Matiu

9 Enẹwutu, to whenue e biọ tọjihun lọ mẹ, e dasá bo yì tòdaho etọn titi mẹ.+ 2 Bo pọ́n! yé hẹn dawe he to awukuzọ̀n jẹ de ja e dè he to aimimlọn to adọzan ji. To whenue Jesu mọ yise yetọn, e dọna awukuzọ̀njẹtọ lọ dọmọ: “Gboadọ, ovi ṣie! Ylando towe lẹ ko yin jijona we.”+ 3 Todin, delẹ to wekantọ lẹ mẹ to didọna yede dọmọ: “Dawe ehe to nùzan.” 4 Na Jesu yọ́n linlẹn yetọn lẹ wutu, e dọmọ: “Naegbọn mì do to nuylankan lẹ lẹn to ahun mìtọn mẹ?+ 5 Di apajlẹ, detẹ wẹ bọawu hugan, nado dọ dọ, ‘Ylando towe lẹ yin jijona we,’ kavi nado dọ dọ, ‘Fọ́n bo zinzọnlin’?+ 6 Ṣigba, na mìwlẹ nido yọnẹn dọ Visunnu gbẹtọ tọn tindo aṣẹ to aigba ji nado jo ylando lẹ namẹ—” whenẹnu wẹ e dọna awukuzọ̀njẹtọ lọ dọmọ: “Fọ́n, ze adọzan towe, bo yì owhé towe gbè.”+ 7 Ewọ sọ fọ́n bo yì owhé etọn gbè. 8 Whenue gbẹtọgun lẹ mọ ehe, obu jẹ yé ji, bọ yé pagigona Jiwheyẹwhe, he na aṣẹ mọnkọtọn gbẹtọ lẹ.

9 To enẹgodo, whenue Jesu to tintọ́n sọn finẹ, e mọ dawe de he nọ yin Matiu to aisinsin to tòkuẹ-ṣinyantẹn, e sọ dọna ẹn dọmọ: “Lẹzun hodotọ ṣie.” Ewọ sọ fọ́n bo hodo e.+ 10 Enẹgodo, dile ewọ to núdù* to whégbè, pọ́n! susu tòkuẹ-ṣinyantọ lẹ po ylandonọ lẹ po tọn wá bo jẹ núdù* hẹ Jesu po devi etọn lẹ po ji.+ 11 Ṣigba, to whenue Falesi lẹ mọ ehe, yé dọna devi etọn lẹ dọmọ: “Naegbọn mẹplọntọ mìtọn do nọ dùnú hẹ tòkuẹ-ṣinyantọ lẹ po ylandonọ lẹ po?”+ 12 To whenuena ewọ sè nuhe dọ yé te, e dọmọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ.+ 13 Enẹwutu, mì yì bo plọn nuhe ehe zẹẹmẹdo, dọ: ‘Lẹblanu wẹ yẹn jlo, e ma yin avọ́sinsan gba.’+ Na yẹn ma wá nado ylọ dodonọ lẹ gba, adavo ylandonọ lẹ.”

14 Enẹgodo, devi Johanu tọn lẹ wá e dè bo kanse dọmọ: “Naegbọn míwlẹ po Falesi lẹ po nọ blanù bọ devi towe lẹ ma ka nọ blanù?”+ 15 Enẹwutu, Jesu dọna yé dọmọ: “Họntọn asisunọ yọyọ lọ tọn lẹ ma tindo nuhudo nado nọ aluẹmẹ to whenue asisunọ yọyọ lọ tin to yé dè,+ kavi e ma yin mọ wẹ? Ṣigba, azán lẹ ja bọ yè na yí asisunọ yọyọ lọ sọn yé dè,+ whenẹnu wẹ yé na blanù. 16 Mẹde ma nọ tọ̀ avọ̀nu avọ̀ yọyọ tọn do awugbó hoho go gba, na avọ̀nu yọyọ lọ na dọ̀n awugbó lọ bọ tintlẹ́n lọ nasọ ylanhu.+ 17 Mọdopolọ, gbẹtọ lẹ ma nọ kọ̀n ovẹn yọyọ do ayúgò hoho lẹ mẹ gba. Eyin yé wàmọ, whenẹnu ayúgò lọ lẹ nọ là podọ ovẹn lọ nọ kọnyingbe bọ ayúgò lọ lẹ nọ gble. Ṣigba, ayúgò yọyọ lẹ mẹ wẹ gbẹtọ lẹ nọ kọ̀n ovẹn yọyọ do, bọ onú awe lẹ nọ yin hihla dai.”

18 To whenue e to onú ehelẹ dọna yé, pọ́n! ogán he ko dọnsẹpọ de litaina* ẹn bo dọmọ: “Viyọnnu ṣie dona ko kú todin, ṣigba wá bo ze alọ towe do e ji, na ewọ nido gọwá ogbẹ̀.”+

19 To whenẹnu, Jesu fọ́n bo hodo e po devi etọn lẹ po. 20 Podọ pọ́n! nawe de he ko to hùndi sọn owhe 12 die gbọ́n,+ dọnsẹpọ ẹ gbọn godo bo doalọ okẹ̀yẹ̀ awugbó etọn tọn go,+ 21 na e to didọ to ede mẹ dọmọ: “Eyin n’ko gbẹ́ doalọ awugbó etọn go poun, yẹn na jẹgangan.” 22 Jesu lẹgodo, podọ to whenue e mọ ẹn, e dọmọ: “Gboadọ, viyọnnu ṣie! Yise towe ko hẹn we jẹgangan.”+ Podọ sọn gànhiho enẹ mẹ, nawe lọ jẹgangan.+

23 Todin, to whenue e wá owhé ogán lọ tọn gbè bo mọ vánkuntọ lẹ po gbẹtọgun lọ po to bẹwlu sinsinyẹn mẹ,+ 24 Jesu dọmọ: “Mì tọ́n sọn fi, na viyọnnu pẹvi lọ ma kú gba, ṣigba amlọndọ wẹ e te.”+ Enẹwutu, yé jẹ ṣinṣàn ẹn kò ji. 25 Tlolo he gbẹtọgun lọ ko yin didohlan gbonu, e biọ họmẹ bo hẹn alọ viyọnnu pẹvi lọ tọn go,+ bọ e sọ fọ́n.+ 26 Na nugbo tọn, linlin ehe tọn gbayipe gbọn agbegbe lọ pete ji.

27 To whenue Jesu tọ́n sọn finẹ, dawe nukuntọ́nnọ+ awe hodo e, bo to awhádo dọmọ: “Wàlẹblanuna mí, hiẹ Visunnu Davidi tọn.” 28 To whenuena ewọ ko biọ whégbè, dawe nukuntọ́nnọ lọ lẹ wá e dè, bọ Jesu kanse yé dọmọ: “Be mìwlẹ tindo yise dọ yẹn sọgan wà ehe ya?”+ Yé gblọnna ẹn dọmọ: “Mọwẹ, Oklunọ.” 29 To whenẹnu, e doalọ nukun yetọn lẹ go,+ bo dọmọ: “Na e ni yin wiwà hlan mì kẹdẹdi yise mìtọn.” 30 Nukun yetọn lẹ sọ hùn. Humọ, Jesu dosẹ́n na yé sinsinyẹn dọmọ: “Mì dike mẹdepope yọ́n ehe blo.”+ 31 Ṣigba, to whenue yé ko tọ́njẹgbonu godo, yé hẹn linlin etọn gbayipe gbọn agbegbe lọ pete ji.

32 To whenue yé tọ́n jei, pọ́n! gbẹtọ lẹ hẹn dawe unbọpẹnnọ he tindo gbigbọ aovi tọn de wá e dè;+ 33 podọ to whenue aovi lọ ko yin yinyan jẹgbonu godo, dawe unbọpẹnnọ lọ dọho.+ Nalete, awuji gbẹtọgun lọ lẹ bọ yé dọmọ: “Onú ehe nkọtọn depope ma ko yin mimọ to Islaeli mẹ pọ́n gbede.”+ 34 Ṣigba, Falesi lẹ to didọmọ: “Ogán aovi lẹ tọn wẹ e nọ yí do yàn aovi lẹ jẹgbonu.”+

35 Jesu sọ to gbejizọnlinzin gbọn tòdaho po gbétatò lẹpo po mẹ, bo to mẹplọn to sinagọgu yetọn lẹ mẹ bosọ to yẹwheho wẹndagbe Ahọluduta lọ tọn dọ bo to azọ̀n wunmẹ lẹpo po madogán wunmẹ lẹpo po hẹngbọ.+ 36 To whenue e mọ gbẹtọgun lẹ,+ onú yetọn wàlẹblanuna ẹn, na yé yin hinhẹn jẹ agbá bosọ yin kọgbẹ́ e go taidi lẹngbọ lẹ he ma tindo lẹngbọhọtọ de wutu.+ 37 To whenẹnu, e dọna devi etọn lẹ dọmọ: “Mọwẹ, ojijẹ lọ sù, ṣigba azọ́nwatọ lẹ ma sù.+ 38 Enẹwutu, mì vẹ̀ Ogán jibẹwawhé lọ tọn nado do azọ́nwatọ lẹ hlan ojijẹ etọn mẹ.”+