E Wà Azọ́njiawu lẹ, Ṣigba Yin Gbigbẹdai to Nazalẹti

Jesu ko wà nususu to azán lọ ji. To whenue e zingbejizọnlin sọn lẹdo Dekapole tọn mẹ godo, e hẹnazọ̀ngbọna nawe he to hùndi lọ bo fọ́n viyọnnu Jailu tọn sọnku. Amọ́, azán lọ ma ko wá vivọnu. Dile Jesu tọ́n sọn owhé Jailu tọn gbè, dawe nukuntọ́nnọ awe hodo e bo to awhádo dọmọ: “Wàlẹblanuna mí, hiẹ Visunnu Davidi tọn.”—Matiu 9:27.

To whenue dawe ehelẹ ylọ Jesu dọ “Visunnu Davidi tọn,” yé dohia dọ emi yise dọ Jesu wẹ na dugu ofìn Davidi tọn bo gbọnmọ dali yin Mẹsia lọ. Jesu yinuwa taidi mẹhe dovọ́na awhágbe yetọn, vlavo nado pọ́n eyin yé na sinyẹnlin, podọ nuhe yé wà niyẹn. To whenue Jesu biọ owhé de gbè, dawe awe lọ lẹ hodo e. Jesu kanse yé dọmọ: “Be mìwlẹ tindo yise dọ yẹn sọgan wà ehe ya?” Yé gblọn po jide po dọmọ: “Mọwẹ, Oklunọ.” To whenẹnu, Jesu doalọ nukun yetọn lẹ go bo dọmọ: “Na e ni yin wiwà hlan mì kẹdẹdi yise mìtọn.”—Matiu 9:28, 29.

To ajiji mẹ, yé jẹ numọ ji! Dile Jesu ko na anademẹ mẹdevo lẹ do wayi, e dọna yé ma nado lá nuhe ewọ wà pé. Ṣigba, yé gọ́ na ayajẹ sọmọ bọ yé dọho Jesu tọn pé gbọn filẹpo.

Dile dawe awe ehelẹ tọ́n jei, gbẹtọ lẹ hẹn dawe he yin unbọpẹnnọ na e tindo gbigbọ aovi tọn de wutu wá. Jesu yàn aovi lọ jẹgbonu bọ to afọdopolọji, dawe lọ jẹ hodọ ji. Awuji gbẹtọgun lọ lẹ bọ yé dọmọ: “Onú ehe nkọtọn depope ma ko yin mimọ to Islaeli mẹ pọ́n gbede.” Falesi lẹ lọsu to finẹ. Yé ma sọgan mọ́n azọ́njiawu ehelẹ, enẹwutu yé vọ́ owhẹ̀ he yé ko nọ sadokọna Jesu gando huhlọn he e nọ yizan go lọ dọ dọmọ: “Ogán aovi lẹ tọn wẹ e nọ yí do yàn aovi lẹ jẹgbonu.”—Matiu 9:33, 34.

Enẹgodo tlolo, Jesu lẹkọyi tòdaho etọn titi Nazalẹti mẹ, bọ devi etọn lẹ hodo e todin. To nudi owhe dopo die, e plọnmẹ to sinagọgu mẹ to finẹ. Nuhe e dọ lẹ jiawu na gbẹtọ lẹ to tintan whenu, ṣigba yé gblehomẹ to nukọn mẹ na nuplọnmẹ etọn wutu bo tẹnpọn nado hù i. Todin, Jesu tẹnpọn whladopo dogọ nado gọalọna kọmẹnu etọn dai tọn lẹ.

To Gbọjẹzangbe, e lẹkọyi sinagọgu mẹ nado plọnmẹ. Awuji mẹsusu bọ yé tlẹ to kinkanse dọmọ: “Fie wẹ dawe ehe hẹn nuyọnẹn ehe po azọ́n huhlọnnọ ehelẹ po sọn?” Yé dọmọ: “Be e ma yin visunnu whlẹpatọ lọ tọn die? Be e ma yin onọ̀ etọn wẹ nọ yin Malia, podọ nọvisunnu etọn lẹ wẹ Jakọbu, Josẹfu, Simọni, po Juda po ya? Podọ nọviyọnnu etọn lẹ, be yemẹpo ma tin tofi po mí po ya? To whelọnu lo, fie wẹ e hẹn onú ehe lẹpo sọn?”—Matiu 13:54-56.

Omẹ lọ lẹ mọdọ gbẹtọ paa de poun wẹ Jesu yin. Nuhe lẹn yé te wẹ yindọ: ‘Nukun mítọn mẹ fi wẹ e whẹ́n te, enẹwutu nawẹ e sọgan yin Mẹsia lọ gbọn?’ Taidi kọdetọn de, mahopọnna kunnudenu lọ lẹpo—gọna nuyọnẹn daho po azọ́n huhlọnnọ Jesu tọn lẹ po—yé gbẹ́ ẹ dai. Na hẹnnumẹ Jesu tọn lẹ lọsu jẹakọ hẹ ẹ ganji wutu, yé tlẹ dahli na etọn wutu, ehe zọ́n bọ e dọmọ: “Yẹwhegán de ma nọ gọ̀n ma doyẹyi adavo to otò etọn titi mẹ podọ to owhé etọn titi gbè.”—Matiu 13:57.

Na nugbo tọn, yise matindo yetọn paṣa Jesu. Enẹwutu, e ma wà azọ́njiawu depope to finẹ “adavo nado ze alọ etọn do vude to mẹhe to azọ̀njẹ lẹ mẹ ji bo hẹnazọ̀ngbọna yé.”—Malku 6:5, 6.