Be Hiẹ to Jehovah Dín Vẹkuvẹku Ya?

DAWE Klistiani de jlo vẹkuvẹku nado má wẹndagbe Biblu tọn hẹ mẹhe nọ dó pinpán dopolọ hẹ ẹ lẹ. (Malku 13:10) Ṣigba, obu glọnalina ẹn. Be e gbọjọ wẹ ya? Lala, e hodẹ̀ sinsinyẹn bo plọn lehe e sọgan bẹ hodọdopọ jẹeji do. Jehovah Jiwheyẹwhe na ẹn obiọ etọn bo na ẹn huhlọn nado dekunnu.

Vivẹnudido mọnkọtọn yin dandan to whenuena mí to Jehovah po dona etọn po dín. Apọsteli Paulu dọmọ: ‘Ewọ he ja Jiwheyẹwhe dè, ma sọgan nọma yise dọ e tin, podọ ewọ wẹ ahọsutọ yé he dín in vẹkuvẹku lẹ tọn.’ (Heblu lẹ 11:6) E ma ko pé nado dín Jehovah poun gba. Hogbe Glẹki tọn heyin lilẹdo ‘dín vẹkuvẹku’ tin to wunmẹ de mẹ he do huhlọn po vivẹnudido sinsinyẹn po hia. Ehe bẹ ahun, ayiha, alindọn po hlọnhlọn omẹ lọ tọn lẹpo po hẹn. Eyin mí to Jehovah dín vẹkuvẹku, mí ma nọ yinuwa to aliho numaylọdọnu, ojlo matindo, kavi numakiyananu tọn mẹ gba. Kakatimọ, mí nọ do zohunhun nujọnu tọn hia to ewọ dindin mẹ.—Owalọ lẹ 15:17.

Mẹhe Dín Jehovah Vẹkuvẹku Lẹ

Owe-wiwe gọ́ na apajlẹ mẹhe dovivẹnu sinsinyẹn to Jehovah dindin mẹ lẹ tọn. Omẹ mọnkọtọn dopo wẹ Jakobu, he diahi tlala hẹ angẹli Jiwheyẹwhe tọn he ze agbasa gbẹtọ tọn dó de kakajẹ afọnnu. Taidi kọdetọn de, Jakobu yin nina yinkọ lọ Islaeli (Ahidihẹ Jiwheyẹwhe tọ́) na e “diahi hẹ,” vánkan, dovivẹnu, kavi sinyẹnlin hẹ Jiwheyẹwhe wutu. Angẹli lọ dona ẹn na vivẹnudido vẹkuvẹku etọn.—Gẹnẹsisi 32:24-30.

Enẹgodo mí tindo apajlẹ yọnnu Galilinu de he yinkọ etọn mayin didọ tọn, he jiya hùndidi tọn na owhe 12, ehe ko ‘hẹn awufiẹsa susu’ wá na ẹn. To ninọmẹ ehe mẹ, e ma dona doalọ mẹdevo lẹ go. Ṣogan, e wleawuna adọgbigbo nado tọ́nyi pé Jesu. E to didọ na ede dọ: “Eyin yẹn gbẹ́ sọgan doalọ awu etọn go, yè na hẹn mi jẹ gángán.” Pọ́n nawe ehe hlan dile e to tintẹnpọn nado ‘jugbọn gbẹtọgun he to hihodo Jesu bo to finfinyọn ẹn lẹ’ ṣẹnṣẹn. Dile e doalọ awu Jesu tọn go, e mọdọ “asisa ohùn etọn tọn hú”—yèdọ awutu ylankan etọn gbọ̀! Obu di i to whenue Jesu kanse dọ, “Mẹnu wẹ doalọ awu ṣie go?” Ṣigba Jesu dọna ẹn po awuvẹmẹ po dọmọ: “Viyọnnu, yise towe hẹn we jẹ gángán, yì jijọho mẹ, bosọ nọ gángán sọn azọ̀n towe mẹ.” Vivẹnudido etọn lẹ yin ahọsuna.—Malku 5:24-34; Levitiku 15:25-27.

To ojlẹ devo mẹ, yọnnu Fenikenu de vẹvẹna Jesu vẹkuvẹku nado hẹnazọ̀ngbọna viyọnnu etọn. Jesu gblọn dọ e ma sọgbe nado na núdùdù ovi lẹ tọn avún pẹvi lẹ. Nuhe dọ e te wẹ yindọ emi ma sọgan penukundo mẹhe mayin Islaelivi lẹ go bo jo Juvi he jẹ lẹ do gba. Dile etlẹ yindọ yọnnu lọ mọnukunnujẹ oló lọ mẹ, e vẹvẹna ẹn dọmọ: “Mọwẹ, Oklunọ: na yèdọ avún lẹ nọ dù jàjá he flẹ́ sọn tafo oklunọ yetọn lẹ tọn ji.” Yise sinsinyẹn po ahundoponọ-yinyin etọn po whàn Jesu nado dọmọ: “Hiẹ nawe, daho wẹ yise towe: ni yin wiwà hlan we yèdọ dile a jlo do.”—Matiu 15:22-28.

Etẹwẹ na ko jọ do omẹ ehelẹ go eyin yé ma sinyẹnlin to vivẹnudido yetọn lẹ mẹ? Be yé na ko mọ dona lọ lẹ yí eyin yé ko gbọjọ to whenue yé pehẹ aliglọnnamẹnu kavi alọhẹndotenamẹ bẹjẹeji tọn lọ wẹ ya? Lala! Apajlẹ ehelẹ do nuagokun he Jesu plọnmẹ lọ hia ganji, dọ e sọgbe nado ‘sinyẹnlin vẹkuvẹku,’ bo tlẹ yin dandannu to Jehovah dindin mẹ.—Luku 11:5-13.

Kẹdẹdi Ojlo Etọn

To kandai heyin nùdego wayi lẹ mẹ, be vivẹnudido vẹkuvẹku kẹdẹ wẹ yin nubiọtomẹsi lọ na mẹhe yin azọ̀nhẹngbọna to aliho jiawu mẹ lẹ ya? Lala, obiọ yetọn dona sọgbe hẹ ojlo Jiwheyẹwhe tọn. Jesu yin nina huhlọn azọ́njiawu tọn nado do kunnudenu vonọtaun hia dọ Ovi Jiwheyẹwhe tọn wẹ e yin, yèdọ Mẹssia dopagbe lọ. (Johanu 6:14; 9:33; Owalọ lẹ 2:22) Humọ, azọ́njiawu he Jesu wà lẹ yin apajlẹ dona susugege aigba ji tọn he Jehovah na kọ̀n do gbẹtọvi ji to Gandudu Owhe Fọtọ́n Klisti tọn whenu tọn.—Osọhia 21:4; 22:2.

E mayin ojlo Jiwheyẹwhe tọn ba dọ mẹhe to sinsẹ̀n nugbo lọ mẹ lẹ ni tindo huhlọn azọ́njiawu tọn, taidi nugopipe nado hẹnazọ̀ngbọ bo do ogbè voovo. (1 Kọlintinu lẹ 13:8, 13) Ojlo etọn na mí to egbehe wẹ nado lá wẹndagbe Ahọluduta lọ tọn lẹdo aihọn pé na ‘gbẹtọ lẹpo nido wá oyọnẹn he pegan nugbo lọ tọn kọ̀n.’ (1 Timoti 2:4; Matiu 24:14; 28:19, 20) Devizọnwatọ Jiwheyẹwhe tọn lẹ sọgan donukun dọ odẹ̀ vẹkuvẹku yetọn lẹ na yin sise eyin yé dovivẹnu po ahundopo po to kọndopọmẹ hẹ ojlo etọn.

Mẹdelẹ sọgan kanse dọ, ‘Naegbọn mí dona dovivẹnu to whenue e yindọ lẹndai Jiwheyẹwhe tọn na yin hinhẹndi janwẹ to aliho depope mẹ?’ Nugbo wẹ dọ Jehovah na hẹn lẹndai etọn di eyin gbẹtọ lẹ ma tlẹ dovivẹnu, ṣigba homẹ etọn nọ hùn nado yí gbẹtọvi lẹ zan to ojlo etọn wiwà mẹ. Jehovah sọgan yin yiyijlẹdo dawe he to ohọ̀ de gbá go. Dawe lọ tindo yẹdide ohọ̀ lọ blebu tọn, ṣigba e nọ ṣinyan azọ́nwanu he e na yizan lẹ sọn dehe tin to lẹdo etọn mẹ lẹ mẹ. Mọdopolọ, Jehovah tindo azọ́n de he e jlo na wadotana to egbehe, podọ homẹ etọn nọ hùn nado yí devizọnwatọ etọn, he ze yede jo sọn ojlo mẹ lẹ zan.—Psalm 110:3; 1 Kọlintinu lẹ 9:16, 17.

Lẹnnupọndo numimọ jọja Toshio tọn ji. To wehọmẹ daho bibiọ godo, e jlo nado dekunnu jẹ obá he go e penugo jẹ mẹ to aigba-denamẹ vonọtaun ehe ji. Biblu etọn nọ tin to alọji to whepoponu bọ e sọ nọ dovivẹnu taun nado yin Klistiani apajlẹ dagbenọ de. Sẹpọ vivọnu owhe tintan etọn tọn to wehọ lọ mẹ, dotẹnmẹ de hundote na ẹn nado dọho na klasi lọ. Toshio hodẹ̀ hlan Jehovah na alọgọ, e sọ jaya nado mọdọ klasi lọ blebu wẹ dotoai po sọwhiwhe po na hodidọ etọn he hosọ etọn yin “Yanwle Ṣie Nado Doafọna Sinsẹ̀nzọn Gbehosọnalitọ Tọn.” E basi zẹẹmẹ dọ emi jlo nado yin lizọnyizọnwatọ whenu-gigọ́ Kunnudetọ Jehovah tọn lẹ tọn de. Wehọmẹvi dopo kẹalọyi plọnmẹ Biblu bosọ zindonukọn jẹ baptẹm kọ̀n. Vivẹnudido vẹkuvẹku Toshio tọn to kọndopọmẹ hẹ odẹ̀ etọn lẹ yin ahọsuna tlala.

Nawẹ Hiẹ Nọ Dovivẹnu Sọ?

Hiẹ sọgan dohia to aliho voovo mẹ dọ a to Jehovah po dona etọn lẹ po dín vẹkuvẹku. Tintan, onú tangan delẹ tin he hiẹ sọgan wà, taidi awuwiwlena opli Klistiani tọn lẹ ganji. Gbọn gblọndo heyin awuwlena ganji, hodidọ he whànmẹ lẹ, po wadohia he yọ́n ganji lẹ po gblamẹ, hiẹ sọgan do lehe a to Jehovah dín vẹkuvẹku sọ hia. Hiẹ sọgan sọ do vivẹnudido towe hia gbọn hinhẹn lizọnyizọn towe pọnte dali. Etẹwẹ dogbọn tintẹnpọn nado jihọntọn hẹ whétọ lẹ dogọ to hodidọ hẹ yé mẹ po homẹbibiọ kọdetọn dagbenọ he sọgbe hẹ aigba-denamẹ mìtọn lẹ po yiyizan dali? (Kọlọsinu lẹ 3:23) Gbọn vivẹnudido ahundopo tọn dali, Klistiani sunnu de sọgan penugo nado kẹalọyi azọndenamẹ lẹ to agun mẹ, taidi sinsẹ̀nzọnwiwa taidi devizọnwatọ lizọnyizọnwiwa tọn kavi mẹho agun tọn. (1 Timoti 3:1, 2, 12, 13) Gbọn hinhẹn dewe tin-to-aimẹ dali, hiẹ sọgan duvivi ayajẹ nunamẹ tọn. Hiẹ sọgan penugo nado ze yinkọ dai nado wàzọn to alahọ Kunnudetọ Jehovah tọn lẹ tọn de gbigbá tẹnmẹ kavi nado yin hagbẹ whẹndo alahọ tọn. Eyin sunnu jọja he pegan de wẹ hiẹ yin, a sọgan jlo nado yì Wehọmẹ Azọ́nplọnmẹ Devizọnwiwa tọn, he nọ hẹn sunnu gbigbọnọ lẹ pegan nado yin lẹngbọhọtọ dagbe lẹ. Eyin hiẹ ko wlealọ, sinsẹ̀nzọn mẹdehlan tọn sọgan yin aliho he mẹ ojlo vẹkuvẹku towe nado sẹ̀n Jehovah dogọ sọgan yin didohia te. Tẹnsisẹ yì fie nuhudo sù na lilatọ Ahọluduta lọ tọn lẹ te sọgan yin yọnbasi devo na we.—1 Kọlintinu lẹ 16:9.

Nujọnu hugan lọ wẹ gbigbọ he hiẹ yí do hẹn azọndenamẹ de di. Azọngban depope he hiẹ mọyi, yí dewe zan na ẹn vẹkuvẹku, sinsinyẹn, po “ayiha dopo” po. (Owalọ lẹ 2:46; Lomunu lẹ 12:8) Hiẹ dona nọ pọ́n azọndenamẹ dopodopo hlan taidi dotẹnmẹ hundote de nado do jejejininọ towe nado hẹn pipà wá na Jehovah hia. Nọ hodẹ̀ na alọgọ Jehovah tọn gbọzangbọzan, bo nọ wà nuhe go a pé lẹpo. Whenẹnu hiẹ na mọ ale susu yí.

Vivẹnudido Vẹkuvẹku Nọ Yin Ahọsuna

Be a flin dawe Klistiani lọ he hodẹ̀ nado duto obu etọn ji na e nido sọgan dekunnuna mẹhe nọ dó pinpán dopolọ hẹ ẹ lẹ ya? Jehovah dona ojlo ahundopo tọn etọn. Mẹmẹsunnu lọ tẹnpọn nado yí mẹdọnsẹpọ dagbe de zan bosọ wleawuna hosọ voovo lẹ nado bẹ hodọdopọ jẹeji. E penugo nado yí Biblu zan po kọdetọn dagbe po nado dekunnuna dawe de he haṣinṣan ylankan gbẹtọvi tọn lẹ to ahunmẹduna. Kunnudidena dawe lọ to ojlẹ voovo mẹ to pinpán mẹ dekọtọn do plọnmẹ Biblu de mẹ. Jehovah dona ẹn taun na vivẹnudido vẹkuvẹku etọn!

Hiẹ sọgan tindo kọdetọn mọnkọtọn lẹ eyin hiẹ to Jehovah dín zọnmii vẹkuvẹku. Eyin hiẹ yí whiwhẹ do sinyẹnlin bosọ yí ahun towe lẹpo do wà azọ́n yẹwhehọluduta tọn depope he mẹ a to mahẹ tindo te, Jehovah na yí we zan to kọndopọmẹ hẹ lẹndai etọn lẹ bo nasọ dona we susugege.

[Yẹdide to weda 26]

Etẹwẹ na ko jọ do yọnnu ehe go eyin e ma sinyẹnlin wẹ?

[Yẹdide to weda 27]

Be hiẹ nọ sinyẹnlin to dona Jehovah tọn bibiọ mẹ ya?

[Yẹdide to weda 28]

Nawẹ hiẹ sọgan dohia dọ emi to Jehovah dín vẹkuvẹku gbọn?