Kanbiọ lẹ sọn Wehiatọ lẹ Dè

Be anademẹ Jiwheyẹwhe tọn heyin kinkàndai to Jẹlemia 7:16 mẹ lọ zẹẹmẹdo dọ Klistiani lẹ ma dona hodẹ̀ na mẹde he ko yin didesẹ sọn agun Klistiani tọn mẹ, na ewọ yin ylandonọ he ma lẹnvọjọ de wutu wẹ ya?

Whenuena e lá whẹdida etọn sọta Juda nugbomadọtọ lọ godo, Jehovah dọna Jẹlemia dọmọ: “Hiẹ hodẹ̀ na omẹ helẹ blo, mọ hiẹ sọ basi avùngbọ̀ hlan mi blo: na yẹn ma na sè we gba.”—Jẹlemia 7:16.

Naegbọn Jehovah gbẹ́ na Jẹlemia ma nado hodẹ̀ na Islaelivi lẹ? E họnwun dọ na Osẹ́n etọn hinhẹngba glanglan yetọn wutu wẹ. To gbangba podọ matin winyan, yé “to ajojẹ, to mẹhu, bo to ayọde, bo yí lalo do to whiwhle, bo to nuwhẹ́nwan mẹ̀ hlan Baali, bo sọ to zọnlinzin hodo yẹwhe devo lẹ.” Taidi kọdetọn de, Jehovah dọna juvi he matindo yise ehelẹ dọmọ: “Yẹn na sọ ze mì dlangbé sọn nukun ṣie mẹ, dile yẹn ko ze mẹmẹsunnu mìtọn lẹpo dlangbé do, yèdọ okún Eflaimi tọn lẹpo pete.” Na nugbo tọn, e na yin nuhe ma sọgbe dọ Jẹlemia, kavi mẹdevo depope, ni hodẹ̀ hlan Jehovah nado hẹn ẹn diọ whẹdida etọn.—Jẹlemia 7:9, 15.

To kọndopọ mẹ hẹ ehe, apọsteli Johanu kanwe gando dẹ̀hiho he sọgbe hlan Jiwheyẹwhe go. To bẹjẹeji, e hẹn Klistiani lẹ deji dọmọ: “eyin mí biọ nudepope kẹdẹdi ojlo etọn, e se mítọn.” (1 Johanu 5:14) Enẹgodo, gando dẹ̀hiho do ota mẹdevo lẹ tọn mẹ go, Johanu zindonukọn dọmọ: “Eyin mẹde mọ mẹmẹsunnu etọn waylando de he ma yin hlan okú gba, e na biọ, ewọ nasọ yí ogbẹ̀ na ẹn na yé he ma waylando hlan okú lẹ. Ylando de tin hlan okú: yẹn ma dọ ewọ do hodẹ̀ na ẹn gba.” (1 Johanu 5:16). Jesu sọ dọho gando ylando he “yè ma to na jona” lọ go, enẹ wẹ ylando do gbigbọ wiwe go.—Mat. 12:31, 32.

Be ehe zẹẹmẹdo dọ mẹhe yin didesẹ sọn agun Klistiani tọn mẹ na ylando bo ma tindo lẹnvọjọ lẹpo wẹ waylando hlan okú bo gbọnmọ dali ma dona yin nùdego to odẹ̀ mẹ wẹ ya? Ehe ma dona yin whẹho lọ na dandan tọn gba, na sẹ́nhẹngba enẹlẹ ma nọ yin ylando “hlan okú” to ninọmẹ delẹ mẹ. Na taun tọn, e vẹawu nado yọ́n ylando hlan okú. Apajlẹ tangan dopo wẹ yin Ahọlu Manassẹ Juda tọn. E ze agbà lẹ dote na yẹwhe lalo tọn lẹ, e yí ovi etọn titi lẹ do sanvọ́, e tindo mahẹ to afinyọnnuwiwa mẹ, e sọ ze boṣiọ pipà de do tẹmpli Jehovah tọn mẹ. Na nugbo tọn, Biblu dọ dọ Manassẹ po gbẹtọ lẹ po wà “enẹ he yin oylan hú ehe akọta lẹ lọ wà, mẹhe OKLUNỌ súdo to ovi Islaeli tọn lẹ nukọn.” Na ehe lẹpo wutu, Jehovah sayana Manassẹ gbọn ewọ didohlan biblá yì kanlinmọgbenu to Babilọni dali. —2 Ahọlu lẹ 21:1-9; 2 Otannugbo lẹ 33:1-11.

Be ylando Manassẹ tọn lẹ, lehe yé tlẹ sinyẹn taun do sọ, yin wunmẹ hlan okú tọn lẹ wẹ ya? E họnwun dọ e ma yinmọ, na kandai lọ zindonukọn nado dọ, gando ewọ go dọ: “Whenuena e tin to nukunbia mẹ, e din OKLUNỌ Jiwheyẹwhe etọn, bo sọ whiwhẹ ede tlala to Jiwheyẹwhe otọ́ etọn lẹ tọn nukọn. E sọ hodẹ̀ hlan ẹn, e sọ yin mẹvivẹ sọn e de, e sọ sè ovẹ̀ etọn, bo sọ vọ́ ẹ hẹnwa Jelusalẹm biọ ahọludu etọn mẹ. Whenẹnu wẹ Manassẹ yọnẹn dọ OKLUNỌ ewọ wẹ Jiwheyẹwhe.”—2 Otannugbo lẹ 33:12, 13.

Enẹwutu, mí ma dona wá tadona niyaniya lọ kọ̀n dọ mẹde dona ko waylando okú tọn, kiki na e yin didesẹ sọn agun mẹ wutu gba. Nuhe yin ninọmẹ omẹ lọ tọn to ahun mẹ na taun tọn sọgan yí whenu nado sọawuhia. Na nugbo tọn, e nọ saba yin didọ dọ dopo to lẹndai mẹdesẹ sọn agun mẹ tọn lẹ wẹ yin nado hẹn whẹhutọ lọ gọwá ede mẹ podọ nado lẹnvọjọ bo sọ lẹkọ wá po jide po.

Whenuena e yindọ omẹ lọ ma sọ to agun mẹ ba, diọdo depope to ayiha mẹ podọ to walọyizan mẹ sọgan yin ayidego to tintan whenu gbọn mẹhe sẹpọ ẹ, taidi alọwlemẹ de kavi hagbẹ whẹndo tọn lẹ dali. Mẹhe to diọdo enẹ nkọ lẹ mọ sọgan wá tadona lọ kọ̀n dọ whẹhutọ lọ ma waylando hlan okú gba. Yé sọgan yin whinwhàn nado hodẹ̀ dọ ewọ ni sọgan mọ huhlọn yí sọn Ohó gbọdo Jiwheyẹwhe tọn mẹ podọ Jehovah ni yinuwa hlan whẹhutọ lọ to kọndopọmẹ hẹ ojlo Etọn.—Psalm 44:21; Yẹwhehodọtọ 12:14.

To whenuena e yindọ mẹdelẹ tlẹ sọgan doayi kunnudenu susu lẹ go he dohia dọ whẹhutọ lọ lẹnvọjọ, ehe sọgan nọ mayin whẹho lọ po agun lọ pete po gba. Yé sọgan yin ahunmẹduna, yin tuklado bo tlẹ yin hinhẹn dahli eyin yé wá to todo mẹde he to dẹ̀ho to gbangba do ota mẹhe to nuṣiwa lọ tọn mẹ. Na whẹwhinwhẹ́n ehelẹ wutu, mẹhe yin whinwhàn nado hodẹ̀ na ylandonọ lọ lẹ dona wàmọ to nuglọ kẹdẹ, bo jó afọdide he na bọdego lẹ dona mẹho azọngbannọ he to agun lọ mẹ lẹ.

[Yẹdide to weda 31]

Ylando sinsinyẹn Manassẹ tọn lẹ yin jijo na ẹn to whenuena e whiwhẹ ede to Jehovah nukọn

[Yẹdide/Asisa Yẹdide Tọn to weda 30]

Yin vivọ-basi sọn Illustrierte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s de