‘Lẹnpọn Dagbenọ-Yinyin’ Dile Opodo to Sisẹpọ

“Opodo onú popo tọn to sisẹpọ; enẹwutu mì yín [lẹnpọn dagbenọ, NW]” —1 PITA 4:7.

 1. Etẹwẹ ‘lẹnpọn dagbenọ-yinyin’ bẹhẹn?

HOGBE aga tọn apọsteli Pita tọn lẹ dona tindo nugandomẹgo sisosiso de do aliho he mẹ Klistiani lẹ nọ zan gbẹzan yetọn lẹ do ji. Ṣigba, Pita ma to didọ na wehiatọ etọn lẹ nado joagọ sọn azọngban egbesọegbesọ tọn lẹ po magbọjẹ gbẹ̀mẹ tọn lẹ po mẹ gba; mọdopolọ e ma to budonamẹ zẹjlẹgo gando vasudo he sẹpọ lọ go gba. Kakatimọ, e dotuhomẹnamẹ dọmọ: ‘Mì yin lẹnpọn dagbenọ to apọ̀nmẹ.’ Nado yin ‘lẹnpọn dagbenọ’ bẹ dido whẹdida dagbe hia, tintindo lẹnpọn dagbe, nuyọnẹntọ, lẹnpọn dagbe to hogbe po nuyiwa mítọn lẹ po mẹ hẹn. E zẹẹmẹdo gbigbọ na Ohó Jiwheyẹwhe Tọn ni deanana lẹnpọn po nuyiwa mítọn lẹ po. (Lomunu lẹ 12:2) To whenuena mí to gbẹ̀nọ “to akọta jijọ gbíngbánnọ po bublunọ po ṣẹnṣẹn,” lẹnpọn dagbe yin nuhudo nado dapana nuhahun lẹ po awusinyẹnnamẹnu lẹ po.—Filippinu lẹ 2:15.

 2. Nawẹ homẹfa Jehovah tọn tindo alemọyi na Klistiani lẹ to egbehe gbọn?

² ‘Lẹnpọn dagbenọ-yinyin’ sọ nọ gọalọna mí nado tindo sọwhiwhe, bo nọ tindo pọndohlan lẹnpọn dagbe mídelẹ tọn. (Titu 2:12; Lomunu lẹ 12:3) Ehe yin titengbe to pọndohlan mẹ na hogbe heyin kinkandai to 2 Pita 3:9 mẹ dọmọ: “Oklunọ ma gboawupo gbọn opagbe etọn dali gba, dile mẹdelẹ lẹn awugbopo do; ṣigba e yín linsinyẹntọ hlan mí dali, na e ma jlo dọ mẹdepope ni dọ̀n, adavo dọ omẹ popo ni wá lẹnvọjọ kọ̀n.” Doayi e go dọ Jehovah yin linsinyẹntọ, e mayin hẹ mayisenọ lẹ kẹdẹ gba, ṣigba “hlan mí dali” ga—yèdọ hagbẹ agun Klistiani tọn lọ. Etẹwutu? Na “e ma jlo dọ mẹdepope ni dọ̀n.” Vlavo mẹdelẹ gbẹ́ dona basi diọdo lẹ po vọjlado lẹ po nado sọgan pegan na nunina ogbẹ̀ madopodo tọn. Enẹwutu mì gbọ mí ni pọ́n awà fie vọjlado delẹ sọgan yin nuhudo te.

‘Lẹnpọn Dagbenọ-yinyin’ to Haṣinṣan Mẹdetiti Tọn Mítọn lẹ Mẹ

 3. Kanbiọ tẹlẹ wẹ mẹjitọ lẹ sọgan kanse yedelẹ gando ovi yetọn lẹ go?

³ Whégbè dona yin nọtẹn jijọho tọn. Ṣigba na mẹdelẹ e yin “owhé he gọ́ na . . . avùn.” (Howhinwhẹn lẹ 17:1) Etẹwẹ dogbọn whẹndo towe dali? Be owhé towe vò sọn “homẹgble, nutlọ, po ohó ylankan po” mẹ ya? (Efesunu lẹ 4:31) Etẹwẹ dogbọn ovi towe lẹ dali? Be yé tindo numọtolanmẹ wanyina po pinpẹn-nutọn-yinyọnẹn namẹ tọn po ya? (Yijlẹdo Luku 3:22 go.) Be hiẹ to whenu yí dai nado na ayinamẹ bo plọn yé ya? Be hiẹ nọ ‘wọhẹmẹ to dodowiwa mẹ’ kakati nado tin to adi po homẹgble po mẹ ya? (2 Timoti 3:16) To whenuena e yindọ ovi lẹ yin “ogú Oklunọ tọn,” e tindo ojlo he siso to lehe yè to nuyiwa hẹ yé do mẹ.—Psalm 127:3.

 4. (a) Etẹwẹ sọgan dekọtọn eyin asu de yinuwahẹ asi etọn to aliho fifiẹ de mẹ? (b) Nawẹ asi lẹ sọgan ze jijọho daga hẹ Jiwheyẹwhe podọ ze ayajẹ daga to whẹndo lọ blebu mẹ gbọn?

⁴ Etẹwẹ dogbọn alọwlemẹ mítọn dali? “Asú lẹ ni nọ yiwanna asi yetọn lẹ kẹdẹdi agbasa yéde tọn. Mẹhe yiwanna asi etọn, e yiwanna ede. Na mẹhe gbẹwanna agbasalan ede tọn de ma tin gbede; adavo ni to yìnyìn in, bosọ to yẹyiwlé na ẹn, yèdọ dile Klisti ga nọ basi na agun do.” (Efesunu lẹ 5:28, 29) Sunnu mẹzuntọ, aṣẹpanamẹtọ, kavi he ma tindo lẹnpọn dagbe e mayin dọ e nọ ze vivomẹninọ owhé etọn tọn do owù mẹ kẹdẹ wẹ gba ṣigba nọ dè haṣinṣan etọn hẹ Jiwheyẹwhe pò. (1 Pita 3:7) Etẹwẹ dogbọn asi lẹ dali? Mọdopolọ yé dona ‘yin mẹmẹglọ hlan asú yetọn lẹ taidi hlan Oklunọ.’ (Efesunu lẹ 5:22) Nulinlẹnpọn do aliho he sọgan hẹn homẹ Jiwheyẹwhe tọn hùn ji sọgan gọalọna asi de nado yí nukunpẹvi do pọ́n awugbopo asu etọn tọn lẹ bo yin mẹmẹglọ hlan ẹn matin homẹgble. To ojlẹ delẹ mẹ, asi de sọgan vò bo dọ linlẹn etọn. Howhinwhẹn lẹ 31:26 dọ dogbọn asi nugopetọ lọ dali dọmọ: “E yí nuyọnẹn do kẹ̀ onù etọn: podọ to odẹ́ etọn ji wẹ osẹ́n dagbewiwà tọn te.” Gbọn nuyiwa hẹ asu etọn to aliho dagbewà, po sisi po tọn mẹ dali, e hẹn jijọho go hẹ Jiwheyẹwhe, bo ze ayajẹ whẹndo lọ blebu tọn daga.—Howhinwhẹn lẹ 14:1.

 5. Naegbọn jọja lẹ dona hodo ayinamẹ Biblu tọn gando nuyiwahẹ mẹjitọ yetọn lẹ go?

⁵ Jọja lẹ emi, nawẹ mì nọ yinuwa hẹ mẹjitọ mìtọn lẹ gbọn? Be mì nọ yí hogbe mẹṣanko, mẹmasi tọn lẹ he nọ saba yin alọkẹyi gbọn aihọn lọ dali lẹ zan wẹ ya? Kavi be mì to tonusena gbedide Biblu tọn lọ he dọmọ: “Mì ovi emi, mì setonuna mẹjitọ mìtọn lẹ to Oklunọ mẹ; na ehe wẹ jlọjẹ. Gbògbéna otọ́ towe po onọ̀ po; he yín osẹ́n tintan po opagbe po; na e nido yín dagbe na we, podọ na hiẹ nido nọ̀ aihọn mẹ dẹn.”—Efesunu lẹ 6:1-3.

 6. Nawẹ mí sọgan din jijọho hẹ hatọ sinsẹ̀ntọ lẹ gbọn?

⁶ Mí sọ nọ do ‘lẹnpọn dagbenọ-yinyin’ hia eyin mí “din jijọho, bosọ nọ doafọ na ẹn” po hatọ yisenọ lẹ po. (1 Pita 3:11) Gbèmanọpọ po nukunnumamọjẹnumẹ po nọ fọ́n sọn ojlẹ de mẹ jẹ devo mẹ. (Jakobu 3:2) Eyin kẹndomẹ yin dotẹnmẹ na nado wleawu, jijọho agun lọ blebu tọn sọgan yin zizedo owù mẹ. (Galatianu lẹ 5:15) Enẹwutu didẹ wiwọ́ lẹ po awuyiya po; din pọngbọ jijọho tọn lẹ.—Matiu 5:23-25; Efesunu lẹ 4:26; Kọlọsinu lẹ 3:13, 14.

‘Lẹnpọn Dagbenọ-yinyin’ po Azọngban Whẹndo Tọn lẹ Po

 7. (a) Nawẹ Paulu na tuli ‘lẹnpọn dagbenọ-yinyin’ didohia to whẹho gbẹzan egbesọegbesọ tọn lẹ mẹ gbọn? (b) Walọyizan tẹwẹ asu po asi Klistiani tọn lẹ po dona tindo hlan azọngban whégbè tọn lẹ?

⁷ Apọsteli Paulu dotuhomẹna Klistiani lẹ ‘nado nọgbẹ̀ po lẹnpọn dagbenọ-yinyin po.’ (Titu 2:12) Ojlofọndotenamẹnu wẹ e yin dọ, to lẹdo hodidọ lọ tọn mẹ, Paulu dotuhomẹna yọnnu lẹ “nado nọ yiwanna asú yetọn lẹ, nado nọ yiwanna ovi yetọn lẹ, nado yín nuyọnẹntọ, wewenọ, nado yín owhégbè nọtọ.” (Titu 2:4, 5) Paulu wlan enẹ to owhe 61-64 W.M., owhe vude lẹ jẹnukọnna vivọnu titonu Ju lẹ tọn. Etomọṣo, whẹho egbesọegbesọ tọn lẹ, taidi whégbèzọ́n, gbẹ́ pò to onú titengbe yin. Enẹwutu asu po asi po lẹ dona tindo pọndohlan dagbe gando azọngban whégbè tọn yetọn lẹ go “na ohó Jiwheyẹwhe tọn ma nado yín nùzandogona.” Tatọ whẹndo tọn dopo vẹvẹna jonọ de na awusọhia winyandomẹ owhé etọn tọn wutu. E basi zẹẹmẹ dọ e ma ko yin jijlado “na emi to gbehosọnalitọ basi wutu.” Nuhe jẹ na pipà wẹ eyin to whenuena mí basi avọ́sinsan lẹ na Ahọluduta lọ wutu, ṣigba mẹdehihọ́ dona yin bibasi ma nado yí dagbemẹninọ whẹndo mítọn lẹ tọn do owù mẹ.

 8. Nawẹ tatọ whẹndo tọn lẹ sọgan penukundo nuhudo whẹndo yetọn lẹ tọn go to aliho jlẹkaji tọn de mẹ gbọn?

⁸ Biblu dotuhomẹna otọ́ lẹ nado hẹn whẹndo yetọn lẹ tin to otẹn tintan mẹ, bo dọ dọ mẹhe gboawupo nado wleawudai na whẹndo etọn “e mọ́n yise lọ, e sọ ylan hú mayisenọ.” (1 Timoti 5:8) Nujinọtedo gbẹninọ tọn gbọnvo lẹdo aihọn pé, podọ e yọ́n nado hẹn yanwle agbasanu lẹ tọn do jlẹkaji. “A na ohẹ́n kavi adọkun mi blo,” wẹ wekantọ Howhinwhẹn lẹ 30:8 tọn hodẹ̀ dọ. Etomọṣo, mẹjitọ lẹ ma dona gbẹkọ nuhudo agbasa tọn ovi yetọn lẹ tọn go gba. Di apajlẹ, be e na yin nuyọnẹnnu nado jo whẹndo mẹde tọn do pete matin dandannu gbẹ̀mẹ tọn lẹ nado sọgan doafọna lẹblanulọkẹyi yẹwhehọluduta tọn lẹ ya? Be ehe ma na hẹn homẹgble ovi mẹtọn lẹ ya? To alọdevo mẹ, Howhinwhẹn lẹ 24:27 dọmọ: “Wleawu azọ́n towe tọn dai to gbonu, bosọ yí vivẹnu do jlòai to ogle towe mẹ; to godo ehe tọn, gbá ohọ̀ towe.” Mọwẹ, to whenuena yinyin ahunmẹduna na nutindo agbasa tọn lẹ tindo otẹn etọn, ‘gbigbá whédo mẹdetiti tọn’—to gbigbọliho podọ to numọtolanmẹ liho—yin onú titengbe.

 9. Naegbọn e do yin nuyọnẹnnu na tatọ whẹndo tọn lẹ nado lẹnnupọndo yọnbasi okú kavi azọ̀njijẹ yetọn tọn ji?

⁹ Be hiẹ ko basi awuwledainanu lẹ nado penukundo whẹndo towe go vlavo eyin okú ajiji wá ya? Howhinwhẹn lẹ 13:22 dọmọ: “Gbẹtọ dagbe jo ogú dai na ovi ovi etọn lẹ tọn.” To yidogọmẹ na gududu oyọnẹn Jehovah tọn po haṣinṣan hẹ ẹ po, mẹjitọ lẹ na tindo ojlo to awuwlena agbasanu ovi yetọn lẹ tọn mẹ. To otò susu lẹ mẹ tatọ whẹndo tọn he go yè dejido lẹ na tẹnpọn nado tindo akuẹ delẹ to sẹdotẹnmẹ, kandai sọgbe hẹ osẹ́n lehe nutindo mẹde tọn na yin mimá do, podọ alọdowemẹ na alọgọmọyi to owù-nujijọ whenu. To popolẹpo mẹ, omẹ Jiwheyẹwhe tọn lẹ ma gán sọn “ojlẹ po kosọ po” si gba (Yẹwhehodọtọ 9:11) “Agbó wẹ” akuẹ podọ titobibasi sọwhiwhe tọn sọgan nọ saba dapana awusinyẹnnamẹnu. (Yẹwhehodọtọ 7:12) To otò he mẹ ahọlu ma nọ sú akuẹ nukunpedomẹgo tọn te lẹ, mẹdelẹ sọgan de nado sẹ akuẹ de do na nuhudo agbasalilo tọn lẹ kavi basi tito na nukunpedomẹgo agbasalilo tọn wunmẹ delẹ.a

10. Nawẹ mẹjitọ Klistiani lẹ sọgan ‘wleawu dai’ na ovi yetọn lẹ gbọn?

¹⁰ Owe wiwe lẹ dọ ga dọmọ: “Na e mayin ovi lẹ wẹ jẹ nado bẹ́ adọkun pli dai na mẹjitọ lẹ gba, adavo mẹjitọ lẹ na ovi lẹ.” (2 Kọlintinu lẹ 12:14) To aihọn mẹ nuhe gbayipe wẹ eyin na mẹjitọ lẹ nado ze akuẹ dai na wepinplọn sọgodo ovi yetọn lẹ tọn po alọwle po nado sọgan na yé bẹjẹeji dagbe de to gbẹ̀mẹ. Be hiẹ ko tindo linlẹn lọ nado ze sọgodo gbigbọmẹ tọn dai na ovi towe lẹ ya? Di apajlẹ, mí ni dọ dọ ovi he ko whẹ́n de to afọdona lizọnyizọn whenu-gigọ tọn. To whenuena devizọnwatọ whenu-gigọ́ tọn lẹ ma dona biọ kavi donukun godonọnamẹ gbonu tọn, mẹjitọ owanyinọ lẹ sọgan de nado ‘má hẹ ẹ sọgbe hẹ nuhudo etọn lẹ’ nado sọgan gọalọna ẹn nado gbọṣi sinsẹ̀nzọ́n whenu-gigọ́ tọn mẹ.—Lomunu lẹ 12:13; 1 Samuẹli 2:18, 19; Filippinu lẹ 4:14-18.

11. Be pọndohlan sọgbe hẹ lẹnpọn dagbe akuẹ tọn do yise matindo hia wẹ ya? Basi zẹẹmẹ.

¹¹ Pọndohlan lẹnpọn dagbe tọn tintindo gando akuẹ go ma do yise matindo hia dọ titonu ylankan Satani tọn ko sẹpọ opodo etọn gba. Whẹho “nuyọnẹn he pé” po zinzin didohia tọn po wẹ e yin poun. (Howhinwhẹn lẹ 2:7; 3:21) Jesu to whedenu dọ dọ “ovi whenu he tọn lẹ yín nuyọnẹntọ . . . hú ovi hinhọ́n tọn lẹ” to akuẹ zinzan yetọn tọn mẹ. (Luku 16:8) To whelọnu lo, abajọ bọ mẹdelẹ ko mọ nuhudo lọ nado basi vọjlado lẹ to aliho he mẹ yé nọ yí nutindo yetọn lẹ zan te, na yé nido sọgan penukundo nuhudo whẹndo yetọn lẹ tọn go ganji.

‘Lẹnpọn Dagbenọ-yinyin’ to Pọndohlan Wepinplọn Tọn Mítọn Mẹ

12. Nawẹ Jesu plọn devi etọn lẹ nado nọ diọada hlan ninọmẹ yọyọ lẹ gbọn?

¹² “Owalọ aihọn he tọn to jujuyi,” podọ diọdo sinsinyẹn akuẹzinzan tọn lẹ po nukunhunhun anazọnwiwa lẹ tọn po to aimẹ wá po awuyiya po. (1 Kọlintinu lẹ 7:31) Ṣigba, Jesu plọn devi etọn lẹ nado yin alọdiọtọ. E dọ na yé to whenuena e do yé hlan nujijla yẹwhehodidọ tọn yetọn tintan dọmọ: “Mì donukun azọ́nnu de, sika, kavi fataka, kavi oganvẹẹ to sẹgẹ mìtọn lẹ mẹ blo, kavi azọpò na whẹntọ́ngbe mìtọn blo, mì hẹn awu awe, kavi afọpa, kavi opò blo: na azọ́nwatọ jẹ na núdùdù etọn.” (Matiu 10:9, 10) Nalete, to ninọmẹ agọgbọnẹnmẹ tọn de mẹ, Jesu dọmọ: “Mẹhe tindo sẹgẹ de, gbọ e ni yí ì, podọ ṣakoto de mọkẹdẹ.” (Luku 22:36) Etẹwẹ ko diọ? Ninọmẹ lọ lẹ. Lẹdo sinsẹ̀n tọn lọ ko lẹzun kanyinylan tọn dogọ, podọ todin yé dona basi awuwledainanu lẹ na yede.

13. Etẹwẹ yin lẹndai nujọnu wepinplọn tọn, podọ nawẹ mẹjitọ lẹ sọgan yin alọgọnamẹnu ovi yetọn lẹ tọn to whẹho ehe mẹ gbọn?

¹³ Mọdopolọ to egbehe, mẹjitọ lẹ dona lẹnnupọndo nugbo akuẹzinzan tọn egbehe tọn lẹ ji. Di apajlẹ, be hiẹ to tito basi nado mọ dọ ovi towe lẹ to mimọ wepinplọn he sọgbe yí ya? Lẹndai titengbe wepinplọn tọn dona yin nado hẹn jọja de pegan nado yin lizọnyizọnwatọ kọdetọn dagbenọ de. Podọ wepinplọn he hugan popolẹpo wẹ wepinplọn gbigbọmẹ tọn. (Isaia 54:13) Mẹjitọ lẹ sọ nọ yin ahunmẹduna dogbọn nugopipe ovi yetọn lẹ tọn dali nado penukundo yedelẹ go to akuẹzinzan-liho. Enẹwutu na anademẹ ovi towe lẹ, gọalọna yé nado de azọ́n he sọgbe wehọmẹ tọn lẹ, bo dọhodeji hẹ yé vlavo e yin nuyọnẹnnu nado doafọna wepinplọn kavi lala. Nudide mọnkọtọn lẹ yin azọngban whẹndo tọn, podọ mẹdevo ma dona mọhodọ do aliho heyin zize lọ ji gba. (Howhinwhẹn lẹ 22:6) Etẹwẹ dogbọn mẹhe ko basi dide nado plọnwe ovi yetọn lẹ to whégbè dali?b To whenuena mẹsusu ko wà azọ́n he jẹ na pipa, mẹdelẹ ko mọ mẹpinplọn whégbè tọn di nuhe sinyẹnawu hugan lehe yé lẹndo, podọ ovi yetọn lẹ ko jiya. Enẹwutu eyin hiẹ to nulẹnpọndo wepinplọn whégbè tọn ji, hẹn diun nado lẹn nuhe e biọ pọ́n, gbadopọnna po nuyiwa sọgbe hẹ lẹnpọn dagbe tọn po eyin hiẹ tindo azọ́nyinyọ́nẹn po mẹplọnlọdomẹgo-mẹdetiti tọn he nuhudo tin na lẹ nado dotana po.—Luku 14:28.

‘Ma Din Onú Dahodaho lẹ Blo’

14, 15. (a) Nawẹ Baluki hẹn jlẹkaji-ninọ gbigbọmẹ tọn etọn bu gbọn? (b) Naegbọn e do yin nululu na ẹn nado ‘din onú dahodaho lẹ’?

¹⁴ To whenuena opodo titonu ehe tọn ma ko wá todin, mẹdelẹ sọgan tindo ayilinlẹn nado din nuhe aihọn lọ tindo nado zedonukọnnamẹ—yèdọ yanwle he diyin lẹ, azọ́n he tindo alè lẹ, po adọkun po. Lẹnnupọndo wekantọ Jẹlemia tọn Baluki ji. E doavigbe dọmọ: “Dindọn wẹ yẹn dinvie! na Oklunọ ko sọ dè awubla dogọ́ awufiẹsa ṣie; yẹn yín gbẹ́donọ po winwẹn ṣie po, yẹn ma sọ mọ gbọjẹ de.” (Jẹlemia 45:3) Nuṣikọna Baluki. Sinsẹ̀nzọnwiwa taidi wekantọ Jẹlemia tọn sinyẹnawu, yèdọ azọ́n kọgbidinamẹnu tọn de. (Jẹlemia 36:14-26) Podọ kọgbidinamẹnu lọ taidi nuhe ma na wá vivọnu nkọtọn. E na yin owhe 18 whẹpo Jelusalẹm do yin vivasudo.

¹⁵ Jehovah dọna Baluki dọmọ: “Doayi e go, enẹ he yẹn ko do wẹ yẹn na họ́liai, podọ enẹ he yẹn ko do wẹ yẹn na dọ̀nsún; podọ ehe to aigba pete mẹ. Bé hiẹ to onú dahodaho lẹ din na dewe wẹ? A din yé blo.” Baluki ko hẹn jlẹkajininọ etọn bu. E ko bẹ ‘onú dahodaho lẹ dindin na edetiti’ jẹeji, vlavo adọkun, mẹjọmẹ-yinyin, kavi hihọ́ agbasanu lẹ tọn. To whenuena Jehovah to ‘dindọ̀nsún, etlẹ yin aigba lọ pete,’ nuyọnẹn tẹwẹ tin to e mẹ nado din onú mọnkọtọn lẹ? Enẹwutu Jehovah na nuflinmẹ sinsinyẹn ehe Baluki dọmọ: “Na doayi e go, yẹn na hẹn oylan wá agbasalan lẹpo ji, . . . ṣigba ogbẹ̀ towe wẹ yẹn na jó hlan we na owẹnyànnu de to otẹn fie dali hiẹ to yìyì lẹpo mẹ.” Nutindo agbasa tọn lẹ ma na lùn vasudo Jelusalẹm tọn tọ́n gba! Jehovah na jide whlẹngán ‘ogbẹ̀ etọn tọn kẹdẹ di owẹnyànnu de’.—Jẹlemia 45:4, 5.

16. Nuplọnmẹ tẹwẹ omẹ Jehovah tọn lẹ to egbehe sọgan plọn sọn numimọ Baluki tọn mẹ?

¹⁶ Baluki kẹalọyi nugbẹnamẹ Jehovah tọn, podọ, opagbe Jehovah tọn yin nugbo, Baluki họngán po ogbẹ̀ etọn po. (Jẹlemia 43:6, 7) Nuplọnmẹ jiawu tẹ die na omẹ Jehovah tọn lẹ to egbehe! Ojlẹ lọ ma die nado to ‘onú dahodaho lẹ din na mídelẹ.’ Etẹwutu? Na “aihọn . . . to juju jei po wantuntun etọn po” wutu.—1 Johanu 2:17.

Ojlẹ he Pò lọ Yiyizan po Nuyọnẹn Po

17, 18. (a) Nawẹ Jona yinuwa gbọn to whenuena omẹ Nineve tọn lẹ lẹnvọjọ? (b) Nuplọnmẹ tẹwẹ Jehovah plọn Jona?

¹⁷ To whelọnu lo, nawẹ mí sọgan yí ojlẹ he pò lọ zan po nuyọnẹn po gbọn? Plọnnu sọn numimọ yẹwhegan Jona tọn mẹ. E “yì jẹ Nineve . . . , ewọ bosọ dawhá, bo to didọmọ, azán kande mọ gbè, Nineve na yín akititana.” Nuhe paṣa Jona wẹ yin, Nineve yigbe hlan wẹndomẹ etọn bo lẹnvọjọ! Jehovah joagọ sọn viva tòdaho lọ sudo mẹ. Etẹwẹ yin nuyiwa Jona tọn? “Oklunọ E, yẹn vẹ̀ we, yí ogbẹ̀ ṣie sọn dee; na e tin pọnte na mi nado kú hú nado nọgbẹ̀.”—Jona 3:3, 4; 4:3.

¹⁸ Jehovah to whelọnu lo plọn Jona nuplọnmẹ titengbe de. E “wleawuna atinkan de, bosọ hẹn ẹn nado hẹaga wá Jona ji, na e nido yín oyẹhẹ́ de to ota etọn . . . Mọwẹ Jona yín homẹhunnọ badabada na atinkan lọ tọn wutu.” Ṣigba, homẹhunhun Jona tọn yin ojlẹ gli de tọn, na atinkan lọ fiọ po awuyiya po. Jona lẹzun “mẹadinọ” do flumẹjijẹ etọn ji. Jehovah zinnudo nuagokun lọ ji, bo dọmọ: “Hiẹ ko tindo awubla to atinkan lọ ji . . . Be yẹn ma do sọ tindo awubla to Nineve ji, tòdaho gbó nẹ; ehe mẹ gbẹtọ hú fọtọ́n kantọ̀n te he ma sọgan yọ́ndesọndemẹ to alọ yetọn adusi po alọ yetọn amiọn po ṣẹnṣẹn; po kanlinyìnyìn susu po ga?”—Jona 4:6, 7, 9-11.

19. Aliho lẹnpọn ṣejannabinọ tọn tẹwẹ mí na jlo nado dapana?

¹⁹ Lehe lẹnpọn Jona tọn yin ṣejannabinọ tọn do sọ! E sọgan blawu na atinkan de, ṣigba e matindo awuvẹmẹ kúndopo tata na gbẹtọ Nineve tọn lẹ—yèdọ mẹhe, nado dọ to gbigbọ-liho, “ma sọgan yọ́ndesọndemẹ to alọ yetọn adusi po alọ yetọn amiọn po ṣẹnṣẹn.” Mọdopolọ mí sọgan jlo vasudo aihọn ylankan ehe tọn podọ po jlọjẹ po mọwẹ! (2 Tẹsalonikanu lẹ 1:8) Ṣigba, to whenuena mí to tenọpọn ẹn, mí tindo azọngban nado gọalọna gbẹtọ ahunjijlọnọ lẹ he, nado dọ to gbigbọ-liho, ma “yọ́ndesọndemẹ to alọ yetọn adusi po alọ yetọn amiọn po ṣẹnṣẹn.” (Matiu 9:36; Lomunu lẹ 10:13-15) Be hiẹ na yí ojlẹ gli he pò lọ zan nado gọalọna mẹsusu dile e sọgan yọnbasi do nado duale oyọnẹn họakuẹ Jehovah tọn tọn ya? Azọ́n tẹwẹ sọgan sọzẹn hẹ ayajẹ alọgigọna mẹde nado mọale ogbẹ̀ tọn yí?

To Gbẹnọ Zọnmii po ‘Lẹnpọn Dagbenọ-yinyin’ Po

20, 21. (a) Etẹwẹ yin aliho delẹ he mẹ mí sọgan do ‘lẹnpọn dagbenọ-yinyin’ hia te to azán he ja lẹ mẹ? (b) Dona tẹlẹ wẹ na wá sọn gbẹninọ po ‘lẹnpọn dagbenọ-yinyin’ po mẹ?

²⁰ Dile titonu Satani tọn to titlọ biọ vasudo etọn mẹ zọnmii, na jide tọn mí dona pehẹ avùnnukundiọsọmẹnu lẹ. Timoti awetọ 3:13 dọ dọdai dọmọ: “Mẹylankan lẹ, po mẹklọtọ lẹ po na to yinylan yì nukọn.” Ṣigba mì dike “onú [ni] dikọna mì, na agbọ́ [ni] pé ayiha mìtọn” blo. (Heblu lẹ 12:3) Ganjẹ Jehovah go na huhlọn. (Filippinu lẹ 4:13) Plọn nado bọawu, nado jẹakọhẹ ninọmẹ he to yinylan ehelẹ, kakati nado nọ to nulẹnpọndo ojlẹ he ko wayi lẹ ji. (Yẹwhehodọtọ 7:10) Yí nuyọnẹn yọn-na-yizan zan, bo setonuna anademẹ he “afanumẹ nugbonọ, nuyọnẹntọ” lọ nọ wleawuna lẹ.—Matiu 24:45-47.

²¹ Ojlẹ sọha he pò mí ma yọnẹn gba. Etomọṣo, mí sọgan dọ po jide po dọ “opodo onú popo tọn to sisẹpọ.” Kakajẹ whenuena opodo enẹ na wá, mì gbọ mí ni nọgbẹ̀ po ‘lẹnpọn dagbenọ-yinyin’ po to nuyiwa mítọn lẹ hẹ ode awetọ mẹ, to aliho he mẹ mí nọ penukundo whẹndo mítọn lẹ go te, podọ to azọngban agbasa tọn mítọn lẹ mẹ. Gbọnmọ wiwà dali, mímẹpo sọgan tindo adọgbigbo dọ mí na yin mimọ to godo mẹ “to jijọho mẹ, to matin apà podọ to madowango mẹ”!—2 Pita 3:14.

[Nudọnamẹ Odò Tọn]

Onú Agokun lẹ na Dogbapọn

◻ Nawẹ mí sọgan do ‘lẹnpọn dagbenọ-yinyin’ hia to haṣinṣan mẹdetiti tọn mítọn lẹ mẹ gbọn?

◻ Nawẹ mí sọgan do jlẹkaji-ninọ hia to nukunpipedo azọngban whẹndo tọn mítọn lẹ go gbọn?

◻ Naegbọn mẹjitọ lẹ dona tindo ojlo to wepinplọn agbasa tọn ovi yetọn lẹ tọn mẹ?

◻ Nuplọnmẹ tẹwẹ mí plọn sọn Baluki po Jona po dè?

[Yẹdide to weda 9]

To whenuena asu po asi po de yinuwahẹ ode awetọ yetọn to aliho agọ̀ mẹ, yé nọ dè haṣinṣan yetọn hẹ Jehovah pò

[Yẹdide to weda 11]

Mẹjitọ lẹ dona tindo ojlo to wepinplọn ovi yetọn lẹ tọn mẹ