Todido Tẹwẹ Tin Na Tọgbo Ṣie Lẹ?

TO OJLẸ de mẹ wayi, hosọ de he fọnjlodotenamẹ sọawuhia to linlinwe Corée tọn de (Choong Ang Ilbo) ji. Hosọ lọ fọ́n kanbiọ ehe dote: “‘Mẹvivẹ Shim Cheong,’ He Ma Yọ́n Nudepope Gando Jesu Go—Be Zòmẹ Wẹ E Yì Ya?”

Hosọ ehe sọwhán mẹsusu to Corée, na sọgbe hẹ otàngblo Corée-nu lẹ tọn de, Shim Cheong yin awhli de he jọmẹ taun bo yí gbẹzan etọn do sanvọ́ nado gọalọna otọ́ etọn he yin nukuntọ́nnọ. Gbẹtọ lẹ pà viyọnnu ehe na owhe susu. To Corée, Shim Cheong wá diyin na e ze apajlẹ dagbe dai na nuhe dù kanvinván do mẹdevo lẹ tamẹ.

Mẹsusu wẹ lẹndọ e ma sọgbe dọ gbẹtọ dagbe de taidi Shim Cheong ni yì zòmẹ na e ma yí baptẹm bo lẹzun Klistiani de wutu, podọ linlẹn ehe tlẹ nọ doadi na mẹsusu. To popolẹpo mẹ, otàn viyọnnu lọ tọn ko wá aimẹ ojlẹ dindẹn whẹpo wẹndagbe gando Klisti go do yin hinhẹnwa gbétatò Corée tọn he mẹ e wá sọn.

Linlinwe Corée tọn lọ sọ do nuhe sinsẹ̀ngán de dọ hia. Yè kanse e dọ, ‘Be zòmẹ wẹ mẹhe ma sèhó gando Jesu go pọ́n bo kú lẹ te ya?’ Sinsẹ̀ngán lọ gblọn dọ: “Mẹde ma yọnẹn. Nuhe mí yise poun wẹ yindọ Jiwheyẹwhe kẹdẹ wẹ yọ́n nuhe na wá jọ do [omẹ enẹlẹ] go.”

Otànwe Katoliki tọn de (The New Catholic Encyclopedia) dọmọ: “Eyin mẹde na mọ whlẹngán, dandan wẹ dọ mẹlọ ni yí baptẹm. Na Klisti lọsu dọ dọ, adavo yè yí osin po gbigbọ po do [vọ́ gbẹtọ ji] ewọ ma sọgan biọ ahọluduta Jiwheyẹwhe tọn mẹ (Joh 3.5).” Enẹ wẹ zọ́n bọ mẹdelẹ do yise dọ mẹhe ma yí baptẹm whẹpo do kú lẹ nọ yì zòmẹ kavi nọ jiya to fide to okú godo.

Ṣigba, mẹdevo lẹ nọ mọdọ nuyise mọnkọtọn ma sọgbe. Gbẹtọ livi susu wẹ ma yọ́n nudepope gando Biblu go whẹpo do kú. Be zòmẹ wẹ jẹna yé bọ yé na to yaji to finẹ kakadoi ya? Etẹwẹ Biblu dọ gando whẹho lọ go?

Biblu dohia hezeheze dọ Jiwheyẹwhe ma nọ dekọ sọn mẹhe ma yọ́n osẹ́n etọn bo kú lẹ go. Owalọ lẹ 17:30 na mí jide dọmọ: “Jiwheyẹwhe ko de nukun sọn ojlẹ wunvi tọn enẹlẹ go.” Eyin mọ wẹ, todido tẹwẹ tin to Biblu mẹ na mẹhe ma sèhó gando Jiwheyẹwhe go pọ́n bo ko kú lẹ?

Nuhe Jesu dọna dopo to ylanwatọ he yin whiwhè do núgo po e po lẹ mẹ na gblọndo kanbiọ ehe tọn. Dawe lọ dọna Jesu dọmọ: “Flin mi whenue hiẹ biọ ahọluduta towe mẹ.” Etẹwẹ Jesu gblọnna ẹn? E dọna ẹn dọmọ: “Nugbo wẹ yẹn dọna we to egbé, Hiẹ na tin hẹ mi to Paladisi mẹ.”—Luku 23:39-43.

Be Jesu to opà do na dawe lọ dọ e na yì olọn mẹ wẹ ya? Lala, na dawe lọ ma ko yin “vivọji” gbọn osin po gbigbọ po dali gba. Enẹ wẹ mẹde ka dona wà whẹpo do biọ Ahọluduta olọn tọn mẹ. (Johanu 3:3-6) Opà he Jesu to didona ylanwatọ lọ wẹ yindọ ewọ na gọwá nọgbẹ̀ to Paladisi mẹ. Na Juvi de wẹ dawe lọ yin wutu, e na ko yọ́n nususu gando Paladisi aigba ji tọn lọ go, yèdọ jipa Edẹni tọn he go owe tintan Biblu tọn donù. (Gẹnẹsisi 2:8) Opagbe he Jesu do na dawe lọ na ẹn jide dọ ewọ na yin finfọnsọnku do aigba he na lẹzun Paladisi de ji.

Na nugbo tọn, Biblu dopà dọ “fọnsọnku dodonọ lẹ po mawadodonọ lẹ tọn po” de na tin. (Owalọ lẹ 24:15) “Mawadodonọ lẹ” bẹ mẹhe ma wanu sọgbe hẹ osẹ́n Jiwheyẹwhe tọn lẹ hẹn, na mẹde ma plọn yé osẹ́n lọ lẹ wutu. Jesu na fọ́n ylanwatọ he e dọho hẹ lọ sọnku, na mawadodonọ de wẹ ewọ yin wutu. E nasọ gọ̀ gbẹtọ livi, kavi liva susu he ma yọ́n Jiwheyẹwhe bo ko kú lẹ wá ogbẹ̀. Enẹgodo, whenue yé na tin to Paladisi mẹ to aigba ji, yè na plọn yé osẹ́n Jiwheyẹwhe tọn lẹ bo na yé dotẹnmẹ nado dohia dọ yé yiwanna Jiwheyẹwhe gbọn tonusisena osẹ́n etọn lẹ dali.

To whenue mawadodonọ lẹ na yin finfọnsọnku, be nuhe yé ko wà wayi lẹ wẹ yè na pọ́n bo do dawhẹna yé ya? Lala. Lomunu lẹ 6:7 dọmọ: “Ewọ he kú ko yin whẹsuna sọn ylando etọn mẹ.” Ehe dohia dọ mawadodonọ he kú lẹ ko suahọ ylando he yé wà wayi lẹ tọn. Enẹwutu, nuhe yé wà to fọnsọnku yetọn godo lẹ wẹ yè na pọ́n bo do dawhẹna yé, e ma yin nuhe yé wà to whenue yé ma yọ́n nudepope gando Jiwheyẹwhe go lẹ wẹ gba. Ale tẹwẹ enẹ na hẹnwa na yé?

To fọnsọnku godo, dotẹnmẹ lọ na hundote na mawadodonọ lẹ nado plọn osẹ́n Jiwheyẹwhe tọn lẹ, yèdọ osẹ́n he yé na mọyi to whenue owe hihá he Johanu mọ to numimọ mẹ lẹ na yin hùnhùn. Enẹgodo, yè na pọ́n eyin yé setonuna osẹ́n Jiwheyẹwhe tọn lẹ kavi lala bo na dawhẹna yé “sọgbe hẹ walọ yetọn lẹ.” (Osọhia 20:12, 13) Na suhugan mawadodonọ lẹ tọn, ehe wẹ na yin dotẹnmẹ hundote tintan he yé na tindo nado plọnnu gando Jiwheyẹwhe go bo wà ojlo etọn bo gbọnmọ dali mọ ogbẹ̀ madopodo to aigba ji.

Nugbo Biblu tọn ehe ko vọ́ huhlọnna yise mẹhe nuplọnmẹ zòmẹ tọn ko hẹn gbọjọ dai lẹ tọn. Yeong Sug yin dopo to omẹ enẹlẹ mẹ. Katoliki-nu akonka de wẹ ewọ po mẹjitọ etọn lẹ po yin. Hẹnnumẹ etọn delẹ tlẹ yin yẹwhenọ. Na e jlo na lẹzun yẹwhenọ-yọnnu wutu, e yì opá yẹwhenọ-yọnnu lẹ tọn de mẹ. To nukọn mẹ, e tọ́n sọn opá lọ mẹ na nuhe yè nọ wà to finẹ lẹ ma nọ hẹn homẹ etọn hùn wutu. Gbọnvona enẹ, e nọ vẹawuna ẹn nado kẹalọyi dọ yè na sayana gbẹtọ to zòmẹ, na e nọ mọdọ nuplọnmẹ enẹ ma sọgbe bo ma do owanyi hia.

Kunnudetọ Jehovah tọn de wá do wefọ Biblu ehe hia Yeong Sug: “Na mẹhe to ogbẹ̀ yọnẹn dọ emi na kú; ṣigba oṣiọ lẹ ma yọ́n nude, mọ yé masọ tindo ale de ba; na oflin yetọn ko zun winwọn.” (Yẹwhehodọtọ 9:5) Kunnudetọ lọ gọalọna ẹn nado mọnukunnujẹemẹ dọ tọgbo etọn lẹ ma to yaji to zòmẹ gba, amọ́ dọ amlọndọ wẹ yé te bo to tenọpọn fọnsọnku.

Na Yeong Sug yọnẹn dọ mẹsusu wẹ ma ko sèhó gando nugbo Biblu tọn lẹ go pọ́n gbede wutu, nuhe Jesu dọ to Matiu 24:14 mẹ whàn ẹn taun. Jesu dọmọ: “Yẹwheho wẹndagbe ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo; podọ whenẹnu wẹ opodo lọ na wá.” Todin, e nọ lá wẹndagbe lọ bosọ nọ do todido jiawu he e plọn sọn Biblu mẹ lọ hia mẹdevo lẹ.

Biblu dọna mí dọmọ: “Jiwheyẹwhe ma yin mẹnukuntahopọntọ gba, ṣigba to akọta lẹpo mẹ, mẹhe nọ dibusi i bo nọ wazọ́n dodo tọn wẹ nọ yin alọkẹyi to e dè.” (Owalọ lẹ 10:34, 35) Aliho pipé ehe mẹ wẹ mímẹpo sọgan donukun dọ Jiwheyẹwhe ni dawhẹ te, na ewọ “ yiwanna nugbo po whẹdida [dodo] po.”—Psalm 33:5.