Lizọnyizọnwatọ Wẹndagbe lọ Tọn Lẹ

JEHOVAH na mí apajlẹ pipé de nado hodo—enẹ wẹ Visunnu etọn Jesu Klisti. (1 Pita 2:21) To whenuena mẹde lẹzun hodotọ Jesu tọn, mẹlọ nọ dọyẹwheho wẹndagbe lọ tọn taidi dopo to lizọnyizọnwatọ Jiwheyẹwhe tọn lẹ mẹ. Nado dohia dọ ehe na hẹn kọfanamẹ wá to gbigbọ-liho, Jesu dọmọ: “Mì wá dè e, mì mẹhe tin to magbọjẹ mẹ bọ yè doagban pinpẹn na lẹpo, yẹn nasọ fakọna mì. Mì yí zẹgẹ ṣie do okọ̀ mìtọn bosọ plọnnu sọn dè e, na homẹmimiọnnọ po whiwhẹnọ to ahun mẹ po wẹ yẹn, mìwlẹ nasọ mọ kọfanamẹ na mìde.” (Mat. 11:28, 29) Mẹhe ko kẹalọyi oylọ-basinamẹ etọn lẹpo nọ mọ hẹndi opagbe enẹ tọn!

² Taidi Lizọnyizọnwatọ-gán Jiwheyẹwhe tọn, Jesu ylọ mẹdelẹ nado wá yin hodotọ etọn lẹ. (Mat. 9:9; Joh. 1:43) E plọnazọ́n yé to lizọnyizọn lọ mẹ bo do yé hlan nado wà azọ́n he ewọ lọsu to wiwà. (Mat. 10:1–11:1; 20:28; Luku 4:43) Enẹgodo, e do omẹ 70 devo lẹ hlan nado tindo mahẹ to wẹndagbe he gando Ahọluduta Jiwheyẹwhe tọn go lilá mẹ. (Luku 10:1, 8-11) To whenue Jesu do devi etọn lẹ hlan, e dọna yé dọmọ: “Mẹdepope he dotoaina mì dotoaina yẹnlọsu. Podọ mẹdepope he gbẹ́ mì dai gbẹ́ yẹnlọsu dai ga. Humọ, mẹdepope he gbẹ́ mi dai gbẹ́ Ewọ he do mi hlan dai ga.” (Luku 10:16) Gbọnmọ dali, Jesu zinnudo nujọnu-yinyin azọngban he yin zizedo alọmẹ na devi lẹ tọn ji. Yé na yin afọzedaitọ Jesu po Jiwheyẹwhe Gigogán lọ po tọn! Nudopolọ wẹ e na yin to egbehe na mẹlẹpo he yigbena oylọ Jesu tọn he dọmọ: “Wá lẹzun hodotọ ṣie.” (Luku 18:22; 2 Kọl. 2:17) Mẹhe yigbena oylọ ehe lẹpo tindo azọ́ndenamẹ de sọn Jiwheyẹwhe dè nado dọyẹwheho wẹndagbe Ahọluduta lọ tọn bo hẹn gbẹtọ lẹ zun devi lẹ.—Mat. 24:14; 28:19, 20.

³ Na mí kẹalọyi oylọ Jesu tọn nado wá hodo e wutu, mí ko tindo lẹblanulọkẹyi lọ nado “wá yọ́n” Jehovah Jiwheyẹwhe po Jesu Klisti po. (Joh. 17:3) Aliho Jehovah tọn lẹ ko yin pinplọn mí. Po alọgọ etọn po, mí ko penugo nado diọ ayiha mítọn, bo ko ze gbẹtọ-yinyin yọyọ lọ do, bosọ hẹn walọyizan egbesọegbesọ tọn mítọn tin to kọndopọ mẹ hẹ nujinọtedo dodo Jehovah tọn lẹ. (Lom. 12:1, 2; Efe. 4:22-24; Kol. 3:9, 10) Pinpẹn-nutọn-yinyọnẹn sọn ahun mẹ wá ko whàn mí nado klan gbẹzan mítọn do wiwe hlan Jehovah bo ko sọ do enẹ hia gbọn baptẹm yíyí to osin mẹ dali. To baptẹm yíyí godo, mí ko yin dide taidi lizọnyizọnwatọ lẹ.

⁴ Mí dona hẹn do ayiha mẹ to whepoponu dọ sinsẹ̀nzọn mítọn hlan Jiwheyẹwhe dona yin po ahun he wé-ṣeke de po bọ mí sọ dona yin homẹvọnọ. (Salm. 24:3, 4; Isa. 52:11; 2 Kọl. 6:14–7:1) Gbọn yise tintindo to Jesu Klisti mẹ dali, mí ko tindo ayihadawhẹnamẹnu wiwe de. (Heb. 10:19-23, 35, 36; Osọ. 7:9, 10, 14) Apọsteli Paulu dotuhomẹna Klistiani lẹ nado nọ wà nulẹpo na gigo Jiwheyẹwhe tọn, na mí ma nado hẹn mẹdevo lẹ dahli. Humọ, apọsteli Pita zinnudo nuhọakuẹ-yinyin apajlẹ dagbe zizedai tọn ji nado dọ̀n mayisenọ lẹ wá nugbo lọ mẹ. (1 Kọl. 10:31, 33; 1 Pita 3:1) Nawẹ hiẹ sọgan gọalọna mẹde nado pegan bo kọnawudopọ hẹ mí taidi lizọnyizọnwatọ wẹndagbe lọ tọn gbọn?

⁵ Sọn whenue hiẹ jẹ anadena plọnmẹ Biblu de ji hẹ jlodotọ de, nọ na ẹn tuli nado nọ dọ nuhe plọn e te lẹ na mẹdevo lẹ. E sọgan nọ dọhona hẹnnumẹ lẹ, họntọn lẹ, azọ́nwatọgbẹ́ lẹ po mẹdevo lẹ po to whedepopenu he dotẹnmẹ etọn hundote. Ehe yin afọdide titengbe de nado plọn mẹyọyọ lẹ nado lẹzun hodotọ Jesu Klisti tọn taidi lizọnyizọnwatọ wẹndagbe lọ tọn. (Mat. 9:9; Luku 6:40) Dile jlodotọ yọyọ lọ to whinwhẹ́n to gbigbọ-liho bo ko jẹakọ ganji hẹ hodidọ hẹ mẹdevo lẹ gando nuhe plọn e te go, matin ayihaawe, e na do ojlo hia nado jẹ mahẹ tindo to lizọnyizọn lọ mẹ ji.

⁶ Whẹpo a nado basi oylọna mẹde nado hodo we yì kunnudegbe whla tintan, hiẹ dona hẹn ẹn diun dọ e jẹ nubiọtomẹsi tangan delẹ kọ̀n. Mẹhe tọ́n hẹ mí to sinsẹ̀nzọn kunnudegbe tọn mẹ to ede dohia to gbangba taidi Kunnudetọ Jehovah tọn. Enẹwutu, e dona ko hẹn gbẹzan etọn wá kọndopọ mẹ hẹ nujinọtedo dodo Jehovah tọn lẹ bo sọgan yin wẹnlatọ he ma ko yí baptẹm de.

⁷ Dile hiẹ to nuplọn hẹ mẹde bo nọ dọhodo nunọwhinnusẹ́n Biblu tọn lẹ ji hẹ ẹ, hiẹ sọgan ko yọ́n ninọmẹ etọn lẹ. Hiẹ sọgan ko doayi e go dọ e to gbẹnọ to kọndopọ mẹ hẹ nuhe e ko plọn lẹ. Ṣigba, adà gbẹzan nuplọntọ lọ tọn delẹ tin he mẹho agun tọn lẹ na jlo nado dọhodeji hẹ ewọ po hiẹ lọsu po dopọ.

⁸ Anadenanutọ to pipli mẹho lẹ tọn mẹ na basi tito, na mẹho agun tọn awe (ehe dopo to yé mẹ dona yin hagbẹ wedegbẹ́ sinsẹ̀nzọn tọn) nido dọhodo whẹho ehe ji hẹ hiẹ po Biblu plọntọ lọ po. To agun he mẹ mẹho agun tọn lẹ ma sù te, mẹho de po devizọnwatọ lizọnyizọnwiwa tọn he pegan de po sọgan basi ehe. Mẹmẹsunnu he yin dide lẹ dona yawu dovivẹnu nado basi hodọdopọ ehe madọngbàn. Na nugbo tọn, eyin yé sè ojlo nuplọntọ lọ tọn whẹpo opli de do bẹjẹeji, e sọgan yọnbasi dọ yé ni dọho hẹ hiẹ po nuplọntọ lọ po to opli godo. Yé dona hẹn hodọdopọ lọ voawu. Whẹpo nuplọntọ lọ nado yin alọkẹyi taidi wẹnlatọ he ma ko yí baptẹm, e dona jẹ nubiọtomẹsi he bọdego helẹ kọ̀n:

1. (1) Ewọ dona yise dọ Biblu yin Ohó gbọdo Jiwheyẹwhe tọn.—2 Tim. 3:16.

2. (2) Ewọ dona yọ́n nuplọnmẹ dodonu Owe-wiwe tọn lẹ bosọ tindo yise to yé mẹ sọmọ bọ e sọgan na gblọndo he sọgbe hẹ nuhe Biblu dọ lẹ bọ e ma na yin sọgbe hẹ nuplọnmẹ sinsẹ̀n lalo tọn lẹ kavi linlẹn edetiti tọn lẹ.—Mat. 7:21-23; 2 Tim. 2:15.

3. (3) Ewọ dona to tonusena gbedide Biblu tọn nado nọ dogbẹ́ hẹ omẹ Jehovah tọn lẹ gbọn opli agun tọn lẹ yìyì dali eyin e penugo nado wàmọ.—Salm. 122:1; Heb. 10:24, 25.

4. (4) Ewọ dona yọ́n nuhe Biblu plọnmẹ dogbọn fẹnnuwiwa zanhẹmẹ tọn, ayọdide, yọnnu bibẹpli po zanhẹmẹ to omẹ vijinu dopolọ tọn lẹ ṣẹnṣẹn po dali, bo to gbẹnọ sọgbe hẹ nuplọnmẹ mọnkọtọn lẹ. Eyin mẹlọ ko to pọnọ hẹ omẹ vijinu awetọnọ de he ma yin hẹnnumẹ etọn, yé dona wlealọ to osẹ́n-liho.—Mat. 19:9; 1 Kọl. 6:9, 10; 1 Tim. 3:2, 12; Heb. 13:4.

5. (5) Ewọ dona nọ setonuna osẹ́n Biblu tọn he gbẹ́ ahànnumu bo nọ dapana amasin adínọ lẹpo he ma tin na azọ̀nhẹngbọ lẹ kavi nuyizan jọwamọ tọn depope he nọ yinuwado apọ̀n ji kavi he nọ hẹnmẹ flu lẹ.—2 Kọl. 7:1; Efe. 5:18; 1 Pita 4:3, 4.

6. (6) Ewọ dona yọ́n lehe e yin nujọnu sọ nado dapana gbẹdido ylankan.—1 Kọl. 15:33.

7. (7) Ewọ dona ko sánkanna kanṣiṣa etọn hẹ titobasinanu sinsẹ̀n lalo tọn he e sọgan ko nọ dogbẹ́ hẹ dai lẹpo mlẹnmlẹn. E dona ko doalọtena amísa yetọn lẹ yìyì po godoninọna kavi mahẹ tintindo to nuwiwa yetọn lẹ mẹ po.—2 Kọl. 6:14-18; Osọ. 18:4.

8. (8) Ewọ dona to kada na whẹho tonudidọ aihọn tọn lẹpo.—Joh. 6:15; 15:19; Jak. 1:27.

9. (9) Ewọ dona yí nuhe Biblu dọ dogbọn whẹho akọta lẹ tọn dali to Isaia 2:4 mẹ lọ sè bo nọ nọgbẹ̀ sọgbe hẹ ẹ.

10. (10) Ewọ dona jlo nado yin dopo to Kunnudetọ Jehovah tọn lẹ mẹ nugbonugbo.—Salm. 110:3.

⁹ Eyin nuhe yin linlẹn nuplọntọ lọ tọn gando whẹho delẹ go ma họnwun na mẹho lọ lẹ, yé dona kanhose e, bo sọgan yí wefọ he yin dide tofi lẹ zan taidi dodonu hodọdopọ lọ tọn. Onú titengbe de wẹ e yin dọ ewọ ni mọnukunnujẹemẹ dọ mẹhe nọ tindo mahẹ to azọ́n yẹwhehodidọ tọn mẹ hẹ Kunnudetọ Jehovah tọn lẹ dona nọ zan gbẹzan he sọgbe hẹ nubiọtomẹsi Owe-wiwe tọn ehelẹ. Gblọndo etọn lẹ na gọalọna mẹho agun tọn lẹ nado yọnẹn eyin ewọ yọ́n nuhe yin bibiọ to e si lẹ podọ nado yọnẹn eyin e pegan jẹ obá he sọgbe hẹ lẹnpọn dagbe de mẹ nado jẹ mahẹ tindo to lizọnyizọn kunnudegbe tọn mẹ ji.

¹⁰ Mẹho agun tọn lẹ dona yawu dọna nuplọntọ lọ eyin e pegan. To ninọmẹ susu mẹ, ehe sọgan yin didọ to vivọnu hodọdopọ lọ tọn. Eyin e pegan, mẹho agun tọn lẹ sọgan yí zohunhun do kẹalọyi mẹlọ taidi wẹnlatọ. (Lom. 15:7) E dona yin tulina nado jẹ mahẹ tindo to lizọnyizọn kunnudegbe tọn mẹ ji dile e sọgan yawu yọnbasi do podọ nado na linlin sinsẹ̀nzọn kunnudegbe tọn to vivọnu osun lọ tọn. Mẹho lọ lẹ sọgan basi zẹẹmẹ na ẹn dọ to whenuena Biblu plọntọ de pegan taidi wẹnlatọ he ma ko yí baptẹm bo na linlin sinsẹ̀nzọn kunnudegbe tọn etọn tintan, Kalti Kandai Wẹnlatọ Tọn de nọ yin awuwlena do oyín etọn mẹ, bo nọ yin hinhẹn do kandai-sẹdotẹn agun tọn mẹ. Mẹho agun tọn lẹ nọ yí nudọnamẹ mẹdetiti tọn ehelẹ to wẹnlatọ lọ si, na titobasinanu lọ nido sọgan penukundo nuwiwa sinsẹ̀n-bibasi tọn Kunnudetọ Jehovah tọn lẹ tọn go lẹdo aihọn pé, podọ na wẹnlatọ lọ nido sọgan nọ tindo mahẹ to nuwiwa gbigbọmẹ tọn lẹ mẹ bosọ mọ alọgọ yí to gbigbọ-liho. Humọ, mẹho lẹ sọgan flinnu wẹnlatọ yọyọ lẹ dọ nudọnamẹ mẹdetiti tọn depope nọ yin nukunpedego sọgbe hẹ Règles mondiales des Témoins de Jéhovah en matière de protection des données [Nujinọtedo He Kunnudetọ Jehovah Tọn lẹ Nọ Hodo Lẹdo Aihọn Pé Nado Basi Hihọ́na Nudọnamẹ Lẹ] ehe tin to jw.org ji.

¹¹ Akọjijẹ ganji hẹ wẹnlatọ yọyọ lọ podọ ojlo mẹdetiti tọn didohia to nuhe e ko wadotana lọ mẹ sọgan tindo nuyiwadomẹji dagbe do e ji. E sọgan whàn ẹn nado nọ na linlin sinsẹ̀nzọn kunnudegbe tọn to gbesisọ mẹ podọ nado tlẹ dovivẹnu dogọ nado to Jehovah sẹ̀n.—Flp. 2:4; Heb. 13:2.

¹² To whenue mẹho lẹ mọdọ Biblu plọntọ lọ pegan nado tindo mahẹ to lizọnyizọn kunnudegbe tọn mẹ, e na sọgbe nado na ẹn vọkan owe Mí Yin Tito-Basina Nado Wà Ojlo Jehovah Tọn etọn titi. To linlin sinsẹ̀nzọn kunnudegbe tọn etọn tintan nina godo, nulila kleun de na yin bibasi na agun dọ e ko lẹzun wẹnlatọ he ma ko yí baptẹm yọyọ de.

¹³ Yọpọvu lẹ lọsu sọgan pegan taidi wẹnlatọ wẹndagbe lọ tọn lẹ ga. Jesu kẹalọyi yọpọvu lẹ wá ede dè bo dona yé. (Mat. 19:13-15; 21:15, 16) Dile etlẹ yindọ mẹjitọ lẹ wẹ tindo azọngban lọ tlọlọ nado gọalọna ovi yetọn lẹ, mẹdevo lẹ to agun lọ mẹ sọgan jlo nado gọalọna jọja he yin whinwhàn sọn ahun mẹ wá nado tindo mahẹ to azọ́n yẹwhehodidọ Ahọluduta lọ tọn mẹ lẹ. Eyin mẹjitọ de wẹ hiẹ yin, apajlẹ dagbe towe to lizọnyizọn kunnudegbe tọn mẹ na na tuli ovi towe lẹ taun nado yin zohunhunnọ to sinsẹ̀nzọn yetọn hlan Jiwheyẹwhe mẹ. Eyin ovi de yin apajlẹ dagbenọ to walọyizan etọn mẹ bo yin whinwhàn sọn ahun mẹ wá nado lá nuyise etọn na mẹdevo lẹ, alọgọ devo tẹlẹ wẹ sọgan yin nina ẹn?

¹⁴ E na sọgbe dọ mẹjitọ lọ ni dọnsẹpọ dopo to mẹho he tin to Wedegbẹ́ Sinsẹ̀nzọn tọn mẹ lẹ mẹ nado dọho hẹ ẹ vlavo eyin ovi lọ ko pegan nado lẹzun wẹnlatọ de. Anadenanutọ to pipli mẹho lẹ tọn mẹ na de mẹho agun tọn awe (ehe dopo to yé mẹ dona yin hagbẹ wedegbẹ́ sinsẹ̀nzọn tọn) nado pli hẹ ovi lọ po mẹjitọ Klistiani etọn (lẹ) kavi mẹgopọntọ etọn po. Eyin ovi lọ tindo oyọnẹn dodonu nugbo Biblu tọn bo do kunnudenu lọ hia nugbonugbo dọ emi jlo nado tindo mahẹ to lizọnyizọn lọ mẹ, ehe na dohia dọ e ko basi nukọnyiyi dagbe. To dogbigbapọnna ninọmẹ ehelẹ po devo lẹ po he taidi dehe gando mẹhe ko whẹ́n mẹho lẹ go godo, mẹho agun tọn awe lọ lẹ sọgan basi dide eyin ovi lọ sọgan yin alọkẹyi taidi wẹnlatọ he ma ko yí baptẹm de. (Luku 6:45; Lom. 10:10) To whenue mì to hodọdopọ hẹ yọpọvu de, e ma yin dandan nado dọhodo whẹho he nọ saba yin dogbapọnna hẹ mẹhe ko whẹ́n mẹho lẹ ji, he e họnwun dọ e ma gando ovi de go.

¹⁵ To aisinsin lọ whenu, mẹho lẹ dona pà ovi lọ na nukọnyiyi etọn bo na ẹn tuli nado ze yanwle baptẹm-yíyí tọn dai. Matin ayihaawe, to whenuena e yindọ mẹjitọ lẹ ko wazọ́n sinsinyẹn nado do nugbo lọ do ahun ovi yetọn tọn mẹ, yelọsu jẹna pipà. Na mẹjitọ lẹ nido penugo nado to alọgọna ovi yetọn lẹ zọnmii, mẹho lẹ dona dọna mẹjitọ lẹ nado hia hosọ lọ “Nudọnamẹ de Na Mẹjitọ Klistiani Lẹ,” he tin to weda 179-181 owe ehe tọn.

¹⁶ Eyin hiẹ ko wá yọ́n Jehovah bo ko do owanyi towe na ẹn hia gbọn gbẹzan towe hinhẹn sọgbe hẹ nubiọtomẹsi etọn lẹ po mahẹ tintindo to lizọnyizọn kunnudegbe tọn mẹ po dali, hiẹ dona hẹn haṣinṣan towe hẹ Jehovah lodo dogọ. Gbọnna? Gbọn gbẹzan towe kinklandowiwe hlan ẹn po baptẹm-yíyí to osin mẹ po dali.—Mat. 28:19, 20.

¹⁷ Klandowiwe zẹẹmẹdo kinklan dovo na lẹndai wiwe de. Nado basi klandowiwe hlan Jiwheyẹwhe zẹẹmẹdo nado dọnsẹpọ ẹ to odẹ̀ mẹ bo dopà na ẹn vẹkuvẹku nado yí gbẹzan towe do sẹ̀n ẹn podọ nado zinzọnlin to aliho etọn lẹ ji. Ehe zẹẹmẹdo nado ze dewe jo na ẹn mlẹnmlẹn kakadoi. (Deut. 5:9) Whẹho mẹdetiti tọn de wẹ ehe, bọ hiẹ lọsu titi wẹ dona basi i. Mẹdevo depope ma sọgan basi i na we.

¹⁸ Ṣigba, didọna Jehovah to odẹ̀ mẹ dọ hiẹ jlo na lẹzun nutindo etọn poun ma ko pé gba. Hiẹ dona dohia mẹdevo lẹ dọ a ko basi klandowiwe hlan Jiwheyẹwhe. Kẹdẹdile Jesu basi do, hiẹ na hẹn ehe zun yinyọnẹn gbọn baptẹm-yíyí to osin mẹ dali. (1 Pita 2:21; 3:21) Eyin hiẹ ko magbe nado sẹ̀n Jehovah bo jlo nado yin bibaptizi, etẹwẹ a dona wà? Hiẹ dona dọ ojlo towe na anadenanutọ to pipli mẹho lẹ tọn mẹ. E na basi tito, na mẹho agun tọn voovo lẹ nido dọhodopọ hẹ we nado pọ́n eyin hiẹ ko jẹ nubiọtomẹsi Jiwheyẹwhe tọn lẹ na baptẹm kọ̀n. Na nudọnamẹ dogọ, jaale bo gbadopọnna “Nudọnamẹ de Na Wẹnlatọ He Ma Ko Yí Baptẹm,” he tin to weda 182-184 owe ehe tọn, podọ “Kanbiọ lẹ Na Mẹhe Jlo Na Yí Baptẹm Lẹ,” he tin to weda 185-207.

¹⁹ Linlin he nọ do nukọnyiyi sinsẹ̀n-bibasi wiwe-ṣeke lọ tọn hia lẹdo aihọn pé lẹ ko yin asisa tulinamẹ tọn tangan de na omẹ Jehovah tọn lẹ sọn owhe susu die. Sọn whenue gbọ́n Jesu Klisti ko dọna devi etọn lẹ dọ yẹwheho wẹndagbe lọ tọn na yin didọ to aigba lẹpo pete ji wẹ Klistiani nugbo lẹ ko yin ahunmẹduna taun nado yọ́n lehe ehe na yin wiwadotana do.—Mat. 28:19, 20; Malku 13:10; Owalọ 1:8.

²⁰ Hodotọ dowhenu tọn Jesu Klisti tọn lẹ tindo ojlo to linlin nukọnyiyi azọ́n yẹwhehodidọ tọn lọ tọn mẹ. (Malku 6:30) Owe Owalọ lẹ tọn to Biblu mẹ dọna mí dọ nudi gbẹtọ 120 wẹ tin to finẹ to whenuena gbigbọ wiwe yin kinkọnjẹgbonu do devi lẹ ji to Pẹntikọsti 33 W.M tọn. E ma dẹn bọ sọha devi lẹ tọn jideji jẹ nudi gbẹtọ 3 000 podọ jẹ nudi gbẹtọ 5 000 to enẹgodo. Linlin yin nina dọ “Jehovah zindonukọn nado to gbẹtọ lẹ yidogọna yé egbesọegbesọ to aliho whlẹngán tọn lọ ji” podọ “yẹwhenọ susu sọ lẹzun yisenọ.” (Owalọ 1:15; 2:5-11, 41, 47; 4:4; 6:7) Lehe linlin jideji ehelẹ tọn na ko na tuli devi lẹ do sọ! Lehe linlin awuvivinamẹ tọn ehelẹ na ko dozolanmẹna yé nado zindonukọn to azọ́ndenamẹ he Jiwheyẹwhe zedo alọmẹ na yé lọ mẹ, mahopọnna homẹkẹn sinsinyẹn he sinsẹ̀ngán Juvi lẹ tọn lẹ fọndote do sọ!

²¹ To nudi owhe 60 jẹ 61 W.M. tọn gblamẹ, Paulu na linlin to wekanhlanmẹ etọn hlan Kolosinu lẹ mẹ dọ wẹndagbe lọ “to sinsẹ́n detọ́n bo to jijideji to aihọn lọ pete mẹ” podọ “yẹwheho etọn yin didọna nudida he to olọn glọ lẹpo.” (Kol. 1:5, 6, 23) Klistiani dowhenu tọn lẹ ko setonuna Ohó lọ, bọ gbigbọ wiwe ko na huhlọn yé nado wà azọ́n yẹwhehodidọ tọn daho de lẹdo aihọn pé jẹnukọnna vivọnu titonu Juvi lẹ tọn to owhe 70 W.M. Lehe e yin tulinamẹnu de na Klistiani nugbonọ enẹlẹ nado sè linlin nuhe ko yin wiwadotana lẹ tọn do sọ!

²² Mọdopolọ, titobasinanu egbezangbe tọn Jehovah tọn nọ dovivẹnu nado tindo kandai lẹ gando azọ́n he yè to wiwà, ehe to dọdai he tin to Matiu 24:14 mẹ hẹndi lẹ go, he dọmọ: “Yẹwheho wẹndagbe Ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo, podọ whenẹnu wẹ opodo lọ na wá.” Taidi devizọnwatọ klandowiwe Jiwheyẹwhe tọn lẹ, mí tindo azọ́n niyaniya tọn de nado wà. Mí dona nọ wà nuhe go mí pé lẹpo nado mọdọ lizọnyizọn lọ yin wiwadotana mlẹnmlẹn whẹpo opodo lọ nido wá. Jehovah na hẹn ẹn diun dọ azọ́n ehe yin wiwadotana, podọ eyin míwlẹ tindo mahẹ to e mẹ, mí na tindo alọkẹyi Jehovah tọn.—Ezek. 3:18-21.

²³ Linlin etẹ tọn wẹ mí dona na taun? Wema Linlin Sinsẹ̀nzọn Kunnudegbe Tọn [Activité de prédication] he titobasinanu lọ ko wleawuna lọ nọ do nudọnamẹ he dona yin nina lẹ hia. Ṣigba, zẹẹmẹ paa he bọdego ehelẹ sọgan gọalọna mí.

²⁴ To apotin he mẹ yè kàn “Publications laissées (imprimées ou électroniques)” do lọ mẹ, kàn lẹndopọ sọha owe—vlavo zinjẹgbonu kavi Intẹnẹt ji tọn—he a dogbonu na mẹhe ma yin Kunnudetọ he ko yí baptẹm lẹ tọn do finẹ. To apotin he mẹ yè kàn “Vidéos montrées” do lọ mẹ, kàn lẹndopọ whla nẹmu he a penugo nado do video mítọn depope hia mẹde tọn do finẹ.

²⁵ To whenuena hiẹ jlo na na linlin “Gọyìpọn [Nouvelles visites]” lẹ tọn, hia whla nẹmu he a gọyì mẹhe ma yin Kunnudetọ he ko yí baptẹm lẹ dè nado doafọna ojlo he yé dohia wayi. Gọyìpọn de sọgan yin bibasi gbọn dlapọn de, wekanhlanmẹ de, oylọ alokan ji tọn, wekanhlanmẹ alokan ji kavi Intẹnẹt ji tọn gblamẹ, kavi gbọn owe delẹ hinhẹn yì na mẹlọ dali. Whedepopenu he hiẹ deanana plọnmẹ Biblu de, a sọgan hia gọyìpọn dopo. Mẹjitọ de sọgan hia gọyìpọn dopo to sẹmẹsẹmẹ to whenue e deanana sinsẹ̀n-bibasi whẹndo tọn de bọ ovi he ma ko yí baptẹm de to otẹn lọ mẹ.

²⁶ Dile etlẹ yindọ plọnmẹ Biblu lẹ nọ saba yin anadena to osẹ dopodopo mẹ, whladopo poun wẹ yé nọ yin hihia to osun dopodopo mẹ. Wẹnlatọ lẹ dona kàn lẹndopọ plọnmẹ Biblu voovo he yé deanana to osun lọ gblamẹ lẹ tọn. Yé sọgan sọ na linlin plọnmẹ Biblu he yé deanana hẹ mẹhe ma yin Kunnudetọ klandowiwe he ko yí baptẹm lẹ tọn. Eyin wedegbẹ́ sinsẹ̀nzọn tọn de dọna we nado nọ deanana oplọn mẹmẹsunnu kavi mẹmẹyọnnu he ko gbọjọ de tọn, kavi oplọn mẹhe ṣẹṣẹ yí baptẹm bo ma ko dotana owe Duvivi Ogbẹ̀ Tọn Kakadoi! de tọn, hiẹ dona nọ na linlin plọnmẹ Biblu lọ tọn.

²⁷ Onú titengbe de wẹ e yin dọ linlin “Gànmẹ [Heures]” he yin nina tọn ni sọgbe. Na taun tọn, ehe yin gànmẹ he a yizan na lizọnyizọn whédegbè jẹ whédegbè tọn, gọyìpọn lẹ, anadidena plọnmẹ Biblu lẹ, kavi kunnudide he yin tito-basina kavi mayin aṣa tọn de na mẹhe ma yin Kunnudetọ klandowiwe he ko yí baptẹm lẹ. Eyin wẹnlatọ awe to azọ́nwadopọ, yé omẹ awe lẹ sọgan hia gànmẹ he yé yizan, ṣigba mẹdopo wẹ dona hia gọyìpọn depope he yé basi kavi plọnmẹ Biblu depope he yé deanana. Mẹjitọ awe lẹ he tindo mahẹ to anademẹ nina ovi yetọn lẹ mẹ to sinsẹ̀n-bibasi whẹndo tọn whenu ma dona hia hugan gànhiho dopo to osẹ dopo mẹ. Mẹmẹsunnu lẹ sọgan na linlin gànmẹ he yé yizan nado na togunmẹho tọn. Mẹhe basi lẹdogbedevomẹ hodidọ lọ tọn lọsu sọgan na linlin gànmẹ etọn tọn ga. Nuwiwa he yin dandan tọn delẹ tin he gànmẹ yetọn ma nọ yin hihia, yèdọ nuwiwa lẹ taidi awuwiwlena sinsẹ̀nzọn kunnudegbe tọn, opli sinsẹ̀nzọn kunnudegbe tọn lẹ yìyì, podọ gbejizọnlin bibasi sọyi kavi sọn aigba-denamẹ lọ ji, po mọmọ po sọyi.

²⁸ Wẹnlatọ dopodopo dona hodo ayihadawhẹnamẹnu etọn he yin pinplọn gbọn Biblu dali nado magbe ojlẹ nẹmu he e yizan na kunnudide tọn. Wẹnlatọ delẹ nọ dọyẹwheho to lẹdo kleun he bẹ gbẹtọ susu hẹn lẹ mẹ, to whenuena e yindọ mẹdevo lẹ nọ wazọ́n to aigba-denamẹ he gbẹtọ lẹ ma sù te bọ e nọ biọ dọ yé ni zingbejizọnlin gaa nado jẹ yé dè lẹ ji. Aigba-denamẹ lẹ gbọnvo; podọ pọndohlan voovo wẹ wẹnlatọ lẹ nọ tindo gando lizọnyizọn yetọn go. Hagbẹ Anademẹtọ lọ ma nọ gbidikọna agun lẹ lẹdo aihọn pé nado kẹalọyi nudide ayihadawhẹnamẹnu etọn tọn gando lehe linlin gànmẹ he yin yiyizan to sinsẹ̀nzọn kunnudegbe tọn mẹ lẹ tọn na yin nina do go, mọjanwẹ mẹde ma yin dide nado dawhẹnamẹ to whẹho ehe mẹ do niyẹn.—Mat. 6:1; 7:1; 1 Tim. 1:5.

²⁹ Gànmẹ he yin nina na sinsẹ̀nzọn kunnudegbe tọn ma dona bẹ gànhiho agbòte lẹ hẹn gba. Ninọmẹ he mẹ gànhiho agbòte sọgan yin alọkẹyi te wẹ whenue wẹnlatọ de lẹzun madogánnọ sinsinyẹn na yọnhowhe, azọ̀n sinsinyẹn, kavi yin ginglọn do owhé mẹgopọntọ tọn de gbè, kavi to whenue nudevo depope hẹn ẹn zun madogánnọ. Wẹnlatọ mọnkọtọn sọgan na linlin nukunwhiwhe 15, 30, kavi 45 tọn kakati nido yin gànhiho dopo blebu. Eyin e tlẹ dekunnu na nukunwhiwhe 15 poun to osun dopo gblamẹ, e dona na linlin etọn. E na gbẹ́ yin pinpọnhlan taidi wẹnlatọ Ahọluduta tọn gbesisọnọ de. Tito ehe sọgan sọ gando wẹnlatọ he yin madogánnọ na ojlẹ gli de lẹ go, vlavo na e ma penugo nado sẹtẹn to osun dopo kavi humọ gblamẹ na e jẹazọ̀n sinsinyẹn kavi na e gbleawu wutu. Ṣigba, mẹhe yin madogánnọ taun to nuwiwa yetọn mẹ lẹ kẹdẹ wẹ tito ehe tin na. Wedegbẹ́ Sinsẹ̀nzọn tọn wẹ na basi nudide vlavo eyin wẹnlatọ de jẹna tito ehe kavi lala.

³⁰ Linlin sinsẹ̀nzọn kunnudegbe tọn towe na osun dopodopo nọ yin kinkandai do Kalti Kandai Wẹnlatọ Tọn de ji. Kandai ehelẹ yin agun lọ tọn. Eyin hiẹ jlo na sẹtẹn yì agun devo mẹ, hẹn ẹn diun dọ a dọna mẹho towe lẹ. Wekantọ agun tọn na hẹn ẹn diun dọ kalti towe yin didohlan agun yọyọ towe mẹ. Gbọnmọ dali, mẹho agun tọn lẹ na penugo nado dokuavọna we bosọ na we alọgọ gbigbọmẹ tọn. Eyin hiẹ jlo na tọ́nwhẹ̀n sọn agun towe mẹ na ojlẹ he ma pé osun atọ̀n, jaale bo zindonukọn nado to linlin sinsẹ̀nzọn kunnudegbe tọn towe lẹ dohlan agun towe mẹ.

³¹ Be hiẹ nọ wọn to whedelẹnu nado na linlin sinsẹ̀nzọn kunnudegbe tọn towe wẹ ya? Matin ayihaawe, mímẹpo wẹ tindo nuhudo nuflinmẹ tọn sọn ojlẹ de mẹ jẹ devo mẹ. Ṣigba, eyin mí wleawuna pọndohlan he sọgbe gando linlin sinsẹ̀nzọn kunnudegbe tọn mítọn nina go podọ eyin mí mọnukunnujẹ nuhewutu e do yin onú titengbe nado wàmọ mẹ, e sọgan lẹzun nuhe bọawuna mí nado nọ flin nado na linlin sinsẹ̀nzọn kunnudegbe tọn mítọn.

³² Mẹdelẹ ko kanse dọmọ: “To whenuena e yindọ Jehovah yọ́n nuhe wà n’te to sinsẹ̀nzọn etọn mẹ, naegbọn n’dona nọ na linlin na agun?” Nugbo wẹ dọ Jehovah yọ́n nuhe wà mí te, podọ ewọ yọnẹn eyin sinsẹ̀nzọn mítọn yin alindọn lẹpo tọn kavi lala. Etomọṣo flindọ, Jehovah basi kandai sọha azán he Noa zan to aki lọ mẹ lẹ tọn podọ sọha owhe he Islaelivi lẹ do zingbejizọnlin to danfafa ji lẹ tọn. Jiwheyẹwhe sọ basi kandai sọha mẹhe yin nugbonọ po mẹhe vẹtoli lẹ po tọn ga. E basi kandai awhàngbigba debọdo-dego he wá aimẹ to aigba Kenani tọn ji lẹ tọn po nuhe whẹdatọ nugbonọ Islaeli tọn lẹ wadotana lẹ po tọn. Mọwẹ, e basi kandai zẹẹmẹ gigọ́ susu lẹ tọn gando nuwiwa devizọnwatọ etọn lẹ tọn go. E gbọdo gbẹtọ lẹ nado basi kandai nuhe jọ lẹ tọn, bo hẹn pọndohlan etọn gando kandai he sọgbe lẹ tintindo go họnwun na mí hezeheze.

³³ Whenuho he yin kinkandai to Biblu mẹ lẹ do lehe linlin po kandai he omẹ Jehovah tọn lẹ wleawuna lẹ po sọgbe pẹpẹ do hia. To whẹho susu mẹ, nujọnu-yinyin kandai Biblu tọn lọ tọn ma sọgan yin didohia matin sọha tangan lẹ didọ gba. Gbadopọnna apajlẹ he bọdego helẹ: Jenẹsisi 46:27; Eksọdusi 12:37; Whẹdatọ lẹ 7:7; 2 Ahọlu lẹ 19:35; 2 Otànnugbo lẹ 14:9-13; Johanu 6:10; 21:11; Owalọ lẹ 2:41; 19:19.

³⁴ Dile etlẹ họnwun dọ linlin ehelẹ ma nọ bẹ nuhe mí wà to Jehovah sinsẹ̀n mẹ lẹpo hẹn, linlin ehelẹ nọ yí nususu wà nado gọalọna mẹhe tin to titobasinanu Jehovah tọn mẹ lẹ. To owhe kanweko tintan whenu, to whenue apọsteli lẹ lẹkọ sọn nujijla yẹwhehodidọ tọn de mẹ, yé na linlin Jesu gando “nuhe yé ko wà bosọ plọnmẹ lẹpo” go. (Malku 6:30) To whedelẹnu, linlin lẹ sọgan dohia dọ ayidonugo tangan de dona yin nina adà lizọnyizọn mítọn tọn tangan delẹ. Sọha lọ lẹ sọgan dohia dọ dile etlẹ yindọ nukọnyiyi ko tin to nuwiwa delẹ mẹ, to adà devo lẹ mẹ nukọnyiyi ma tin, taidi to agayiyi sọha wẹnlatọ lẹ tọn mẹ. E sọgan dohia dọ nuhudo tin na tulinamẹ kavi dọ nuhahun delẹ tin he dona yin nukunpedego. Nugopọntọ azọngbannọ lẹ na doayi linlin lẹ go bo dovivẹnu nado basi vọjlado na ninọmẹ depope he sọgan to aliglọnna nukọnyiyi mẹdopodopo delẹ tọn kavi agun lọ blebu tọn.

³⁵ Humọ, linlin lẹ nọ gọalọna titobasinanu lọ nado yọ́n awà he ji nuhudo daho hugan tin te na azọ́nwatọ lẹ. Awà tẹlẹ ji wẹ to sinsẹ́n detọ́n hugan? Awà tẹ ji wẹ nukọnyiyi ma sù te sọmọ? Nuhudo owe tẹlẹ tọn wẹ mí tindo nado gọalọna gbẹtọ lẹ nado plọn nugbo lọ? Linlin lẹ nọ gọalọna titobasinanu lọ nado wleawuna owe he nuhudo etọn tin to azọ́n yẹwhehodidọ tọn lọ mẹ to awà voovo aihọn lọ tọn lẹ ji podọ nado to azọ́nwa do hudo enẹlẹ ji zọnmii.

³⁶ Linlin nọ na tuli suhugan mítọn lẹ. Be homẹ mítọn ma nọ hùn to whenue mí sè azọ́n he mẹmẹsunnu mítọn lẹ to wiwà nado dọyẹwheho wẹndagbe lọ tọn lẹdo aihọn pé lẹ ya? Linlin lẹ gando jideji sọha wẹnlatọ lẹ tọn go nọ gọalọna mí nado yọ́n lehe titobasinanu Jehovah tọn ko gbloada sọ. Numimọ lẹ nọ na tuli mí bo nọ hẹn mí gọ́ na zohunhun, bosọ nọ whàn mí nado tindo mahẹ gigọ́ to azọ́n yẹwhehodidọ tọn mẹ. (Owalọ 15:3) Enẹwutu, gbekọndopọ mítọn hẹ agun lọ to linlin sinsẹ̀nzọn kunnudegbe tọn mítọn lẹ nina mẹ yin onú titengbe de bosọ nọ dohia dọ onú mẹmẹsunnu lẹ tọn to filẹpo to ahunmẹduna mí. To onú pẹvi ehe mẹ, mí nọ do taliai mítọn hia na tito he titobasinanu Jehovah tọn zedai lẹ.—Luku 16:10; Heb. 13:17.

³⁷ Mí ma tindo whẹwhinwhẹ́n depope nado nọ yí sinsẹ̀nzọn kunnudegbe tọn mítọn jlẹdo mẹdevo lẹ tọn go gba. (Gal. 5:26; 6:4) Ninọmẹ mẹdopodopo tọn gbọnvo. To alọ devo mẹ, mí sọgan mọ ale susu yí eyin mí nọ ze yanwle he sọgbe hẹ lẹnpọn dagbe lẹ dai na mídelẹ na nukọnyiyi mítọn to lizọnyizọn lọ mẹ. Yanwle ehelẹ kọ̀n jijẹ sọgan na mí pekọ he nọ zọnpọ hẹ wadotana dagbe lẹ.

³⁸ E họnwun hezeheze dọ, na nugbo tọn, Jehovah to mizọnmizọn do na bibẹpli mẹhe na yin hihọ́-basina to “nukunbibia daho” lọ whenu lẹ tọn. Mí to gbẹnọ to ojlẹ hẹndi dọdai Isaia tọn ehe tọn mẹ he dọmọ: “Omẹ vude na lẹzun fọtọ́n podọ omẹ pẹvi de na lẹzun akọta huhlọnnọ. Yẹn, Jehovah lọsu, wẹ na basi i po awuyiya po to ojlẹ etọn mẹ.” (Osọ. 7:9, 14; Isa. 60:22) Lẹblanulọkẹyi nankọ die nado yin lizọnyizọnwatọ wẹndagbe lọ tọn to azán godo tọn ayidego tọn ehelẹ mẹ!—Mat. 24:14.