Kanbiọ lẹ sọn Wehiatọ lẹ Dè

Etẹwẹ hodidọ he tin to Heblu lẹ 12:4 zẹẹmẹdo he dọmọ: “Mìwlẹ ma saa ko pannukọn avùn jẹ ohùn [kọ̀n]”?

Hodidọ agbòte lọ ‘pannukọn avùn jẹ ohùn kọ̀n’ zẹẹmẹdo akọ́ndonanu kakajẹ okú, yèdọ nado kọ̀n ohùn mẹdetiti tọn dai to yẹhiadonu-liho.

Apọsteli Paulu yọnẹn dọ Klistiani Heblu tọn delẹ ko “doakọnna avùn daho nukunbibia tọn” na yise yetọn wutu. (Heblu lẹ 10:32, 33) To whenuena e to alọdlẹndo enẹ, e taidi dọ apọsteli Paulu to hogbe nunọnutẹnmẹ agbàwhinwhlẹn aihundida Glẹki tọn de yizan, he sọgan bẹ wezundido afọ tọn, avùnhiho, akotokún-yìnyìn, po agán dindlan po hẹn. Enẹwutu, to Heblu lẹ 12:1, e dotuhomẹna Klistiani hatọ lẹ dọmọ: ‘Mì gbọ mí ni de onú pinpẹn lẹpo do apadopo, po ylando he ma sinyẹnawu nado tẹdo mẹgo po, bosọ gbọ mí ni nọ yí akọ́ndonanu do họ̀n alèwezun he yè ze do mí nukọn.’

To wefọ atọ̀n godo, yèdọ to Heblu lẹ 12:4 mẹ, Paulu sọgan ko to adà diọ sọn wezundido afọ tọn ji jẹ agbàwhinwhlẹn akotokún yìnyìn tọn ji. (Wunmẹ awe lẹ yin nudego to 1 Kọlintinu lẹ 9:26 mẹ.) Akotokún-yìntọ hohowhenu tọn lẹ nọ yí ayú do blá alọ po alọkọ yetọn lẹ po. Yé tlẹ sọgan ko nọ tlẹ́ “osùnmi, ogàn, kavi onú pẹnzin devo, he na gbleawuna akotokún-yìntọ lẹ taun” do ayú he yé nọ blá do alọ lẹ mẹ. Agbàwhinwhlẹn kanlin-jọmẹ tọn mọnkọtọn lẹ nọ gbleawunamẹ, bo tlẹ nọ hùmẹ to whedelẹnu.

Depope he whẹho lọ yin, Klistiani Heblu tọn lẹ tindo apajlẹ devizọnwatọ nugbonọ Jiwheyẹwhe tọn susu he ko jiya homẹkẹn po nuyiwahẹmẹ kanlin-jọmẹ tọn lẹ po, etlẹ yin kakajẹ okú, yèdọ ‘jẹ ohùn kọ̀n.’ Doayi lẹdo hodidọ tọn he mẹ Paulu dọ̀n ayidonugo wá nuhe omẹ nugbonọ hohowhenu tọn lẹ tindo numimọ etọn lẹ ji go:

“Yè to zannu dlan do yé, yè yí ayinyọ̀n de do yé sán do awe, yè to yé whlepọn, yè yí ohí do to yé hù: yé to dindanpe to ayú lẹngbọ po gbọgbọẹ po tọn mẹ; yé zun agbátọnọ, nukunbibianọ, awufiẹsanọ.” Enẹgodo, Paulu zinnudo Opodo yise mítọn tọn, heyin Jesu ji dọmọ: “E doakọnna [yatin, NW] lọ, ma hò winyan lọ pọ́n, bosọ sinai to adusilọ ofìn Jiwheyẹwhe tọn ji.”—Heblu lẹ 11:37; 12:2.

Mọwẹ, mẹsusu ko ‘pannukọn avùn jẹ ohùn kọ̀n,’ enẹwẹ jẹ okú. Akọ́ndonanu yetọn zẹ̀ avùnhiho homẹ tọn sọta ylando yise matindo tọn go. Yé yin nugbonọ to yasanamẹ kanlin-jọmẹ gbonu tọn glọ, bo hẹn nugbonọ-yinyin yetọn go jẹ okú.

Omẹ yọyọ he tin to agun Jelusalẹm tọn mẹ lẹ, vlavo he lẹzun Klistiani to whenuena homẹkẹn sinsinyẹn ko depò godo, ma ko pannukọn whlepọn sinsinyẹn mọnkọtọn lẹ pọ́n gba. (Owalọ lẹ 7:54-60; 12:1, 2; Heblu lẹ 13:7) Etomọṣo, whlepọn he ma tlẹ sinyẹnawu sọmọ lẹ to mẹdelẹ hẹn gbọjọ to yé mẹ sọn nukọnzinzindo to agbàwhinwhlẹn lọ mẹ; yèdọ ‘agbọ́ to yé pé bọ onú to kọṣina alindọn yetọn.’ (Heblu lẹ 12:3) Yé dona zindonukọn bo whẹ́n deji. Enẹ na hẹn yé penugo nado doakọnna nudepope he yé pannukọn, eyin e tlẹ bẹ yasanamẹ agbasa tọn jẹ obá okú tọn mẹ hẹn.—Heblu lẹ 6:1; 12:7-11.

Klistiani egbezangbe tọn susu wẹ ko ‘pannukọn avùn jẹ ohùn kọ̀n,’ bo yin hùhù na yé ma gbẹ́ Klistiani-yinyin yetọn dai wutu. Kakati nado dike hogbe Paulu tọn lẹ to Heblu lẹ 12:4 ni yin asisa obu tọn, mí sọgan pọ́n yé hlan taidi dohia obá he mẹ mí magbe nado yin nugbonọ hlan Jiwheyẹwhe jẹ. To godo mẹ to wekanhlanmẹ dopolọ mẹ hlan Heblu lẹ, Paulu wlan dọmọ: “Mì gbọ mí ni hẹn ojọmiọn go, ehe mẹ mí sọgan nọ basi sinsẹ̀n homẹhunnọ hlan Jiwheyẹwhe te po yẹyi po, po osi po.”—Heblu lẹ 12:28.