Be A Ko “Wleawufo Nado Setonu” Ya?

 1. Etẹwutu e gán nọ vẹawuna mí nado setonu?

BE E ko vẹawuna we pọ́n nado setonu ya? Enẹ jọ do Ahọlu Davidi go, enẹwutu e hodẹ̀ na Jiwheyẹwhe dọmọ: “Fọ́n ojlo lọ dote to yẹn mẹ nado nọ setonuna we.” (Salm. 51:12) Davidi yiwanna Jehovah. Etomọṣo, e vẹawuna ẹn to whedelẹnu nado setonu, podọ nuhe nọ jọ do mílọsu go niyẹn. Etẹwutu? Tintan, mí ko dugu tolivivẹ tọn. Awetọ, Satani to vivẹnudo klinkán-klinkán nado sisẹ́ mí na mí nido ṣiatẹ dile ewọ lọsu ko wà do. (2 Kọl. 11:3) Atọ̀ntọ, gbigbọ atẹṣiṣi tọn aihọn ehe tọn wẹ lẹdo mí pé, “yèdọ gbigbọ he to nuyiwa todin to tolivẹtọ lẹ mẹ.” (Efe. 2:2) Gbọnvona dọ mí dona wazọ́n sinsinyẹn nado diahi hẹ ayilinlẹn ylando tọn mítọn, mí sọ dona nọavùnte sọta kọgbidinamẹ Lẹgba po aihọn ehe po tọn he nọ sisẹ́ mí nado vẹtoli. Mí dona dovivẹnu sinsinyẹn nado setonuna Jehovah po mẹhe ewọ ko de do otẹn aṣẹpipa tọn mẹ lẹ po.

 2. Etẹwẹ e zẹẹmẹdo nado “wleawufo nado setonu”? (Jakọbu 3:17)

² Hia Jakọbu 3:17. Jakọbu kàn to gbọdo glọ dọ nuyọnẹntọ lẹ nọ “wleawufo nado setonu.” Lẹnnupọndo nuhe enẹ zẹẹmẹdo ji. Mí dona nọ to jejeji bosọ nọ wleawufo nado setonuna mẹhe Jehovah ko na aṣẹpipa jẹ obá de mẹ lẹ. Na nugbo tọn, Jehovah ma nọ donukun dọ mí ni setonuna mẹde he biọ to mí si nado dovọ́na gbedide Emitọn lẹ.—Owalọ 4:18-20.

 3. Naegbọn e do yin nujọnu to nukun Jehovah tọn mẹ dọ mí ni nọ setonuna mẹhe tindo aṣẹpipa do mí ji lẹ?

³ Mí gán nọ mọdọ e bọawu nado setonuna Jehovah hugan gbẹtọvi de. To popolẹpo mẹ, anademẹ pipé wẹ Jehovah nọ na to whelẹponu. (Salm. 19:7) Amọ́ e ma nọ yinmọ na gbẹtọvi he do aṣẹpipa lẹ. Etomọṣo, Otọ́ olọn mẹ tọn mítọn ko na aṣẹpipa mẹjitọ, ahọluzọnwatọ po mẹho agun tọn lẹ po jẹ obá de mẹ. (Howh. 6:20; 1 Tẹs. 5:12; 1 Pita 2:13, 14) Eyin mí setonuna yé, be Jehovah wẹ mí to tonusena nugbonugbo niyẹn. Mì gbọ mí ni gbadopọnna lehe mí sọgan setonuna gbẹtọvi he Jehovah na aṣẹpipa lẹ do, eyin etlẹ nọ vẹawuna mí to whedelẹnu nado kẹalọyi anademẹ yetọn lẹ bosọ hodo yé.

 4. Naegbọn ovi susu do nọ vẹtolina mẹjitọ yetọn lẹ?

⁴ Hagbẹ he nọ saba ‘vẹtolina mẹjitọ lẹ’ wẹ lẹdo jọja mítọn lẹ. (2 Tim. 3:1, 2) Etẹwutu wẹ susu yetọn do nọ vẹtoli? Delẹ to yé mẹ nọ mọdọ mẹjitọ emitọn lẹ yin yẹnuwatọ. Mẹjitọ delẹ nọ donukun dọ ovi lẹ ni wà nuhe yelọsu ma nọ wà. Ovi devo lẹ nọ mọdọ ayinamẹ mẹjitọ emitọn lẹ tọn masọ yọ́n-na-yizan ba kavi nọ glọnalinamẹ zẹjlẹgo. Eyin jọja de wẹ a yin, be e ko ṣí mọ na we pọ́n ya? Mẹsusu wẹ e nọ vẹawuna nado setonuna gbedide Jehovah tọn lọ he dọ dọ: “Mì nọ setonuna mẹjitọ mìtọn lẹ to kọndopọ mẹ hẹ Oklunọ, na ehe wẹ dodo.” (Efe. 6:1) Etẹwẹ gán gọalọna mì nado wàmọ?

 5. Sọgbe hẹ nuhe Luku 2:46-52 dọ, naegbọn e do jẹna ayidego dọ Jesu setonuna mẹjitọ etọn lẹ?

⁵ Mì gán plọn tonusise sọn apajlẹnọ dagbe hugan lọ dè, enẹ wẹ Jesu. (1 Pita 2:21-24) Gbẹtọ pipé wẹ e yin, amọ́ bo ka tindo mẹjitọ mapenọ lẹ. Ṣogan, Jesu gbògbéna mẹjitọ etọn lẹ etlẹ yin to whenue yé ṣinuwa, bo masọ mọnukunnujẹ nuyiwa etọn lẹ mẹ to whedelẹnu. (Eks. 20:12) Lẹnnupọndo nuhe jọ whenue Jesu do owhe 12 ji. (Hia Luku 2:46-52.) Mẹjitọ etọn lẹ jo e do Jelusalẹm. To popolẹpo mẹ, azọngban Josẹfu po Malia po tọn wẹ nado hẹn ẹn diun dọ ovi yetọn lẹpo to pipli mẹhe zingbejizọnlin lẹkọ sọn hùnwhẹ lọ tẹnmẹ lẹ tọn mẹ. Whenue Josẹfu po Malia po wá mọ Jesu to godo mẹ, Malia dowhẹ Jesu na e gbọṣi Jelusalẹm wutu! Jesu gán ko dohia dọ enẹ ma sọgbe. Kakatimọ, e gblọnho na mẹjitọ etọn lẹ to aliho he bọawu bosọ do sisi hia de mẹ. Amọ́ Josẹfu po Malia po “ma mọnukunnujẹ nuhe e to didọna yé lọ mẹ.” Ṣogan, Jesu “to mẹmẹglọ yin hlan yé zọnmii.”

6, 7. Etẹwẹ gán gọalọna jọja lẹ nado setonuna mẹjitọ yetọn lẹ?

⁶ Jọja lẹ emi, be e ko vẹawuna mì pọ́n nado setonuna mẹjitọ mìtọn lẹ to whenue yé ṣinuwa kavi ma mọnukunnujẹ nuyiwa mìtọn lẹ mẹ ya? Etẹwẹ gán gọalọna mì? Jẹnukọn whẹ́, mì nọ lẹnnupọndo numọtolanmẹ Jehovah tọn ji. Biblu dọ dọ eyin mì setonuna mẹjitọ mìtọn lẹ, “ehe wẹ nọ hẹn homẹ Oklunọ tọn hùn.” (Kol. 3:20) Jehovah nọ yọnẹn eyin mẹjitọ mìtọn lẹ ma mọnukunnujẹ mì go to gigọ́ mẹ, kavi whenue yé dosẹ́n he taidi nuhe ma sọgbe lẹ. Amọ́, eyin mì de nado setonuna yé mahopọnna ninọmẹ lọ, mì na hẹn homẹ etọn hùn.

⁷ Awetọ, mì lẹnnupọndo numọtolanmẹ mẹjitọ mìtọn lẹ tọn ji. Eyin mì setonuna mẹjitọ mìtọn lẹ, homẹ yetọn nọ hùn, bọ yé nasọ dejido mì go dogọ. (Howh. 23:22-25) Ayihaawe ma tin dọ mì nasọ dọnsẹpọ yé dogọ. Mẹmẹsunnu de he wá sọn Belgique bo nọ yin Alexandre dọ dọ: “Haṣinṣan he n’do hẹ mẹjitọ ṣie lẹ pọnte whenue n’jẹ tonusena nubiọtomẹsi yetọn lẹ ji dogọ. Mí vẹ́ bosọ do ayajẹ dogọ.”b Atọ̀ntọ, mì lẹnnupọndo lehe tonusise todin na wá gọalọna mì to sọgodo do ji. Paulo he nọ nọ̀ Brésil dọ dọ “Pinplọn nado setonuna mẹjitọ ṣie lẹ ko gọalọna mi nado setonuna Jehovah podọ na mẹdevo he to otẹn aṣẹpipa tọn mẹ lẹ.” Ohó Jiwheyẹwhe tọn na whẹwhinwhẹ́n dolido de nado setonuna mẹjitọ mìtọn lẹ. E dọmọ: “Na e nido yin dagbe na we bọ hiẹ nado nọgbẹ̀ dẹn to aigba ji.”—Efe. 6:2, 3.

 8. Etẹwutu jọja susu nọ desọn ojlo mẹ nado setonuna mẹjitọ yetọn lẹ?

⁸ Jọja susu lẹ wẹ ko mọdọ nulẹ yì do ganji na yé whenue yé setonu. Luiza he wá sọn Brésil ga mọ to tintan whenu dọ e vẹawu nado mọnukunnujẹ nuhewutu mẹjitọ etọn lẹ ma kẹalọyi dọ e ni do alokan apomẹ tọn na ojlẹ de mẹ. To popolẹpo mẹ, e mọdọ suhugan mẹhe do owhe etọn nkọ lẹ tọn wẹ do alokan. Amọ́ na taun tọn, e wá mọ to enẹgodo dọ hihọ́-basina emi wẹ mẹjitọ emitọn lẹ te. Todin, e dọmọ: “N’yọnẹn dọ n’ma dona nọ pọ́n tonusisena mẹjitọ ṣie lẹ hlan taidi aliglọnnamẹnu de, na ayinamẹ yetọn wẹ nuhe sin hudo n’do pẹẹ.” E gbẹ́ nọ vẹawuna Elizabeth, yèdọ mẹmẹyọnnu jọja de he wá sọn États-Unis nado setonuna mẹjitọ etọn lẹ to whedelẹnu. E dọmọ: “Eyin n’ma mọnukunnujẹ nuhewutu mẹjitọ ṣie lẹ do dó osẹ́n de mẹ to gigọ́ mẹ, n’nọ flin ojlẹ he mẹ osẹ́n yetọn lẹ ko basi hihọ́na mi te lẹ.” Monica he nọ nọ̀ Arménie dọ dọ nulẹ nọ yì do ganji na emi whedepopenu he emi setonuna mẹjitọ emitọn lẹ hugan whenue emi vẹtolina yé.

 9. Etẹwẹ mẹsusu nọ lẹn gando tonusisena osẹ́n go?

⁹ Mẹsusu lẹ wẹ kẹalọyi dọ mí do hudo aṣẹpatọ lẹ tọn bosọ dona nọ setonuna e whè gbau osẹ́n he “aṣẹpipa daho lẹ” zedai delẹ. (Lom. 13:1) Amọ́, omẹ enẹlẹ dopolọ gán nọ whleawu nado setonuna osẹ́n de he yé mọdọ e ma sọgbe kavi he taidi nuhe nọ biọ nususu gbau to yé si. Di apajlẹ, pọ́n whẹho tòkuẹ-súsú tọn. Sọha yinanu de dohia dọ to otò Europe tọn de mẹ, mado-ẹnẹ mẹhe yè kanhose lẹ tọn wẹ lẹndọ “nude ma ylan to e mẹ ma nado sú tòkuẹ eyin a mọdọ e ma sọgbe.” Abajọ tòvi otò enẹ tọn lẹ ma nọ sú tòkuẹ he aṣẹpipa lọ nọ biọ to yé si lẹpo.

10. Naegbọn mí nọ setonuna osẹ́n he ma tlẹ nọ jẹ mítọn ji lẹ?

¹⁰ Biblu dohia dọ gandudu gbẹtọvi tọn lẹ nọ hẹn awufiẹsa wá, dọ yé to anademẹ Satani tọn glọ bo nasọ yin vivasudo to madẹnmẹ. (Salm. 110:5, 6; Yẹwh. 8:9; Luku 4:5, 6) E sọ dọna mí dọ “mẹdepope he jẹagọdo aṣẹpipa ko diọnukunsọ tito Jiwheyẹwhe tọn.” Todin whẹ́, Jehovah na dotẹnmẹ aṣẹpipa daho lẹ nado dugán na nulẹ nido nọ titoji, podọ e nọ donukun dọ mí ni setonuna yé. Enẹwutu, mí dona “nọ na mẹdopodopo nuhe e jẹna,” ehe bẹ tòkuẹ, sisi po tonusise po hẹn. (Lom. 13:1-7) Mí gán nọ mọdọ osẹ́n de ma yin dandan, ma sọgbe kavi dọ e nọ vẹawu nado hodo. Amọ́, mí nọ setonuna Jehovah, podọ e biọ to mí si nado setonuna aṣẹpipa enẹlẹ dile e na dẹnsọ bọ nuhe yé biọ to mí si lẹ ma gbà osẹ́n etọn lẹ.—Owalọ 5:29.

11, 12. Dile Luku 2:1-6 dọ do, etẹwẹ Josẹfu po Malia po wà nado setonuna osẹ́n he vẹawu de, podọ kọdetọn tẹlẹ wẹ enẹ hẹnwa? (Sọ pọ́n yẹdide lọ lẹ.)

¹¹ Mí gán plọnnu sọn apajlẹ Josẹfu po Malia po tọn mẹ, mẹhe wleawufo nado setonuna aṣẹpipa daho lẹ etlẹ yin to whenue mọwiwà ma bọawu. (Hia Luku 2:1-6.) Whenue ohò Malia tọn ko dibla pé osun ṣinẹnẹ, tonusise ewọ po Josẹfu po tọn yin whiwhlepọn. Ahọluigbagán Lomu tọn Augusti biọ to tòvi etọn lẹ si nado yì ze yinkọ dai. Josẹfu po Malia po dona yì Bẹtlẹhẹm, yèdọ gbejizọnlin de he dẹn na nudi kilomẹtlu 150 gbọn lẹdo osó lẹ tọn de mẹ. Gbejizọnlin enẹ ma na ko bọawu paali, titengbe na Malia. Asu po asi po lọ gán ko hanú gando hihọ́ Malia gọna viyẹyẹ he ma ko yin jiji lọ tọn go. Bọ eyin vinú ka jẹ wiwà ẹ ji whenue yé to aliji lo? Mẹsia he Jehovah dopagbe etọn lọ wẹ to ohò etọn mẹ. Be ehe na glọnalina yé nado setonuna osẹ́n gandudu lọ tọn wẹ ya?

¹² Josẹfu po Malia po ma dike na depope to ahunmẹdunamẹnu enẹlẹ mẹ ni magbe eyin vlavo yé na setonuna osẹ́n lọ kavi lala. Jehovah dona tonusise yetọn. Malia jẹ Bẹtlẹhẹm awuyẹyẹ afọyẹyẹ, e ji viyẹyẹ he to jogún-jogún de bo tlẹ sọ yí adà de wà nado hẹn dọdai Biblu tọn de di!—Mika 5:2.

13. Nawẹ tonusise mítọn gán yinuwado mẹmẹsunnu mítọn lẹ ji gbọn?

¹³ Eyin mí setonuna aṣẹpipa daho lẹ, e nọ wà dagbe na mílọsu po mẹdevo lẹ po. Gbọnna? Whẹwhinwhẹ́n dopo wẹ yindọ mí nọ dapana osẹ́n-bá he nọ hò mẹhe nọ vẹtolina osẹ́n lẹ. (Lom. 13:4) Tonusise mítọn gán yinuwado nukun he aṣẹpatọ lẹ nọ yí do pọ́n Kunnudetọ Jehovah tọn lẹ to pọmẹ ji. Di apajlẹ, to owhe susu lẹ die to Nigéria, awhànfuntọ lẹ biọ Plitẹnhọ Ahọluduta tọn de mẹ to opli de whenu bo to gufọntọ he to agọjẹdo tòkuẹ-súsú lẹ dín. Amọ́ awhàngán lọ biọ to awhànfuntọ lẹ si nado tọ́n sọn Plitẹnhọ lọ mẹ bo dọmọ: “Kunnudetọ Jehovah tọn lẹ ma nọ jẹagọdo tòkuẹ-súsú.” Whedepopenu he a setonuna osẹ́n, a gán yidogọna yinkọ dagbe omẹ Jehovah tọn lẹ tọn, yèdọ yinkọ dagbe de he gán gọalọ to gbèdopo nado basi hihọ́na yisenọ hatọ towe lẹ.—Mat. 5:16.

14. Etẹwẹ gọalọna mẹmẹyọnnu de bọ e wá ‘wleawufo nado setonuna’ aṣẹpipa daho lẹ?

¹⁴ Etomọṣo, e gán nọma nọ bọawuna mí to whelẹponu nado setonuna aṣẹpipa daho lẹ. Mẹmẹyọnnu de to États-Unis he nọ yin Joanna yigbe dọmọ: “To dai, e nọ vẹawuna mi taun nado setonu, na hagbẹ whẹndo tọn ṣie delẹ ko jiya mawadodo tọn to alọ aṣẹpatọ lẹ tọn mẹ wutu.” Amọ́ Joanna desọn ojlo mẹ bo dovivẹnu nado diọ pọndohlan etọn. Jẹnukọn whẹ́, e masọ nọ hia nudọnamẹ he nọ yin zizedo nọtẹn gbẹdido Intẹnẹt ji tọn ji he nọ fọ́n numọtolanmẹ agọ̀ dote gando aṣẹpatọ lẹ go ba. (Howh. 20:3) Awetọ, e biọ to odẹ̀ mẹ dọ Jehovah ni gọalọna emi nado nọ dejido ewọ go kakati ni yin do gandudu gbẹtọvi tọn didiọ go. (Salm. 9:9, 10) Atọ̀ntọ, e hia hosọ he dọho gando kadaninọ go to owe mítọn lẹ mẹ. (Joh. 17:16) Joanna nọ dọ todin dọ sisi didohia aṣẹpatọ lẹ gọna tonusisena yé ko gọalọna emi nado do “jijọho he mayọnjlẹ de.”

15. Naegbọn e gán nọ vẹawuna mí nado setonuna anademẹ he wá sọn titobasinanu Jehovah tọn dè lẹ?

¹⁵ Jehovah biọ to mí si nado “nọ setonuna mẹhe to anadenanu” to agun mẹ lẹ. (Heb. 13:17) Dile etlẹ yindọ Nukọntọ mítọn Jesu yin mẹpipé, e ma yin mọ na mẹhe e nọ yizan nado deanananu to aigba ji fi lẹ. E gán nọ vẹawuna mí nado setonuna yé titengbe eyin yé biọ to mí si nado wà nude he mí ma jlo na wà. To gbèdopo, apọsteli Pita whleawu nado setonu. Whenue angẹli de degbena ẹn nado dù kanlin he yin mawé to Osẹ́n Mose tọn glọ lẹ, Pita gbẹ́ e ma yin whladopo poun amọ́ whla atọ̀n! (Owalọ 10:9-16) Etẹwutu? Anademẹ yọyọ ehe ma sọgbe to nukun etọn mẹ. Aliho devo mẹ wẹ e ko nọ wà nulẹ te dai. Eyin e vẹawuna Pita nado setonuna anademẹ he wá sọn angẹli pipé de dè, nẹmunẹmu wẹ e ma na vẹawuna mí nado setonuna anademẹ he wá sọn sunnu mapenọ lẹ dè!

16. Mahopọnna dọ apọsteli Paulu gán ko mọdọ anademẹ he emi mọyi lọ ma sọgbe, etẹwẹ e wà? (Owalọ lẹ 21:23, 24, 26)

¹⁶ Apọsteli Paulu “wleawufo nado setonu,” etlẹ yin to whenue e mọ anademẹ de yí he e gán ko mọdọ e ma sọgbe hẹ lẹnpọn dagbe. Klistiani Ju lẹ ko sè yèdọ-yèdọ susu lẹ gando Paulu go, enẹ wẹ hodidọ delẹ he dohia dọ e to “atẹṣiṣi sọta Mose” plọn mẹlẹ bo masọ nọ do sisi na Osẹ́n Mose tọn. (Owalọ 21:21) Sunnu mẹho he to agun Jelusalẹm tọn mẹ lẹ na anademẹ Paulu nado plan dawe ẹnẹ delẹ yì tẹmpli mẹ bosọ klọ ede wé to aṣa-liho nado dohia dọ emi nọ yìn Osẹ́n Mose tọn. Amọ́ Paulu yọnẹn dọ Klistiani lẹ masọ to Osẹ́n lọ glọ ba. Podọ e ma wà nudepope yindo. Etomọṣo, Paulu ma whleawu. E “plan sunnu lọ lẹ to azán awetọ gbè bọ ewọ po yé po klọ́ yede wé to aṣa-liho.” (Hia Owalọ lẹ 21:23, 24, 26.) Tonusise Paulu tọn yidogọna pọninọ.—Lom. 14:19, 21.

17. Etẹwẹ a plọn sọn apajlẹ Stephanie tọn mẹ?

¹⁷ E vẹawuna mẹmẹyọnnu de he nọ yin Stephanie nado kẹalọyi nudide he mẹmẹsunnu he to anadenanu to otò etọn mẹ lẹ basi. Ewọ po asu etọn po to sinsẹ̀n po ayajẹ po to kándo jonọgbè tọn de mẹ. Enẹgodo, wekantẹn alahọ tọn sú kándo lọ bọ asu po asi po lọ wá yin azọ́ndena do agun he nọ do anọ́nu-gbè yetọn de mẹ. Stephanie yigbe dọmọ: “E vẹna mi taun. N’ma lẹndọ nuhudo sù to anọ́nu-gbè mítọn mẹ.” Etomọṣo, e de nado nọgodona anademẹ yọyọ lọ. E dọmọ: “To nukọn mẹ, n’wá mọdọ nudide nuyọnẹn tọn wẹ yé basi. Mí ko lẹzun mẹjitọ gbigbọmẹ tọn na mẹsusu lẹ to agun lọ mẹ, yèdọ mẹhe hagbẹ whẹndo tọn yetọn de ma to nugbo lọ mẹ lẹ. N’to nuplọn hẹ mẹmẹyọnnu de he ko gbọjọ wayi bo ṣẹṣẹ gọ̀ nuwiwa gbigbọmẹ tọn lẹ bẹ. Podọ todin, n’nọ mọ whenu dogọ na oplọn mẹdetiti tọn ṣie.” E yidogọ dọ, “N’do ayihadawhẹnamẹnu he wé de, na n’yọnẹn dọ n’ko wà nuhe go n’pé lẹpo nado setonu.”

18. Nawẹ tonusise nọ hẹn ale wá na mí gbọn?

¹⁸ Mí gán plọn nado setonu. Jesu “plọn tonusise,” e ma yin to ninọmẹ dagbe hugan lẹ mẹ, amọ́ “sọn nuhe e jiya etọn lẹ mẹ.” (Heb. 5:8) Taidi Jesu, mí nọ saba plọn tonusise to ninọmẹ he vẹawu taun lẹ mẹ. Di apajlẹ, to bẹjẹeji COVID-19 tọn, to whenue e yin bibiọ to mí si nado doalọtena opli lẹ yìyì to Plitẹnhọ Ahọluduta tọn lẹ mẹ gọna lizọnyizọn whédegbè jẹ whédegbè tọn mítọn, be e vẹawuna we nado setonu wẹ ya? Ṣogan tonusise towe basi hihọ́na we, kọ̀n we dopọ hẹ yisenọ hatọ towe lẹ bosọ hẹn homẹ Jehovah tọn hùn. Mímẹpo wẹ ko wleawu dogọ todin nado setonuna anademẹ depope he mí na mọyi to nukunbibia daho lọ whenu lẹ. Mọwiwà gán whlẹn ogbẹ̀ mítọn!—Jobu 36:11.

19. Naegbọn a do jlo nado nọ setonu?

¹⁹ Mí ko mọdọ tonusise nọ hẹn dona mayọnjlẹ lẹ wá. Amọ́ whẹwhinwhẹ́n tintan he wutu mí do de nado setonuna Jehovah wẹ yindọ mí yiwanna ẹn bosọ nọ jlo na hẹn homẹ etọn hùn. (1 Joh. 5:3) Mí ma gán suahọ Jehovah na nuhe e ko wà na mí lẹpo pọ́n gbede. (Salm. 116:12) Amọ́ mí gán setonuna ewọ po mẹhe tindo aṣẹpipa do mí ji lẹ po. Eyin mí setonu, mí nọ dohia dọ mí yin nuyọnẹntọ. Podọ, nuyọnẹntọ lẹ wẹ nọ hẹn homẹ Jehovah tọn hùn.—Howh. 27:11.