Malku

10 E fọ́n sọn finẹ bo wá dogbó Jude tọn lẹ ji to Jọdani godo, gbẹtọgun lẹ sọ vọ́ pli do e dè. Dile e ko nọ wà do, e sọ jẹ nuplọn yé ji.+ 2 Falesi lẹ sọ dọnsẹpọ po linlẹn lọ po nado whlé e pọ́n bo kanse e vlavo e sọgbe hẹ osẹ́n na sunnu de nado gbẹ́ asi etọn dai.+ 3 E gblọnna yé dọmọ: “Etẹwẹ Mose degbe etọn na mì?” 4 Yé dọmọ: “Mose na dotẹnmẹ nado nọ kàn owe gbẹdai tọn de bo gbẹ́ ẹ dai.”+ 5 Ṣigba, Jesu dọna yé dọmọ: “Na ahun sinsinyẹn mìtọn wutu+ wẹ e do kàn gbedide ehe na mì.+ 6 Ṣigba, sọn bẹjẹeji nudida tọn, ‘Ewọ dá yé sunnu de yọnnu de.+ 7 Na whẹwhinwhẹ́n ehe wutu, sunnu na jo otọ́ etọn po onọ̀ etọn po do,+ 8 bọ yé omẹ awe lẹ na lẹzun agbasalan dopo,’+ sọmọ bọ yé masọ yin agbasalan awe ba, adavo dopo. 9 Enẹwutu, nuhe Jiwheyẹwhe ko kọndopọ,* mì dike mẹde klan ẹn blo.”+ 10 Whenue yé sọ vọ́ to whégbè, devi lẹ jẹ hokanse e ji gando ehe go. 11 E sọ dọna yé dọmọ: “Mẹdepope he gbẹ́ asi etọn dai bo wlealọ hẹ devo, e deayọ+ bosọ waylando sọta ẹ, 12 podọ eyin yọnnu de, to whenue e gbẹ́ asu etọn dai godo, wlealọ hẹ devo, e deayọ.”+

13 Todin, gbẹtọ lẹ jẹ yọpọvu lẹ hẹnwa e dè ji na e nido doalọ yé go, amọ́ devi lẹ gbẹnuna yé.+ 14 Whenue Jesu mọ ehe, e gblehomẹ bo dọna yé dọmọ: “Mì gbọ yọpọvu lẹ ni wá dè e; mì sọ tẹnpọn nado glọnalina yé blo, na omẹ mọnkọtọn lẹ wẹ Ahọluduta Jiwheyẹwhe tọn tin na.+ 15 Nugbo wẹ yẹn dọna mì dọ, mẹdepope he ma yí Ahọluduta Jiwheyẹwhe tọn taidi yọpọvu de ma na biọ e mẹ to aliho depope mẹ.”+ 16 E sọ bẹ ovi lẹ do awà etọn lẹ mẹ bo jẹ didona yé ji, bosọ ze alọ etọn lẹ do yé ji.+

17 Dile e to yìyì to aliji, dawe de họ̀nwezun wá bo jẹklo to nukọn etọn bosọ kanbiọ ẹ dọmọ: “Mẹplọntọ Dagbe, etẹwẹ yẹn dona wà nado dugu ogbẹ̀ madopodo tọn?”+ 18 Jesu gblọnna ẹn dọmọ: “Naegbọn hiẹ do ylọ mi dọ mẹdagbe? Mẹdepope ma yin mẹdagbe, adavo mẹdopo, yèdọ Jiwheyẹwhe.+ 19 Hiẹ yọ́n gbedide lọ lẹ he dọ: ‘Hiẹ hùhlọ̀n blo,+ hiẹ deayọ blo,+ hiẹ fìnnú blo,+ hiẹ dekunnu lalo blo,+ hiẹ hòmẹdu blo,+ gbògbéna otọ́ towe po onọ̀ towe po.’”+ 20 Dawe lọ dọna ẹn dọmọ: “Mẹplọntọ, yẹn ko nọ yìn onú ehe lẹpo sọn ovu whenu ṣie gbọ́n.” 21 Jesu pọ́n ẹn bo yiwanna ẹn bosọ dọ dọ, “Onú dopo wẹ whèdo we: Yì, bo sà nuhe a tindo lẹ bosọ na wamọnọ lẹ, a nasọ tindo adọkun to olọn mẹ; enẹgodo wá bo lẹzun hodotọ ṣie.”+ 22 Ṣigba, gblọndo lọ hẹn awuku i bọ e dedo po awubla po, na e tindo adọkunnu susu wutu.+

23 Whenue Jesu pọ́n lẹdo pé, e dọna devi etọn lẹ dọmọ: “Lehe e na vẹawuna akuẹnọ lẹ nado biọ Ahọluduta Jiwheyẹwhe tọn mẹ do sọ!”+ 24 Ṣigba, ohó etọn lẹ paṣa devi etọn lẹ. Enẹwutu, Jesu dọna yé dọmọ: “Ovi ṣie lẹ emi, lehe e na vẹawu nado biọ Ahọluduta Jiwheyẹwhe tọn mẹ do sọ! 25 E bọawuna kanklosọ́ de nado gbọn onù yẹnvi tọn mẹ hú na adọkunnọ de nado biọ Ahọluduta Jiwheyẹwhe tọn mẹ.”+ 26 E sọ vọ́ paṣa yé tlala bọ yé dọna ẹn* dọmọ: “Mẹnu wẹ sọgan yin whinwhlẹngán lo?”+ 27 Jesu pọ́n yé tlintlin bo dọmọ: “Gbẹtọ lẹ wẹ ehe ma yọnbasi na, ṣigba e ma yinmọ na Jiwheyẹwhe, na nulẹpo wẹ yọnbasi na Jiwheyẹwhe.”+ 28 Pita jẹ didọna ẹn ji dọmọ: “Pọ́n! Míwlẹ ko jo nulẹpo do bo hodo we.”+ 29 Jesu dọmọ: “Nugbo wẹ yẹn dọna mì dọ, mẹdepope ma tin he jo owhé kavi nọvisunnu lẹ kavi nọviyọnnu lẹ kavi onọ̀ kavi otọ́ kavi ovi lẹ kavi aigba lẹ do, na yẹn tọn podọ na wẹndagbe lọ tọn wutu+ 30 he ma na mọ donu 100 to ojlẹ ehe mẹ todin—owhé lẹ, nọvisunnu lẹ, nọviyọnnu lẹ, onọ̀ lẹ, ovi lẹ po aigba lẹ po, gọna homẹkẹn lẹ+—podọ ogbẹ̀ madopodo to titonu* he ja mẹ. 31 Ṣigba, mẹsusu he yin tintan na lẹzun godotọ, podọ godotọ na lẹzun tintan.”+

32 Todin, yé hẹji jei Jelusalẹm, Jesu to yìyì to nukọn yetọn, awú sọ ji yé, ṣigba mẹhe hodo yé lẹ jẹ budi ji. E sọ vọ́ plan Omẹ Wiawe lẹ dovo bo jẹ nuhe na jọ do e go to madẹnmẹ lẹ dọna yé ji dọmọ:+ 33 “Mì pọ́n! Mí hẹji jei Jelusalẹm, podọ Visunnu gbẹtọ tọn na yin zizedo alọmẹ na yẹwhenọgán lẹ po wekantọ lẹ po. Yé nasọ gblewhẹ okú tọn do e bo na ze e jo na omẹ akọta lẹ tọn, 34 bọ yé na yí i do davlẹ bo túntán do e go bosọ hò e bo hù i, ṣigba to azán atọ̀n godo, e na fọ́n.”+

35 Jakọbu po Johanu po, visunnu Zebede+ tọn lẹ sọ wá e dè bo dọna ẹn dọmọ: “Mẹplọntọ, mí jlo dọ hiẹ ni wà nudepope he mí biọ we na mí.”+ 36 E dọna yé dọmọ: “Etẹwẹ mì jlo dọ yẹn ni wà na mì?” 37 Yé gblọn dọmọ: “Dike mí ni sinai, dopo to adusilọ towe mẹ podọ awetọ to amiyọnlọ towe mẹ to gigo towe mẹ.”+ 38 Ṣigba, Jesu dọna yé dọmọ: “Mìwlẹ ma yọ́n nuhe biọ mì te. Be mìwlẹ sọgan nù kọfo he yẹn to nùnù lọ, kavi yin bibaptizi po baptẹm he yè to yíyí do baptizi mi lọ po ya?”+ 39 Yé dọna ẹn dọmọ: “Mí sọgan.” Enẹwutu, Jesu dọna yé dọmọ: “Mì na nù kọfo he yẹn to nùnù, podọ mì na yin bibaptizi po baptẹm he yè to yíyí do baptizi mi lọ po.+ 40 Ṣigba, nado sinai to adusilọ ṣie kavi amiyọnlọ ṣie mẹ ma yin yẹn tọn nado namẹ gba, ṣigba otẹn ehelẹ tin na mẹhe e ko yin awú etọn wle dai na lẹ.”

41 Whenue omẹ ao he pò lẹ sè ehe, yé gblehomẹ do Jakọbu po Johanu po go.+ 42 Ṣigba, Jesu ylọ yé wá ede dè bo dọna yé dọmọ: “Mì yọnẹn dọ mẹhe sọawuhia* nado to gandu do akọta lẹ ji nọ duklunọ do yé ji podọ omẹ gboogbo lẹ nọ paṣẹ glanglan do yé ji.+ 43 E ma dona yinmọ to mìwlẹ ṣẹnṣẹn gba; ṣigba mẹdepope he jlo na lẹzun kiklo to mì ṣẹnṣẹn dona yin lizọnyitọ mìtọn,+ 44 podọ mẹdepope he jlo na yin tintan to mì ṣẹnṣẹn dona yin afanumẹ mẹlẹpo tọn. 45 Na Visunnu gbẹtọ tọn lọsu wá, e ma yin nado yin lizọnyina gba,+ ṣigba nado yilizọn namẹ bo ze ogbẹ̀* etọn jo taidi ofligọ de do ota mẹsusu tọn mẹ.”+

46 Enẹgodo, yé wá Jẹliko. Ṣigba, dile ewọ po devi etọn lẹ po gọna gbẹtọgun he yinukunkẹ de to tintọ́njẹgbonu sọn Jẹliko, Batime (visunnu Time tọn), he yin nukuntọ́nnọ nubiọdutọ de, tin to aisinsin to alitó.+ 47 Whenue e sè dọ Jesu Nazalẹti tọn wẹ, e jẹ awhádo ji dọmọ: “Wàlẹblanuna mi,+ Jesu, hiẹ Visunnu Davidi tọn!”+ 48 Enẹwutu, mẹsusu jẹ gbededo e ji bo dọna ẹn nado nabọẹ, ṣigba e sọ vọ́ to awhádo gángán mapote dọmọ: “Wàlẹblanuna mi, hiẹ Visunnu Davidi tọn!” 49 To whenẹnu, Jesu nọte bo dọmọ: “Mì ylọ ẹ wá na mi.” Yé sọ ylọ dawe nukuntọ́nnọ lọ, bo dọna ẹn dọmọ: “Gboadọ! Fọnṣite; ewọ to yiylọ we.” 50 E de awugbó etọn dlan, bo zlọn fọ́n bosọ yì Jesu dè. 51 To whenẹnu, Jesu dọna ẹn dọmọ: “Etẹwẹ hiẹ jlo dọ yẹn ni wà na we?” Dawe nukuntọ́nnọ lọ dọna ẹn dọmọ: “Laboni,* dike nukun ṣie ni hùn.” 52 Jesu sọ dọna ẹn dọmọ: “Yì. Yise towe ko hẹn we jẹgangan.”+ Podọ nukun etọn hùn to afọdopolọji,+ bọ e jẹ hihodo e ji to aliji.