‘Dile Etlẹ Yindọ Mì Ma Mọ Ẹn Pọ́n, Mì Yiwanna Ẹn’
“Mẹhe mì ma ko mọ, bo to wanyina; mẹhe mì ma tlẹ mọ dinvie, ganṣo bo to yiyise, mì yí ayá ma sọgan dọ he gọna gigo do to ayajẹ.”—1 PITA 1:8.
1. Dile etlẹ yindọ mẹdepope to aigba ji to egbehe ma ko mọ Jesu, nawẹ sinsẹ̀n-basitọ delẹ nọ tẹnpọn nado do mẹdezejo hia hlan ẹn gbọn?
MẸDEPOPE he tin to ogbẹ̀ to aigba ji to egbehe ma ko mọ Jesu Klisti pọ́n gba. Ṣogan, livi susu gbẹtọ lẹ tọn sọalọakọn nado yiwanna ẹn. To owhe dopodopo mẹ to 9 janvier, to Manila, otò Philipine tọn mẹ, boṣiọ nujọnu tọn heyin Jesu Klisti he to yatin hẹn tọn nọ yin zize lẹdo tòhomẹ-liho lọ lẹpo mẹ pé to nuhe ko yin zẹẹmẹ basina taidi dohia ayidego hugan wọbliba gbẹtọ lẹ tọn na sinsẹ̀n he diyín hugan otò lọ mẹ tọn. Gbẹtọgun ayajẹnọ lọ lẹ nọ sisẹ́ yedelẹ bo nọ tintlín biọ gbẹtọ lẹ mẹ; gbẹtọ lẹ tlẹ nọ hẹ́ ode awetọ yetọn lẹ ji to vivẹnudido egblemaku tọn mẹ nado doalọ boṣiọ lọ go. Suhugan mẹhe tin to finẹ nado payi ehe go lẹ nọ yin dindọn gbọn nuwiwa hùnwhẹ gbẹtọ susu lẹ tọn kẹdẹ dali. Ṣogan, matin ayihaawe delẹ to yé mẹ yin gbẹtọ he tindo numọtolanmẹ yinyin dindọnsẹpọ Jesu po ahundopo po tọn lẹ. Taidi kunnudenu enẹ tọn, yé sọgan nọ do akluzu kavi sọgan nọ yì ṣọṣi whepoponu. Ṣigba, be boṣiọ sinsẹ̀n mọnkọtọn sọgan yin pinpọndohlan taidi sinsẹ̀n-bibasi nugbo ya?
2, 3. (a) Mẹnu to hodotọ Jesu tọn lẹ mẹ wẹ mọ ẹn bo sè nuhe e dọ lẹ na taun tọn? (b) Mẹdevo tẹlẹ to owhe kanweko tintan mẹ wẹ yiwanna Jesu bo tindo yise to ewọ mẹ, dile etlẹ yindọ yé ma mọ ẹn po nukun po?
2 To owhe kanweko tintan whenu, fọtọ́n susu gbẹtọ lẹ tọn tin to ayimatẹn Lomu tọn lẹ heyin Judé, Samalia, Pelea, po Galili po he dopodopo yetọn na taun tọn mọ bo sèhó Jesu Klisti tọn lẹ. Yé dotoai dile e basi zẹẹmẹ nugbo ahunfọndotenamẹ tọn lẹ dogbọn Ahọluduta Jiwheyẹwhe tọn dali. Yé mọ azọ́njiawu he e basi lẹ po nukun po. Delẹ to omẹ ehelẹ mẹ lẹzun devi mẹdezejotọ etọn lẹ, bo tindo nujikudo dọ ewọ wẹ “Klisti lọ, Ovi Jiwheyẹwhe ogbẹ̀nọ tọn.” (Matiu 16:16) Ṣigba, mẹhe apọsteli Pita wlan wekanhlanmẹ gbọdo tintan etọn hlan lẹ ma ko tin to omẹ ehelẹ mẹ gba.
3 Mẹhe Pita to wekan hlan lẹ tin to ayimatẹn Lomu tọn lẹ taidi Pọntu, Galatia, Kapadokia, Asia, po Bitinia po—he yemẹpo tin to awà Turquie egbezangbe tọn ji. Pita wlan hlan yé dọmọ: “Mẹhe mì ma ko mọ, bo to wanyina; mẹhe mì ma tlẹ mọ dinvie, ganṣo bo to yiyise, mì yí ayá ma sọgan dọ he gọna gigo do to ayajẹ.” (1 Pita 1:1, 8) Nawẹ yé wà do yọ́n Jesu kakajẹ obá owanyina ẹn po yise didohia to ewọ mẹ po gbọn?
4, 5. Nawẹ gbẹtọ he ma ko mọ Jesu pọ́n nẹlẹ plọnnu ganji dogbọn dali etọn nado yiwanna ẹn bo tindo yise to ewọ mẹ gbọn?
4 Kunnudenu dohia dọ, mẹdelẹ tin to Jelusalẹm to whenuena apọsteli Pita dekunnu hlan gbẹtọgun he wá hùnwhẹ Pẹntikọsti owhe 33 W.M. tọn tẹnmẹ. To hùnwhẹ lọ godo devi susu lẹ nọte to Jelusalẹm nado sọgan mọ nuplọnmẹ susu lẹ yí sọn apọsteli lẹ si. (Owalọ lẹ 2:9, 41, 42; yijlẹdo 1 Pita 1:1 go.) To gbejizọnlin pludopludo mẹdehlan tọn lẹ mẹ, apọsteli Paulu wà lizọnyizọn zohunhunnọ de, humọ to mẹhe nọ nọ lẹdo he Pita yí wekanhlanmẹ tintan Biblu tọn he tindo yinkọ etọn hlan lẹ ṣẹnṣẹn.—Owalọ lẹ 18:23; 19:10; Galatianu lẹ 1:1, 2.
5 Naegbọn gbẹtọ nẹlẹ, he ma ko mọ Jesu pọ́n gbede, do dọnsẹpọ ẹ tlala sọmọ? To azán mítọn gbe, naegbọn suhugan livi susu lẹ tọn, lẹdo globu lọ pe, do yiwanna ẹn sisosiso?
Nuhe Yé Sè Lẹ
6. (a) Eyin hiẹ ko sè bọ Pita dekunnu dogbọn Jesu dali to Pẹntikọsti owhe 33 W.M., etẹwẹ hiẹ na ko plọn? (b) Nawẹ ehe yinuwa do omẹ 3 000 delẹ he tin to finẹ ji gbọn?
6 Eyin hiẹ ko tin to Jelusalẹm to whenuena Pita dọho na gbẹtọgun he to hùnwhẹ basi to owhe 33 W.M. wẹ, etẹwẹ hiẹ na ko plọn dogbọn Jesu dali? Matin ayihaawe depope azọ́njiawu he e wà lẹ dohia dọ e yin didohlan gbọn Jiwheyẹwhe dali. Dọ, dile etlẹ yindọ gbẹtọ ylandonọ lẹ ko hù Jesu, e ma sọ tin to yọ̀do mẹ ba ṣigba ko yin finfọnsọnku bo gbọnmọ dali yin zizedaga to olọn mẹ to adusilọ Jiwheyẹwhe tọn mẹ. Na nugbo tọn, dọ Jesu wẹ, Klisti lọ, yèdọ Mẹssia lọ he yẹwhegan lẹ ko wlanwe dogbọn dali etọn. Dọ gbọn Jesu Klisti gblamẹ, gbigbọ wiwe ko yin kinkọ̀n do hodotọ etọn lẹ ji bọ yé do penugo to afọdopolọji nado dekunnu na gbẹtọ akọta susu lẹ dogbọn onú jiawu he Jiwheyẹwhe to wiwà lẹ gbọn Visunnu etọn dali. Ahún suhugan mẹhe sè hodidọ Pita tọn lẹ to nujijọ enẹ mẹ lẹ yin whinwhàn sisosiso, podọ gbẹtọ 3 000 delẹ yin bibaptizi taidi devi Klistiani lẹ. (Owalọ lẹ 2:14-42) Eyin hiẹ ko tin to finẹ wẹ, be hiẹ na ko ze afọdide nujikudo tọn mọnkọtọn ya?
7. (a) Eyin hiẹ ko tin to Antioku to whenuena apọsteli Paulu dọyẹwheho to finẹ wẹ, etẹwẹ hiẹ sọgan ko plọn? (b) Naegbọn mẹdelẹ to gbẹtọgun lọ mẹ lẹzun yisenọ lẹ bo má wẹndagbe lọ hẹ mẹdevo lẹ?
7 Eyin hiẹ ko tin to mẹhe wá lẹ ṣẹnṣẹn to whenuena apọsteli Paulu plọnmẹ to Antioku to ayimatẹn Lomu tọn heyin Galatia mẹ, onú devo tẹwẹ hiẹ sọgan ko plọn dogbọn Jesu dali? Hiẹ na ko sè Paulu basi zẹẹmẹ dọ yinyin owhẹ̀ okú tọn dá na Jesu gbọn mẹhe to gandu to Jelusalẹm mẹ lẹ dali ko yin dọdai etọn dọ gbọn yẹwhegan lẹ dali. Hiẹ na ko sọ sè dogbọn kunnudenu mẹhe mọ fọnsọnku Jesu tọn po nukun po lẹ dali. Na jide tọn hiẹ na ko yin whinwhàn gbọn zẹẹmẹ Paulu tọn dali dọ gbọn finfọ́n Jesu sọn okú dali, Jehovah na kunnudenu dogọ dọ omẹ ehe na nugbo tọn wẹ Visunnu Jiwheyẹwhe tọn. Podọ be ahún towe ma na ko yin finfọndote dile hiẹ plọn dọ jona ylando tọn lẹ he yin hinhẹn yọnbasi gbọn yise to Jesu mẹ dali sọgan dekọtọn do ogbẹ̀ madopodo mẹ ya? (Owalọ lẹ 13:16-41, 46, 47; Lomunu lẹ 1:4) To yinyọ́n nujọnu-yinyin nuhe yé to sisè tọn, mẹdelẹ to Antioku lẹzun devi lẹ, bo yí zohunhun do to wẹndagbe lọ má hẹ mẹdevo lẹ, yèdọ dile etlẹ yindọ mọwiwà zẹẹmẹdo dọ yé na pannukọn homẹkẹn sinsinyẹn.—Owalọ lẹ 13:42, 43, 48-52; 14:1-7, 21-23.
8. Eyin hiẹ ko tin to opli lọ tẹnmẹ to agun Efesu tọn mẹ to whenuena wekanhlanmẹ Paulu tọn hlan yé yin mimọyi wẹ, etẹwẹ hiẹ sọgan ko plọn?
8 Etẹwẹ lo eyin hiẹ ko to gbẹdo hẹ agun Klistiani tọn he tin to Efesu, to ayimatẹn Asia Lomu tọn, to whenuena wekanhlanmẹ gbọdo Paulu tọn hlan devi he tin to finẹ lẹ yin mimọyi? Etẹwẹ hiẹ sọgan ko plọn sọn e mẹ dọgbọn azọngban Jesu tọn dali to lẹndai Jiwheyẹwhe tọn mẹ? To wekanhlanmẹ enẹ mẹ Paulu basi zẹẹmẹ dọ gbọn Klisti dali onú lẹpo to olọn mẹ podọ to aigba ji na yin hinhẹn gọwa gbesisọmẹ hẹ Jiwheyẹwhe, dọ nunina Jiwheyẹwhe tọn gbọn Jesu Klisti dali yin kandlẹnna jẹ gbẹtọ akọta lẹpo tọn dè, dọ omẹ dopodopo he ko kú to pọndohlan Jiwheyẹwhe tọn mẹ na ylando yetọn lẹ wutu yin hinhẹn tin to ogbẹ̀ gbọn yise to Klisti mẹ dali, podọ taidi kọdetọn awuwledainanu ehe tọn, e sọ yọnbasi na gbẹtọvi lẹ nado lẹzun visunnu yiwanna Jiwheyẹwhe tọn lẹ.—Efesunu lẹ 1:1, 5-10; 2:4, 5, 11-13.
9. (a) Etẹwẹ sọgan gọalọna we nado yọnẹn vlavo hiẹ na dewetiti mọnukunnujẹ nujọnu-yinyin nuhe Paulu wlan hlan Efesunu lẹ go? (b) Nawẹ mẹmẹsunnu lẹ to ayimatẹn Lomu tọn lẹ heyin nùdego gbọn Pita dali yin gingandego gbọn nuhe yé to pinplọn dogbọn Jesu dali gbọn?
9 Be pinpẹn-nutọn-yinyọnẹn na ehe lẹpo ko hẹn owanyi towe na Visunnu Jiwheyẹwhe Tọn siso ya? Be owanyi enẹ na ko yinuwa do gbẹzan egbesọegbesọ towe tọn ji, dile apọsteli Paul namẹ tuli etọn do to weta 4 kakajẹ 6 Efesunu lẹ tọn mẹ ya? Be pinpẹn-nutọn-yinyọnẹn mọnkọtọn na ko whàn we nado basi dogbapọn sọwhiwhe tọn na nuhe tin to otẹn tintan mẹ to gbẹzan towe mẹ lẹ ya? Na owanyi tintindo na Jiwheyẹwhe po pẹdido na Visunnu etọn po wutu, be hiẹ na ko basi vọjlado he nuhudo tin na lẹ na ojlo Jiwheyẹwhe tọn wiwà nido sọgan tin to otẹn ayidego tọn mẹ to gbẹzan towe mẹ ya? (Efesunu lẹ 5:15-17) Gando aliho he mẹ Klistiani lẹ to Asia, Galatia, po ayimatẹn Lomu tọn devo lẹ po yin gingandego gbọn nuhe yé to pinplọn lẹ dali go do, apọsteli Pita wlanwe hlan yé dọmọ: “Mẹhe mì ma ko mọ [Jesu Klisti], bo to wanyina; . . . bo to yiyise, mì yí ayá ma sọgan dọ he gọna gigo do to ayajẹ.”—1 Pita 1:8.
10. (a) Matin ayihaawe etẹwẹ yidogọna owanyi Klistiani fliflimẹ tọn lẹ tọn na Jesu? (b) Nawẹ míwlẹ lọsu sọgan mọaleyi gbọn?
10 Matin ayihaawe onú devo tin he yidogọna owanyina Visunnu Jiwheyẹwhe Tọn he yin numọtolanmẹ etọn tindo gbọn Klistiani fliflimẹ tọn enẹlẹ dali he apọsteli Pita kanwe hlan. Etẹwẹ enẹ yin? To ojlẹ he mẹ Pita kàn wekanhlanmẹ tintan etọn, e whè gbau awe to Wẹndagbe lọ lẹ mẹ—yèdọ Matiu po Luku po—ko jẹ gbẹtọ lẹ si. Klistiani owhe kanweko tintan whenu tọn he ma mọ Jesu pọ́n lẹ sọgan hia kandai Wẹndagbe ehe tọn lẹ. Mí lọsu sọgan wà mọ ga. Wẹndagbe lọ lẹ mayin kandai otangblo tọn lẹ gba, yé bẹ́ nujijọ whenuho tọn he go yè sọgan ganjẹ lẹpo hẹn. To kandai gbọdo enẹlẹ mẹ, mí mọ onú susu he hẹn owanyi mítọn na Visunnu Jiwheyẹwhe Tọn siso.
Gbigbọ he E Dohia
11, 12. Etẹwẹ tin to finẹ dogbọn gbigbọ he Jesu dohia dohlan gbẹtọ lẹ dali he hẹn we nado yiwanna ẹn?
11 To finẹ to kandai whenuho gbẹzan Jesu tọn mẹ, mí plọn lehe e yinuwa hẹ gbẹtọ devo lẹ do. Gbigbọ he e dohia nọ whàn ahún gbẹtọ lẹ tọn etlẹ yin todin, to nuhugan owhe 1 960 to whenuena e ko kú godo. Mẹhe tin to ogbẹ̀ lẹpo yin tukla dona po nugandomẹgo ylando tọn lẹ po. Livi susu lẹ to oya whẹdida agọ̀ tọn ji, nọ diahi hẹ azọ̀n, kavi na whẹwhinwhẹ́n devo lẹ nọ tindo numọtolanmẹ gbigbọjọ flumẹjijẹ tọn. Na omẹ mọnkọtọn lẹpo, Jesu dọmọ: “Mì wá dee, mì he to tuklajẹ, bọ yè doagban pinpẹn na lẹ, yẹn nasọ na gbọjẹ mì. Mì yí zẹ̀gẹ̀ ṣie do okọ̀ mìtọn, na mì ni sọ plọn nupinplọn ṣie: na homẹmimiọnnọ podọ ayiha whiwhẹnọ wẹ yẹn: mì nasọ mọ gbọjẹ hlan alindọn mìtọn lẹ. Na zẹ̀gẹ̀ ṣie bọawu, agbàn ṣie sọ fua.”—Matiu 11:28-30.
12 Jesu do mẹtọnhopọn numọtolanmẹ tọn hia na hẹntọnọ lẹ, huvẹtọnọ lẹ, po mẹhe to awubla mẹ lẹ po. To whenuena ninọmẹ lẹ hẹn ẹn zun dandannu, e tlẹ na núdùdù gbẹtọgun lẹ to azọ́njiawu liho. (Luku 9:12-17) E hẹn yé jẹ mẹdekannu sọn kanlinmọgbenu otangblo tọn lẹ si. E sọ hẹn yise yetọn lodo to awuwledainanu Jiwheyẹwhe tọn mẹ nado hẹn yasanamẹ tonudidọ po akuẹzinzan tọn po wá vivọnu. Jesu ma hẹn mẹhe to yinyin yasana lẹ gbọjọ gba. Po awuvẹmẹ po gọna owanyi, e gbọn azọ́nyinyọnẹn dali do dotuhomẹna homẹmimiọnnọ lẹ. E fakọna mẹhe taidi osẹ̀ he yọ́ bo to adàji lẹ podọ mẹhe taidi sékànfún he mẹ amì ko vọ̀ sọn he to na ṣí lẹ. Bẹsọn ojlẹ enẹ mẹ kakajẹ din, oyín etọn nọ fọ́n todido dote, etlẹ yin to ahún mẹhe ma ko mọ ẹn pọ́n lẹ tọn mẹ.—Matiu 12:15-21; 15:3-10.
13. Naegbọn aliho he mẹ Jesu yinuwa hẹ ylanwatọ lẹ te do dọ̀n gbẹtọ lẹ dogo?
13 Jesu ma kẹalọyi ylanwiwa gba, ṣogan e do nukunnumọjẹnumẹ hia hlan mẹhe ko ṣinuwa to gbẹ̀mẹ lẹ ṣigba he do lẹnvọjọ hia bo lẹhlan ẹn na alọgọ. (Luku 7:36-50) E nọ sinai bo nọ dùnú hẹ mẹhe yin kọgbẹ́ e go to lẹdo lọ mẹ lẹ eyin e tindo numọtolanmẹ dọ ehe na wleawuna dotẹnmẹ hundote de nado gọalọna yé to gbigbọmẹ. (Matiu 9:9-13) Taidi kọdetọn gbigbọ he e dohia lọ tọn, livi susu gbẹtọ he tin to ninọmẹ dopolọ mẹ lẹ he ma ko mọ Jesu pọ́n ko yin whinwhàn nado yọ́n ẹn bo tindo yise to ewọ mẹ.
14. Etẹwẹ dọ̀n we dogo to aliho he mẹ Jesu gọalọna mẹhe to azọ̀n jẹ lẹ, sẹ́kunọ lẹ, kavi mẹhe to alọẹmẹ lẹ te?
14 Aliho he mẹ Jesu yinuwa hẹ azọ̀ntọ kavi awukúnọ lẹ te nọ do mẹtọnhopọn po awuvẹmẹ etọn po hia to pọmẹ po nugopipe etọn po nado hẹn kọgbọ wá na yé. Gbọnmọ dali, to whenuena azọ̀ntọ he gọ́ na opòzọ̀n de dọnsẹpọ ẹ bo vẹvẹ na alọgọ, Jesu ma joagọyigodo na ninọmẹ lọ wutu gba. Podọ e ma dọna dawe lọ dọ, dile etlẹ yindọ emi tindo lẹblanu na ẹn do sọ, whẹho etọn ko sinyẹn gbau bọ nudepope ma sọgan yin bibasi nado gọalọ gba. Dawe lọ vẹvẹ dọmọ: “Oklunọ, eyin hiẹ jlo, hiẹ sọgan hẹn mi zun wiwe.” Matin gbandindọn, Jesu dlẹnalọ etọn bo do pòtọnọ lọ go, dọmọ: “Yẹn jlo, hiẹ ni zun wiwe.” (Matiu 8:2, 3) To nujijọ devo mẹ yọnnu de dín nado yin azọ̀nhẹngbọna gbọn alọdido okẹ̀yẹ̀ avọ̀ etọn tọn go to nuglọ. Jesu yinuwa hẹ ẹ po awuvẹmẹ po to ninọmẹ jidenamẹ tọn mẹ. (Luku 8:43-48) Podọ to whenuena e dukosọhẹ gbẹtọgun he jei ṣiọdi gbe de, e wàlẹblanu na asuṣiọsi he tin to alọẹmẹ lọ mẹhe visunnu dopo akàn etọn ko kú lọ. Dile etlẹ yindọ Jesu ko gbẹ́ nado yí huhlọn he yin nina ẹn gbọn Jiwheyẹwhe dali zan to azọ́njiawu liho nado wleawu núdùdù tọn na ede, e yí i zan po awubibọ po nado fọ́n dawe he kú enẹ sọn okú bo hẹn ẹn gọwa ogbẹ̀ na onọ̀ etọn.—Luku 4:2-4; 7:11-16.
15. Nawẹ kandai Jesu tọn lọ lẹ hihia po ayihamẹlinlẹnpọn do yé ji po yinuwa do jiwe gbọn?
15 Dile mí hia kandai ehelẹ bo lẹnayihamẹpọn do gbigbọ he Jesu dohia ji, owanyi mítọn na ẹn nọ yin hinhẹn siso na omẹ ehe he ze ogbẹ̀ gbẹtọvi etọn tọn dai na mí nido sọgan nọgbẹ̀ kakadoi. Dile etlẹ yindọ mí ma ko mọ ẹn pọ́n gbede, mí tindo numọtolanmẹ dindọnsẹpọ ẹ tọn, podọ mí jlo nado hodo afọdòmẹ etọn.—1 Pita 2:21.
Whiwhẹ Yiyi Do Ganjẹ Jiwheyẹwhe Go Etọn
16. Mẹnu ji wẹ Jesu ze ayidonugo etọn tintan do, podọ etẹwẹ e na mí tuli nado wà?
16 Hú onú devo lẹpo, Jesu ze ayidonugo etọn po mítọn po do Otọ́ olọn mẹ etọn tọn ji, yèdọ Jehovah Jiwheyẹwhe. E do gbedide he klo hugan to Osẹ́n lọ mẹ hia bo dọmọ: “Hiẹ na yí ayiha towe lẹpo, podọ alindọn towe lẹpo po nuyọnẹn towe lẹpo po do yiwanna Oklunọ Jiwheyẹwhe towe.” (Matiu 22:36, 37) E dotuhomẹna devi etọn lẹ dọmọ: “Mì do yise to Jiwheyẹwhe mẹ.” (Malku 11:22) To whenuena yé pannukọn whlepọn sinsinyẹn yise yetọn tọn de, e na yé tuli dọmọ: “Mì . . . nọ hodẹ̀.”—Matiu 26:41.
17, 18. (a) Nawẹ Jesu do whiwhẹnọ-yinyin etọn nado ganjẹ Otọ́ etọn go hia gbọn? (b) Naegbọn nuhe e wà do yin onú titengbe na mí sọmọ?
17 Jesu lọsu ze apajlẹ lọ dai. Odẹ̀ yin adà titengbe de to gbẹzan etọn mẹ. (Matiu 14:23; Luku 9:28; 18:1) To whenuena ojlẹ lọ wá na ẹn nado ṣinyan apọsteli etọn lẹ, Jesu ma ganjẹ linlẹn etọn titi kẹdẹ go gba, dile etlẹ yindọ angẹli lẹpo to olọn mẹ ko tin to nukunpedomẹgo etọn glọ dai. Po whiwhẹ po e yí ozán dopo blebu zan nado hodẹ̀ hlan Otọ́ etọn. (Luku 6:12, 13) To whenuena e pannukọn mẹwiwle po okú yasanamẹ tọn de po, whladopo dogọ Jesu lẹhlan Otọ́ etọn, bo hodẹ̀ vivẹvivẹ. E ma tindo pọndohlan lọ dọ emi yọ́n Satani ganji bo sọgan penukundo ayiha depope he mẹylankan enẹ sọgan kàn go gba. Jesu yọ́n lehe awumagbopo etọn yin onú titengbe do. Lehe awugbopo etọn na yin vlẹko de na Otọ́ etọn do sọ! Podọ lehe e na yin nuhẹnbu de na gbẹtọvi lẹ do sọ, he todido yetọn sinai do avọ́sinsan he Jesu na basi ji!
18 Jesu hodẹ̀ pludopludo—to whenuena e tin po devi etọn lẹ po to abò aga tọn de mẹ to Jelusalẹm podọ vẹkuvẹku humọ to jipa Gẹtsemani tọn mẹ. (Matiu 26:36-44; Johanu 17:1-26; Heblu lẹ 5:7) To whenuena e to yaji to yatin ji, e ma zùn mẹhe vlẹ ẹ ko lẹ gba. Kakatimọ, e hodẹ̀ do ota mẹhe to nuyiwa to mayọnẹn mẹ lẹ tọn mẹ dọmọ: “Otọ́, jona yé; na yé ma yọ́n onú he yé to wiwà gba.” (Luku 23:34) E hẹn ayiha etọn gbọṣi Otọ́ etọn ji, “bo jo ede hlan ewọ he nọ yí dodo do dawhẹ.” Hogbe godo tọn he e dọ to yatin ji lẹ yin odẹ̀ de hlan Otọ́ etọn. (1 Pita 2:23; Luku 23:46) Lehe mí gọna pẹdido do dọ, po ginganjẹ Jehovah go po to gigọ́mẹ, Jesu gbọn nugbonọ-yinyin dali do dotana azọ́ndenamẹ he Otọ́ etọn ko ze do alọmẹ na ẹn! Dile etlẹ yindọ mí ma ko mọ Jesu Klisti pọ́n, lehe mí yiwanna ẹn sisosiso na nuhe e wà do sọ!
Owanyi Mítọn na Ẹn Didohia
19. To owanyi didohia Jesu mẹ, walọyizan tẹlẹ wẹ mí na dapana mlẹnmlẹn taidi nuhe ma sọgbe?
19 Nawẹ mí sọgan na kunnudenu dọ owanyi he mí dọ dọ mí tindo hugan hogbe tata lẹ gbọn? To whenuena e yindọ Otọ́ etọn, mẹhe Jesu yiwanna, gbẹ́ boṣiọ lẹ pipà bọ to enẹgodo nọ yinuwa hẹ onú ehelẹ taidi nuyizan mẹdezejo tọn lẹ, po jide po mí ma na gbògbéna Jesu gbọn boṣiọ mọnkọtọn lẹ zize do kọnú mítọn lẹ go to okọ̀ mítọn kavi gbọn zize e pé to tòhomẹ-liho lẹ ji. (Eksọdusi 20:4, 5; Johanu 4:24) E ma na yin gbégbò na Jesu na míwlẹ nado yì nọtẹn sinsẹ̀n-bibasi tọn lẹ mẹ, yèdọ na tlẹ do wà mọ whlasusu to osẹ mẹ, eyin mí ma nọgbẹ̀ sọgbe hẹ nuplọnmẹ etọn lẹ to pipòtọ osẹ lọ tọn mẹ. Jesu dọmọ: “Ewọ he tindo osẹ́n ṣie lẹ, bosọ yìn yé, ewọ lọ wẹ mẹhe yiwanna mi: mẹhe sọ yiwanna mi, yè na yiwanna ẹn sọn Otọ́ ṣie dè.”—Johanu 14:21, 23; 15:10.
20. Onú tẹlẹ wẹ na dohia vlavo eyin mí yiwanna Jesu nugbonugbo?
20 Gbedide tẹlẹ wẹ e na mí? Tintan, nado basi sinsẹ̀n hlan Jiwheyẹwhe nugbo lọ, yèdọ Jehovah, podọ ewọ dopo kẹdẹ. (Matiu 4:10; Johanu 17:3) Na azọngban etọn to lẹndai Jiwheyẹwhe tọn mẹ wutu, Jesu sọ plọnmẹ dọ mí dona yí yise zan to ewọ mẹ taidi Visunnu Jiwheyẹwhe Tọn podọ mí dona do e hia gbọn kọgbigbẹ́ azọ́n ylankan lẹ go podọ gbọn zọnlinzinzin to hinhọ́n mẹ dali. (Johanu 3:16-21) E na mí ayinamẹ nado din Ahọluduta Jiwheyẹwhe Tọn po dodo etọn po whẹ́, bo ze ehelẹ donukọnna lẹnpọn dogbọn nuhudo agbasa tọn lẹ dali. (Matiu 6:31-33) E degbe dọ mí ni yiwanna ode awetọ mítọn dile e yiwanna mí do. (Johanu 13:34; 1 Pita 1:22) Podọ e deazọnna mí nado yin kunnudetọ lẹ dogbọn lẹndai Jiwheyẹwhe tọn dali, yèdọ kẹdẹdile ewọ lọsu yin do. (Matiu 24:14; 28:19, 20; Osọhia 3:14) Dile etlẹ yindọ yé ma ko mọ Jesu pọ́n, livi atọ́n Kunnudetọ Jehovah Tọn delẹ to egbehe nọ yin whinwhàn gbọn owanyi nujọnu tọn na ẹn dali nado yìn gbedide enẹlẹ. Ma mọ Jesu po nukun po yetọn ma hẹn gbemima yetọn nado yin tonusetọ zun madogánnọ to alọ depope mẹ gba. Yé hẹn nuhe Oklunọ yetọn dọna apọsteli Tọmasi do ayiha mẹ dọmọ: “Na hiẹ mọ mi wutu wẹ hiẹ yise; donanọ wẹ yé he ma mọ bo yise lẹ.”—Johanu 20:29.
21. Nawẹ mí na mọaleyi sọn Oflin okú Klisti tọn yìyì mẹ, he na yin bibasi to owhe ehe mẹ to Sẹgbe 23 mars?
21 Todido tin dọ hiẹ na tin to gbẹtọ lẹdo aihọn pé enẹlẹ mẹ he na plidopọ to Plitẹnhọ Ahọluduta Kunnudetọ Jehovah Tọn lẹ tọn mẹ to họyìyì owhè tọn godo, to Sẹgbe 23 mars, 1997, nado flin dohia he klo hugan owanyi Jiwheyẹwhe tọn hlan gbẹtọvi lẹ podọ nado basi hùnwhẹ oflín okú Visunnu nugbonọ etọn tọn, yèdọ Jesu Klisti. Nuhe nọ yin didọ bo nọ yin wiwà to nujijọ enẹ whenu dona hẹn owanyi na Jehovah po Visunnu etọn po siso bo gbọnmọ dali hẹn ojlo lọ nado yìn gbedide Jiwheyẹwhe tọn lẹ jideji.—1 Johanu 5:3.
Nawẹ Hiẹ Na Na Gblọndo Gbọn?
◻ Nawẹ mẹhe owe tintan Pita tọn yin kinkan hlan lẹ yọ́n Jesu bo yiwanna ẹn gbọn?
◻ Etẹwẹ yin delẹ to nuhe Klistiani fliflimẹ tọn lẹ sè mẹ he fọ́n ojlo towe dote?
◻ Etẹwẹ tin to finẹ dogbọn gbigbọ he Jesu dohia dali he hẹn owanyi towe na ẹn siso?
◻ Naegbọn ginganjẹ Jiwheyẹwhe go po whiwhẹ po Jesu tọn do yin onú titengbe sọmọ na mí?
◻ Nawẹ mí sọgan do owanyi mítọn hia na Jesu Klisti gbọn?
[Yẹdide to weda 28]
Mí tindo numọtolanmẹ dindọnsẹpọ Jesu tọn na gbigbọ he e dohia wutu