NUPINPLỌN 59
A Sọgan Doakọnna Homẹkẹn
E yá wẹo kavi e dẹn wẹo, Klistiani lẹpo wẹ na pehẹ nukundiọsọmẹ, kavi tlẹ jiya homẹkẹn sinsinyẹn tọn. Be enẹ dona gbahundona mí wẹ ya?
1. Naegbọn mí nọ donukun dọ mí na yin homẹkẹndo?
Biblu dohia to aliho he họnwun mẹ dọmọ: “Mẹhe to jijlo nado nọgbẹ̀ po mẹdezejo na Jiwheyẹwhe po to kọndopọ mẹ hẹ Klisti Jesu lẹpo na yin homẹkẹndo ga.” (2 Timoti 3:12) Jesu yin homẹkẹndo na e ma yin apadewhe aihọn Satani tọn wutu. Na mílọsu lẹ ma yin apadewhe aihọn lọ tọn wutu, e ma nọ paṣa mí dọ gandudu lẹ po pipli sinsẹ̀n tọn aihọn ehe tọn lẹ po nọ dohomẹkẹn mí.—Johanu 15:18, 19.
2. Nawẹ mí sọgan wleawudai nado pehẹ homẹkẹn gbọn?
Ojlẹ lọ die nado hẹn jidide mítọn to Jehovah mẹ lodo. Nọ de whenu dovo to azán dopodopo ji nado hodẹ̀ hlan ẹn bosọ nọ hia adà de sọn Ohó etọn mẹ. Nọ yì opli agun tọn lẹ to gbesisọ mẹ. Nuwiwa ehelẹ na na we huhlọn he a tindo nuhudo etọn nado pehẹ homẹkẹn wunmẹ depope po adọgbigbo po, eyin e tlẹ yin sọn hagbẹ whẹndo tọn lẹ dè. Apọsteli Paulu he ko pehẹ homẹkẹn whlasusu wlan dọmọ: “Jehovah wẹ alọgọtọ ṣie; yẹn ma na dibu.”—Heblu lẹ 13:6.
Mí sọgan sọ hẹn adọgbigbo mítọn jideji eyin mí nọ dọyẹwheho to gbesisọ mẹ. Yẹwhehodidọ nọ gọalọna mí nado dejido Jehovah go bo duto obu gbẹtọ tọn ji. (Howhinwhẹn lẹ 29:25) Eyin a wleawuna adọgbigbo nado dọyẹwheho bẹsọn din, a na to gbesisọ mẹ nado zindonukọn to yẹwhehodidọ mẹ eyin aṣẹpatọ lẹ tlẹ doalọtena azọ́n mítọn.—1 Tẹsalonikanu lẹ 2:2.
3. Ale tẹlẹ wẹ mí nọ mọyi eyin mí doakọnna homẹkẹn?
Na nugbo tọn, homẹ mítọn ma nọ hùn eyin yè dohomẹkẹn mí, amọ́ eyin mí doakọnna bo dudeji, enẹ nọ hẹn yise mítọn lodo dogọ. Eyin mí mọ alọgọ Jehovah tọn to whenue e taidi dọ huhlọn vọ̀ do mí, ehe nọ zọ́n bọ haṣinṣan mítọn hẹ ẹ nọ sinyẹn deji. (Hia Jakọbu 1:2-4.) E nọ vẹna Jehovah eyin mí to yaji, amọ́ homẹ etọn nọ hùn eyin e mọ bọ mí to akọndonanu. Biblu dọmọ: “Eyin mì nọ doakọnna yajiji na mì to dagbe wà wutu, nuhe yin alọkẹyi to Jiwheyẹwhe dè wẹ ehe.” (1 Pita 2:20) Mẹhe hẹn nugbonọ-yinyin yetọn go lẹpo wẹ Jehovah na suahọ, bọ yé na nọgbẹ̀ kakadoi to aihọn yọyọ de mẹ fie sinsẹ̀n-bibasi nugbo lọ ma nasọ yin nukundiọsọ te ba.—Matiu 24:13.
DINDONANU DOGỌ
Gbadopọnna nuhewutu e yọnbasi nado yí nugbonọ-yinyin do tẹdo Jehovah go mahopọnna homẹkẹn, gọna ale he enẹ nọ hẹnwa lẹ.
4. A sọgan doakọnna nukundiọsọmẹ whẹndo tọn
Jesu hẹn ẹn họnwun dọ whẹndo mítọn sọgan jẹagọdo nudide he mí basi nado sẹ̀n Jehovah. Hia Matiu 10:34-36, enẹgodo dọhodo kanbiọ ehe ji:
Etẹwẹ sọgan jọ eyin hagbẹ whẹndo tọn de basi dide nado sẹ̀n Jehovah?
Nado mọ apajlẹ ehe tọn dopo, hò VIDEO lọ, enẹgodo dọhodo kanbiọ he bọdego ji.
Etẹwẹ a na wà eyin hẹnnumẹ de kavi họntọn de tẹnpọn nado glọnalina we ma nado sẹ̀n Jehovah?
Hia Salmu lẹ 27:10 gọna Malku 10:29, 30. To wefọ dopodopo hihia godo, dọhodo kanbiọ ehe ji:
Nawẹ opagbe ehe sọgan gọalọna we gbọn eyin whẹndo kavi họntọn towe lẹ diọnukunsọ we?
5. To Jehovah sẹ̀n zọnmii mahopọnna homẹkẹn
E nọ biọ adọgbigbo nado sẹ̀n Jehovah to whenue mẹdevo lẹ ma jlo dọ mí ni wàmọ. Hò VIDEO lọ, enẹgodo dọhodo kanbiọ he bọdego ji.
Nawẹ apajlẹ he to video lọ mẹ lẹ vọ́ adọgbigbo na we gbọn?
Hia Owalọ lẹ 5:27-29 gọna Heblu lẹ 10:24, 25. To wefọ dopodopo hihia godo, dọhodo kanbiọ ehe ji:
Naegbọn e do yin nujọnu nado to Jehovah sẹ̀n zọnmii eyin yẹwhehodidọ mítọn kavi opli lẹ tlẹ yin alọhẹndotena?
6. Jehovah na gọalọna we nado doakọnnanu
Kunnudetọ Jehovah tọn he wá sọn ninọmẹ voovo mẹ lẹ, yèdọ mẹho po yọpọ po wẹ ko yí nugbonọ-yinyin do zindonukọn to Jehovah sinsẹ̀n mẹ etlẹ yin to whenue yé yin homẹkẹndo. Nado mọ nuhe gọalọna yé, hò VIDEO lọ. Enẹgodo dọhodo kanbiọ he bọdego ji.
To video lọ mẹ, etẹwẹ gọalọna Kunnudetọ lọ lẹ nado doakọnnanu?
Hia Lomunu lẹ 8:35, 37-39 gọna Filipinu lẹ 4:13. To wefọ dopodopo hihia godo, dọhodo kanbiọ ehe ji:
Nawẹ wefọ ehe hẹn we deji dogọ gbọn dọ a gán doakọnna whlepọn depope?
Hia Matiu 5:10-12, enẹgodo dọhodo kanbiọ ehe ji:
Naegbọn a sọgan yin ayajẹnọ mahopọnna homẹkẹn?
Sinsẹ̀n-basitọ Jehovah tọn livi susu lẹ wẹ ko doakọnna nukundiọsọmẹ bo dudeji. Hiẹ lọsu gán dudeji ga!
MẸDELẸ NỌ DỌ DỌ: “Yẹn uwọ na yawu jogbe eyin n’pehẹ homẹkẹn.”
Wefọ tẹlẹ wẹ a lẹndọ e gán gọalọna yé nado wleawuna adọgbigbo he yé tindo nuhudo etọn?
BLADOPỌ
Jehovah nọ yọ́n pinpẹn vivẹnu he mí nọ do lẹ tọn nado sẹ̀n ẹn mahopọnna homẹkẹn. Podọ mí sọgan dudeji po alọgọ etọn po!
Dogbapọn
Naegbọn Klistiani lẹ dona donukun homẹkẹn?
Etẹwẹ a sọgan wà bẹsọn din nado wleawudai nado pehẹ homẹkẹn?
Etẹwẹ sọgan gọalọna we nado deji dọ a sọgan sẹ̀n Jehovah mahopọnna whlepọn depope?
PỌ́N NUDỌNAMẸ DEVO LẸ
Pọ́n mẹmẹsunnu jọja de he dọ lehe Jehovah gọalọna ẹn do nado doakọnnanu whenue e yin súsú do gànpamẹ na kadaninọ etọn wutu.
Gbadopọnna nuhe gọalọna asu po asi po de nado sẹ̀n Jehovah po nugbonọ-yinyin po na owhe susu mahopọnna nukundiọsọmẹ.
Pọ́n lehe a sọgan yí adọgbigbo do doakọnna homẹkẹn do.
“Wleawudai Todin Nado Pehẹ Homẹkẹn” (Atọ̀họ̀-Nuhihọ́ lọ Tọn, juillet 2019 tọn)
Pọ́n lehe mí dona nọ yinuwa do whenue hagbẹ whẹndo tọn lẹ diọnukunsọ mí, gọna lehe mí sọgan duto avùnnukundiọsọmẹnu he enẹ nọ hẹnwa lẹ ji do.
“Nugbo lọ Ma Nọ ‘Hẹn Jijọho Wá Gba, Adavo Ohí’” (Atọ̀họ̀-Nuhihọ́ lọ Tọn, octobre 2017 tọn)