Kanbiọ lẹ sọn Wehiatọ lẹ Dè

Be hogbe Jesu tọn he tin to Matiu 19:10-12 mẹ lẹ dohia dọ mẹhe de nado gbọṣi tlẹnmẹ lẹ mọ nunina tlẹnmẹninọ tọn yí to aliho jiawu de mẹ wẹ ya?

Mì gbọ mí ni gbadopọnna ninọmẹ he mẹ Jesu donù tlẹnmẹninọ go te. To whenue Falesi lẹ wá e dè bo fọ́n whẹho gbẹdai tọn dote, Jesu hẹn nujinọtedo Jehovah tọn gando alọwle go họnwun. Dile etlẹ yindọ Osẹ́n lọ na dotẹnmẹ sunnu de nado wlan owe gbẹdai tọn de na asi etọn na e ko mọ ‘nuhe demẹpò’ de to ewọ mẹ wutu, e ma to mọ sọn whẹwhẹwhenu. (Deut. 24:1, 2) Enẹgodo, Jesu dọmọ: “Mẹdepope he gbẹ́ asi etọn dai, bọ e ma yin na whẹwhinwhẹ́n galilọ tọn wutu, bo wlealọ hẹ devo, e deayọ.”—Mat. 19:3-9.

To whenue devi lẹ sè mọ, yé dọmọ: “Eyin mọ wẹ whẹho lọ na sunnu de po asi etọn po, be e ma yin nuyọnẹnnu nado wlealọ.” Jesu gblọn dọmọ: “E ma yin mẹlẹpo wẹ nọ natẹn ehe to gbẹzan yetọn mẹ gba, adavo mẹhe tindo nunina lọ lẹ kẹdẹ. Na ojọ̀ delẹ tin he yin jiji domọ sọn adọ̀ onọ̀ yetọn tọn mẹ, ojọ̀ delẹ sọ tin he yin hinhẹn zun ojọ̀ gbọn gbẹtọ lẹ dali, podọ ojọ̀ devo lẹ tin he hẹn yede zun ojọ̀ na ahọluduta olọn tọn wutu. Mì gbọ ewọ he sọgan natẹn ehe ni natẹn ẹn.”—Mat. 19:10-12.

To paa mẹ, mẹhe yin ojọ̀ lẹ nọ yin jiji domọ na yé tindo oblọ de to whenue yè ji yé, kavi nọ lẹzun ojọ̀ gbọn kosọ ylankan de dali, kavi na yè sá yé wutu. Ṣigba, mẹdevo lẹ tin he hẹn yede zun ojọ̀ sọn ojlo mẹ wá. Dile etlẹ yindọ yé sọgan wlealọ, yé nọ duto yede ji bo nọ gbọṣi tlẹnmẹ “na ahọluduta olọn tọn wutu.” Taidi Jesu, yé de nado gbọṣi tlẹnmẹ na yé nido sọgan ze yede jo na lizọnyizọn Ahọluduta lọ tọn. Yé ma yin jiji po nunina tlẹnmẹninọ tọn po, mọjanwẹ nunina enẹ ma yin nina yé do niyẹn. Na nugbo tọn, yé natẹn ẹn wẹ. Enẹ wẹ yindọ yé desọn ojlo mẹ nado wleawuna nunina enẹ.

To kọndopọ mẹ hẹ nuhe Jesu dọ, apọsteli Paulu basi zẹẹmẹ dọ Klistiani lẹpo—yèdọ tlẹnnọ kavi mẹhe wlealọ—sọgan sẹ̀n Jiwheyẹwhe dile e jẹ do, ṣigba mẹhe ‘magbe to ahun yetọn mẹ’ nado gbọṣi tlẹnmẹ lẹ wẹ “wà dagbe hugan.” Gbọnna? Mẹhe wlealọ lẹ dona yí delẹ to whenu po huhlọn yetọn po mẹ zan nado hẹn homẹ alọwlemẹ yetọn tọn hùn podọ nado penukundo e go. To alọ devo mẹ, Klistiani tlẹnnọ lẹ sọgan yí yede zan to sinsẹ̀nzọn Oklunọ tọn mẹ matin azọngban whẹndo tọn mọnkọtọn. Yé nọ pọ́n ninọmẹ yetọn hlan taidi “nunina” de sọn Jiwheyẹwhe dè.—1 Kọl. 7:7, 32-38.

Enẹwutu, sọgbe hẹ Owe-wiwe lẹ, Klistiani de ma nọ mọ nunina tlẹnmẹninọ tọn yí to aliho jiawu de mẹ. Kakatimọ, e nọ wleawuna nunina enẹ gbọn gbigbọṣi tlẹnmẹ dali nado sọgan ze Ahọluduta lọ do otẹn tintan mẹ matin ayihafẹsẹnamẹnu depope. To egbehe, Klistiani susu ko magbe to ahun yetọn mẹ nado gbọṣi tlẹnmẹ na whẹwhinwhẹ́n enẹ wutu, podọ mẹhe pò lẹ na wà dagbe nado yin asisa tulinamẹ tọn de na yé.