7. Osẹ́n dagbe hugan lẹ wẹ Ahọluduta Jiwheyẹwhe tọn zedai

Gandudu aihọn tọn lẹ nọ do osẹ́n lẹ, po linlẹn lọ po dọ ehe na hẹn ale wá na tòvi yetọn lẹ bosọ basi hihọ́na yé. Ahọluduta Jiwheyẹwhe tọn lọsu ko ze osẹ́n delẹ dai, ehe tòvi etọn lẹ dona nọ yìn. Hia 1 Kọlintinu lẹ 6:9-11, enẹgodo dọhodo kanbiọ ehelẹ ji:

• Nawẹ a lẹndọ ogbẹ̀ lọ na te eyin mẹlẹpo nọ yìn osẹ́n he Jiwheyẹwhe do gando walọyizan go lẹ?a

• Be a lẹndọ e sọgbe hẹ lẹnpọn dagbe dọ Jehovah nọ donukun dọ tòvi Ahọluduta lọ tọn lẹ ni setonuna osẹ́n enẹlẹ ya? Naegbọn a do lẹnmọ?

• Etẹwẹ dohia dọ mẹhe ma nọ yìn osẹ́n enẹlẹ sọgan diọ jijọ?—Pọ́n wefọ 11.

Mẹsusu ma nọ voawu nado dọho gando zanhẹmẹ go. Ṣigba, Biblu nọ dọho gando zanhẹmẹ go to aliho he to tlọlọ mẹ podọ po sisi po. Nuhe e dọ gandego lẹ nọ hẹn ale wá na mí. E ka sọgbe domọ, na to popolẹpo mẹ, Jehovah wẹ Mẹdatọ mítọn. Enẹwutu, e yọ́n nuhe nọ wà dagbe na mí hugan lẹ. Ewọ do lehe nuyiwa mítọn lẹ gán hẹn homẹhun in do hia mí gọna nuhe na gọalọna mí nado duvivi gbẹninọ kakadoi tọn lẹ.

1. Nukun tẹwẹ Jehovah nọ yí do pọ́n zanhẹmẹ?

Nunina de wẹ zanhẹmẹ yin sọn Jehovah dè. Ewọ jlo dọ sunnu po yọnnu po he ko wlealọ lẹ ni nọ duvivi etọn. Nunina ehe ma nọ zọ́n bọ asu po asi po lẹ nọ jivi lẹ poun gba, ṣigba e sọ nọ zọ́n bọ yé nọ do owanyi gọna numọtolanmẹ he yé tindo na yenọzo hia to jọwamọ-liho podọ po awuvivi po. Enẹ wẹ zọ́n bọ Ohó Jiwheyẹwhe tọn do dọmọ: “Nọ jaya hẹ asi jọja whenu towe tọn.” (Howhinwhẹn lẹ 5:18, 19) Jehovah nọ donukun dọ Klistiani he ko wlealọ lẹ ni nọ yin nugbonọ na ode awetọ, gbọnmọ dali yé ma na jai jẹ ayọdide mẹ gbede.—Hia Heblu lẹ 13:4.

2. Etẹwẹ fẹnnuwiwa zanhẹmẹ tọn zẹẹmẹdo?

Biblu dọna mí dọ “mẹhe nọ doalọ to fẹnnuwiwa zanhẹmẹ tọn mẹ lẹ . . . ma na dugu Ahọluduta Jiwheyẹwhe tọn.” (1 Kọlintinu lẹ 6:9, 10) Biblu-kantọ he kàn adà Biblu tọn he to Glẹkigbe mẹ lẹ yí hogbe lọ pọlnẹia zan nado basi zẹẹmẹ fẹnnuwiwa zanhẹmẹ tọn. Hogbe enẹ bẹ (1) kọndopọ zanhẹmẹ tọna to mẹhe ma ko wlealọ lẹ ṣẹnṣẹn, (2) zanhẹmẹ to mẹhe tindo vijinu dopolọ lẹ ṣẹnṣẹn, podọ (3) zanhẹmẹ to gbẹtọ po kanlin po ṣẹnṣẹn hẹn. Eyin mí “nọla na fẹnnuwiwa zanhẹmẹ tọn,” mí nọ hẹn homẹhun Jehovah podọ mílọsu nọ mọaleyi.—1 Tẹsalonikanu lẹ 4:3.

DINDONANU DOGỌ

3. Nọ họ̀nna fẹnnuwiwa zanhẹmẹ tọn

Dawe nugbonọ de he nọ yin Josẹfu dovivẹnu sinsinyẹn ma nado hẹn walọ wiwe etọn flu. Hia Jenẹsisi 39:1-12, enẹgodo dọhodo kanbiọ ehelẹ ji:

• Etẹwẹ whàn Josẹfu nado họ̀n? —Pọ́n wefọ 9.

• Be a lẹndọ nudide dagbe lọ wẹ Josẹfu basi ya? Naegbọn a do dọ mọ?

VIDEO: Họ̀nna Fẹnnuwiwa (5:06)

Jehovah jlo dọ mímẹpo ni gbẹ́ fẹnnuwiwa dai. Hia 1 Kọlintinu lẹ 6:18, enẹgodo dọhodo kanbiọ ehelẹ ji:

• Ninọmẹ tẹlẹ wẹ sọgan hẹn mẹde nado jai jẹ fẹnnuwiwa zanhẹmẹ tọn mẹ?

• Nawẹ a sọgan họ̀nna fẹnnuwiwa gbọn?

4. A sọgan nọavùnte sọta mẹtẹnpọn lọ

VIDEO: Nọ Hia Biblu Nado Duto Mẹtẹnpọn lẹ Ji (3:02)

• Whenue mẹmẹsunnu he to video lọ mẹ mọdọ linlẹn po nuyiwa etọn lẹ po gán hẹn ẹn ma nado yin nugbonọ na asi etọn, etẹwẹ e wà?

To whedelẹnu, e nọ biọ dọ Klistiani nugbonọ lẹ lọsu ni dovivẹnu sinsinyẹn nado hẹn linlẹn yetọn lẹ do wiweji. Nawẹ a sọgan dapana nulinlẹnpọn do onú mawé lẹ ji gbọn? Hia Filipinu lẹ 4:8, enẹgodo dọhodo kanbiọ ehelẹ ji:

• Etẹlẹ ji wẹ mí dona nọ ze ayiha do?

• Nawẹ Biblu hihia po alọnu mítọn hinhẹn ján to sinsẹ̀nzọn Jehovah tọn mẹ po gán gọalọna mí nado nọavùnte sọta mẹtẹnpọn fẹnnuwiwa tọn gbọn?

5. Nujinọtedo Jehovah tọn lẹ nọ hẹn ale wá na mí

VIDEO: Zinzin Whèdo E (9:31)

• Nawẹ jọja sunnu lọ jai jẹ mẹtẹnpọn de mẹ gbọn?—Pọ́n Howhinwhẹn lẹ 7:8, 9.

• Sọgbe hẹ nuhe Howhinwhẹn lẹ 7:23, 26 dọ, fẹnnuwiwa zanhẹmẹ tọn sọgan hẹn kọdetọn vẹadi lẹ wá. Eyin mí nọ gbọṣi wiweji to walọyizan-liho, nuhahun tẹlẹ wẹ mí gán dapana?

• Eyin mí nọ hẹn walọyizan wiwe de go, nawẹ enẹ gán gọalọna mí nado duvivi ogbẹ̀ tọn kakadoi gbọn?

Mẹdelẹ lẹndọ nuhe Biblu dọ gando zanhẹmẹ to mẹhe tindo vijinu dopolọ lẹ ṣẹnṣẹn go ma do owanyi hia. Amọ́ Jehovah, Jiwheyẹwhe owanyinọ lọ jlo dọ mí ni duvivi ogbẹ̀ tọn kakadoi. Eyin enẹ na pà mí, mí dona nọ yìn osẹ́n etọn lẹ. Hia 1 Kọlintinu lẹ 6:9-11, enẹgodo dọhodo kanbiọ ehe ji:

• Be awuwiwlena ojlo zanhẹmẹ tọn na mẹhe tindo vijinu dopolọ hẹmẹ kẹdẹ wẹ ylan to nukun Jiwheyẹwhe tọn mẹ ya?

Nado hẹn homẹhun Jiwheyẹwhe, mí dona dovivẹnu bo basi diọdo lẹ. Be enẹ doale ya? Hia Salmu lẹ 19:8, 11, enẹgodo dọhodo kanbiọ ehelẹ ji:

• Be a lẹndọ nuhe Jehovah dọ gando walọ dagbe go lẹ sọgbe ya? Naegbọn a dọ mọ?

BLADOPỌ

Nunina de wẹ zanhẹmẹ yin sọn Jehovah dè, ehe e jlo dọ asu po asi po lẹ ni nọ duvivi etọn.

Dogbapọn

• Etẹlẹ wẹ fẹnnuwiwa zanhẹmẹ tọn bẹhẹn?

• Etẹwẹ na gọalọna mí nado dapana fẹnnuwiwa zanhẹmẹ tọn?

• Eyin mí setonuna gbedide Jehovah tọn lẹ gando walọyizan dagbe go, ale tẹlẹ wẹ e nọ hẹnwa na mí?

PỌ́N NUDỌNAMẸ DEVO LẸ

Pọ́n nuhewutu e yin nujọnu na Jiwheyẹwhe dọ sunnu po yọnnu po he jlo na nọpọ́ de ni wlealọ whẹ́.

“Etẹwẹ Biblu Dọ Gando Pọninọ Matin Alọwle Go?” (Hosọ Intẹnẹt ji tọn)

Gbadopọnna nuhewutu nuhe Biblu dọ gando zanhẹmẹ to mẹhe tindo vijinu dopolọ lẹ ṣẹnṣẹn go ma na tuli mí nado nọ gbẹwanna omẹ mọnkọ lẹ.

“Be E Ylan Dọ Sunnu po Sunnu po Kavi Yọnnu po Yọnnu po Ni Nọ Zanhẹ Yede Ya?” (Hosọ Intẹnẹt ji tọn)

Gbadopọnna lehe osẹ́n he Jiwheyẹwhe do gando wunmẹ zanhẹmẹ tọn lẹpo go nọ basi hihọ́na mí do.

“Be Zanhẹmẹ Nùmẹ Tọn Sọgan Yin Pinpọnhlan Taidi Zanhẹmẹ Ya?” (Hosọ Intẹnẹt ji tọn)

To hosọ lọ “Yé Doyẹyigona Mi” mẹ, pọ́n nuhe whàn dawe he nọ doalọ to zanhẹmẹ sunnu po sunnu po tọn mẹ dai de nado basi diọdo bo hẹn homẹ Jiwheyẹwhe tọn hùn.

“Biblu Nọ Diọ Gbẹzan Mẹtọn” (Atọ̀họ̀-Nuhihọ́ lọ Tọn, juillet- septembre 2011 tọn)

Dile etlẹ yindọ a yiwanna Jehovah sisosiso bosọ nọ dovivẹnu taun ma nado wà nudepope he na hẹn homẹgble e, e gán wá jọ bọ a na ṣinuwa. Etomọṣo, ylando delẹ nọ ylan taun hugan devo lẹ. (1 Kọlintinu lẹ 6:9, 10) Eyin a waylando sinsinyẹn de, flindọ Jehovah gbẹ́ yiwanna we; e ko wleawufo nado jona we podọ nado gọalọna we.

1. Etẹlẹ wẹ mí dona wà na Jehovah nido jona mí?

Mẹhe yiwanna Jehovah lẹ nọ jẹflumẹ taun eyin yé doayi e go dọ emi ko waylando sinsinyẹn de. Amọ́, yé nọ mọ homẹmimiọn yí sọn opagbe he Jehovah do na omẹ etọn lẹ mẹ, dọmọ: “Dile etlẹ yindọ ylando mìtọn lẹ divẹẹ ṣẹ́ṣẹ́, yé na yin hinhẹn zun wewe di osin-agó.” (Isaia 1:18) Eyin mí lẹnvọjọ nugbonugbo, Jehovah na jona mí mlẹnmlẹn. Nawẹ mí nọ dohia gbọn dọ mí lẹnvọjọ? Nuhe mí wà lọ nọ vẹna mí yì ahun mẹ sọmọ bọ mí nọ doalọtena nuylankan wiwà bo nọ vẹ̀ Jehovah dọ ni jona mí. Enẹgodo, mí nọ wà nuhe go mí pé lẹpo nado gbẹ́ pọndohlan agọ̀ kavi walọ ylankan he hẹn mí jai jẹ ylando mẹ lọ lẹ dai, podọ mí nọ dovivẹnu nado nọgbẹ̀ sọgbe hẹ nujinọtedo wiwe Jehovah tọn lẹ.—Hia Isaia 55:6, 7.

2. To whenue mí waylando, nawẹ Jehovah nọ yí mẹho agun tọn lẹ zan nado gọalọna mí gbọn?

Eyin mí waylando sinsinyẹn de, Jehovah biọ to mí si nado nọ “ylọ mẹho agun tọn lẹ.” (Hia Jakọbu 5:14, 15.) Sunnu he yin dide ehelẹ nọ yiwanna Jehovah po lẹngbọ etọn lẹ po. Yé pegan nado gọalọna mí, na mí nido vọ́ haṣinṣan mítọn hẹ Jehovah jlado.—Galatianu lẹ 6:1.

Nawẹ mẹho agun tọn lẹ nọ gọalọna mí gbọn to whenue mí waylando sinsinyẹn de? Mẹho awe kavi atọ̀n na yí ayinamẹ Owe-wiwe tọn lẹ zan nado do nuhewutu nuhe mí wà lọ do ylan hia mí. Yé nasọ na mí ayinamẹ yọ́n-na-yizan lẹ po tulinamẹ po, ehe na gọalọna mí ma nado vọ́ jai jẹ nuṣiwa dopolọ mẹ. Mẹho agun tọn lẹ nọ de mẹdepope he waylando sinsinyẹn bo ma lẹnvọjọ sẹ̀ sọn agun mẹ nado basi hihọ́na agun lọ, na walọyizan etọn nikaa bẹpla mẹhe pò to agun lọ mẹ lẹ.

DINDONANU DOGỌ

3. Gbeyiyina ylando mítọn nọ hẹn ale wá

Ylando depope he mí wà nọ vẹna Jehovah, enẹwutu e sọgbe dọ mí ni nọ yigbe ylando mítọn tọn na ẹn. Hia Salmu lẹ 32:1-5, enẹgodo dọhodo kanbiọ ehe ji:

• Naegbọn e do yọ́n nado yigbe ylando mítọn lẹ tọn na Jehovah, kakati nado to tintẹnpọn nado whlá yé do e?

VIDEO: “Mẹhe Jehovah Yiwanna lẹ Go Wẹ E Nọ Domẹplọnlọ” (3:01)

• To video lọ mẹ, nawẹ mẹho lẹ gọalọna Canon nado lẹkọwa Jehovah dè gbọn?

Mí dona nọ dọ lehe nulọ yì do pẹpẹ na mẹho lẹ po ahundopo po; na yé tin to finẹ nado gọalọna mí wẹ. Hia Jakọbu 5:16, enẹgodo dọhodo kanbiọ ehe ji:

• Nawẹ nugbodidọ na mẹho lẹ nọ hẹn ẹn bọawuna yé dogọ nado gọalọna mí gbọn?

4. Jehovah nọ do lẹblanu hia ylanwatọ lẹ

Eyin mẹhe ko waylando sinsinyẹn de gbẹ́ nado hodo nujinọtedo Jehovah tọn lẹ, e nọ yin didesẹ sọn agun mẹ, podọ mí ma nọ dogbẹ́ hẹ ẹ ba. Hia 1 Kọlintinu lẹ 5:6, 11, enẹgodo dọhodo kanbiọ ehe ji:

• Kẹdẹdile otọ́n nọ hẹn linfin yinyàn fọ́n do, kọdetọn tẹwẹ gbẹdido hẹ ylanwatọ he ma lẹnvọjọ de na tindo do agun lọ ji?

Nawẹ aliho he mẹ Jehovah nọ yinuwa hẹ ylanwatọ lẹ te dohia dọ ewọ yin lẹnpọn ­dagbenọ, lẹblanunọ, bosọ yiwanna mí gbọn?

5. Jehovah nọ jona mí to whenue mí lẹnvọjọ

Jesu na apajlẹ de he gọalọna mí nado mọnukunnujẹ numọtolanmẹ he Jehovah nọ tindo mẹ to whenue mẹde lẹnvọjọ. Hia Luku 15:1-7, enẹgodo dọhodo kanbiọ ehe ji:

• Etẹwẹ ehe plọn we gando Jehovah go?

Hia Ezekiẹli 33:11, enẹgodo dọhodo kanbiọ ehe ji:

• Afọdide titengbe tẹwẹ mẹde dona ze nado dohia dọ emi lẹnvọjọ?

BLADOPỌ

Eyin mí waylando sinsinyẹn de, ṣigba bọ e vẹna mí taun, bọ mí magbe nado dealọ sọn ylanwiwa mẹ, Jehovah na jona mí.

Dogbapọn

• Naegbọn e do yin alenu dọ mí ni yigbe ylando mítọn lẹ tọn na Jehovah?

• Etẹlẹ wẹ mí dona wà na ylando mítọn lẹ nido yin jijona mí?

• Eyin mí waylando sinsinyẹn de, naegbọn mí dona dín alọgọ mẹho agun tọn lẹ tọn?

PỌ́N NUDỌNAMẸ DEVO LẸ

Pọ́n lehe dawe de mọaleyi sọn lẹblanu Jehovah tọn he go Isaia 1:18 donù mẹ do.

Ma Tindo Ayihaawe Gando Lẹblanu Jehovah Tọn Go Gbede Blo (5:02)

Nawẹ mẹho lẹ nọ dovivẹnu nado gọalọna mẹhe waylando sinsinyẹn lẹ gbọn?

“Owanyi po Lẹblanu po Didohia Mẹhe Waylando Lẹ” (Atọ̀họ̀-Nuhihọ́ lọ Tọn, août 2024 tọn)

Pọ́n lehe owanyi po lẹblanu po nọ yin didohia ylanwatọ he ma lẹnvọjọ lẹ do.

“Alọgọ Na Mẹhe Yin Didesẹ sọn Agun mẹ Lẹ” (Atọ̀họ̀-Nuhihọ́ lọ Tọn, août 2024 tọn)

To otàn lọ “N’Dona Lẹkọwa Jehovah Dè” mẹ, pọ́n nuhewutu dawe de he ko danbú sọn nugbo lọ mẹ do mọdọ Jehovah wẹ dọ̀n emi lẹkọwa.

“Biblu Nọ Diọ Gbẹzan Mẹtọn” (Atọ̀họ̀-Nuhihọ́ lọ Tọn, avril-juin 2012 tọn)