Kanbiọ lẹ sọn Wehiatọ lẹ Dè

Naegbọn Paulu do wlan gando asi Klistiani de go dọ: “Yè na whlẹn ẹn to vijiji etọn mẹ”?—1 Timoti 2:15.

Etẹwẹ lẹdo hodidọ wefọ ehe tọn dohia gando nuhe dọ Paulu te go? To gbọdo glọ, e to ayinamẹ na do adà he yọnnu Klistiani de dona yiwà to agun mẹ ji. E wlan dọmọ: “Na yọnnu lẹ ni nọ yí avọ̀ jlẹmẹjlẹmẹ do doaṣọ́na yede, po winyan po po huwhẹ̀ po; e ma yin oda biblá, kavi sika, kavi osé dagbedagbe, kavi avọ̀ akuẹgegenu sọ dogo tọn gba; ṣigba ehe jẹna yọnnu he yigbena jijọ-di-Jiwheyẹwhe tọn gbọn azọ́n dagbe lẹ mẹ.” (1 Timoti 2:9, 10) Paulu to tudohomẹna mẹmẹyọnnu Klistiani etọn lẹ nado whiwhẹ yede, bo yin jlẹkajinọ to nudide nusisọ́ tọn lẹ bibasi mẹ, bosọ yí azọ́n dagbe lẹ do “doaṣọ́na” yede.

Enẹgodo, Paulu basi zẹẹmẹ tito tatọ́-yinyin to agun mẹ tọn dọmọ: “Yẹn ma dike na yọnnu nado nọ plọnmẹ gba, kavi nado nọ degbè di ogán to sunnu ji gba, adavo ni nọ̀ abọẹ.” (1 Timoti 2:12; 1 Kọlintinu lẹ 11:3) E basi zẹẹmẹ dodonu tito ehe tọn gbọn didohia dali dọ Adam ma yin kiklọ gbọn Satani dali gba, ṣigba Evi “whenuena yè klọ ẹ, ewọ wẹ jai do sẹ́nmẹjẹ mẹ.” Nawẹ yọnnu Klistiani de sọgan yin hihọ́-basina sọn nuṣiwa Evi tọn mẹ gbọn? Paulu na gblọndo dọmọ: “Ṣigba yè na whlẹn ẹn to vijiji etọn mẹ, eyin yé gbọṣi yise owanyi walọ wiwe po huwhẹ̀ po mẹ.” (1 Timoti 2:14, 15) Etẹ dọ wẹ Paulu te?

Lẹdogbedevomẹ-basitọ delẹ de linlẹn lọ tọ́n dọ whẹpo yọnnu de na do yin whinwhlẹngán, e dona jivi dandan. Di apajlẹ, La Bible en français courant hia dọmọ: “Yọnnu na yin whinwhlẹngán gbọn ovi lẹ jiji dali.” Ṣigba, e ma sọgbe nado detana nuhe Paulu dọ to aliho ehe mẹ gba. Wefọ susu dohia dọ whẹpo mẹde na do yin whinwhlẹngán, e dona yọ́n Jehovah, yí Jesu sè, bo yí yise zan, bosọ do yise enẹ hia gbọn azọ́n lẹ dali. (Johanu 17:3; Owalọ lẹ 16:30, 31; Lomunu lẹ 10:10; Jakobu 2:26) Humọ, Paulu ma to jide na yọnnu yisenọ lẹ dọ yé na nọ jivi awuyẹyẹ afọyẹyẹ to whepoponu gba. Yọnnu susu ko lùn numimọ vijiji tọn tọ́n awuyẹyẹ afọyẹyẹ, vlavo yé yin yisenọ kavi lala. Podọ e blawu dọ mẹdelẹ, vlavo yé yin yisenọ kavi lala, ko kú to ajipanu.—Gẹnẹsisi 35:16-18.

Ayinamẹ devo he Paulu na yọnnu lẹ to nukọnmẹ to wekanhlanmẹ dopolọ mẹ gọalọna mí nado mọnukunnujẹ nuhe dọ e te mẹ. E na avase gando asuṣiọsi jọja delẹ go he yin “adidọnọ, bo nọ to dindanpe whégbè whégbè; e ma yin adidọ kẹdẹ, ṣigba hofusadọtọ, ajanmanọ, yé sọ nọ to nuhe ma jẹ dọ.” Ayinamẹ tẹwẹ Paulu na? E zindonukọn dọmọ: “Yẹn jlo dọ yọpọ yọnnu [asuṣiọsi] lẹ ni wlealọ, na yé ni jivi, na yé ni nọ pé owhé ji, yé na otẹn kẹntọ lẹ nado dọ hogblo blo.” —1 Timoti 5:13, 14.

Paulu zinnudo adà dagbe he yọnnu lẹ dona yiwà to tito whẹndo tọn mẹ ji. Yọnnu he hẹn alọnu ján to nuyiwa mọnkọtọn lẹ mẹ taidi ‘vijiji po nukunpipedo whédo go’ po, bosọ gbọṣi “yise owanyi walọ wiwe po huwhẹ̀ po mẹ” ma na yin dindọ̀n biọ walọyizan he ma nọ jlọmẹdote mẹ gba. Gbigbọnọ-yinyin etọn na yin hihọ́-basina, kavi ‘yin whinwhlẹngán’ (1 Timoti 2:15) Afọdidona nuyiwa mọnkọtọn lẹ na gọalọna yọnnu jọja susu nado dapana omọ̀ Satani tọn lẹ.

Nuhe Paulu wlan hlan Timoti flinnu mímẹpo, sunnu po yọnnu po, nado hẹn alọnu ján to aliho dagbe mẹ. Ohó Jiwheyẹwhe tọn na ayinamẹ Klistiani lẹpo dọmọ: “Mì nọ payi do zinzọnlin to jijọ pipé mẹ, e ma yin di nulunọ gba, ṣigba di nuyọnẹntọ.”—Efesunu lẹ 5:15.