Ma Gbọjọ to Alewezun Ogbẹ̀ Tọn mẹ Blo!
“Gbọ mí ni nọ yí homẹfa do họ̀n alewezun he yè ze do mí nukọn.”—HEBLU LẸ 12:1.
1, 2. Nujijọ awuvivinamẹ tọn tẹlẹ wẹ ko hẹn devizọnwatọ Jehovah tọn lẹ jaya to azán godo tọn ehelẹ mẹ?
MÍ TO gbẹnọ to ojlẹ awuvivi po awusinyẹn tọn lẹ po mẹ. Hugan owhe 80 lẹ die wayi, to 1914, Jesu yin zizedo ofin ji taidi Ahọlu Ahọluduta olọn mẹ tọn Jiwheyẹwhe tọn. “Azán Oklunọ tọn” po “ojlẹ opodo” titonu onú lẹ tọn ehe po bẹjẹeji. (Osọhia 1:10; Daniẹli 12:9) Sọn whenẹnu gbọ́n alewezun Klistiani tọn na ogbẹ̀ ko lẹzun niyaniya tlala tọn. Devizọnwatọ Jiwheyẹwhe tọn lẹ ko dovivẹnu vẹkuvẹku nado to yìyì afọsu-afọsi hẹ kẹkẹ olọn mẹ tọn Jehovah tọn, yèdọ titobasinanu olọn mẹ tọn etọn, ehe to nukọnyi madoalọte nado hẹn lẹndai Jehovah tọn lẹ di.—Ezekiẹli 1:4-28; 1 Kọlintinu lẹ 9:24.
2 Be omẹ Jiwheyẹwhe tọn lẹ ko mọ ayajẹ dile yé to ‘alewezun lọ họ̀n’ hlan ogbẹ̀ madopodo kọ̀n ya? Na nugbo tọn, mọwẹ! Yé ko yin whinwhan nado mọ bibẹpli pipotọ mẹmẹsunnu Jesu tọn lẹ, podọ yé jaya nado yọnẹn dọ hiadogonamẹ godo tọn pipotọ 144 000 lẹ tọn ko sẹpọ vivọnu. (Osọhia 7:3, 4) Humọ, yé yin ojlofọndotena nado yọnẹn dọ Ahọlu dide Jehovah tọn ko zín agbogọdọẹ etọn do e mẹ nado gbẹ̀n “ojì aigba tọn.” (Osọhia 14:15, 16) Podọ jibẹwawhé nankọ die! (Matiu 9:37) Kakajẹ din, hugan alindọn livi atọ́n lẹ wẹ ko yin bibẹpli—“gbẹtọ susugege, he mẹdepope ma sọgan hia, sọn akọta lẹpo mẹ, sọn ohẹnnu lẹpo mẹ, sọn gbẹtọ lẹpo mẹ, podọ sọn ogbè lẹpo mẹ.” (Osọhia 7:9) Mẹdepope ma sọgan dọ lehe gbẹtọ susugege enẹ na sù sọ to godo mẹ gba, to whenuena e yindọ mẹdepope ma penugo nado hia ẹ.
3. Mahopọnna etẹlẹ wẹ mí dona tẹnpọn nado wleawuna gbigbọ ayajẹ tọn to whepoponu?
3 Nugbo wẹ dọ, Satani nọ tẹnpọn nado hẹn mí dahli kavi dọ̀n mí do godo dile mí to alewezun lọ họ̀n yinukọn do. (Osọhia 12:17) Podọ e ma ko yin nuhe bọawu nado to wezunhọ̀n gbọn awhàn lẹ, huvẹ lẹ, azọ̀nylankan lẹ, po awusinyẹnnamẹnu devo lẹ po mẹ he dohiagona ojlẹ opodo tọn lọ gba. (Matiu 24:3-9; Luku 21:11; 2 Timoti 3:1-5) Etomọṣo, ahun mítọn lẹ gọfla po ayajẹ po dile opodo alewezun lọ tọn to sisẹpọ. Mí nọ dovivẹnu nado dè gbigbọ he Paulu dotuhomẹna Klistiani hatọ lẹ to azán etọn gbè nado tindo lọ hia dọmọ: “Mì nọ jaya to Oklunọ mẹ whepoponu: yẹn sọ vọ́ dọ, Mì jaya.”—Filippinu lẹ 4:4.
4. Gbigbọ wunmẹ tẹwẹ yin didohia gbọn Klistiani Filippi tọn lẹ dali?
4 Ayihaawe depope matin dọ Klistiani he Paulu dọ hogbe enẹlẹ hlan lẹ to ayajẹ mọ to yise yetọn mẹ, na Paulu dọ hlan yé dọmọ: “Mì nọ to ayajẹ to Oklunọ mẹ.” (Filippinu lẹ 3:1, wekun flinflin lẹ yin mítọn.) Filippinu lẹ yin alọtlútọ, agun owanyinọ he wadevizọn po zohunhun po gọna numọtolanmẹ mẹfọndote tọn. (Filippinu lẹ 1:3-5; 4:10, 14-20) Ṣigba e mayin Klistiani owhe kanweko tintan tọn lẹpo wẹ tindo gbigbọ enẹ lọ gba. Di apajlẹ, delẹ to Klistiani Ju lẹ mẹ he Paulu wlan owe Heblu lẹ tọn hlan lẹ yin mẹhe duahunmẹnamẹ lẹ.
‘Mì Nọ Doayinugo’
5. (a) Gbigbọ tẹwẹ Klistiani Heblu tọn lẹ tindo to whenuena agun Klistiani tọn tintan yin didoai? (b) Basi zẹẹmẹ gbigbọ Klistiani Heblu tọn delẹ tọn to nudi owhe 60 W.M.
5 Agun Klistiani tọn tintan lọ to whenuho aihọn tọn mẹ bẹ Ju jọwamọ tọn po mẹdiọzun Juvi lẹ po hẹn bo yin didoai to Jelusalẹm to owhe 33 W.M. Gbigbọ wunmẹ tẹwẹ e tindo? Mẹde dona hia weta bẹjẹeji owe Owalọ lẹ tọn poun nado yọnẹn dogbọn zohunhun po ayajẹ etọn po dali, yèdọ etlẹ yin to homẹkẹn nukọn. (Owalọ lẹ 2:44-47; 4:32-34; 5:41; 6:7) Ṣigba, dile owhe ao ao lẹ juwayi, ninọmẹ lẹ diọ, podọ kunnudenu dohia dọ susu Ju Klistiani lẹ wẹ gbọjọ to alewezun ogbẹ̀ tọn lọ mẹ. Azọ́n alọdlẹndonu tọn dopo dọ ehe gando ninọmẹ yetọn go dile e tin to aimẹ to nudi owhe 60 W.M. tọn mẹ do dọmọ: “Ninọmẹ awuwhiwhle po gbigbọjọ po tọn, nukundido he ma mọ hẹndi yí lẹ, todido he nọ yin sisẹ̀ do nukọn lẹ, awugbopo sọn ojlo mẹ wá, po yise matindo po to whẹho egbesọegbesọ tọn lẹ mẹ. Yé yin Klistiani lẹ ṣigba tindo pinpẹn-nutọn-yinyọnẹn vude poun na gigo oylọ yetọn tọn.” Nawẹ Klistiani yiamisisadode lẹ sọgan jai biọ ninọmẹ mọnkọtọn mẹ gbọn? Dogbapọnna apadewhe wekanhlanmẹ Paulu tọn hlan Heblu lẹ (heyin kinkan to nudi owhe 61 W.M.) gọalọna mí nado na gblọndo na kanbiọ enẹ. Dogbapọnnanu mọnkọtọn na gọalọna mímẹpo to egbehe nado dapana titlọ biọ ninọmẹ gbigbọjọ gbigbọmẹ tọn dopolọ mẹ.
6. Etẹwẹ yin vogbingbọn delẹ to sinsẹ̀n-bibasi to Osẹ́n Mose tọn glọ po sinsẹ̀n-bibasi heyin zize sinai do yise to Jesu Klisti mẹ ji po mẹ?
6 Klistiani Heblu tọn lẹ wá sọn sinsẹ̀n Ju lẹ tọn mẹ, tito de he sọalọakọn nado to tonusena Osẹ́n he Jehovah na gbọn Mose dali. E taidi dọ Osẹ́n enẹ to nukọnzindo nado to Klistiani Ju susu dọ̀n dogo, vlavo na e ko yin aliho dopo gee lọ nado dọnsẹpọ Jehovah na owhe kanweko susu lẹ wutu, podọ e yin tito sinsẹ̀n-bibasi tọn he dọnmẹdogo de ga, he tindo yẹwhenọduta de, avọ́sinsan gbesisọ tọn lẹ, gọna tẹmpli diyin aihọn tọn de to Jelusalẹm mẹ. Sinsẹ̀n Klistiani tọn gbọnvo. E biọ pọndohlan gbigbọmẹ tọn de, taidi Mose tọn, mẹhe “pọ́n hlan ahọsu alè [sọgodo tọn] lọ tọn” bosọ “doakọnna ẹn taidi e mọ ewọ he yin mamọ lọ.” (Heblu lẹ 11:26, 27) Kunnudenu dohia dọ susu Ju Klistiani lẹ wẹ ma tindo pọndohlan gbigbọmẹ tọn mọnkọtọn gba. Yé to kọhò kakati nado dowezun to aliho nujikudo tọn mẹ.
7. Nawẹ aṣa he mẹ mí wá sọn sọgan yinuwa do aliho he mẹ mí to wezunhọ̀n to alewezun ogbẹ̀ tọn mẹ ji gbọn?
7 Be ninọmẹ dopolọ tin to egbehe ya? Matin ayihaawe, ninọmẹ lẹ mayin nudopolọ pẹpẹ gba. Etomọṣo, Klistiani lẹ wá sọn titonu onú lẹ tọn he nọ yigo taun de mẹ. Aihọn lọ nọ ze dotẹnmẹ hundote ojlofọndotenamẹ tọn lẹ donukọnnamẹ, ṣigba to ojlẹ dopolọ mẹ, e sọ nọ ze nubiọtomẹsi he pẹnagbanmẹ lẹ do gbẹtọ lẹ ji. To yidogọ mẹ, susu mítọn lẹ nọ nọ̀ aigba lẹ ji fie walọ ojlo matindo tọn gbayipe te po fie gbẹtọ lẹ tindo walọ ṣejannabi, yẹn whẹ́ jẹnukọn tọn hlan onú lẹ po te. Eyin mí na dotẹnmẹ míde nado yin nuyiwadeji gbọn aṣa mọnkọtọn dali, ‘nukun ahun tọn mítọn’ sọgan yin hinhẹn dozinvlu po awubibọ po. (Efesunu lẹ 1:18) Nawẹ mí sọgan họ̀n alewezun ogbẹ̀ tọn lọ ganji do eyin mí ma sọgan mọ fihe mí jei lọ hezeheze?
8. Etẹwẹ yin aliho delẹ he mẹ sinsẹ̀n Klistiani tọn yiaga hugan sinsẹ̀n-bibasi to Osẹ́n glọ tọn te?
8 Nado sọgan whàn Ju Klistiani lẹ, Paulu flin yé kiklo-yinyin tito Klistiani tọn do Osẹ́n Mose Tọn ji. Nugbo wẹ dọ, to whenuena akọta Islaeli agbasa tọn yin omẹ Jehovah tọn lẹ to Osẹ́n glọ, Jehovah dọho hlan ẹn gbọn yẹwhegan gbọdo lẹ dali. Ṣigba, to egbehe e nọ “dọho hlan mí to ovi etọn mẹ, mẹhe e do dè whédutọ onú popo tọn, gbọn mẹhe mẹ ga e basi aihọn lẹ,” wẹ Paulu dọ. (Heblu lẹ 1:2) Yinukọn dogọ, Jesu klo hugan ahọlu heyin hukan Davidi tọn lẹpo, yèdọ “ogbẹ́” etọn lẹ. Yèdọ e tlẹ yiaga hugan angẹli lẹ.—Heblu lẹ 1:5, 6, 9.
9. Taidi Klistiani Juvi azán Paulu tọn gbè tọn lẹ, naegbọn mí do tindo nuhudo “ayidonugo tọn” na nuhe Jehovah dọ lẹ?
9 Enẹwutu, Paulu na ayinamẹ Klistiani Ju lẹ dọmọ: “E jẹ mí ni nọ doayi onú he mí ko sè lẹ go tlala, na mí sọ dike yé dúdú kọnyinai to whedepopenu blo.” (Heblu lẹ 2:1) Dile etlẹ yindọ nupinplọn dogbọn Klisti dali yin dona jiawu de, nuhugan mọ yin bibiọ. Yé tindo nuhudo nado na ayidonugo tlala Ohó Jiwheyẹwhe Tọn nado pehẹ nuyiwadomẹji aihọn Juvi lẹ tọn he lẹdo yé pé lọ. Mílọsu tindo nuhudo “ayidonugo” tọn na nuhe Jehovah dọ to pọndohlan mẹ na nujijla gbọzangbọzan oklọ tọn he mí nọ pannukọn sọn aihọn ehe mẹ. Ehe zẹẹmẹdo awuwiwlena walọ nupinplọn tọn dagbe de po hinhẹn todohukanji Biblu-hihia tọn dagbe de go po. Dile Paulu dọ do to godo mẹ to wekanhlanmẹ etọn hlan Heblu lẹ mẹ, e sọ zẹẹmẹdo tintin to opli lẹ tẹnmẹ to gbesisọmẹ po lilá yise mítọn na mẹdevo lẹ po. (Heblu lẹ 10:23-25) Nuwiwa mọnkọtọn na gọalọna mí nado gbọṣi aṣeji to gbigbọmẹ na mí ni ma do hẹn pọndohlan todido gigonọ mítọn bú blo. Eyin mí hẹn ayiha mítọn lẹ gọ́ po linlẹn Jehovah tọn lẹ po, mí ma na yin dududeji kavi hẹn jlẹkaji-ninọ bú gbọn nudepope he aihọn ehe sọgan wà na mí lẹ dali gba.—Psalm 1:1-3; Howhinwhẹn lẹ 3:1-6.
“Mì Nọ Jlahomẹdona Mìnọzo”
10. (a) Etẹwẹ sọgan jọ do mẹde he ma doayi Ohó Jehovah Tọn go? (b) Nawẹ mí sọgan ‘nọ jlahomẹdona ode awetọ’ gbọn?
10 Eyin mí ma na ayidonugo pẹkipẹki onú gbigbọmẹ tọn lẹ, opagbe Jiwheyẹwhe tọn sọgan wá taidi nuhe mayin nujọnu. Ehe tlẹ jọ to owhe kanweko tintan mẹ whenuena agun lẹ blebu bẹ Klistiani yiamisisadode lẹ hẹn bọ delẹ to apọsteli lẹ mẹ gbẹ́ tin to ogbẹ̀. Paulu na avase Heblu lẹ dọmọ: “Mì payi mìde go, mẹmẹsunnu emi, na ayiha ylankan mayise tọn nikaa tin to mì mẹdepope mẹ, nado yì sọn Jiwheyẹwhe ogbẹ̀nọ dè. Ṣigba mì ni nọ jlahomẹdona mìnọzo egbesọegbesọ, whenuena yè to yiylọ ẹ Egbé; na mẹdepope mìtọn nikaa hẹn ayiha etọn sinyẹn gbọn oklọ ylando tọn dali.” (Heblu lẹ 3:12, 13) Hodidọ Paulu tọn lọ “mì payi mìde go” zinnudo nuhudo lọ ji nado tin to aṣeji. Owù tin! Yise matindo—“ylando”—sọgan wleawu to ahun mítọn lẹ mẹ, bọ mí sọgan yì sọn Jiwheyẹwhe dè kakati nado dọnsẹpọ ẹ pẹkipẹki. (Jakobu 4:8) Paulu flin mí nado ‘nọ jlahomẹdona ode awetọ.’ Mí tindo nuhudo zohunhun gbẹdido mẹmẹsunnu-yinyin tọn. “Ewọ he klan ede do ovò na dómọ na ojlo ede tọn, bosọ diọ avùnnukun sọ́ nudepope he yin zinzin tọn.” (Howhinwhẹn lẹ 18:1) Nuhudo na gbẹdido mọnkọtọn nọ whàn Klistiani lẹ to egbehe nado yin gbesisọnọ to opli agun tọn lẹ yìyì, plidopọ lẹdo tọn lẹ, po plidopọ agbegbe tọn lẹ po mẹ.
11, 12. Naegbọn mí ma dona tindo pekọ po sinsẹ̀n-nuplọnmẹ dodonu Klistiani tọn lẹ yinyọnẹn po poun gba?
11 To godo mẹ to wekanhlanmẹ etọn mẹ, Paulu na ayinamẹ họakuẹ ehe yinukọn dogọ dọmọ: “Na ojlẹ he mẹ e jẹ dọ mì do yin mẹplọntọ, mì sọ tin to yé he mẹde nasọ nọ vọ́ onú heyin ojọgbè ohó Jiwheyẹwhe tọn he dabla tọn plọn; bosọ wá di mẹhe hunkọ ma sọgan nọ oyìnnọ ma tindo lẹ, ehe mayin núdùdù sinsinyẹn. . . . Núdùdù sinsinyẹn yin yé he tindo azán susu to ota lẹ tọn, yé he gbọn linlẹn zinzan tọn dali yí nuyọnẹn yetọn do to dagbe po oylan po yọnẹn.” (Heblu lẹ 5:12-14) Po kunnudenu po, Klistiani Juvi delẹ ko gboawupo nado to nukọnyi to nukunnumọjẹnumẹ mẹ. Yé ko whleawu nado kẹalọyi hinhọ́n he to nukọnzindo gando Osẹ́n po owhẹgbigbo po go. (Owalọ lẹ 15:27-29; Galatianu lẹ 2:11-14; 6:12, 13) Mẹdelẹ sọgan gbẹ́ pò to nukun nujọnu tọn yí do pọ́n nuyiwa aṣa tọn mọnkọtọn lẹ taidi Gbọjẹzan sẹmẹsẹmẹ tọn, po Azán Ovẹsè Tọn titengbe whemẹwhemẹ tọn po.—Kọlọsinu lẹ 2:16, 17; Heblu lẹ 9:1-14.
12 Nalete, Paulu dọmọ: “Mì gbọ mí ni jo ohó whẹwhẹwhenu Klisti tọn tọn dai, mì gbọ mí ni yì gbesisọ kọ̀n.” (Heblu lẹ 6:1) Wezun gaa họ̀ntọ de he na ayidonugo núdùdù gbesisọ tọn etọn tin to ninọmẹ de mẹ nado doakọnna wezun gaa, awusinyẹn tọn lọ. Mọdopolọ, Klistiani de he na ayidonugo núdùdù gbigbọmẹ tọn—bo ma nọte do, ‘ohó whẹwhẹwhenu’ tọn dodonu tọn lẹ ji —na penugo ganji nado gbọṣi alewezun lọ mẹ bosọ dotana ẹn. (Yijlẹdo 2 Timoti 4:7 go.) Ehe zẹẹmẹdo awuwlena ojlo to “gbigblo, tedidi, sisosiso, po ojiyiyi” nugbo lọ tọn po mẹ, gbọnmọ dali zindonukọn jẹ whinwhẹ́n kọ̀n.—Efesunu lẹ 3:18.
‘Mì Tindo Nuhudo Akọndonanu Tọn’
13. Nawẹ Klistiani Heblu tọn lẹ basi dohia yise yetọn tọn gbọn to ojlẹ he wayi lẹ mẹ?
13 To ojlẹ he jẹgodona Pẹntikọsti owhe 33 W.M. tọn mẹ tlolo, Klistiani Juvi lẹ nọte gligli mahopọnna nukundiọsọmẹ sinsinyẹn. (Owalọ lẹ 8:1) Vlavo Paulu tindo ehe to ayiha mẹ to whenuena e wlan dọmọ: “Mì ni flin azán nukọn tọn lẹ, ehe mẹ, ehegodo yè hunnukunna mì vọ̀, mì sinyẹnlin do doakọnna avùn daho nukunbibia tọn.” (Heblu lẹ 10:32) Akọndonanu nugbonọ mọnkọtọn basi dohia owanyi yetọn na Jiwheyẹwhe bosọ na yé mẹdekannujẹ hodidọ tọn to nukọn etọn. (1 Johanu 4:17) Paulu dotuhomẹna yé ma nado ze mẹdekannujẹ hodidọ tọn enẹ dlan na yise matindo wutu gba. E na tuli yé dọmọ: “Mì ma sọgan nọma tindo [akọndona, NW ] dọ, ehe godo mìwlẹ wà ojlo Jiwheyẹwhe tọn vọ̀, mì nido mọ opagbe yí. Na ojlẹ vude dogọ́, ewọ he ja na wá, e ma to na dẹn.”—Heblu lẹ 10:35-37.
14. Nugbo tẹlẹ wẹ dona gọalọna mí nado doakọnna etlẹ yin owhe susu to Jehovah sinsẹ̀n mẹ godo?
14 Etẹwẹ dogbọn míwlẹ dali to egbehe? Suhugan mítọn lẹ yin zohunhunnọ to whenuena mí plọn nugbo Klistiani tọn to tintan whenu. Be mí gbẹsọ tindo zohunhun enẹ lọ ya? Kavi be mí ‘ko jó owanyi mítọn tintan dai’ wẹ ya? (Osọhia 2:4) Be mí ko gbọjọ, vlavo ko jẹflumẹ vude kavi yin hinhẹn agbọ́pé dogbọn teninọ pọ́n Amagẹdọni dali wẹ ya? Nalete, nọte whẹ́, bo lẹnnupọn. Nugbo lọ gbẹ́ yin nujiawu dile e yin do dai. Jesu gbẹ́ pò to Ahọlu olọn mẹ tọn mítọn yín. Mí gbẹsọ tindo todido na ogbẹ̀ madopodo to paladisi aigba ji tọn de mẹ, podọ mí gbẹsọ tindo haṣinṣan mítọn hẹ Jehovah. Podọ ma wọnji pọ́n gbede blo dọmọ: “Ewọ he ja na wá, e ma to na dẹn.”
15. Taidi Jesu, nawẹ Klistiani delẹ ko doakọnna homẹkẹn vẹadi lẹ gbọn?
15 Nalete, hogbe Paulu tọn heyin kinkandai to Heblu lẹ 12:1, 2 mẹ yin nuhe sọgbe taun dọmọ: “Mì gbọ mí ni dè onú pinpẹn lẹpo do apadopo, po ylando [yise matindo] he ma sinyẹnawu nado tẹ́ do omẹ go po, bosọ gbọ mí ni nọ yí [akọndona, NW ] do họ̀n alewezun he yè ze do mí nukọn, bo nọ pọ́n hlan Jesu heyin dòdó po opodo yise mítọn tọn po, mẹhe na ayajẹ he yè ze do nukọn etọn wutu e doakọnna [yatin, NW ] lọ, ma hò winyan lọ pọ́n, bosọ sinai to adusilọ ofin Jiwheyẹwhe tọn ji.” Onú susu wẹ devizọnwatọ Jiwheyẹwhe tọn lẹ ko doakọnna to azán godo tọn ehelẹ mẹ. Taidi Jesu, heyin nugbonọ jẹ obá okú awufiẹsa tọn mẹ, delẹ to mẹmẹsunnu po mẹmẹyọnnu mítọn lẹ po mẹ ko doakọnna homẹkẹn vẹadi lẹ po nugbonọ-yinyin po—ganpa yasanamẹ tọn lẹ, hihò, huhlọn-yido-zanhẹmẹ, yèdọ etlẹ yin okú ga. (1 Pita 2:21) Be ahun mítọn ma gọ́ na owanyi na yé to whenuena mí lẹnnupọn do tenọgligo-hinhẹn yetọn ji ya?
16, 17. (a) Avùnnukundiọsọmẹ hlan yise yetọn tọn tẹlẹ wẹ Klistiani suhugan nọ pehẹ? (b) Etẹ finflin wẹ na gọalọna mí nado to wezunhọ̀n to alewezun ogbẹ̀ tọn lọ mẹ?
16 Ṣigba, na suhugan yetọn, hogbe Paulu tọn yinukọn dogọ gando yé go dọmọ: “Mìwlẹ ma saa ko pannukọn avùn jẹ ohùn to avunhiho mìtọn mẹ hẹ ylando.” (Heblu lẹ 12:4) Nalete, aliho nugbo tọn mayin nuhe bọawu na depope mítọn to titonu ehe mẹ gba. Mẹdelẹ yin hinhẹn gbọjọ gbọn “hodọdomẹgo ylandonọ lẹ tọn” dali to agbasazọ́n mẹ kavi to wehọmẹ, bo nọ doakọnna ovlẹko kavi nọavunte sọta kọgbidinamẹnu nado wà ylando. (Heblu lẹ 12:3) Whlepọn sinsinyẹn lẹ ko dekanpona gbemima mẹdelẹ tọn nado hẹn nujinọtedo yiaga Jiwheyẹwhe tọn lẹ go. (Heblu lẹ 13:4, 5) Atẹṣitọ lẹ ko yinuwa do jlẹkaji-ninọ gbigbọmẹ tọn omẹ kleun he dotoai hlan nujijla adínọ oklọ tọn yetọn lẹ ji. (Heblu lẹ 13:9) Vogbingbọn gbẹtọ-yinyin tọn lẹ ko hò ayajẹ mẹdevo lẹ tọn yí. Nùzindonuji hugan do ayidedai po nuwiwa gbọjẹ-yíyí tọn lẹ po ji ko hẹn Klistiani delẹ gbọjọ. Podọ suhugan lẹ nọ tindo numọtolanmẹ kọgbidinamẹ tọn gbọn nuhahun gbẹninọ to titonu ehe mẹ tọn lẹ dali.
17 Nugbo wẹ dọ, depope to ninọmẹ ehelẹ mẹ ma bẹ ‘nukọnpinpan avunhiho jẹ ohùn kọ̀n’ hẹn gba. Podọ ninọmẹ delẹ sọgan yin afọdona jẹ nudide agọ̀ he mílọsu lẹ basi kọ̀n. Ṣigba yemẹpo wẹ nọ ze avùnnukundiọsọmẹ de donukọnna yise mítọn. Enẹwutu wẹ mí dona ze nukun mítọn do apajlẹ klohugan akọndonanu Jesu tọn ji. Na mí ni ma wọnji lehe todido mítọn yin nujiawu do go gbede blo. Na mí ni ma hẹn nujikudo mítọn dọ Jehovah “wẹ ahọsutọ yé he whesọ do din in lẹ tọn” bú gbede blo. (Heblu lẹ 11:6) Whenẹnu, mí na tindo huhlọn gbigbọmẹ tọn nado to wezunhọ̀n to alewezun ogbẹ̀ tọn lọ mẹ.
Mí Sọgan Doakọnna
18, 19. Nujijọ whenuho tọn tẹwẹ dohia dọ Klistiani Heblu tọn lẹ to Jelusalẹm setonuna ayinamẹ gbọdo Paulu tọn?
18 Nawẹ Klistiani Juvi lẹ yigbe hlan wekanhlanmẹ Paulu tọn gbọn? Owhe ṣidopo delẹ jẹgodona kinkan wekanhlanmẹ lọ hlan Heblu lẹ, Juda to awhànfun. To owhe 66 W.M., awhànpa Lomu tọn dosla lẹdo Jelusalẹm, he hẹn hogbe Jesu tọn lẹ di dọmọ: “Whenuena mìwlẹ mọ yè yí awhàn lẹdo Jelusalẹm, whenẹnu mì ni yọnẹn dọ ovọ́jẹ etọn sẹpọ.” (Luku 21:20) Ṣigba, na alemọyi Klistiani lẹ he na tin to Jelusalẹm to ojlẹ enẹ mẹ tọn wutu, Jesu dọmọ: “Whenẹnu mì gbọ mẹhe tin to Judé lẹ ni họnyi osó lẹ ji; bosọ gbọ yé he tin to gblagbla etọn mẹ lẹ ni fọ́n tọ́n yì; mì sọ dike yé he sọ tin to tòpẹvi mẹ lẹ biọ e mẹ blo.” (Luku 21:21) Nalete, awhàn lọ hẹ Lomu ze mẹtẹnpọn de donukọnnamẹ: Be Klistiani Juvi enẹlẹ na gbẹ́ Jelusalẹm, yèdọ ahọ́nkan sinsẹ̀n-bibasi Juvi lẹ tọn po nọtẹn tẹmpli gigonọ lọ tọn po dai wẹ ya?
19 To ajiji mẹ, podọ na whẹwhinwhẹ́n he mayin yinyọnẹn de wutu, Lomunu lẹ joagọ yigodo. Vlavo, Ju sinsẹ̀nnọ lẹ pọ́n ehe hlan taidi kunnudenu dọ Jiwheyẹwhe to whiwhla tòdaho wiwe yetọn. Etẹwẹ dogbọn Klistiani lẹ dali? Whenuho dọna mí dọ yé họ̀n yì. Enẹgodo, to owhe 70 W.M., Lomunu lẹ lẹkọ wá bo và Jelusalẹm sudo mlẹnmlẹn po ogbẹ̀-hẹnbu budonamẹ tọn de po. ‘Azán Jehovah tọn’ heyin didọdai gbọn Joẹli dali lọ ko wá Jelusalẹm jí. Ṣigba Klistiani nugbonọ lẹ ma gbẹsọ tin to finẹ bà. Yé ‘yin whinwhlẹngan.’—Joẹli 2:30-32; Owalọ lẹ 2:16-21.
20. Yinyọnẹn dọ ‘azán daho Jehovah tọn’ ko sẹpọ dona whàn mí to aliho tẹlẹ mẹ?
20 To egbehe, mí yọnẹn dọ ‘azán Jehovah tọn’ daho devo to madẹnmẹ na yinuwa do titonu onú lẹ tọn ehe blebu ji. (Joẹli 3:12-14) Mí ma yọ́n whenuena azán enẹ na wá gba. Ṣigba Ohó Jiwheyẹwhe Tọn na jide mí dọ e na wá dandan! Jehovah dọ dọ e ma na dọngban gba. (Habbakuk 2:3; 2 Pita 3:9, 10) Enẹwutu, mì gbọ mí ni “doayi onú he mí ko sè lẹ go tlala.” Dapana yise matindo, yèdọ “ylando he ma sinyẹnawu nado tẹ́ do omẹ go.” Magbe nado doakọnna dẹn sọle e biọ do. Flin, kẹkẹ daho titobasinanu olọn mẹ tọn Jehovah tọn tin to mizọnmizọn ji. E na dotana lẹndai etọn. Enẹwutu mì gbọ mímẹpo ni to wezunhọ̀n bo ma gbọjọ to alewezun ogbẹ̀ tọn lọ mẹ blo!
Be Hiẹ Flin Ya?
● Tonusise na tudohomẹnamẹ Paulu tọn hlan Filippinu lẹ tẹwẹ na gọalọna mí nado doakọnna to alewezun ogbẹ̀ tọn lọ mẹ?
● Etẹwẹ na gọalọna mí nado pehẹ ayilinlẹn aihọn ehe tọn nado fẹayihasẹna mí?
● Nawẹ mí sọgan gọalọna ode awetọ nado doakọnna to alewezun lọ mẹ gbọn?
● Etẹwẹ yin onú delẹ he sọgan hẹn Klistiani de gbọjọ?
● Nawẹ apajlẹ Jesu tọn sọgan gọalọna mí nado doakọnna gbọn?
[Yẹdide to weda 16, 17]
Taidi wezunhọntọ lẹ, Klistiani lẹ, ma dona dike na nudepope ni fẹ́ayiha yetọn sẹ̀ gba
[Yẹdide to weda 18]
Nudepope ma sọgan glọnalina kẹkẹ daho olọn mẹ tọn Jehovah tọn sọn lẹndai Jiwheyẹwhe tọn wiwadotana mẹ gba