Nọ “Doafọna Nuhe Nọ Hẹn Jijọho Wá Lẹ”

ALI he ṣẹṣẹ yin titlẹ́ de nọ taidi nuhe ló ganji bo ma na yawu gble. Ṣigba, dile ojlẹ to yìyì, e sọgan jẹ zizẹ ji bo na gọ́ na odò. Nado dapana owùnu-jijọ lẹ bo hẹn ali lọ do ninọmẹ dagbe mẹ, e dona yin vivọjlado.

Mọdopolọ, tukla sọgan fọ́n to míwlẹ po mẹdevo lẹ po ṣẹnṣẹn to whedelẹnu bọ haṣinṣan mítọn tlẹ sọgan gble. Apọsteli Paulu yigbe dọ Klistiani he tin to Lomu lẹ tindo pọndohlan he gbọnvo. E na ayinamẹ Klistiani hatọ lẹ dọmọ: “Mì gbọ mí ni doafọna nuhe nọ hẹn jijọho wá lẹ po nuhe nọ jlọ ode awetọ dote lẹ po.” (Lom. 14:13, 19, NW ) Naegbọn e do yin nujọnu nado nọ “doafọna nuhe nọ hẹn jijọho wá lẹ”? Nawẹ mí sọgan nọ yí adọgbigbo do doafọna jijọho po kọdetọn dagbe po gbọn?

Naegbọn Mí Dona Doafọna Jijọho?

Eyin ofi kleunkleun he zẹ̀ to ali titlẹ́ lọ ji lẹ ma yawu yin vivọjlado, yé sọgan lẹzun odò daho bo hẹn owù wá. Mọdopolọ, eyin mí ma yawu didẹ wiwọ́ he mí tindo hẹ mẹdevo lẹ, e sọgan wá yin owùnu. Apọsteli Johanu wlan dọmọ: “Eyin mẹde dọ, Yẹn yiwanna Jiwheyẹwhe, bo gbẹwanna mẹmẹsunnu etọn, lalonọ wẹ ewọ: na ewọ he ma yiwanna mẹmẹsunnu etọn he e mọ, nawẹ e na yiwanna Jiwheyẹwhe mẹhe e ma mọ do?” (1 Joh. 4:20) Wiwọ́ he ma yawu yin dididẹ sọgan wá hẹn Klistiani de nado gbẹwanna mẹmẹsunnu etọn.

Jesu Klisti dohia dọ Jehovah ma na kẹalọyi sinsẹ̀n-bibasi mítọn eyin mí ma tin to jijọho mẹ hẹ mẹdevo lẹ. Jesu dọna devi etọn lẹ dọmọ: “Enẹwutu eyin hiẹ hẹn nunina towe yì agbà kọ̀n, bosọ flin to finẹ dọ mẹmẹsunnu towe tindo nude do gowe: jo nunina towe dai to finẹ to agbà nukọn, bo yì, gbọwhẹ hẹ mẹmẹsunnu towe whẹ́; whenẹnu wẹ a ni wá bo na nunina towe.” (Mat. 5:23, 24) Mọwẹ, whẹwhinwhẹ́n tintan he wutu mí dona nọ doafọna jijọho wẹ yindọ mí jlo na hẹn homẹhun Jehovah Jiwheyẹwhe.a

Ninọmẹ he fọ́n to agun Filippi tọn mẹ de do whẹwhinwhẹ́n devo he wutu mí dona nọ doafọna jijọho hia. Nuhahun he Biblu ma dọ taun de tin to mẹmẹyọnnu awe ṣẹnṣẹn, yèdọ Euodia po Sintiki po. Podọ kunnudenu dohia dọ ehe ze jijọho agun lọ blebu tọn do owù mẹ. (Flp. 4:2, 3) Eyin wiwọ́ he tin to Klistiani awe ṣẹnṣẹn ma yawu yin dididẹ, bleun wẹ e sọgan jẹ otó mẹdevo lẹ tọn mẹ. Ojlo lọ nado hẹn owanyi po pọninọ po go to agun lọ mẹ nọ whàn mí nado doafọna jijọho hẹ yisenọ hatọ lẹ.

“[Ayajẹnọ] wẹ jijọho-dintọ lẹ,” wẹ Jesu dọ. (Mat. 5:9) Afọdidona jijọho nọ hẹn ayajẹ po pekọ po wá. Humọ, jijọho nọ yidogọna agbasalilo, na ‘ayiha he vò wẹ ogbẹ̀ agbasa tọn.’ (Howh. 14:30) To alọ devo mẹ, mẹhẹndohomẹ sọgan zọ́n bọ mí na nọ yawu jẹazọ̀n.

Dile etlẹ yindọ suhugan Klistiani lẹ tọn wẹ kọngbedopọ dọ afọdidona jijọho yin nujọnu, hiẹ sọgan nọma yọ́n lehe a na nọ didẹ wiwọ́ he a tindo hẹ Klistiani devo lẹ do. Enẹwutu, mì gbọ mí ni gbadopọnna nunọwhinnusẹ́n Owe-wiwe tọn he sọgan deanana mí lẹ.

Hodọdopọ po Ogbè Dẹẹdẹ po Nọ Hẹn Jijọho Wá

Ofi kleunkleun he zẹ̀ to ali he yin titlẹ́ lọ ji lẹ sọgan nọ saba yin vivọjlado gbọn súsú yé dali. Be mí sọgan jona mẹmẹsunnu mítọn lẹ bo ṣinyọnnudo awugbopo flinflin yetọn lẹ ya? E yọnbasi dọ ehe na didẹ suhugan wiwọ́ lẹ tọn na apọsteli Pita wlan dọ “owanyi nọ ṣinyọnnudo ylando susu.”—1 Pita 4:8.

Ṣigba, to whedelẹnu, nuhahun de sọgan taidi nuhe sinyẹn sọmọ bọ mí ma sọgan wọnji e go poun. Lẹnnupọndo nuhe jọ do Islaelivi lẹ go ojlẹ vude to whenuena yé yí Aigba Pagbe tọn lọ godo ji. Whẹpo “ovi Lẹubeni tọn lẹ po ovi Gadi tọn lẹ po po odaa whẹndo Manassẹ tọn po” do dasá Tọ̀sisa Jọdani tọn, yé do ‘agbà daho he sọgan yin mimọ hlan de.’ Whẹndo Islaeli tọn he pò lẹ lẹndọ agbà boṣiọ-sinsẹ̀n tọn de wẹ ehe yin bo mọdọ emi ma sọgan jo nuhahun lọ do domọ poun. Yé wleawu nado tọ́nawhàn yé.—Jọṣ. 22:9-12.

Islaelivi delẹ sọgan ko lẹndọ kunnudenu tin dọ whẹndo ehelẹ waylando podọ emi dona tọ́nawhàn yé to nuglọ ma nado hẹn awhànfuntọ emitọn susu bu. Ṣigba, kakati nado yinuwa aplà, whẹndo he tin to whèyihọ-waji Jọdani tọn lẹ do afọzedaitọ lẹ hlan nado dọhodo nuhahun lọ ji hẹ nọvisunnu yetọn lẹ. Yé kanse yé dọmọ: “Ylanwiwa tẹwẹ ehe mì wà do Jiwheyẹwhe Islaeli tọn he, nado diọkọ to egbehe sọn hihodo OKLUNỌ mẹ?” Nado dọ hójọhó, whẹndo he do agbà lọ lẹ ma to nuylankan de wà gba. Ṣigba nawẹ yé na yinuwa hlan whẹsadokọnamẹ mọnkọtọn gbọn? Be yé na ylangbè na mẹhe sawhẹdokọna yé lẹ kavi gbẹ́ nado dọho na yé wẹ ya? Whẹndo he yin whẹsadokọna lọ lẹ hẹn ẹn họnwun po ogbè dẹẹdẹ po dọ ojlo yetọn nado sẹ̀n Jehovah wẹ whàn yé nado yinuwa to aliho enẹ mẹ. Hogbe dẹẹdẹ yetọn hẹn haṣinṣan he yé tindo hẹ Jiwheyẹwhe dote bo whlẹn ogbẹ̀ susu gán. Hodọdopọ po ogbè dẹẹdẹ po didẹ whẹho lọ bo hẹn jijọho wá.—Jọṣ. 22:13-34.

Whẹpo Islaelivi he pò lẹ nido ze afọdide nujikudo tọn de, yé gbọn nuyọnẹn dali dọhodo nuhahun lọ ji hẹ whẹndo Lẹubeni, Gadi po odaa whẹndo Manassẹ tọn po. “A yawu to ayiha towe mẹ nado gblehomẹ blo,” wẹ Ohó Jiwheyẹwhe tọn dọ, “na homẹgble gbọjẹ to otù nulunọ tọn ji.” (Yẹwh. 7:9) Sọgbe hẹ Owe-wiwe, aliho he yọ́n hugan nado didẹ wiwọ́ lẹ wẹ nado dọ hójọhó dopọ po ogbè dẹẹdẹ po. Be mí sọgan donukun dọ Jehovah ni dona mí nugbonugbo eyin mí nọ hẹnmẹdohomẹ bo ma nọ dọnsẹpọ mẹhe mí lẹndọ e ṣinuwa do mí ya?

To alọ devo mẹ, etẹwẹ mí na wà eyin Klistiani hatọ de he gblehomẹ do mí wá mọ mí vlavo bo tlẹ sawhẹ agọ̀ dokọna mí? “Hogbe dẹẹdẹ nọ lẹ́ homẹgble sẹ̀,” wẹ Biblu dọ. (Howh. 15:1) Whẹndo Islaelivi he yin whẹsadokọna lẹ basi zẹẹmẹ nuyiwa yetọn tọn po ogbè dẹẹdẹ po ṣigba to aliho he họnwun mẹ bo gbọnmọ dali didẹ ninọmẹ homẹgble tọn he tin to yewlẹ po nọvisunnu yetọn lẹ po ṣẹnṣẹn. Vlavo míwlẹ wẹ ze afọdide tintan lọ nado mọ mẹmẹsunnu mítọn kavi ewọ wẹ wá mọ mí po nuhahun de po, mí dona kanse míde dọ, ‘Hogbe, kọnugbè, po awusọhia nukunta tọn tẹ po wẹ na yidogọna jijọho hugan?’

Yí Odẹ́ Zan po Nuyọnẹn Po

Jehovah yọnẹn dọ mí tindo nuhudo nado dọ ahunmẹdunamẹnu mítọn lẹ tọ́n. Ṣigba, eyin mí ma didẹ wiwọ́ he mí tindo hẹ mẹde, e yọnbasi dọ mí na yin whinwhàn nado dọ nuhahun lọ na mẹdevo. Mẹhẹndohomẹ sọgan zọ́n bọ mí na nọ yawu mọhodọdomẹgo. Howhinwhẹn lẹ 11:11 dọ gando odẹ́ ṣiṣizan go dọmọ: “Yè gbọn onù mẹylankan lẹ tọn dali họ́ [otò de] liai.” Mọdopolọ, ohó agọ̀ didọ do Klistiani hatọ de go sọgan hẹn jijọho agun he taidi otò de tọn gble.

Etomọṣo, afọdidona jijọho ma zẹẹmẹdo dọ mí ma dona nọ dọ nudepope gando mẹmẹsunnu po mẹmẹyọnnu mítọn lẹ po go gba. Apọsteli Paulu na ayinamẹ yisenọ hatọ lẹ dọmọ: “Mì dike hogbe gbigble de tọ́n sọn onù mìtọn mẹ blo, ṣigba ehe yọ́n zinzan na didó daga . . . , na e nido wazọ́n ojọmiọn tọn hlan mẹhe sè lẹ. . . . Mì nọ wà dagbe hlan mìnọzo, mì do homẹmimiọn, mì nọ jo ylando mìnọzo tọn.” (Efe. 4:29-32) Eyin mẹmẹsunnu he hogbe kavi walọyizan towe hẹn homẹgble de dọnsẹpọ we, be e ma na bọawu na we hugan nado vẹvẹ bo dín jijọho eyin mẹmẹsunnu enẹ ko nọ dọ ohó towe dagbe na mẹdevo lẹ dai ya? Mọdopolọ, eyin mí yin yinyọnẹn taidi mẹhe nọ yí hogbe mẹjlọdote tọn lẹ zan gando Klistiani hatọ lẹ go, e na bọawu na mí hugan nado dín jijọho to whenuena wiwọ́ lẹ fọ́n.—Luku 6:31.

Mí Dona Sẹ̀n Jiwheyẹwhe ‘Abọ́ to Abọ́ Go’

Ayilinlẹn mí gbẹtọvi mapenọ lẹ tọn wẹ nado dapana mẹhe ṣinuwa do mí lẹ bo klan mídelẹ dovo. Ṣigba enẹ ma yin nuyọnẹnnu gba. (Howh. 18:1) Taidi mẹhe to oyín Jehovah tọn ylọ to kọndopọ mẹ lẹ, gbemima mítọn wẹ ‘nado nọ sẹ̀n ẹn abọ́ to abọ́ go.’—Zẹf. 3:9.

Nuhe mẹdevo lẹ dọ kavi wà jẹagọdo mí ma dona zọ́n bọ mí na dekanpona zohunhun he mí tindo na sinsẹ̀n-bibasi wiwe-ṣeke gbede. Azán vude poun whẹpo avọ́sinsan Jesu tọn do diọtẹnna avọ́nunina he nọ yin bibasi to tẹmpli mẹ lẹ podọ whenu vude to whenuena Jesu ko gblewhẹdo wekantọ lẹ sinsinyẹn godo, e doayi asuṣiọsi wamọnọ de go he na “dùdù he e tindo lẹpo” do adọkun-potin tẹmpli tọn de mẹ. Be Jesu tẹnpọn nado glọnalina ẹn wẹ ya? Paali! Kakatimọ, e pà ẹ na godoninọna agun Jehovah tọn po nugbonọ-yinyin po to ojlẹ enẹ mẹ. (Luku 21:1-4) Nawe lọ gbẹ́ tin to dandannu glọ nado nọgodona sinsẹ̀n-bibasi Jehovah tọn mahopọnna nuylankan he mẹdevo lẹ to wiwà.

Eyin mí tlẹ lẹndọ mẹmẹsunnu kavi mẹmẹyọnnu de ko ṣinuwa do mí bo tlẹ yinuwa hẹ mí to aliho mawadodo tọn mẹ, nawẹ mí na yinuwa gbọn? Be mí na dike ehe ni bẹpla sinsẹ̀nzọn alindọn lẹpo tọn mítọn hlan Jehovah wẹ ya? Kavi mí na yinuwa po adọgbigbo po nado didẹ wiwọ́ depope he mí sọgan tindo hẹ mẹdevo lẹ nado sọgan hẹn jijọho dagbe he tin to agun Jiwheyẹwhe tọn mẹ to egbehe dote?

Owe-wiwe na mí ayinamẹ dọmọ: “Eyin e yin wiwà, le e te to huhlọn mẹ na mì, mì nọ nọ̀ jijọho hẹ omẹ popo.” (Lom. 12:18) Na mímẹpo ni magbe nado wàmọ bo gbọnmọ dali zindonukọn awuyẹyẹ-afọyẹyẹ to ali ogbẹ̀ tọn lọ ji.

[Nudọnamẹ odò tọn]

[Yẹdide to weda 17]

Euodia po Sintiki po dona doafọna jijọho

[Yẹdide to weda 18]

Hogbe, kọnugbè, po awusọhia nukunta tọn tẹ po wẹ na yidogọna jijọho hugan?