Aṣli 2

Dapana Ayilinlẹn lọ Nado Nọ Yí Dewe Jlẹdo Mẹdevo lẹ Go

ETẸWẸ BIBLU PLỌN MÍ? ‘Nọ dindona azọ́n dewetiti tọn, podọ to whenẹnu, hiẹ na tindo whẹwhinwhẹ́n nado jẹaglin gando dewetiti go, bọ e ma yin nado nọ yí dewe jlẹdo mẹdevo go gba.’—Galatianu lẹ 6:4.

ETẸWẸ NỌ HẸN NUHAHUN LỌ WÁ? Mí nọ tindo mẹwhinwhàn lọ nado yí míde jlẹdo mẹdevo lẹ go—to whedelẹnu, do mẹhe ma tindo onú sọ mí lẹ go, podọ whlasusu do mẹhe tindo huhlọn, adọkun, kavi nugopipe hugan mí lẹ go. Depope he whẹho lọ yin, kọdetọn lọ nọ ylan. Mí nọ gbọn nuṣiwa dali lẹndọ nuhe mẹde tindo kavi nuhe e sọgan wà wẹ nọ do e hia taidi mẹjọmẹ. Mí sọgan sọ nọ whànwu nutindo mẹdevo lẹ tọn kavi wleawuna gbigbọ agbàwhinwhlẹn tọn.—Yẹwhehodọtọ 4:4.

ETẸWẸ HIẸ SỌGAN WÀ? Tẹnpọn nado nọ pọ́n dewe hlan dile Jiwheyẹwhe nọ wà do. Dike pọndohlan etọn ni nọ yinuwado lehe hiẹ nọ pọ́n dewe do ji. “Gbẹtọ nọ to awusọhia gbonu go tọn dali pọ́n, ṣigba ayiha pọ́n wẹ OKLUNỌ te.” (1 Samuẹli 16:7) Jehovaha ma nọ yí we jlẹdo mẹdevo lẹ go nado yọ́n lehe hiẹ họakuẹ sọ gba, kakatimọ e nọ mọ nuhe tin to ahun towe mẹ, bo nọ gbeje linlẹn, numọtolanmẹ po ayilinlẹn towe lẹ po pọ́n. (Heblu lẹ 4:12, 13) Jehovah yọ́n dogbó towe lẹ bosọ jlo dọ hiẹ lọsu ni nọ kẹalọyi yé ga. Eyin hiẹ nọ yí dewe jlẹdo mẹdevo lẹ go, a na wá lẹzun saklanọ kavi mẹhe ma nọ tindo pekọ gbede. Enẹwutu, nọ gbọn whiwhẹ dali kẹalọyi dọ hiẹ ma sọgan pegan to onú lẹpo mẹ.—Howhinwhẹn lẹ 11:2.

Na taun tọn, etẹwẹ hiẹ sọgan wà nado họakuẹ to nukun Jiwheyẹwhe tọn mẹ? E gbọdo yẹwhegán Mika nado wlan dọmọ: “Hiẹ dawe, ewọ ko do nuhe yin dagbe hia we; podọ etẹwẹ OKLUNỌ to kinkanbiọ sọn dè we, adavo nado nọ yí nugbo do wà, podọ nado yiwanna lẹblanu, podọ nado nọ yí whiwhẹ do zinzọnlin po Jiwheyẹwhe towe po.” (Mika 6:8) Eyin hiẹ hodo ayinamẹ enẹ, Jiwheyẹwhe na penukundo gowe. (1 Pita 5:6, 7) Be e ma yin whẹwhinwhẹ́n titengbe hugan de niyẹn nado tindo pekọ ya?

[Nudọnamẹ odò tọn]

[Yẹdide to weda 5]

Nuhe tin to ahun mítọn mẹ wẹ Jehovah nọ pọ́n nado yọ́n lehe mí họakuẹ do