“Fọnsọnku po Ogbẹ̀ Po”

Whenue Jesu tọ́n sọn Pelea, e wá lẹdo Bẹtani tọn mẹ, yèdọ gbétatò de he dẹn do Jelusalẹm na nudi kilomẹtlu 3 to whèzẹtẹn-waji. Malia po Malta po he yin nọviyọnnu Lazalọsi tọn lẹ to aluẹmẹ, na ewọ kú e ma dẹn wutu. Mẹsusu wá nado miọnhomẹna yé.

To whenẹnu, mẹde dọna Malta dọ Jesu ja, ewọ sọ yawu yì pé e. Malta dọ nuhe ewọ po nọviyọnnu etọn po na ko to linlẹn sọn azán ẹnẹ die na Jesu dọmọ: “Oklunọ, eyin hiẹ ko tin tofi wẹ, nọvisunnu ṣie ma na ko kú.” Ṣigba, ehe ma dohia dọ e ma tindo todido. Malta dọmọ: “Yẹn gbẹ́ kudeji dọ nulẹpo he hiẹ biọ Jiwheyẹwhe, Jiwheyẹwhe na na we.” (Johanu 11:21, 22) E lẹndọ Jesu gbẹ́ sọgan gọalọna nọvisunnu etọn.

Jesu gblọn dọmọ: “Nọvisunnu towe na fọ́n.” Malta wá tadona lọ kọ̀n dọ ewọ na ko to hodọ gando fọnsọnku sọgodo tọn to aigba ji go, yèdọ todido he Ablaham po mẹdevo lẹ po tindo. Podọ e dohia dọ emi yise dọ ehe na jọ janwẹ to whenue e dọmọ: “Yẹn yọnẹn dọ e na fọ́n to fọnsọnku whenu to azán godo tọn gbè.”—Johanu 11:23, 24.

Amọ́, be e yọnbasi dọ Jesu ni hẹn kọgbọ wá to afọdopolọji to nujijọ ehe mẹ ya? E flinnu Malta dọ Jiwheyẹwhe ko na emi huhlọn do okú ji, dọmọ: “Ewọ he do yise hia to yẹn mẹ, eyin ewọ tlẹ kú, e na gọwá ogbẹ̀; podọ mẹdepope he to ogbẹ̀ bo do yise hia to yẹn mẹ ma na kú pọ́n gbede.”—Johanu 11:25, 26.

Jesu ma to didọ dọ devi emitọn he to ogbẹ̀ to whenẹnu lẹ ma na kú gbede gba. Ewọ lọsu tlẹ dona kú, dile e ko dọna apọsteli etọn lẹ do. (Matiu 16:21; 17:22, 23) Jesu jlo na zinnudeji dọ, yise tintindo to ewọ mẹ sọgan namẹ ogbẹ̀ madopodo. Na mẹsusu, fọnsọnku godo wẹ ogbẹ̀ enẹ na yọnbasi te. Ṣigba, omẹ nugbonọ he nọgbẹ̀ kakajẹ vivọnu titonu ehe tọn lẹ sọgan nọma dọ́ okú pọ́n gbede. Depope he whẹho lọ na yin, mẹhe do yise hia to ewọ mẹ lẹpo sọgan deji dọ yé ma na kú kakadoi.

Ṣigba, be Jesu he ṣẹṣẹ dọ dọ “yẹn wẹ fọnsọnku po ogbẹ̀ po,” na penugo nado gọalọna Lazalọsi, yèdọ mẹhe ko kú sọn azán susu die ya? Jesu kanse Malta dọmọ: “Be hiẹ yí ehe sè ya?” E gblọn dọmọ: “Mọwẹ, Oklunọ; yẹn yise dọ hiẹ wẹ Klisti lọ, Visunnu Jiwheyẹwhe tọn, Omẹ lọ he dona wá aihọn mẹ.” Malta yise dọ Jesu sọgan yí nude wà to azán enẹ gbè, enẹwutu e yawu yì whégbè bo dọna nọviyọnnu etọn to nuglọ dọmọ: “Mẹplọntọ lọ ko wá bo to yiylọ we.” (Johanu 11:25-28) Whenẹnu, Malia tọ́n sọn whégbè, bọ mẹdevo lẹ hodo e hadopo, na yé lẹndọ yọdò Lazalọsi tọn kọ̀n wẹ e na ko jei.

Kakatimọ, Jesu dè wẹ Malia yì bo họ́jai to afọ etọn lẹ kọ̀n bosọ to avivi, e sọ vọ́ numọtolanmẹ nọviyọnnu etọn tọn lẹ dọ dọmọ: “Oklunọ, eyin hiẹ ko tin tofi wẹ, nọvisunnu ṣie ma na ko kú.” To whenue Jesu mọ Malia po gbẹtọgun lọ lẹ po to avivi, enẹ yinuwado e ji bọ e wẹnhun bo biọ bẹwlu mẹ bosọ kùn dasin. Enẹ biọ lanmẹ na mẹhe to finẹ lẹ. Ṣigba, mẹdelẹ kanse dọ: ‘Eyin Jesu penugo nado hunnukun na mẹhe yin jiji di nukuntọ́nnọ de, be e ma penugo nado glọnalina omẹ ehe ma nado kú wẹ ya?’—Johanu 11:32, 37.