Kanbiọ lẹ sọn Wehiatọ lẹ Dè

Kọlọsinu lẹ 1:16 dọ gando Visunnu Jiwheyẹwhe tọn go dọ “gbọn e dè wẹ yè dá onú lẹpo, podọ na ewọ.” Aliho tẹ mẹ wẹ onú lẹpo yin didá “na” Jesu, Visunnu Jiwheyẹwhe tọn te?

Jehovah yí Visunnu dopo akàn etọn zan taidi azọ́nwatọgan to onú lẹpo didá mẹ, enẹwẹ, onú devo lẹpo gbọnvona Jesu lọsu. (Howhinwhẹn lẹ 8:​27-30; Johanu 1:3) Po gbesisọ po, Visunnu lọ hùnhomẹ to azọ́n ehelẹ mẹ, podọ to linlẹn ehe mẹ wẹ yé yin “na” ewọ te.

Mí yọnẹn dọ mẹjitọ lẹ nọ donukun, bo nọ saba hùnhomẹ susu to visunnu po viyọnnu he yé ji lẹ po mẹ. Enẹwutu wẹ howhinwhẹn Biblu tọn lọ do dọho gando ‘visunnu he go homẹ otọ́ etọn tọn hùn do’ go. (Howhinwhẹn lẹ 3:12; 29:17) Mọdopolọ, Jehovah nọ hùnhomẹ to Islaeli mẹ to whenuena omẹ etọn lẹ yin nugbonọ. (Psalm 44:3; 119:108; 147:11) E sọ nọ hùnhomẹ to nugbonọ-yinyin devizọnwatọ etọn lẹ tọn mẹ kakajẹ egbehe.​—Howhinwhẹn lẹ 12:22; Heblu lẹ 10:38.

Gbọnmọ dali, e sọgbe dọ Jiwheyẹwhe ni dike azọ́nwatọgbẹ́ etọn, Jesu, ni hùnhomẹ to nuhe e wadotana lẹ mẹ. Na nugbo tọn, Howhinwhẹn lẹ 8:31 dọ dọ Visunnu lọ ‘to ayajẹ to aigba he nọ de sinsẹ́n tọ́n etọn mẹ, bọ homẹhunhun etọn sọ tin to ovi gbẹtọ tọn lẹ mẹ.’ To linlẹn ehe mẹ wẹ Kọlọsinu lẹ 1:16 dọ dọ ‘Onú devo lẹpo ko yin didá gbọn ewọ gblamẹ podọ na ewọ te.’