Nawẹ Whẹndo Towe Gán Do Ayajẹ Gbọn?—Apá 1

Alọwlemẹ yọyọ lẹ nọ donukun dọ numọtolanmẹ ayajẹ tọn he yé tindo to alọwle-zan yetọn gbè na nọ mọ kakadoi. Enẹ ka yọnbasi nugbo. Asu po asi po Klistiani he wlealọ sọn ojlẹ dindẹn die bosọ to vivẹnudo nado yí ayinamẹ Biblu tọn lẹ do yizan mẹ lẹ sọgan dekunnu dọ enẹ yọnbasi.

1. Ayinamẹ tẹwẹ Biblu na asu lẹ?

Jehovah ko deazọ́nna asu dopodopo taidi tatọ́ whẹndo tọn. (Hia Efesunu lẹ 5:23.) Jehovah nọ donukun dọ asu de ni nọ basi nudide he na hẹn ale wá na whẹndo etọn lẹ. Biblu na ayinamẹ asu lẹ dọmọ: “Mì nọ yiwanna asi mìtọn.” (Efesunu lẹ 5:25) Etẹwẹ enẹ zẹẹmẹdo? Asu owanyinọ de nọ yinuwa hẹ asi etọn po yẹyi po, vlavo to whenue yé to yedeṣo kavi tin topọ hẹ mẹdevo lẹ. E nọ basi hihọ́na asi etọn sọn nuhe na hẹn awugble wá na ẹn lẹ si, bosọ nọ wà nuhe go e pé lẹpo nado hẹn ayajẹ wá na ẹn podọ nado penukundo nuhudo etọn lẹ go. (1 Timoti 5:8) Hú popolẹpo, e nọ gọalọna asi etọn nado wleawuna haṣinṣan pẹkipẹki de hẹ Jehovah. (Matiu 4:4) Di apajlẹ, e sọgan nọ hodẹ̀ bosọ nọ hia Biblu hẹ asi etọn. Eyin asu de nọ yí owanyi do penukundo asi etọn go, ewọ lọsu nọ tindo haṣinṣan dagbe de hẹ Jehovah.—Hia 1 Pita 3:7.

2. Ayinamẹ tẹwẹ Biblu na asi lẹ?

Ohó Jiwheyẹwhe tọn dọ dọ asi de “dona tindo sisi sisosiso na asu etọn.” (Efesunu lẹ 5:33) Nawẹ asi de sọgan wà ehe gbọn? E sọgan nọ lẹnnupọndo jẹhẹnu dagbe asu etọn tọn lẹ ji, gọna vivẹnu he do asu lọ te nado penukundo ewọ po ovi yetọn lẹ po go. Asi de sọgan sọ dohia dọ emi do sisi eyin e nọ nọgodona nudide asu etọn tọn lẹ, nọ dọhona ẹn to aliho he jọmẹ mẹ bosọ nọ dọho etọn dagbe to mẹdevo lẹ dè, eyin asu lọ ma tlẹ nọ sẹ̀n Jehovah.

3. Nawẹ asu po asi po de sọgan hẹn alọwle yetọn lodo gbọn?

Biblu dọ gando asu po asi po he wlealọ lẹ go dọmọ: “Yé omẹ awe lẹ na lẹzun agbasalan dopo.” (Matiu 19:5) Ehe zẹẹmẹdo dọ yé dona dovivẹnu sinsinyẹn nado nọavùnte sọta nuhe gán hẹn gbemanọpọ kavi kinklan wá lẹpo. Ehe sọgan pà yé eyin yé nọ yí whenu zan dopọ whẹwhẹ, bosọ nọ yí ahundopo po owanyi po do dọ linlẹn po numọtolanmẹ yetọn lẹ po na ode awetọ. Gbọnvona Jehovah, yé ma nọ na dotẹnmẹ nudevo depope kavi mẹdepope nado yin nujọnu na yé sọ alọwlemẹ yetọn. Podọ yé nọ nọ̀ aṣeji taun ma nado wleawuna haṣinṣan he ma sọgbe de hẹ mẹdevo depope.

DINDONANU DOGỌ

4. Asu lẹ emi—mì nọ yiwanna asi mìtọn bo nọ wlebòna ẹn ganji

VIDEO: Asu lẹ Emi, Mì Nọ Yiwanna Asi Mìtọn Di Mìde (9:53)

• Aliho tẹlẹ mẹ wẹ asu de sọgan nọ dohia te dọ emi yiwanna asi emitọn bosọ nọ penukundego?

Hia Kolosinu lẹ 3:12, enẹgodo dọhodo kanbiọ ehe ji:

• Nawẹ asu de sọgan nọ do jẹhẹnu ehelẹ hia to alọwle etọn mẹ gbọn?

5. Asi lẹ emi—mì nọ yiwanna asu mìtọn bosọ nọ do sisi hia ẹ

Biblu na ayinamẹ dọ asi de dona nọ na sisi asu etọn, vlavo asu lọ nọ sẹ̀n Jehovah kavi lala. Hia 1 Pita 3:1, 2, enẹgodo dọhodo kanbiọ ehelẹ ji:

• Eyin asu towe ma nọ sẹ̀n Jehovah, ayihaawe ma tin dọ ojlo towe wẹ yindọ ni wá jẹ mọwà ji. Detẹ to aliho he bọdego ehelẹ mẹ wẹ a lẹndọ e sọgan yinuwadeji hugan—yẹwhehodidọ na ẹn mapote wẹ ya kavi walọyizan dagbe towe po sisi sisosiso didohia po? Naegbọn a do lẹnmọ?

Asu po asi po lẹ sọgan nọ basi nudide dagbe lẹ dopọ. Ṣigba to whedelẹnu, e sọgan wá jọ bọ asi de ma na kọngbedopọ hẹ asu etọn. To whenẹnu, e sọgan yiagbọji bo yí sisi do dọ linlẹn etọn tọ́n, amọ́ e dona flindọ asu etọn wẹ Jehovah deazọ́nna nado nọ basi nudide nuhe na wà dagbe hugan na whẹndo lọ tọn. Asi lọ dona wà nuhe go e pé lẹpo nado nọgodona nudide asu etọn tọn. Gbọnmọ dali, e na yidogọna ayajẹ whẹndo lọ tọn. Hia 1 Pita 3:3-5, enẹgodo dọhodo kanbiọ ehe ji:

• Numọtolanmẹ tẹwẹ Jehovah nọ tindo eyin asi de nọ do sisi hia asu etọn?

6. A sọgan duto nuhahun he nọ fọ́n to alọwle towe mẹ lẹ ji

VIDEO: Lehe Yè Nọ Hẹn Kanṣiṣa Alọwle Tọn Lodo Do (5:44)

• To video lọ mẹ, etẹlẹ wẹ dohia dọ kanṣiṣa asu po asi po lọ tọn masọ ló sọmọ ba?

• Afọdide tẹlẹ wẹ yé ze nado vọ́ alọwle yetọn hẹn lodo?

Hia 1 Kọlintinu lẹ 10:24 po Kolosinu lẹ 3:13 po. To wefọ dopodopo hihia godo, dọhodo kanbiọ ehe ji:

• Nawẹ wefọ ehe yíyí-do-yizan mẹ sọgan gọalọ nado hẹn alọwle de lodo gbọn?

Biblu dọ dọ mí dona nọ gbògbéna ode awetọ. Gbégbò didohia mẹde nọ biọ dọ yè ni yinuwa hẹ mẹlọ to aliho he jọmẹ mẹ podọ po sisi po. Hia Lomunu lẹ 12:10, enẹgodo dọhodo kanbiọ ehelẹ ji:

• Be asu kavi asi de dona nọte dọ alọwlemẹ etọn ni do gbégbò hia ẹ jẹnukọn wẹ ya? Naegbọn e ma dona yinmọ?

BLADOPỌ

Asu po asi po de sọgan do ayajẹ eyin yé nọ yiwanna ode awetọ, nọ na sisi ode awetọ bosọ nọ hodo nunọwhinnusẹ́n Biblu tọn lẹ.

Dogbapọn

• Etẹwẹ asu de sọgan wà na alọwle etọn nido do ayajẹ?

• Etẹwẹ asi de sọgan wà na alọwle etọn nido do ayajẹ?

• Eyin a ko wlealọ, nunọwhinnusẹ́n Biblu tọn tẹlẹ wẹ sọgan gọalọna we nado hẹn alọwle towe lodo?

PỌ́N NUDỌNAMẸ DEVO LẸ

Gbadopọnna ayinamẹ yọ́n-na-yizan delẹ he gán gọalọna we nado duvivi gbẹzan whẹndo ayajẹnọ de tọn.

Whẹndo Towe Sọgan Yin Ayajẹnọ (Alọnuwe)

Pọ́n video ohàn tọn de he do dona he a gán mọyi lẹ hia eyin a nọ yí ayinamẹ Jiwheyẹwhe tọn lẹ do yizan mẹ to alọwle towe mẹ.

Owanyi Nugbo 4:26)

Gbadopọnna nuhe e zẹẹmẹdo nado nọ litaina asu towe taidi tatọ́ whẹndo tọn.

“Yọnnu lẹ, Naegbọn Mì Dona Litaina Tito Tatọ́-Yinyin Tọn?” (Atọ̀họ̀-Nuhihọ́ lọ Tọn, 15 mai 2010 tọn)

Nawẹ asu po asi po de duto nuhahun sinsinyẹn lẹ ji, etlẹ yin to gbẹdai ji gbọn?

Mí Hẹn Alọwle Mítọn Lodo po Alọgọ Jiwheyẹwhe Tọn Po (5:14)