“Mì Pà Oyín Jehovah Tọn”

1, 2. Etẹwẹ gán gọalọna mí nado mọnukunnujẹ numọtolanmẹ Jehovah tọn lẹ mẹ whenue yè kọnmasin do yinkọ etọn go?

MI NI dọ dọ mẹhe a yiwanna de dọ nuhe ylan taun de gando gowe. A yọnẹn dọ lalo wẹ e do; ṣogan mẹdelẹ yí i sè. Dehe tlẹ sọ ylan hugan wẹ yindọ, yé jẹ lalọ lọ fúnfún pé ji, podọ mẹsusu devo lẹ sọ yí i sè ga. Nawẹ e na ṣí na we? Eyin a nọ do ojlo to mẹlẹ mẹ bọ yinkọ dagbe towe sọ nọ duahunmẹna we, e họnwun dọ homẹ towe ma na hùn do masin he yin kinkọ̀n do gowe lọ go.—Howh. 22:1.

² Apajlẹ ehe gán gọalọna mí nado mọnukunnujẹ lehe e ṣí na Jehovah do mẹ, whenue yinkọ dagbe etọn yin hinhẹngble. Dopo to visunnu gbigbọmẹ tọn etọn lẹ mẹ dolalo na yọnnu tintan lọ Evi gando ewọ go. Evi yí lalo lọ sè. Lalo enẹ zọ́n bọ mẹjitọ mítọn tintan lẹ ṣiatẹ sọta Jehovah. Taidi kọdetọn de, ylando po okú po biọ whẹndo gbẹtọvi tọn mẹ. (Jen. 3:1-6; Lom. 5:12) Nuhahun he mí nọ mọ to aihọn lọ mẹ lẹpo, enẹ wẹ okú, awhàn po yajiji po bẹjẹeji, na lalo he Satani jẹ fúnfún pé ji to jipa Edẹni tọn mẹ lẹ wutu. Be lalo mọnkọ po kọdetọn etọn lẹ po gbleawuna Jehovah ya? Gbau. Amọ́, Jehovah ma duadi kavi gbọṣi homẹgble mẹ. Na nugbo tọn, e gbẹ́ yin “Jiwheyẹwhe ayajẹnọ lọ.”—1 Tim. 1:11.

 3. Lẹblanulọkẹyi tẹwẹ mí do?

³ Mí gán yí adà de wà nado suwhẹna yinkọ Jehovah tọn eyin mí setonuna gbedide he bọawu ehe: “Mì pà oyín Jehovah tọn.” (Salm. 113:1) Mí nọ wàmọ eyin mí nọ dọho dagbe gando Mẹlọ he tindo oyín wiwe enẹ go. Be a na wàmọ ya? Mì gbọ mí ni dọhodo onú titengbe atọ̀n delẹ ji he na whàn mí nado nọ pà oyín Jiwheyẹwhe mítọn tọn po ahun lẹpo po.

MÍ NỌ HẸN HOMẸ JEHOVAH TỌN HÙN EYIN MÍ PÀ OYÍN ETỌN

 4. Naegbọn homẹ Jehovah tọn nọ hùn eyin mí pà ewọ? Na apajlẹ. (Sọ pọ́n yẹdide lọ.)

⁴ Mí nọ hẹn homẹ Otọ́ olọn mẹ tọn mítọn tọn hùn eyin mí pà oyín etọn. (Salm. 119:108) Amọ́, be ehe zẹẹmẹdo dọ Jiwheyẹwhe ganhunupotọ lọ taidi gbẹtọvi mapenọ lẹ he nọ jlo vẹkuvẹku dọ yè ni pà yé, na yé do hudo jidevọnamẹ kavi tulinamẹ tọn wutu wẹ ya? Paali. Lẹnnupọndo apajlẹ de ji. Viyọnnu pẹvi de plasikọna otọ́ etọn bo dọna ẹn dọ, “Mìlẹ wẹ yin otọ́ dagbe hugan to aihọn lọ blebu mẹ!” Nuhe viyọnnu lọ dọ to jọwamọ-liho hẹn homẹ otọ́ lọ tọn hùn bo tlẹ yinuwadeji sisosiso. Etẹwutu? Be na e nọ do ayihaawe, nọ jlo vẹkuvẹku dọ ovi etọn ni pà ẹ bo tlẹ sọ do hudo enẹ tọn sinsinyẹn wutu wẹ ya? Paali. Kakatimọ, na e yiwanna viyọnnu etọn bọ homẹ etọn sọ hùn dọ e do owanyi po pinpẹn nutọn po hia ẹ wutu wẹ. E yọnẹn dọ jẹhẹnu mọnkọ lẹ na yidogọna ayajẹ viyọnnu etọn tọn dile e to whinwhẹ́n. Mọdopolọ, homẹ Jehovah, enẹ wẹ Otọ́ daho hugan lọ tọn nọ hùn eyin mí pà ẹ.

 5. Eyin mí nọ pà oyín Jiwheyẹwhe tọn, lalo tẹwẹ mí gán gọalọ nado degba?

⁵ Whenue mí pà Otọ́ olọn mẹ tọn mítọn, mí nọ yí adà mítọn wà nado gbẹ́ lalo devo he Satani do dokọna dopodopo mítọn lẹ dai. Satani sọalọakọ́n dọ gbẹtọvi depope ma gán yí nugbonọ-yinyin do yiavùnlọna oyín Jiwheyẹwhe tọn. Dọ depope mítọn ma na hẹn tenọgli mítọn go to whlepọn nukọn. E dọ dọ mímẹpo wẹ na gbẹ́ Jiwheyẹwhe dai eyin mí mọdọ mọwiwà na hẹn ale wá na mí. (Jobu 1:9-11; 2:4) Amọ́, dawe nugbonọ lọ Jobu dohia dọ lalo wẹ Satani do. Bọ hiẹ lo? Dopodopo mítọn wẹ tindo lẹblanulọkẹyi lọ nado yiavùnlọna oyín Otọ́ mítọn tọn bosọ hẹn homẹ etọn hùn gbọn sinsẹ̀n ẹn po nugbonọ-yinyin po dali. (Howh. 27:11) Gbégbò daho de wẹ e yin nado wàmọ.

 6. Nawẹ mí gán hodo apajlẹ Ahọlu Davidi po Levinu lẹ po tọn gbọn? (Nẹhemia 9:5)

⁶ Owanyi na Jiwheyẹwhe nọ whàn nugbonọ lẹ nado yí ahun lẹpo do pà oyín etọn. Ahọlu Davidi wlan dọmọ: “Gbọ yẹn ni nọ pà Jehovah; gbọ awutugonu ṣie lẹpo ni nọ pà oyín wiwe etọn.” (Salm. 103:1) Davidi mọnukunnujẹemẹ dọ nado pà oyín Jehovah tọn zẹẹmẹdo nado pà Jehovah lọsu. Oyín Jehovah tọn bẹ omẹ alọpa he e yin, jẹhẹnu dagbedagbe etọn lẹ gọna nujiawu he e nọ wà lẹ hẹn. Davidi jlo na dohia to walọ etọn lẹ mẹ dọ oyín Otọ́ etọn tọn yin wiwe bosọ jlo na nọ pà oyín enẹ. E jlo na wàmọ po ‘awutugonu etọn lẹpo’ po, enẹ wẹ po ahun lẹpo po. Mọdopolọ, Levinu lẹ nọ yin nukọntọ na nuhe dù Jehovah pipà. Yé nọ gbọn whiwhẹ dali kẹalọyi dọ hogbe yetọn lẹ ma gán pé gbede nado na pipà he oyín wiwe Jehovah tọn jẹna to gigọ́ mẹ. (Hia Nẹhemia 9:5.) Ayihaawe matin dọ pipà ahundopo tọn he zọnpọ hẹ whiwhẹ mọnkọ nọ hẹn Jehovah jaya.

 7. Nawẹ mí gán nọ pà Jehovah to lizọnyizọn po gbẹzan egbesọ tọn mítọn po mẹ gbọn?

⁷ To egbehe, mí gán hẹn homẹ Jehovah tọn hùn eyin mí nọ yí zohunhun, pinpẹn-nutọn-yinyọnẹn po owanyi po do dọho gandego. Whenue mí to lizọnyizọn lọ mẹ, mí nọ hẹn do ayiha mẹ dọ yanwle mítọn tintan wẹ nado dọ̀n mẹlẹ sẹpọ Jehovah, bo gọalọna yé nado yí nukun he mí nọ yí do pọ́n Otọ́ owanyinọ mítọn do pọ́n ewọ. (Jak. 4:8) Homẹ mítọn nọ hùn nado dohia gbẹtọ lẹ lehe Biblu basi zẹẹmẹ Jehovah tọn, bo do owanyi, whẹdida dodo, nuyọnẹn, huhlọn po jẹhẹnu dagbedagbe etọn devo lẹ po hia do. Mí sọ nọ pà Jehovah bo nọ hẹn homẹ etọn hùn eyin mí dovivẹnu nado hodo apajlẹ etọn. (Efe. 5:1) Eyin mí wàmọ, mí nọ dohia dọ mí gbọnvo to aihọn ylankan ehe mẹ. Mẹlẹ gán doayi e go dọ mí gbọnvo bo gán nọ kanse yede nuhewutu wẹ. (Mat. 5:14-16) Dile mí to nuyiwa hẹ yé egbesọegbesọ, mí gán penugo nado basi zẹẹmẹ na yé nuhewutu mí nọ yinuwa domọ. Taidi kọdetọn de, ahundoponọ lẹ nọ dọnsẹpọ Jiwheyẹwhe mítọn. Eyin mí pà Jehovah to aliho ehelẹ mẹ, homẹ etọn nọ hùn.—1 Tim. 2:3, 4.

MÍ NỌ HẸN HOMẸ JESU TỌN HÙN EYIN MÍ PÀ OYÍN JEHOVAH TỌN

 8. Nawẹ Jesu yin nukọntọ to oyín Jehovah tọn pipà mẹ gbọn?

⁸ To nudida nuyọnẹntọ he to olọn mẹ podọ to aigba ji lẹpo mẹ, mẹdepope ma yọ́n Otọ́ lọ hugan Visunnu lọ. (Mat. 11:27) Jesu yiwanna Otọ́ etọn, podọ e yin nukọntọ na nuhe dù pipà nina oyín Jehovah tọn. (Joh. 14:31) To odẹ̀ he e hò hlan Otọ́ etọn to ozán he jẹnukọnna okú etọn mẹ, e basi bladopọ lizọnyizọn aigba ji tọn etọn tọn to aliho ehe mẹ: “N’ko hẹn oyín towe zun yinyọnẹn.” (Joh. 17:26) Etẹ na dọ wẹ e te?

 9. Nawẹ Jesu yí apajlẹ de zan nado basi zẹẹmẹ Otọ́ etọn tọn to aliho he họnwun dogọ mẹ gbọn?

⁹ Jesu wà nususu hugan didọna gbẹtọ lẹ poun dọ oyín Jiwheyẹwhe tọn nọ yin Jehovah. Ju he Jesu plọnnu lẹ ko yọ́n oyín Jiwheyẹwhe tọn. Amọ́, Jesu yin nukọntọ to mẹhe Jiwheyẹwhe yin ‘didohia’ mẹ. (Joh. 1:17, 18) Di apajlẹ, Owe-wiwe Heblu tọn lẹ dohia dọ Jehovah yin lẹblanunọ podọ awuvẹmẹtọ. (Eks. 34:5-7) Jesu hẹn nugbo enẹ họnwun hugan gbede pọ́n whenue e donù apajlẹ visunnu he danbú lọ po otọ́ etọn po tọn go. Eyin mí hianu gando lehe otọ́ enẹ mọ visunnu etọn he lẹnvọjọ lọ hlan do go “dile e gbẹ́ pò to olá” bo họnwezun yì pé e, bo gbò e fán bosọ jona ẹn sọn ahun mẹ wá, mí nọ mọnukunnujẹ obá he mẹ Jehovah yin lẹblanunọ podọ awuvẹmẹtọ jẹ mẹ dogọ. (Luku 15:11-32) Jesu do omẹ alọpa he Otọ́ etọn yin nugbonugbo hia.

10. (a) Nawẹ mí wagbọn do yọnẹn dọ Jesu yí oyín mẹdetiti tọn Otọ́ etọn tọn zan bosọ jlo dọ mẹdevo lẹ ni nọ wà nudopolọ? (Malku 5:19) (Sọ pọ́n yẹdide lọ.) (b) Etẹwẹ Jesu jlo dọ mí ni nọ wà to egbehe?

¹⁰ Be Jesu jlo dọ mẹdevo lẹ ni nọ yí yinkọ mẹdetiti tọn Otọ́ etọn tọn zan ga ya? Gbau. Nukọntọ sinsẹ̀n tọn akonka whenẹnu tọn lẹ gán ko nọ lẹndọ mẹmasi wẹ e yin nado nọ ylọ yinkọ Jiwheyẹwhe tọn, amọ́ Jesu ma na dotẹnmẹ aṣa he ma sọgbe hẹ owe-wiwe mọnkọ lẹ gbede nado glọnalina ẹn nado gbògbéna oyín Otọ́ etọn tọn. Lẹnnupọndo ojlẹ he mẹ e gbọazọ̀nna dawe he gbigbọ aovi tọn to yadona de to lẹdo Gelazeninu lẹ tọn mẹ ji. Mẹlẹ bẹ bu, bo vẹ̀ Jesu nado yì, enẹwutu e tọ́n sọn lẹdo lọ mẹ. (Malku 5:16, 17) Amọ́, Jesu jlo dọ oyín Jehovah tọn ni yin yinyọnẹn to finẹ. Enẹwutu, e degbèna dawe he e gbọazọ̀nna lọ nado dọna gbẹtọ lẹ, e ma yin nuhe emi ko wà gba, amọ́ nuhe Jehovah ko wà. (Hia Malku 5:19.)a Onú dopolọ wẹ e jlo to egbehe ga—enẹ wẹ yindọ mí ni hẹn oyín Otọ́ etọn tọn zun yinyọnẹn gbọn aihọn lọ blebu mẹ! (Mat. 24:14; 28:19, 20) Eyin mí yí adà mítọn wà, mí nọ hẹn homẹ Ahọlu mítọn Jesu tọn hùn.

11. Etẹ go wẹ Jesu plọn hodotọ etọn lẹ nado nọ hodẹ̀ gando, podọ naegbọn enẹ do yin nujọnu? (Ezekiẹli 36:23)

¹¹ Jesu yọnẹn dọ lẹndai Jehovah tọn wẹ nado klan oyín Etọn do wiwe, bo de vlẹko lẹpo sẹ̀ sọn e go. Enẹwutu, Ogán mítọn plọn hodotọ etọn lẹ nado nọ hodẹ̀ dọmọ: “Otọ́ mítọn he tin to olọn mẹ, na oyín towe ni yin kinklandowiwe.” (Mat. 6:9) Jesu mọnukunnujẹemẹ dọ ehe wẹ whẹho titengbe hugan lọ he nudida lẹpo pannukọn. (Hia Ezekiẹli 36:23.) Nudida nuyọnẹntọ depope to wẹkẹ lọ mẹ ma ko wà sọ Jesu nado klan oyín Jehovah tọn do wiwe. Amọ́, whenue Jesu yin wiwle, owhẹ̀ tẹwẹ kẹntọ etọn lẹ sadokọna ẹn? Yé dọ dọ e zánnu! Matin ayihaawe, Jesu mọdọ nado dọ onú agọ̀ gando oyín wiwe Otọ́ emitọn tọn go kavi nado kọnmasin dego wẹ yin ylando he sinyẹn hugan lọ. E dotukla ẹ sinsinyẹn dọ e na yin whẹsadokọna bo yin whẹdana na ylando ehe wutu. Enẹ gán ko yin whẹwhinwhẹ́n titengbe he wutu Jesu do “tin to ayimajai sinsinyẹn mẹ” to gànhiho he jẹnukọnna wiwle etọn lẹ gblamẹ.—Luku 22:41-44.

12. Nawẹ Jesu klan oyín Otọ́ etọn tọn do wiwe to aliho dagbe hugan mẹ gbọn?

¹² Nado klan oyín Otọ́ etọn tọn do wiwe, Jesu doakọnna yasanamẹ, mẹzunzun po owhẹ̀ agọ̀ he yin sisadokọna ẹn lẹ po. E yọnẹn dọ emi ko setonuna Otọ́ emitọn to nulẹpo mẹ; nude ma tin he na huwinyan na ẹn. (Heb. 12:2) E sọ yọnẹn dọ Satani wẹ to ogbé etọn yàn tlọlọ to ojlẹ he vẹawu enẹlẹ mẹ. (Luku 22:2-4; 23:33, 34) Na nugbo tọn, nukundido Satani tọn wẹ nado hẹn tenọgligo hinhẹn Jesu tọn gble; amọ́ e gboawupo mlẹnmlẹn! Jesu dohia to aliho he họnwun mẹ dọ lalonọ hèelú wẹ Satani yin, podọ na nugbo tọn, Jehovah tindo devizọnwatọ nugbonọ lẹ, he nọ hẹn tenọgligo etlẹ yin to whlepọn he sinyẹn hugan lẹ glọ!

13. Nawẹ a gán hẹn homẹ Ahọlu towe he to gandu lọ tọn hùn gbọn?

¹³ Be a jlo na hẹn homẹ Ahọlu towe he to gandu lọ tọn hùn ya? Zindonukọn nado to oyín Jehovah tọn pà, bo nọ gọalọna mẹdevo lẹ nado yọ́n omẹ alọpa he Jiwheyẹwhe mítọn yin nugbonugbo. Eyin a wàmọ, afọdòmẹ Jesu tọn lẹ hodo wẹ a te. (1 Pita 2:21) Taidi Jesu, a na hẹn homẹ Jehovah tọn hùn, bo na do Satani he yin agọjẹdomẹtọ Etọn hia di lalonọ de he ma do winyan!

MÍ NỌ GỌALỌ NADO WHLẸN OGBẸ̀ MẸLẸ TỌN GÁN EYIN MÍ PÀ OYÍN JEHOVAH TỌN

14, 15. Onú jiawu tẹlẹ wẹ gán jọ whenue mí plọnnu mẹlẹ gando Jehovah go?

¹⁴ Whenue mí pà oyín Jehovah tọn, mí nọ gọalọ nado whlẹn ogbẹ̀ mẹlẹ tọn gán. Gbọnna? Na nugbo tọn, Satani ‘ko tọ́nnukunna ayiha mayisenọ lẹ tọn.’ (2 Kọl. 4:4) Taidi kọdetọn de, yé ko kẹalọyi lalo Satani tọn delẹ taidi: Jiwheyẹwhe ma tin, Jiwheyẹwhe dẹ̀n do mí bo masọ nọ hò gbẹtọvi lẹ tọn pọ́n, Jiwheyẹwhe yin kanylantọ bo nọ sayana ylandonọ lẹ kakadoi. Yanwle lalo mọnkọ lẹ tọn poun wẹ nado hẹn yinkọ Jehovah tọn dozín kavi nado kọnmasin do ewọ po oyín dagbe etọn po go, na gbẹtọvi lẹ nikaa tindo ojlo nado dọnsẹpọ ewọ. Amọ́, azọ́n mítọn nọ glọnalina lẹndai Satani tọn. Mí nọ plọn mẹlẹ nugbo lọ gando Otọ́ mítọn go, bo nọ pagigona oyín wiwe Jiwheyẹwhe mítọn tọn. Po kọdetọn tẹ po?

¹⁵ Nugbo he to Ohó Jiwheyẹwhe tọn mẹ lẹ dohuhlọn taun. Eyin mí plọnnu mẹlẹ gando Jehovah po omẹ alọpa he e yin nugbonugbo po go, mí nọ wá mọnukunnujẹ nujiawu de mẹ. Vudevude nukun mẹlẹ tọn nọ hùn gando lalo Satani tọn lẹ go, podọ yé nọ jẹ Otọ́ yiwanna mítọn pọnhlan ji kẹdẹdile mí nọ wà do. Huhlọn madodógbo etọn nọ zọ́n bọ yé nọ wleawuna budisi na ewọ. (Isa. 40:26) Yé nọ plọn nado dejido ewọ go, na whẹdida dodo etọn wutu. (Deut. 32:4) Nuyọnẹn sisosiso etọn nọ hunnukun na yé. (Isa. 55:9; Lom. 11:33) Podọ, yé nọ mọ homẹmimiọn yí nado plọn dọ ewọ yin owanyi. (1 Joh. 4:8) Dile yé to dindọnsẹpọ Jehovah, todido yetọn nado nọgbẹ̀ kakadoi taidi ovi etọn lẹ nọ lodo dogọ. Lẹblanulọkẹyi jiawu tẹ die mí tindo nado gọalọna gbẹtọ lẹ nado dọnsẹpọ Otọ́ yetọn! Eyin mí wàmọ, Jehovah nọ pọ́n mí hlan taidi “azọ́nwatọ hatọ” etọn lẹ.—1 Kọl. 3:5, 9.

16. Nawẹ yinkọ Jiwheyẹwhe tọn yinyọnẹn yinuwado mẹdelẹ ji gbọn? Na apajlẹ delẹ.

¹⁶ To bẹjẹeji, mí gán nọ plọn mẹlẹ poun dọ yinkọ Jiwheyẹwhe tọn nọ yin Jehovah. Yinkọ lọ na ede gán yinuwado ahunjijlọnọ de ji na ojlẹ dindẹn. Di apajlẹ, jọja yọnnu de he nọ yin Aaliyahb whẹ́n to whédo he ma yin Klistiani de mẹ. Amọ́, e ma mọ pekọ to sinsẹ̀n etọn mẹ, podọ e mọdọ emi ma vẹ́ po Jiwheyẹwhe po. Nulẹ diọ whenue e jẹ nuplọn hẹ Kunnudetọ lẹ ji. E jẹ Jiwheyẹwhe mọ ji taidi Họntọn etọn. Podọ e paṣa ẹ nado mọdọ yinkọ Jiwheyẹwhe tọn ko yin didesọn Biblu susu mẹ bo yin didiọ po tẹnmẹ-yinkọ tata delẹ po taidi Oklunọ. Yinkọ Jehovah tọn he e plọn wẹ diọ gbẹzan etọn. E dọmọ: “Họntọn alọmayiemẹ ṣie do yinkọ de!” Etẹwẹ yin kọdetọn lọ? E dọmọ: “N’do jijọho ahun mẹ tọn mayọnjlẹ de todin. N’mọdọ n’yin yẹyidogona taun.” Dawe de he nọ yin Steve yin hànsinọ, yèdọ Juvi-jiji de. E ma jlo na kọnawudopọ hẹ sinsẹ̀n de, na e ko mọ yẹnuwiwa susu wutu. Amọ́, to okú onọ̀ etọn tọn godo, e yigbe nado nọ oplọn he Kunnudetọ Jehovah tọn de to anadena de tẹnmẹ. E yinuwadeji sisosiso whenue e plọnnu gando yinkọ Jiwheyẹwhe tọn go. E dọmọ: “N’ma ko yọ́n yinkọ Jiwheyẹwhe tọn pọ́n gbede.” E yidogọ dọ: “Whla tintan die he n’mọnukunnujẹemẹ dọ Jiwheyẹwhe tin nugbonugbo! N’mọ ẹn di Omẹ nujọnu tọn de. Todin, n’yọnẹn dọ n’ko mọ Họntọn de.”

17. Naegbọn a do magbe nado to oyín Jehovah tọn pà zọnmii? (Sọ pọ́n yẹdide lọ.)

¹⁷ Eyin a to yẹwhehodọ bo to mẹplọn, be a nọ do oyín wiwe lọ, Jehovah hia mẹlẹ ya? Be a nọ gọalọna yé nado yọ́n omẹ alọpa he Jiwheyẹwhe mítọn yin nugbonugbo ya? Eyin a nọ wàmọ, a na pagigona oyín Jiwheyẹwhe tọn. Jaale bo zindonukọn nado to oyín wiwe Jehovah tọn pà, bo nọ gọalọna gbẹtọ lẹ nado wá yọ́n omẹ alọpa he ewọ yin nugbonugbo. Gbọnmọ dali, a na whlẹn ogbẹ̀ mẹlẹ tọn gán. A na hodo anademẹ Ahọlu towe, yèdọ Klisti Jesu tọn. Podọ hú popolẹpo, a na hẹn homẹ Otọ́ owanyinọ towe yèdọ Jehovah tọn hùn. Mì gbọ mí ni “nọ pà oyín [etọn] kakadoi podọ doidoi”!—Salm. 145:2.