• ‘Babilọni Họ́!’
    Dọdai Isaia Tọn—Hinhọ́n de Na Gbẹtọvi Lẹpo I

    •  8. Dile e yin dọdai etọn dọ do, nawẹ Babilọninu lẹ yinuwa gbọn, dile etlẹ yindọ kẹntọ yetọn lẹ tin to adó lọ lẹ godo?

      8 Dile zinvlu jẹ didó ji to ozán nugbajẹmẹji tọn enẹ mẹ, obu depope ma wá ayiha Babilọninu lẹ tọn mẹ gba. Owhe kanweko donu awe delẹ jẹnukọn, Isaia dọ dọdai dọmọ: “Wleawu tafo tọn dai, họ́ali to atọ̀họ̀ ji, dù, nù.” (Isaia 21:5a) Mọwẹ, Ahọlu Bẹlṣazali saklanọ lọ to hùnwhẹ de basi. Oján lẹ ko yin awú etọn wle na fọtọ́n omẹ klogán-klogán etọn lẹ, gọna asi susu po asi mọwhlá etọn lẹ po. (Daniẹli 5:1, 2) Agọ́dutọ lọ lẹ yọnẹn dọ awhànfuntọ lẹ tin to gbonu adó lẹ tọn, ṣigba yé yise dọ tòdaho yetọn ma sọgan yin awhàn etọn gbà. Adó daho etọn lẹ po osinwhín sisosiso etọn po sọawuhia nado hẹn awhàngbigba do e ji vẹawu; e ma sọgan wá linlẹn mẹ gbede na yẹwhe susu etọn lẹ wutu. Enẹwutu mì gbọ yé ni to ‘dùdù, bo to nùnù!’ Bẹlṣazali nùahànmú, podọ vlavo e mayin ewọ kẹdẹ wẹ wàmọ gba. Ninọmẹ ahànnumu ahọluzọnwatọ nukundeji lẹ tọn yin didohia gbọn nuhudo lọ nado fọ́n yé dali, dile hogbe Isaia tọn he bọdego lẹ dohia to dọdai-liho do.

       9. Naegbọn e lẹzun dandannu nado “sámido sagbà”?

      9 “Fọ́n, mì ahọvi lẹ, mì sámido sagbà mìtọn.” (Isaia 21:5b) Agọ́ lọ wá vivọnu to ajijimẹ. Ahọvi lẹ dona fọ́n yedelẹ! Yẹwhegán Daniẹli yọnhonọ lọ ko yin yiylọ wá otẹn lọ mẹ, bọ e mọ lehe Jehovah hẹn Bẹlṣazali Ahọlu Babilọni tọn biọ ninọmẹ obu tọn de mẹ he taidi dehe Isaia basi zẹẹmẹ etọn. Omẹ klogán-klogán ahọlu lọ tọn lẹ biọ bẹwlu mẹ dile awhànpa Media, Pẹlsia, po Elaminu lẹ tọn po gbà avùnlọyinu tòdaho lọ tọn lẹ. Babilọni họ́ po awuyiya po! Nalete, etẹwẹ e zẹẹmẹdo nado “sámido sagbà”? To whedelẹnu Biblu nọ dlẹnalọdo ahọlu akọta de tọn taidi sagbà etọn na ewọ wẹ yin avùnlọyitọ po hihọ́tọ aigba lọ tọn po.b (Psalm 89:18) Enẹwutu wefọ Isaia tọn ehe sọgan to dọdai dọ na nuhudo lọ na ahọlu yọyọ de. Etẹwutu? Na Bẹlṣazali yin hùhù “to ozán nẹ mẹ” wutu. Gbọnmọ dali, nuhudo tin nado “sámido sagbà,” kavi dè ahọlu yọyọ de.—Daniẹli 5:1-9, 30.

  • ‘Babilọni Họ́!’
    Dọdai Isaia Tọn—Hinhọ́n de Na Gbẹtọvi Lẹpo I

    • b Zẹẹmẹ-basitọ Biblu tọn susu wẹ lẹndọ hogbe lọ “sámido sagbà” dlẹnalọdo nuwiwa awhànfunfun hohowhenu tọn heyin amìsisádo sagbà ayúnọ lẹ jẹnukọnna awhànfunfun nado sọgan glọnalina suhugan opẹ́n lẹ tọn. To whenuena e yindọ zẹẹmẹ ehe sọgan yin nugbo tọn, e dona yin ayidego dọ to ozán he mẹ tòdaho lọ jai te, Babilọninu lẹ ma tlẹ tindo whenu nado yíavunlọ gba, nẹmunẹmu wẹ nado wleawuna awhànfunfun gbọn amìsisádo sagbà yetọn lẹ dali!