A Tindo Otẹn Towe to Agun Jehovah Tọn Mẹ!

 1. Lẹblanulọkẹyi tẹwẹ mí tindo?

LẸBLANULỌKẸYI nankọ die nado yin apadewhe agun Jehovah tọn! Mí tin to paladisi gbigbọmẹ tọn de mẹ, he gọ́ na gbẹtọ jijọhonọ podọ ayajẹnọ lẹ. Otẹn tẹwẹ a do to agun lọ mẹ?

 2. Apajlẹ tẹwẹ apọsteli Paulu yizan to wekanhlanmẹ gbọdo etọn susu mẹ?

² Mí sọgan plọn nususu do whẹho ehe ji gbọn dogbigbapọnna apajlẹ de he apọsteli Paulu yizan to wekanhlanmẹ gbọdo etọn susu mẹ dali. To wekanhlanmẹ ehelẹ dopodopo mẹ, Paulu yí agun lọ jlẹdo agbasa gbẹtọ tọn go. E sọ yí hagbẹ agun lọ tọn dopodopo jlẹdo awutugonu agbasa tọn lẹ go.—Lom. 12:4-8; 1 Kọl. 12:12-27; Efe. 4:16.

 3. Nuplọnmẹ atọ̀n tẹlẹ wẹ mí na gbadopọnna to hosọ ehe mẹ?

³ To hosọ ehe mẹ, mí na gbadopọnna onú titengbe atọ̀n he mí sọgan plọn sọn apajlẹ he Paulu na mẹ. Tintan, mí na plọn dọ dopodopo mítọn tindo otẹnb de to agun Jehovah tọn mẹ. Awetọ, mí na dọhodo nuhe mí sọgan wà eyin e vẹawuna mí nado mọ otẹn he mí tindo to agun lọ mẹ ji. Podọ atọ̀ntọ, mí na dọhodo nuhewutu mí dona hẹn alọnu mítọn ján to adà mítọn yíyí wà mẹ to agun Jiwheyẹwhe tọn mẹ ji.

 4. Etẹwẹ Lomunu lẹ 12:4, 5 plọn mí?

⁴ Onú tintan he mí sọgan plọn sọn apajlẹ he Paulu na mẹ wẹ yindọ dopodopo mítọn tindo otẹn nujọnu tọn de to whẹndo Jehovah tọn mẹ. Paulu bẹ apajlẹ etọn jẹeji dole: “Kẹdẹdile mí tindo awutugonu susu to agbasa dopo go, ṣigba bọ awutugonu lọ lẹpo ma nọ wà azọ́n dopolọ lẹ do, mọdopolọ dile míwlẹ tlẹ sù, agbasa dopo wẹ mí yin to kọndopọ mẹ hẹ Klisti, ṣigba dopodopo mítọn yin awutugonu lẹ he to kọndopọ mẹ hẹ ode awetọ.” (Lom. 12:4, 5) Etẹ na dọ wẹ Paulu te taun? Adà voovo lẹ wẹ dopodopo mítọn nọ yiwà to agun mẹ, etomọṣo mí omẹ dopodopo wẹ họakuẹ na Jehovah.

 5. “Nunina” tẹlẹ wẹ Jehovah ko na agun lọ?

⁵ Eyin a to nulẹnpọn do mẹhe do otẹn de to agun mẹ lẹ ji, ayiha towe gán yawu yì mẹhe nọ deanananu lẹ ji. (1 Tẹs. 5:12; Heb. 13:17) Na nugbo tọn, gbọn Klisti gblamẹ, Jehovah ko na agun Etọn “sunnu lẹ di nunina.” (Efe. 4:8) ‘Sunnu he yin ninamẹ di nunina’ ehelẹ bẹ mẹhe to Hagbẹ Anademẹtọ lọ mẹ lẹ, alọgọtọ Hagbẹ Anademẹtọ lọ tọn lẹ, hagbẹ Wedegbẹ́ Alahọ tọn lẹ, nugopọntọ lẹdo tọn lẹ, mẹplọntọ wehọmẹ yẹwhehọluduta tọn lẹ, mẹho agun tọn lẹ po devizọnwatọ lizọnyizọnwiwa tọn lẹ po hẹn. Mẹmẹsunnu ehe lẹpo yin dide gbọn gbigbọ wiwe dali nado penukundo lẹngbọ họakuẹ Jehovah tọn lẹ go bo wadevizọn na agun lẹ.—1 Pita 5:2, 3.

 6. Sọgbe hẹ 1 Tẹsalonikanu lẹ 2:6-8, etẹwẹ mẹmẹsunnu he yin dide gbọn gbigbọ wiwe dali lẹ nọ dovivẹnu nado wà?

⁶ Mẹmẹsunnu lẹ nọ yin dide gbọn gbigbọ wiwe dali nado penukundo azọngban voovo lẹ go. Kẹdẹdile awutugonu mítọn voovo lẹ, taidi alọ po afọ lẹ po nọ wazọ́n na dagbe agbasa lọ blebu tọn do, mẹmẹsunnu he yin dide gbọn gbigbọ wiwe dali lẹ nọ wazọ́n sinsinyẹn na dagbe agun lọ blebu tọn. Yé ma nọ dín gigo yedetiti tọn. Kakatimọ, yé nọ dovivẹnu nado jlọ mẹmẹsunnu po mẹmẹyọnnu yetọn lẹ po dote bo hẹn yé lodo. (Hia 1 Tẹsalonikanu lẹ 2:6-8.) Mí dopẹna Jehovah na sunnu gbigbọnọ he pegan bo ma yin ṣejannabinọ ehelẹ he e na mí!

 7. Dona tẹlẹ wẹ susu mẹhe to sinsẹ̀nzọn whenu-gigọ́ tọn mẹ lẹ tọn nọ mọyi?

⁷ Mẹdelẹ to agun lọ mẹ sọgan yin dide nado sẹ̀n taidi mẹdehlan, gbehosọnalitọ titengbe kavi whepoponu tọn. Na nugbo tọn, lẹdo aihọn pé, mẹmẹsunnu po mẹmẹyọnnu po susu lẹ ko ze yede jo nado nọ wà azọ́n yẹwhehodidọ po gbẹtọ lẹ hinhẹn zun devi po tọn na whenu gigọ́. Gbọnmọ dali, yé ko gọalọna mẹsusu nado lẹzun devi Klisti Jesu tọn lẹ. Dile etlẹ yindọ wẹndagbe-jlatọ whenu-gigọ́ tọn ehelẹ ma nọ saba tindo agbasanu lẹ sọmọ, Jehovah ko yí dona susu do suahọ yé. (Malku 10:29, 30) Mẹmẹsunnu po mẹmẹyọnnu vivẹ́ ehelẹ po họakuẹ na mí taun, podọ mí nọ yọ́n pinpẹn etọn dọ mí tindo yé to agun lọ mẹ!

 8. Naegbọn wẹnlatọ lẹpo do họakuẹ na Jehovah?

⁸ Be mẹmẹsunnu azọngbannọ lẹ po mẹhe to sinsẹ̀nzọn whenu-gigọ́ tọn mẹ lẹ po kẹdẹ wẹ tindo otẹn de to agun lọ mẹ ya? Paali! Wẹnlatọ lẹpo wẹ họakuẹ na Jiwheyẹwhe, podọ na agun lọ. (Lom. 10:15; 1 Kọl. 3:6-9) Na nugbo tọn, dopo to yanwle titengbe hugan agun lọ tọn lẹ mẹ wẹ nado hẹn gbẹtọ lẹ zun devi Oklunọ mítọn Jesu Klisti tọn lẹ. (Mat. 28:19, 20; 1 Tim. 2:4) Mẹhe nọ kọnawudopọ hẹ agun lọ lẹpo, yèdọ wẹnlatọ he ko yí baptẹm po dehe ma ko yí baptẹm po lẹ, wẹ nọ dovivẹnu nado ze azọ́n ehe do otẹn tintan mẹ.—Mat. 24:14.

 9. Naegbọn mí do nọ yọ́n pinpẹn mẹmẹyọnnu mítọn lẹ tọn?

⁹ Jehovah na mẹmẹyọnnu lẹ otẹn he do yẹyi de to agun mẹ. E nọ yọ́n pinpẹn asi, onọ̀, asuṣiọsi gọna mẹmẹyọnnu tlẹnnọ he nọ sẹ̀n ẹn po nugbonọ-yinyin po ehelẹ tọn. Whlasusu wẹ Biblu donù yọnnu ayidego tọn he hẹn homẹ Jiwheyẹwhe tọn hùn lẹ go. E na yé pipà na apajlẹ dagbe nuyọnẹn, yise, zohunhun, adọgbigbo, alọtútlú po azọ́n dagbe lẹ wiwà po tọn he yé zedai. (Luku 8:2, 3; Owalọ 16:14, 15; Lom. 16:3, 6; Flp. 4:3; Heb. 11:11, 31, 35) Lehe mí dopẹna Jehovah do sọ dọ mílọsu tindo mẹmẹyọnnu he do jẹhẹnu dagbedagbe mọnkọ lẹ ga to agun mítọn lẹ mẹ!

10. Naegbọn mí nọ yọ́n pinpẹn mẹhomẹ mítọn lẹ tọn?

¹⁰ Mí sọ tindo lẹblanulọkẹyi lọ nado do mẹhomẹ susu to ṣẹnṣẹn mítọn. To agun delẹ mẹ, mẹmẹsunnu po mẹmẹyọnnu po mẹhomẹ delẹ tin he ko yí gbẹzan yetọn blebu do sẹ̀n Jehovah po nugbonọ-yinyin po. Na mẹhomẹ devo lẹ, e sọgan yindọ agọe wẹ yé mọ nugbo lọ. Depope he whẹho lọ yin, mẹhomẹ mítọn lẹ sọgan to ahidi hẹ nuhahun agbasalilo tọn voovo he mẹhowhe nọ hẹnwa lẹ. Nuhahun enẹlẹ sọgan nọ glọnalina yé nado wà nususu to agun lọ mẹ, podọ to azọ́n yẹwhehodidọ tọn mẹ. Etomọṣo, mẹhomẹ enẹlẹ nọ wà nuhe go yé pé to lizọnyizọn lọ mẹ, podọ yé nọ yí huhlọn yetọn lẹpo zan nado na tuli mẹdevo lẹ bo plọnazọ́n yé! Podọ mí nọ mọaleyi sọn numimọ yetọn mẹ. Na nugbo tọn, yé họakuẹ na Jehovah, podọ na mílọsu.—Howh. 16:31.

11, 12. Nawẹ jọja he to agun towe mẹ lẹ yin tulinamẹnu de na we gbọn?

¹¹ Todin, lẹnnupọndo jọja mítọn lẹ ji. Yelọsu nọ pehẹ avùnnukundiọsọmẹnu lẹ dile yé to whinwhẹ́n to aihọn he Satani Lẹgba to anadena bọ tamẹnuplọnmẹ ylankan etọn lẹ gbayipe te ehe mẹ. (1 Joh. 5:19) Ṣigba, tulinamẹnu wẹ e yin na mímẹpo nado mọdọ jọja mítọn lẹ nọ na gblọndo lẹ to opli lẹ ji, nọ do mahẹ to lizọnyizọn lọ mẹ bosọ nọ yiavùnlọna nuyise yetọn lẹ po adọgbigbo po. Mọwẹ, mìwu jọja lẹ do otẹn nujọnu tọn de to agun Jehovah tọn mẹ!—Salm. 8:2.

¹² Ṣigba, e nọ vẹawuna mẹmẹsunnu po mẹmẹyọnnu mítọn delẹ po nado kudeji dọ yé tindo otẹn nujọnu tọn de to agun lọ mẹ. Etẹwẹ sọgan gọalọna mí nado mọdọ dopodopo mítọn wẹ tindo otẹn de to agun lọ mẹ? Mì gbọ mí ni pọ́n.

13, 14. Naegbọn mẹdelẹ sọgan nọ mọdọ emi ma vó nude to agun lọ mẹ?

¹³ Doayi nuplọnmẹ awetọ he mí sọgan mọyi sọn apajlẹ he Paulu na mẹ go. Ewọ donù nuhahun de he mẹsusu nọ pehẹ to egbehe go; enẹ wẹ yindọ e nọ vẹawuna yé nado kudeji dọ yé họakuẹ na agun lọ. Paulu wlan dọmọ: “Eyin afọ na dọ dọ, ‘Na yẹn ma yin alọ wutu, yẹn ma yin apadewhe agbasa lọ tọn,’ ehe ma zọ́n bọ e ma yin apadewhe agbasa lọ tọn gba. Podọ eyin otó na dọ dọ, ‘Na yẹn ma yin nukun wutu, yẹn ma yin apadewhe agbasa lọ tọn,’ ehe ma zọ́n bọ e ma yin apadewhe agbasa lọ tọn gba.” (1 Kọl. 12:15, 16) Nuagokun tẹ ji wẹ Paulu jlo na zinnudo?

¹⁴ Eyin a nọ yí dewe jlẹdo mẹdevo lẹ go to agun lọ mẹ, enẹ gán zọ́n bọ a na nọ mọ ovọ́ mẹ na dewe. Mẹdelẹ to agun lọ mẹ sọgan do nunina mẹpinplọn po anadidenanu po tọn kavi yin lẹngbọhọtọ azọ́nyọnẹntọ lẹ. Vlavo a nọ mọdọ emi ma do nunina enẹlẹ jẹ obá he mẹ yewlẹ tindo jẹ. Ehe dohia dọ a yin whiwhẹnọ podọ jlẹkajinọtọ. (Flp. 2:3) Amọ́, nọ payi. Eyin a nọ to dewe yijlẹdo mẹdevo he tindo nugopipe vonọtaun lẹ go mapote, a na wá jẹflumẹ. A tlẹ sọgan wá tindo numọtolanmẹ he go Paulu donù nkọ, bo mọdọ emi ma do otẹn depope to agun lọ mẹ. Etẹwẹ sọgan gọalọna we nado duto numọtolanmẹ mọnkọ lẹ ji?

15. Sọgbe hẹ 1 Kọlintinu lẹ 12:4-11, etẹwẹ mí dona nọ flin gando nunina depope he mí sọgan mọyi go?

¹⁵ Lẹnnupọndo nugbo ehe ji: Gbọn azọ́njiawu dali, Jehovah na nunina gbigbọ wiwe tọn Klistiani owhe kanweko tintan whenu tọn delẹ, ṣigba e ma yin Klistiani lẹpo wẹ mọ nunina dopolọ yí. (Hia 1 Kọlintinu lẹ 12:4-11.) Nunina po nugopipe voovo lẹ po wẹ Jehovah na yé, amọ́ dopodopo Klistiani enẹlẹ tọn wẹ họakuẹ to nukun etọn mẹ. To egbehe, mí ma nọ mọ nunina gbigbọ wiwe tọn yí to azọ́njiawu-liho. Etomọṣo, nunọwhinnusẹ́n lọ ma diọ. Mí sọgan nọma tindo nugopipe dopolọ lẹ, amọ́ mímẹpo wẹ họakuẹ to nukun Jehovah tọn mẹ.

16. Ayinamẹ apọsteli Paulu tọn tẹwẹ mí dona yido yizan mẹ?

¹⁶ Kakati nado nọ yí míde jlẹdo Klistiani devo lẹ go, mí dona nọ yí ayinamẹ gbọdo apọsteli Paulu tọn do yizan mẹ, he dọmọ: “Mì gbọ mẹdopodopo ni nọ dindona nuyiwa edetiti tọn lẹ, podọ to whenẹnu, ewọ na tindo whẹwhinwhẹ́n nado jaya gando edetiti kẹdẹ go, bọ e ma yin nado nọ yí ede jlẹdo mẹdevo go gba.”—Gal. 6:4.

17. Ale tẹwẹ mí na mọyi eyin mí hodo ayinamẹ Paulu tọn?

¹⁷ Eyin mí hodo ayinamẹ gbọdo Paulu tọn bo nọ gbeje nuyiwa mítọn lẹ pọ́n, mí gán jẹ ayidego ji dọ mí tindo nunina po nugopipe delẹ po he mẹdevo lẹ ma do. Di apajlẹ, mẹho agun tọn de sọgan nọma tindo nunina lọ nado nọ plọnmẹ sọn oplò ji, amọ́ e gán nọ do kọdetọn dagbe taun to azọ́n mẹhẹnzun devi tọn lọ mẹ. Kavi e gán nọma nọ to titoji sọ mẹho devo lẹ to agun lọ mẹ, amọ́ mẹsusu sọgan yọnẹn di lẹngbọhọtọ owanyinọ de he wẹnlatọ lẹ nọ dọnsẹpọ po awuvivo po nado dín ayinamẹ dagbe sinai do Owe-wiwe ji lẹ. Kavi vlavo e yin yinyọnẹn taun na alọtútlú etọn. (Heb. 13:2, 16) Eyin e họnwun na mí dọ mílọsu do nugopipe po nunina lẹ po, mí na mọ whẹwhinwhẹ́n he wutu mí na nọ tindo pọndohlan dagbe gando nuhe mí sọgan wà do agun lọ tamẹ lẹ go. Podọ, e yọnbasi dọ mí ma na nọ whànwu mẹmẹsunnu mítọn he tindo nunina he mí ma do lẹ.

18. Nawẹ mí sọgan hẹn nugopipe mítọn lẹ pọnte gbọn?

¹⁸ Mahopọnna otẹn depope he mí do to agun lọ mẹ, mímẹpo dona nọ tindo ojlo nado hẹn sinsẹ̀nzọn mítọn po nugopipe mítọn lẹ po pọnte. Nado gọalọna mí, Jehovah hẹn azọ́nplọnmẹ dagbedagbe lẹ tin-to-aimẹ na mí gbọn titobasinanu etọn gblamẹ. Di apajlẹ, to opli osẹ ṣẹnṣẹn tọn mítọn lẹ whenu, mí nọ mọ anademẹ lẹ yí gando lehe mí na tindo kọdetọn dagbe dogọ to lizọnyizọn mítọn mẹ do go. Be a to alemọyi to gigọ́ mẹ sọn tito azọ́nplọnmẹ tọn enẹ mẹ ya?

19. Nawẹ a sọgan jẹ yanwle lọ nado yì Wehọmẹ Wẹndagbe-Jlatọ Ahọluduta lọ tọn lẹ tọn kọ̀n gbọn?

¹⁹ Tito azọ́nplọnmẹ tọn dagbedagbe devo wẹ Wehọmẹ Wẹndagbe-Jlatọ Ahọluduta lọ tọn lẹ tọn. Mẹmẹsunnu po mẹmẹyọnnu po he to sinsẹ̀nzọn whenu-gigọ́ tọn mẹ bo to gblagbla owhe 23 jẹ 65 tọn mẹ lẹ wẹ sọgan yì wehọmẹ ehe. A sọgan nọ lẹndọ emi ma gán jẹ yanwle enẹ kọ̀n pọ́n gbede. Ṣigba, kakati nado nọ to whẹwhinwhẹ́n he wutu e ma gán pà we lẹ slẹ, nọ basi todohukanji nuhewutu a jlo na doafọna yanwle ehe lẹ tọn. Enẹgodo, basi tito de he na gọalọna we nado pegan na yanwle enẹ. Po alọgọ Jehovah tọn po, gọna vivẹnudido sinsinyẹn hiẹ lọsu tọn, nuhe taidi odlọ de poun dai gán wá lẹzun hójọhó.

20. Etẹwẹ mí gán plọn sọn Lomunu lẹ 12:6-8 mẹ?

²⁰ Nuplọnmẹ atọ̀ntọ he mí gán mọyi sọn apajlẹ he Paulu na mẹ tin to Lomunu lẹ 12:6-8 mẹ. (Hia.) Tofi, Paulu dohia whladopo dogọ dọ nunina voovo wẹ mẹhe to agun lọ mẹ lẹ tindo. Ṣigba todin, e zinnudeji dọ mí dona nọ yí nunina depope he mí tindo zan nado jlọ agun lọ dote bo hẹn ẹn lodo.

21, 22. Etẹwẹ mí sọgan plọn sọn Robert po Felice po dè?

²¹ Lẹnnupọndo apajlẹ mẹmẹsunnu de he mí na ylọdọ Robert tọn ji. Whenue e ko sẹ̀n to jonọ-gbéji godo, e wá yin azọ́ndena do Bẹtẹli he tin to otò etọn titi mẹ. Mahopọnna dọ yè hẹn ẹn deji dọ yè ma diọ azọ́ndenamẹ na ẹn na nugomape etọn de wutu, e dọmọ: “Pọndohlan agọ̀ he n’tindo gando dee go, yèdọ pọndohlan lọ dọ n’ko gboawupo, dotukla mi na osun susu. E wá jẹ ojlẹ delẹ mẹ bọ e jlo mi dọ ma jo sinsẹ̀nzọn ṣie to Bẹtẹli do.” Nawẹ e gọ̀ ayajẹ etọn mọyi gbọn? Mẹho agun tọn hatọ etọn de flinnu in dọ Jehovah nọ plọnazọ́n mí to azọ́ndenamẹ dopodopo he jẹnukọn mẹ, na mí nido sọgan yọ́n-na-yizan dogọ to azọ́ndenamẹ yọyọ mítọn mẹ. Robert wá mọdọ emi dona doalọtena nulinlẹnpọn do nuhe ko wayi lẹ ji bo jẹ ayiha zedo nuhe emi gán wà to alọnu din lẹ ji.

²² Mẹmẹsunnu Felice Episcopo pehẹ avùnnukundiọsọmẹnu mọnkọ de. Ewọ po asi etọn po yí gbedewema Giliadi tọn to 1956 bo sẹ̀n to azọ́n lẹdo tọn mẹ to Bolivie. To 1964, yé ji visunnu de. Felice dọmọ: “E ma bọawuna mí paali nado jo azọ́ndenamẹ mítọn he mí yiwanna taun ehe do. Nado dọ hójọhó, n’gbẹ́ blawu na nudi owhe dopo. Amọ́ po alọgọ Jehovah tọn po, n’vọ́ pọndohlan ṣie jlado bo na ayidonugo azọngban mẹjitọ tọn yọyọ he jẹ alọmẹ na mi lọ.” Be a nọ tindo numọtolanmẹ Robert kavi Felice tọn nkọ wẹ ya? Be a ko jẹflumẹ, na to alọnu a masọ tindo lẹblanulọkẹyi sinsẹ̀nzọn tọn he a ko duvivi etọn wayi lẹ wẹ ya? Eyin mọ wẹ, a na tindo ayajẹ dogọ eyin a diọ pọndohlan towe bo ze ayiha do nuhe a sọgan wà to alọnu din nado sẹ̀n Jehovah bo yilizọn na mẹmẹsunnu towe lẹ ji. Nọ hẹn alọnu towe ján gbọn nunina po nugopipe towe lẹ po yiyizan nado gọalọna mẹdevo lẹ dali, podọ a na tindo ayajẹ dile a to agun lọ hẹn lodo.

23. Etẹwẹ mí dona nọ yí sọwhiwhe do wà, podọ etẹwẹ mí na gbadopọnna to hosọ he bọdego mẹ?

²³ Dopodopo mítọn wẹ họakuẹ na Jehovah. Ewọ jlo dọ mí ni yin hagbẹ whẹndo etọn tọn. Eyin mí nọ yí sọwhiwhe do lẹnayihamẹpọn do nuhe mí sọgan wà nado jlọ mẹmẹsunnu po mẹmẹyọnnu lẹ po dote ji, bosọ nọ wazọ́n sinsinyẹn nado jẹ yanwle enẹ kọ̀n, e na vẹawu dọ mí ni tindo numọtolanmẹ lọ dọ otẹn mítọn ma to agun lọ mẹ! Ṣigba, etẹwẹ lo na nuhe dù nukun he mí nọ yí do pọ́n mẹdevo lẹ to agun lọ mẹ? Nawẹ mí sọgan dohia dọ mí nọ yọ́n pinpẹn yetọn gbọn? To hosọ he bọdego mẹ, mí na gbadopọnna whẹho titengbe enẹ.