Hiẹ Sọgan Lùn Yujẹhọn Tọ́n

TO OJLẸ awusinyẹn tọn ehelẹ mẹ, mẹsusu wẹ to oyà nuhahun he taidi yujẹhọn lẹ tọn ji. Ṣogan, na nuhe dù Klistiani lẹ, owanyi na Jiwheyẹwhe po nugbonọ-yinyin na nunọwhinnusẹ́n etọn lẹ po nọ gọalọna yé nado doakọnnanu. Gbọnna? Gblọndo lọ sọgan yin mimọ to oló he Jesu Klisti dó de mẹ. E yí devi tonusetọ etọn lẹ jlẹdo “gbẹtọ nuyọnẹntọ de go, he gbá ohọ̀ etọn do osé ji.” Jesu dọmọ: “Whenuena jikun ja, bọ asisa lẹ fọ́n, bọ jẹhọn lẹ yìn, bo hò jẹ ohọ̀ lọ ji: e ma jai: na yè do e do osé ji wutu.”—Matiu 7:24, 25.

Doayi e go dọ mahopọnna dọ dawe he yin nùdego to oló lọ mẹ yin nuyọnẹntọ, e gbẹ́ pehẹ nuhahun—he yin tenọna gbọn jikun, asisa, po jẹhọn ylankan lẹ po dali. Gbọnmọ dali, Jesu ma to didọ dọ devi etọn lẹ na vò sọn nuhahun lẹpo si bo na duvivi gbẹzan jijọho po blẹomẹninọ po tọn to whepoponu gba. (Psalm 34:19; Jakobu 4:13-15) Ṣigba e dohia dọ devizọnwatọ nugbonọ Jiwheyẹwhe tọn lẹ sọgan wleawudai bosọ pehẹ nuhahun po hunyanhunyan he taidi yujẹhọn ehelẹ po.

Jesu bẹ oló lọ jẹeji gbọn didọ dali dọmọ: ‘Mẹdepope he sè ohó ṣie helẹ, bosọ basi yé, yè na jlẹ ẹ do gbẹtọ nuyọnẹntọ de go, he gbá ohọ̀ etọn do osé ji.’ E họnwun dọ, Jesu ma to hodọ gando ohọ̀ paa lẹ gbigbá go gba, ṣigba gando awuwiwlena gbẹzan mítọn go. Mẹhe setonuna ohó Klisti tọn lẹ nọ yí wuntuntun zan bo nọ do lẹnpọn dagbe hia. Yé nọ ze mẹwhinwhàn po nuwiwa yetọn lẹ po sinai do osé gángán he yin nuplọnmẹ Klisti tọn lẹ ji gbọn nuhe yin pinplọn yé lẹ yíyí do yizan mẹ dali. E jẹna ayidego dọ, osé yẹhiadonu tọn ehe ma nọ yin mimọ to gbangba. Dawe he yin nùdego to oló lọ mẹ dona kùndò “yì siso” nado mọ ẹn. (Luku 6:48) Mọdopolọ, devi Jesu tọn lẹ to azọ́n sinsinyẹn wà nado wleawuna jẹhẹnu dẹn-to-aimẹ lẹ he nọ hẹn yé dọnsẹpọ Jiwheyẹwhe dogọ.—Matiu 5:5-7; 6:33.

Etẹwẹ nọ jọ eyin nuhahun he taidi yujẹhọn lẹ wá whlé dolilo dodonu Klistiani tọn he yin hodotọ Jesu tọn lẹ tọn pọ́n? Tonusise sọn ahun mẹ wá yetọn na nuplọnmẹ Klisti tọn lẹ gọna jẹhẹnu Klistiani tọn yetọn lẹ nọ sọawuhia nado yin asisa huhlọn tọn to nuhahun mọnkọtọn lẹ whenu. Podọ dehe tlẹ sọ yin nujọnu hugan wẹ yindọ, e na hẹn yé dote to yujẹhọn Amagẹdọni tọn he to unklẹn ja lọ whenu. (Matiu 5:10-12; Osọhia 16:15, 16) Mọwẹ, gbọn nuplọnmẹ Klisti tọn lẹ hihodo dali, mẹsusu to whlepọn he taidi yujẹhọn lẹ luntọ́n po kọdetọn dagbe po. Hiẹ lọsu sọgan wàmọ ga.—1 Pita 2:21-23.