnsọndai susu po wá to whenuho gbẹtọvi tọn mẹ.a Nugbo lọ dọ diọdo mọnkọtọn lẹ to wiwá aimẹ to egbehe yin kunnudenu de nado yise dọ opagbe Jiwheyẹwhe tọn lẹ na yin hinhẹndi to aliho he gbloada mẹ.

Ṣigba, etẹwẹ nọ zọ́n bọ diọdo mọnkọtọn lẹ do nọ wá aimẹ? Opagbe Biblu tọn devo he yin kinkandai gbọn yẹwhegán Isaia dali bẹ gblọndo lọ hẹn. E wlan dọmọ:

“Ohla ga na nọ nọhẹ lẹngbọvu dopọ, kinnikinni ovu na mlọnai hẹ gbọgbọẹvu; oyìnvu po kinnikinni po, po kanlin yìnyìn po na nọ nọpọ́; yọpọvu nasọ hẹn yé dánpe. . . . Kinnikinni nasọ dù amà di oyìnsú. Ovi to anọ́nu na daihun to odò lopa tọn ji, ovi he yè desọn anọ́nu na yí alọ etọn do oslò basilie tọn mẹ. Yé ma na gbleawunamẹ, mọ yé ma to na gbà sudo to osó wiwe ṣie lẹpo ji: na aihọn na gọ́ na nuyọnẹn OKLUNỌ tọn, dile osin ṣinyọ́n ohù ji do.”—Isaia 11:6-9.

Be ojlẹ he mẹ kanlin po gbẹtọ po na nọgbẹ̀ to kọndopọ mẹ hodọ wẹ dọdai ehe te poun ya? Lala, e bẹ nususu hẹn hugan mọ. Doayi e go dọ adà godo tọn dọdai lọ tọn do nuhe na hẹn diọdo lọ wá hia dọmọ: “Aihọn na gọ́ na nuyọnẹn OKLUNỌ tọn.” Be oyọnẹn Jiwheyẹwhe tọn nọ diọ jijọ kanlin lẹ tọn wẹ ya? Lala. Ṣigba e sọgan diọ gbẹtọ lẹ podọ e nọ wàmọ! Dọdai ehe dohia dọ mẹhe sọgan ko tindo walọ kanlinjọmẹ tọn lẹ na diọ bo wleawuna jẹhẹnu Klisti tọn nkọ lẹ na yé plọn bo yí nuhe Biblu dọ lẹ do yizan mẹ wutu.

Di apajlẹ, mì gbọ mí ni pọ́n nuhe jọ do Pedro go.b E lẹndọ emi to avùnho na whẹdida dodo to whenue e biọ ogbẹ́ nukunbianamẹtọ lẹ tọn de mẹ. To whenue e mọ azọ́nplọnmẹ yí godo, e yin gbedena nado yí bọmbu do và ponọ-pá de sudo. Dile e to awuwle nado wàmọ, e yin wiwle. Pedro nọ gànpamẹ na osun 18 to fie e zindonukọn to yanwle etọn mẹ te. To ojlẹ enẹ mẹ, asi Pedro tọn jẹ Biblu plọn hẹ Kunnudetọ Jehovah tọn lẹ ji. To whenuena Pedro tọ́n sọn gànpamẹ, ewọ lọsu jẹ Biblu plọn ji podọ nuhe e plọn gando Jehovah Jiwheyẹwhe go whàn ẹn nado basi diọdo ayidego tọn to walọ po pọndohlan etọn gando ogbẹ̀ go po mẹ. Pedro dọmọ: “N’dopẹna Jehovah dọ n’ma hù mẹde to owhe he mẹ n’yin nukunbianamẹtọ te lẹ mẹ. Todin, n’nọ yí ohí gbigbọ Jiwheyẹwhe tọn, yèdọ Biblu zan nado lá owẹ̀n jijọho nugbo po whẹdida dodo po tọn na gbẹtọ lẹ—enẹ wẹ wẹndagbe Ahọluduta Jiwheyẹwhe tọn.” Pedro tlẹ dla ponọ-pá he e basi tito nado vasudo lọ pọ́n nado má owẹ̀n jijọho po aihọn he mẹ danuwiwa ma na tin te po tọn hẹ gbẹtọ lẹ.

Nuyiwadomẹji sinsinyẹn he Ohó Jiwheyẹwhe tọn sọgan tindo do gbẹtọ lẹ ji nọ yidogọna whẹwhinwhẹ́n he mí tindo nado yise to opagbe Jiwheyẹwhe tọn mẹ dọ opodo ylanwiwa lẹpo tọn na wá dandan. Mọwẹ, gbẹtọ lẹ ma na wà nuylankan kakadoi, ṣigba yé na diọ do dagbe ji. To madẹnmẹ, Jehovah na de dowatọ ylanwiwa tọn, Satani Lẹgba sẹ̀, yèdọ mẹhe to anadena aihọn lọ to aliho mayinukundomọ tọn mẹ. Biblu dọmọ: “Aihọn lọ pete tin to huhlọn mẹylankan lọ tọn glọ.” (1 Johanu 5:19) Ṣigba, to madẹnmẹ, ewọ ma na tin ba. Mẹhe gbẹ́ po tasinsinyẹn po ma nado jo walọ ylankan yetọn do lẹ lọsu ma na tin ba. Lehe gbẹninọ to ojlẹ dagbe mọnkọtọn mẹ na jiawu do sọ!

Etẹwẹ mẹde dona wà nado duvivi sọgodo mọnkọtọn de tọn? Flindọ “nuyọnẹn OKLUNỌ tọn” wẹ to diọdo hẹnwa gbẹzan gbẹtọ lẹ tọn mẹ to egbehe podọ ewọ wẹ na hẹn diọdo wá lẹdo aihọn pé to madẹnmẹ. Gbọn oyọnẹn he pegan Biblu tọn tintindo po yíyí i zan po dali—dile Pedro wà do—hiẹ lọsu sọgan tindo todido nado nọgbẹ̀ to aihọn he mẹ “dodowiwa na nọ nọ̀” de mẹ. (2 Pita 3:13) Enẹwutu, mí dotuhomẹna we nado yí dotẹnmẹ hundote he gbẹ́ tin-to-aimẹ lọ zan nado yọ́n Jiwheyẹwhe po Jesu Klisti po, na ehe wiwà na zẹẹmẹdo ogbẹ̀ madopodo na we.—Johanu 17:3.

[Nudọnamẹ odò tọn]

[Blurb on page 9]

Hiẹ lọsu sọgan tindo todido nado nọgbẹ̀ to aihọn he mẹ “dodowiwa na nọ nọ̀” de mẹ.—2 PITA 3:13