NUPINPLỌN 54
Nuhe “Afanumẹ Nugbonọ Podọ Nuyọnẹntọ lọ” Nọ Wà Lẹ
Jesu wẹ yin Ota agun Klistiani tọn. (Efesunu lẹ 5:23) To egbehe, sọn otẹn azọngban tọn etọn mẹ to olọn mẹ, Jesu nọ deanana hodotọ etọn he tin to aigba ji lẹ gbọn “afanumẹ nugbonọ podọ nuyọnẹntọ” de gblamẹ. (Hia Matiu 24:45.) Na Jesu lọsu wẹ deazọ́nna “afanumẹ” enẹ wutu, afanumẹ lọ tindo aṣẹpipa jẹ obá de mẹ, amọ́ e gbẹ́ nọ litaina Klisti bosọ nọ wadevizọn na mẹmẹsunnu Klisti tọn lẹ. Mẹnu wẹ yin afanumẹ enẹ? Nawẹ afanumẹ lọ nọ penukundo mí go gbọn?
1. Mẹnu wẹ yin “afanumẹ nugbonọ podọ nuyọnẹntọ lọ”?
Sọn hohowhenu gbọ́n wẹ Jehovah ko nọ yí sunnu de kavi pipli kleun he bẹ sunnu delẹ hẹn zan nado deanana omẹ etọn lẹ. (Malaki 2:7; Heblu lẹ 1:1) To okú Jesu tọn godo, apọsteli lẹ po mẹho he tin to Jelusalẹm lẹ po wẹ jẹ anadenanu ji. (Owalọ lẹ 15:2) To aliho dopolọ mẹ to egbehe, pipli kleun de he bẹ mẹho agun tọn lẹ hẹn—yèdọ Hagbẹ Anademẹtọ Kunnudetọ Jehovah tọn lẹ tọn—wẹ nọ wleawuna núdùdù gbigbọmẹ tọn bosọ nọ deanana azọ́n yẹwhehodidọ tọn lọ. Pipli ehe wẹ yin “afanumẹ nugbonọ podọ nuyọnẹntọ lọ he [Jesu] de.” (Matiu 24:45a) Mẹhe Hagbẹ Anademẹtọ lọ bẹhẹn lẹpo wẹ yin Klistiani yiamisisadode lẹ, he to nukọnpọnhlan nado dugán hẹ Klisti to Ahọluduta olọn mẹ tọn etọn mẹ to vivọnu gbẹzan aigba ji tọn yetọn godo.
2. Núdùdù gbigbọmẹ tọn tẹwẹ afanumẹ nugbonọ lọ nọ wleawuna?
Jesu dọ dọ afanumẹ nugbonọ lọ na nọ “na núdùdù [Klistiani hatọ yetọn lẹ] to ojlẹ sisọ mẹ.” (Matiu 24:45b) Kẹdẹdile núdùdù he mí nọ dù lẹ nọ gọalọna mí nado nọ jogún-jogún to agbasa mẹ bosọ do huhlọn do, mọ wẹ núdùdù gbigbọmẹ tọn, yèdọ nuplọnmẹ he mí nọ mọyi sọn Ohó Jiwheyẹwhe tọn mẹ lẹ nọ na mí huhlọn nado sọgan hẹn nugbonọ-yinyin mítọn na Jehovah go bosọ wà azọ́n he Jesu dena mí lọ dotana do niyẹn. (1 Timoti 4:6) Mí nọ mọ núdùdù gbigbọmẹ tọn enẹlẹ yí to opli lẹ, plidopọ lẹdo tọn lẹ po plidopọ daho lẹ po ji, podọ sọn owe gọna video sinai do Biblu ji lẹ mẹ, yèdọ awuwledainanu delẹ he nọ gọalọna mí nado mọnukunnujẹ ojlo Jiwheyẹwhe tọn mẹ bosọ hẹn haṣinṣan mítọn hẹ ewọ lodo.
DINDONANU DOGỌ
Gbadopọnna nuhewutu mí do hudo “afanumẹ nugbonọ podọ nuyọnẹntọ lọ,” yèdọ Hagbẹ Anademẹtọ lọ tọn.
Hagbẹ Anademẹtọ lọ nọ wleawuna núdùdù gbigbọmẹ tọn lẹ, nọ na mí anademẹ lẹ bosọ nọ gọalọna Kunnudetọ Jehovah tọn lẹ to aliho tangan devo lẹ mẹ lẹdo aihọn pé
3. Omẹ Jehovah tọn lẹ dona yin tito-basina
Hagbẹ Anademẹtọ lọ nọ basi titona azọ́n Kunnudetọ Jehovah tọn lẹ tọn to anademẹ Jesu tọn glọ. Aliho dopolọ mẹ wẹ nulẹ yì te to ojlẹ Klistiani dowhenu tọn lẹ tọn mẹ. Hò VIDEO lọ.
Hia 1 Kọlintinu lẹ 14:33, 40, enẹgodo dọhodo kanbiọ ehe ji:
Nawẹ wefọ ehelẹ dohia gbọn dọ Jehovah jlo dọ Kunnudetọ emitọn lẹ ni yin tito-basina?
4. Afanumẹ nugbonọ lọ nọ basi titona azọ́n yẹwhehodidọ tọn lọ
Yẹwhehodidọ wẹ yin azọ́n titengbe hugan he Klistiani dowhenu tọn lẹ na ayidonugo. Hia Owalọ lẹ 8:14, 25, enẹgodo dọhodo kanbiọ ehelẹ ji:
To owhe kanweko tintan whenu, mẹnu wẹ deanana azọ́n yẹwhehodidọ tọn lọ?
Etẹwẹ Pita po Johanu po wà whenue apọsteli hatọ yetọn lẹ na yé anademẹ de?
Yẹwhehodidọ wẹ yin azọ́n titengbe hugan he Hagbẹ Anademẹtọ lọ nọ basi titona. Hò VIDEO lọ.
Jesu zinnudo obá he mẹ yẹwhehodidọ yin nujọnu jẹ ji. Hia Malku 13:10, enẹgodo dọhodo kanbiọ ehelẹ ji:
Naegbọn Hagbẹ Anademẹtọ lọ nọ ylọ azọ́n yẹwhehodidọ tọn lọ dọ nujọnu sọmọ?
Naegbọn e biọ dọ “afanumẹ nugbonọ podọ nuyọnẹntọ lọ” ni nọ basi tito na azọ́n he to yinyin wiwà lẹdo aihọn pé ehe?
5. Afanumẹ nugbonọ lọ nọ na mí anademẹ lẹ
Hagbẹ Anademẹtọ lọ nọ na anademẹ Klistiani lẹ lẹdo aihọn pé. Nawẹ yé nọ basi nudide anademẹ he yé na na lẹ tọn gbọn? Pọ́n lehe hagbẹ anademẹtọ Klistiani owhe kanweko tintan whenu tọn lẹ tọn nọ wàmọ do. Hia Owalọ lẹ 15:1, 2, enẹgodo dọhodo kanbiọ ehelẹ ji:
Whẹho tẹwẹ hẹn gbemanọpọ wá Klistiani dowhenu tọn delẹ ṣẹnṣẹn?
Mẹnu dè wẹ Paulu, Balnaba po mẹdevo lẹ po biọ alọgọ sọn nado didẹ whẹho lọ?
Hia Owalọ lẹ 15:12-18, 23-29, enẹgodo dọhodo kanbiọ ehe ji:
Whẹpo hagbẹ anademẹtọ dowhenu tọn lọ do wá gbèta whẹho de tọn kọ̀n, etẹwẹ yé gbadopọnna dile yé to anademẹ Jiwheyẹwhe tọn dín?—Pọ́n wefọ 12, 15, po 28 po.
Hia Owalọ lẹ 15:30, 31 gọna 16:4, 5, enẹgodo dọhodo kanbiọ ehelẹ ji:
Nawẹ Klistiani dowhenu tọn lẹ yinuwa gbọn to whenue yé mọ anademẹ lẹ yí sọn hagbẹ anademẹtọ lọ dè?
Nawẹ Jehovah dona yé na tonusise yetọn wutu gbọn?
Hia 2 Timoti 3:16 po Jakọbu 1:5 po, enẹgodo dọhodo kanbiọ ehe ji:
To egbehe, fie wẹ Hagbẹ Anademẹtọ lọ nọ dín anademẹ sọn nado basi nudide lẹ?
MẸDELẸ NỌ DỌ DỌ: “Mì nọ wà nuhe Hagbẹ Anademẹtọ lọ biọ lẹ, bo ka nọ dọ dọ mì ma to gbẹtọ hodo.”
Etẹlẹ wẹ hẹn we kudeji dọ Jesu wẹ to anadena Hagbẹ Anademẹtọ lọ?
BLADOPỌ
Hagbẹ Anademẹtọ lọ wẹ yin “afanumẹ nugbonọ podọ nuyọnẹntọ lọ” he Klisti de. Yé nọ na anademẹ lẹ bosọ nọ wleawuna núdùdù gbigbọmẹ tọn lẹ na Klistiani lẹpo lẹdo aihọn pé.
Dogbapọn
Mẹnu wẹ de “afanumẹ nugbonọ podọ nuyọnẹntọ lọ”?
Nawẹ Hagbẹ Anademẹtọ lọ nọ penukunndo mí go gbọn?
Be a yise dọ Hagbẹ Anademẹtọ lọ wẹ yin “afanumẹ nugbonọ podọ nuyọnẹntọ lọ ya”?
PỌ́N NUDỌNAMẸ DEVO LẸ
Pọ́n lehe Hagbẹ Anademẹtọ lọ yin tito-basina nado penukundo azọ́n he yin didena ẹn go do.
“Etẹwẹ Hagbẹ Anademẹtọ Kunnudetọ Jehovah Tọn lẹ Tọn Yin?” (Hosọ Intẹnẹt ji tọn)
Gbadopọnna nuhe Hagbẹ Anademẹtọ lọ nọ wà nado hẹn ẹn diun dọ mí nọ mọ núdùdù gbigbọmẹ tọn he sọgbe lẹ yí.
Nukun tẹwẹ Hagbẹ Anademẹtọ lọ nọ yí do pọ́n azọ́n he Jesu dena yé nado wà?
Nawẹ nuhe sin vivi mí nọ dù to opli po plidopọ mítọn lẹ po ji lẹ yin kunnudenu de dọ Jehovah wẹ to anadena Hagbẹ Anademẹtọ lọ gbọn?