Etẹwẹ Devi-Yinyin Bẹhẹn?

Jesu ko plọnmẹ onú titengbe delẹ to whenue e to núdù to owhé ogán Falesi lẹ tọn de tọn gbè. Dile Jesu zindonukọn to gbejizọnlin etọn mẹ dedo Jelusalẹm, gbẹtọgun daho de to gbejizọnlinzin hẹ ẹ. Etẹwutu? Be yé tindo ojlo nugbonugbo nado lẹzun hodotọ nugbo etọn lẹ, mahopọnna nuhe enẹ sọgan biọ to yé si ya?

Dile yé to yìyì to aliho ji, Jesu dọ nude he sọgan hẹn delẹ to yé mẹ jọsi dọmọ: “Eyin mẹdepope wá dè e bo ma gbẹwanna otọ́, onọ̀, asi, ovi lẹ, nọvisunnu lẹ po nọviyọnnu etọn lẹ po, mọwẹ, podọ etlẹ yin alindọn etọn titi, ewọ ma sọgan yin devi ṣie.” (Luku 14:26) Ṣigba, etẹ dọ wẹ e te to whenue e dọ mọ?

Jesu ma to didọ dọ mẹhe lẹzun hodotọ emitọn lẹpo dona gbẹwanna hẹnnumẹ yetọn lẹ to paa mẹ gba. Kakatimọ, nuhe dọ e te wẹ yindọ yé dona gbẹwanna yé to linlẹn lọ mẹ dọ owanyi he yé tindo na hẹnnumẹ lẹ ma dona sinyẹn hugan dehe yé tindo na Jesu, yé ma dona taidi dawe he go e donù to apajlẹ núdùdù whèjai tọn lọ tọn mẹ he gbẹ́ oylọ-basinamẹ vonọtaun de dai na e ṣẹṣẹ dà asi wutu. (Luku 14:20) E yin didọ gando tọgbo Ju lẹ tọn Jakọbu go dọ e “gbẹwanna” Lea bo yiwanna Laheli, ehe zẹẹmẹdo dọ owanyi he e tindo na Lea ma sinyẹn sọ dehe e tindo na nọviyọnnu etọn Laheli.—Gẹnẹsisi 29:31.

Doayi e go dọ Jesu dọ dọ devi de dona gbẹwanna “etlẹ yin alindọn etọn titi.” Ehe dohia dọ devi nugbo de dona yiwanna Jesu hugan ogbẹ̀ etọn titi, bo tlẹ tindo ojlo nado hẹn ogbẹ̀ ede tọn bu eyin e biọ domọ. E họnwun dọ azọngban sinsinyẹn de wẹ e yin nado lẹzun devi Klisti tọn. E ma yin afọdide he dona yin zize na ojlẹ gli de, kavi nuhe yè ma lẹnnupọn ganji whẹpo do basi de gba.

Devi-yinyin sọgan bẹ nuhahun po homẹkẹn po hẹn, na Jesu dọmọ: “Mẹdepope he ma ze yatin etọn bo to hihodo mi ma sọgan yin devi ṣie.” (Luku 14:27) Mọwẹ, devi nugbo Jesu tọn de dona tindo ojlo nado jugbọn vlẹko sinsinyẹn mẹ kẹdẹdile Jesu pehẹ do. Jesu tlẹ dọ dọ emi na kú to alọ kẹntọ emitọn lẹ tọn mẹ.

Enẹwutu, gbẹtọgun he to gbejizọnlinzin hẹ Jesu lọ dona lẹnnupọn po sọwhiwhe po do nuhe e zẹẹmẹdo nado yin devi Klisti tọn de ji. Jesu zinnudo enẹ ji po apajlẹ de po. E dọmọ: “Di apajlẹ, mẹnu to mì mẹ wẹ na jlo nado gbá atọ̀họ̀ de he ma na sinai bo lẹn akuẹ etọn whẹ́ nado pọ́n eyin e tindo nuhe pé nado dotana ẹn? Eyin e ma yinmọ, e sọgan do dodonu etọn ṣigba bo ma penugo nado dotana ẹn.” (Luku 14:28, 29) Enẹwutu, whẹpo yé nado lẹzun devi Jesu tọn, mẹhe to gbejizọnlinzin hẹ ẹ jei Jelusalẹm lẹ dona ko magbe sinsinyẹn nado didá azọngban he enẹ bẹhẹn lẹ to gigọ́ mẹ. Jesu zinnudo linlẹn enẹ ji po apajlẹ devo he e na po dọmọ:

“Kavi ahọlu tẹwẹ na to awhànfọ de nado pé ahọlu devo to awhàn mẹ, bo ma na sinai bo dewé whẹ́ eyin ewọ na penugo nado yí awhànfuntọ 10 000 do pehẹ ewọ he ja e dè po 20 000 po? Na nugbo tọn, eyin e ma sọgan wàmọ, to whenẹnu e na do pipli afọzedaitọ lẹ tọn de hlan to whenue ewọ gbẹ́ pò to olá, nado dín jijọho.” Nado hẹn nuagokun etọn họnwun, Jesu dọmọ: “To aliho dopolọ mẹ, mẹdepope to mì mẹ he ma dọ e yì whedenu na nutindo etọn lẹpo ma sọgan yin devi ṣie.”—Luku 14:31-33.

E họnwun dọ Jesu ma to ohó ehe dọna gbẹtọgun he to hihodo e to aliho ji lọ kẹdẹ gba. Mẹhe plọnnu gando Klisti go lẹpo dona tindo ojlo nado wà nuhe dọ e te tofi lẹ. Ehe zẹẹmẹdo dọ yé dona wleawufo nado yí nuhe yé tindo lẹpo do sanvọ́—yèdọ nutindo yetọn lẹ, etlẹ yin ogbẹ̀ yetọn—eyin yé jlo na yin devi etọn lẹ. Whẹho he ji yè dona lẹnnupọndo bosọ hodẹ̀ gandego de wẹ.

Todin, Jesu fọ́n whẹho he go e ko donù to Yẹwhehodidọ Osó ji tọn etọn whenu de dote, yèdọ whenue e dọ dọ devi etọn lẹ wẹ “ojẹ̀ aigba tọn.” (Matiu 5:13) E sọgan ko to didọ dọ kẹdẹdile ojẹ̀ nọ basi hihọ́na nude ma nado gble do, mọdopolọ wẹ devi etọn lẹ nọ tindo nuyiwadomẹji do gbẹtọ lẹ ji do, bo nọ basi hihọ́na yé ma nado gble to gbigbọ-liho podọ to walọyizan-liho. Todin, dile lizọnyizọn etọn to dindọnsẹpọ vivọnu, e dọmọ: “E họnwun dọ ojẹ̀ yọ́n. Ṣigba, eyin ojẹ̀ lọsu hẹn huhlọn etọn bu, etẹwẹ yè na yí do hẹn ẹn dotọ́n?” (Luku 14:34) Todoaitọ etọn lẹ yọnẹn dọ delẹ to ojẹ̀ he tin to whenẹnu lẹ mẹ ko yin hinhẹnflu, e ko flusọ́ po nuhe tin to aigba ji lẹ po bo masọ yọ́n-na-yizan sọmọ ba.

Enẹwutu, Jesu to didohia dọ mẹhe tlẹ ko yin devi etọn na whenu dindẹn lẹ ma dona dike gbemima yetọn ni dekanpo. Eyin enẹ jọ do yé go, be yé masọ yọ́n-na-yizan ba, taidi ojẹ̀ he hẹn huhlọn etọn bu. To whenẹnu, aihọn lọ sọgan ṣàn yé kò. Humọ, yé ma na yin alọkẹyi to nukun Jiwheyẹwhe tọn mẹ, bo tlẹ hẹn vlẹko wá oyín etọn ji. Jesu zinnudeji dọ nujọnu wẹ e yin nado dapana kọdetọn enẹ to whenue e dọmọ: “Gbọ ewọ he tindo otó nado dotoai, ni dotoai.”—Luku 14:35.