Mahopọnna Whlepọn, Tẹdo Yise Towe Go!
“Mì mẹmẹsunnu ṣie emi, whenuena mì jẹ whlepọn hunkọhunkọ mẹ, mì hia ẹ na ayajijẹ popo.”—JAKOBU 1:2.
1. Mahopọnna etẹ wẹ omẹ Jehovah tọn lẹ nọ basi sinsẹ̀n na ẹn to yise po ‘ayajẹ ahun tọn po mẹ’?
OMẸ Jehovah tọn lẹ nọ wadevizọn taidi Kunnudetọ etọn lẹ po yise po to ewọ mẹ gọna “homẹhunhun ayiha tọn.” (Deutelonomi 28:47; Isaia 43:10) Yé nọ wà ehe dile etlẹ yindọ yé nọ yin tuklado gbọn whlepọn susu dali. Mahopọnna awusinyẹnnamẹnu yetọn lẹ, yé nọ mọ homẹmiọnnamẹ sọn hogbe lọ mẹ he dọmọ: “Mì mẹmẹsunnu ṣie emi, whenuena mì jẹ whlepọn hunkọhunkọ mẹ, mì hia ẹ na ayajijẹ popo; na mì ni sọ yọ́n ehe dọ whlepọn yise mìtọn tọn wẹ nọ wazọ́n homẹfa tọn.”—Jakobu 1:2, 3.
2. Etẹwẹ yin yinyọnẹn dogbọn wekantọ wekanhlanmẹ Jakobu tọn lọ dali?
2 Hodidọ enẹ yin kinkan to nudi owhe 62 W.M. gbọn devi Jakobu dali, yèdọ nọvisunnu daa Jesu Klisti tọn. (Malku 6:3) Jakobu yin mẹho de to agun Jelusalẹm tọn mẹ. Na nugbo tọn, ewọ, Kefa (Pita), po Johanu po “di dotin”—tindo huhlọn, bo yin godonọnamẹtọ he lodo agun lọ tọn. (Galatianu lẹ 2:9) To whenuena whẹho nudindọn gando whẹgbigbo go tọn yin zizedonukọnna “apọsteli lẹ po mẹho lẹ po” to nudi owhe 49 W.M., Jakobu na ayinamẹ sinaido Owe wiwe lẹ ji he yin alọkẹyi gbọn Hagbẹ Anademẹtọ owhe kanweko tintan tọn enẹ dali.—Owalọ lẹ 15:6-29.
3. Etẹwẹ yin delẹ to nuhahun he pannukọn Klistiani owhe kanweko tintan tọn lẹ mẹ, podọ nawẹ mí sọgan tindo alemọyi daho hugan lọ sọn wekanhlanmẹ Jakobu tọn mẹ gbọn?
3 Taidi lẹngbọhọtọ mẹtọnhopọntọ de, Jakobu ‘yọ́n ninọmẹ apó lọ tọn.’ (Howhinwhẹn lẹ 27:23) E yọnẹn dọ Klistiani lẹ to pipehẹ whlepọn sinsinyẹn lẹ to whenẹnu. Lẹnpọn mẹdelẹ tọn biọ vọjlado, na yé to mẹnukuntahopọn dohia adọkunnọ lẹ. Na mẹdelẹ, sinsẹ̀n-bibasi yin nuwiwa mọmọ poun tọn de. Mẹdelẹ to awugble hẹn wá po hogbe he mayin anadena yetọn tọn lẹ po. Gbigbọ aihọn tọn to nugandomẹgo awugble tọn hẹnwa, podọ mẹsusu ma sọ nọ fahomẹ kavi nọ hodẹ̀ bà. Na nugbo tọn, Klistiani delẹ ko bẹ awutu gbigbọmẹ tọn. Wekanhlanmẹ Jakobu tọn basi zẹẹmẹ whẹho mọnkọtọn lẹ tọn to aliho mẹjlọdote tọn de mẹ, podọ ayinamẹ etọn yọn-na-yizan to egbehe dile e te do to owhe kanweko tintan W.M. mẹ. Mí na mọaleyi tlala eyin mí pọ́n wekanhlanmẹ ehe hlan taidi dehe yin kinkan hlan mídetiti.a
To Whenuena Mí Tindo Numimọ Whlepọn lẹ Tọn
4. Nukun tẹwẹ mí dona yí do pọ́n whlepọn lẹ?
4 Jakobu dohia mí lehe yè na pọ́n whlepọn lẹ hlan gbọn. (Jakobu 1:1-4) E ma dọ kanṣiṣa whẹndo tọn etọn hẹ Visunnu Jiwheyẹwhe Tọn gba, e yí whiwhẹ do ylọ ede dọ, “afanumẹ Jiwheyẹwhe tọn po Jesu Klisti Oklunọ po tọn.” Jakobu kanwe hlan “whẹndo wiawe” Islaeli gbigbọmẹ tọn he “gbàpe lẹ,” to tintan whenu na homẹkẹn wutu. (Owalọ lẹ 8:1; 11:19; Galatianu lẹ 6:16; 1 Pita 1:1) Taidi Klistiani lẹ, mí nọ yin homẹkẹndo ga, podọ mí nọ “jẹ whlepọn hunkọhunkọ mẹ.” Ṣigba eyin mí flin dọ akọndona whlepọn lẹ nọ na huhlọn yise mítọn, mí na ‘hia ẹ na ayajẹ popo’ to whenuena yé jẹ mí ji. Eyin mí hẹn tenọgli mítọn go hlan Jiwheyẹwhe to whlepọn lẹ whenu, ehe na hẹn ayajẹ dẹn-to-aimẹ wá na mí.
5. Etẹwẹ whlepọn mítọn lẹ sọgan bẹhẹn, podọ etẹwẹ nọ jọ to whenuena mí doakọnna yé po kọdetọn dagbe po?
5 Whlepọn mítọn lẹ bẹ yajiji he gbayipe hlan gbẹtọvi lẹ hẹn. Di apajlẹ, agbasalilo matindo sọgan dotukla mí. Jiwheyẹwhe ma nọ basi azọ́njiawu azọ̀nhẹngbọ tọn lẹ todin bà, ṣigba e nọ na gblọndo odẹ̀ mítọn lẹ na nuyọnẹn po huhlọn he nuhudo tin na po nado doakọnna azọ̀n. (Psalm 41:1-3) Mí sọ nọ jiya na dodowiwa wutu taidi Kunnudetọ heyin homẹkẹndo Jehovah tọn lẹ. (2 Timoti 3:12; 1 Pita 3:14) To whenuena mí doakọnna whlepọn mọnkọtọn lẹ po kọdetọn dagbe po, yise mítọn nọ yin didohia, bo nọ lẹzun dehe yè “whlepọn.” Podọ to whenuena yise mítọn gbawhàn, ehe ‘nọ wazọ́n akọndona tọn.’ Yise heyin hinhẹn lodo gbọn whlepọn lẹ dali na gọalọna mí nado doakọnna mẹtẹnpọn sọgodo tọn lẹ.
6. Nawẹ ‘akọndonanu wazọ́n etọn tla’ gbọn, podọ afọdide yọn-na-yizan tẹwẹ sọgan yin zize to whenuena mí tin to whlepọn mẹ?
6 “Ṣigba, mì gbọ [akọndona, NW ] ni wazọ́n etọn tla” wẹ Jakobu dọ. Eyin mí dike na whlepọn de ni zindonukọn matin vivẹnudido nado doalọtena ẹn po awuyiya po gbọn aliho he ma sọgbe hẹ owe wiwe lẹ dali, akọndona na wà “azọ́n” hinhẹn mí sọgbe taidi Klistiani lẹ, e mayin nado gbọ̀agba to yise mẹ gba. Na nugbo tọn, eyin whlepọn dè madogán delẹ hia, mí dona din alọgọ Jehovah tọn nado dù to e ji. Etẹwẹ eyin whlepọn lọ yin mẹtẹnpọn nado tindo mahẹ to fẹnnuwiwa zanhẹmẹ tọn mẹ? Mì gbọ mí ni hodẹ̀ dogbọn nuhahun enẹ dali podọ to enẹgodo yinuwa to kọndopọmẹ hẹ odẹ̀ mítọn lẹ. Mí sọgan tindo nuhudo nado diọ azọ́nwatẹn mítọn kavi nado ze afọdide devo lẹ nado hẹn tenọgligo hlan Jiwheyẹwhe.—Gẹnẹsisi 39:7-9; 1 Kọlintinu lẹ 10:13.
Afọdona Nuyọnẹn
7. Nawẹ mí sọgan yin alọgọna nado yinuwa hẹ whlepọn lẹ gbọn?
7 Jakobu do nuhe dona yin wiwà hia mí eyin mí ma yọ́n lehe yè na yinuwa hẹ whlepọn de do. (Jakobu 1:5-8) Jehovah ma na gblewhẹdo mí na nuyọnẹn matindo po odẹ̀hiho na ẹn po to yise mẹ gba. E na gọalọna mí nado pọ́n whlepọn to aliho he sọgbe mẹ podọ nado doakọnna ẹn. Owe wiwe lẹ sọgan yin hinhẹnwa ayidonugo mítọn mẹ gbọn yisenọ hatọ lẹ dali kavi to oplọn Biblu tọn whenu. Nuyiwadomẹji azọ́n yinyọnẹn tọn gbọn anademẹ Jiwheyẹwhe tọn dali sọgan hẹn mí penugo nado mọ nuhe mí dona wà. Mí sọgan yin anadena gbọn gbigbọ Jiwheyẹwhe tọn dali. (Luku 11:13) Nado duvivi alemọyi mọnkọtọn lẹ tọn, to aliho paa mẹ mí dona tẹdo Jiwheyẹwhe po omẹ etọn lẹ po go pẹkipẹki.—Howhinwhẹn lẹ 18:1.
8. Naegbọn ayihaawenọ ma na mọ nudepope yí sọn Jehovah dè?
8 Jehovah nọ na mí nuyọnẹn nado pehẹ whlepọn lẹ eyin mí “biọ to yise mẹ, to matin ayi awe mẹ.” Ayihaawenọ “taidi agbowhẹn ohù tọn, he gbọn alọ jẹhọn tọn mẹ to bibli hlan nukọn bibli hlan godo” mẹhe go yè ma sọgan dejido. Eyin mí tin to ninọmẹ he ma lodo gbigbọmẹ tọn enẹ mẹ, ‘mí ma dona lẹndọ mí na mọ nudepope yí sọn Jehovah dè.’ Mì gbọ mí ni ma yin “ayihaawenọ” po mẹhe ma “lodo” po to odẹ̀ mẹ kavi to aliho devo lẹ mẹ blo. Kakatimọ, mì gbọ mí ni tindo yise to Jehovah mẹ, yèdọ Asisa nuyọnẹn tọn.—Howhinwhẹn lẹ 3:5, 6.
Adọkunnọ po Wamọnọ po Sọgan Jaya
9. Naegbọn mí tindo whẹwhinwhẹ́n na ayajijẹ taidi sinsẹ̀n-basitọ Jehovah tọn lẹ?
9 Etlẹ yindọ ohẹn yin dopo to whlepọn mítọn lẹ mẹ, mì gbọ mí ni hẹn do ayiha mẹ dọ Klistiani adọkunnọ po wamọnọ lẹ po sọgan jaya. (Jakobu 1:9-11) Whẹpo yé lẹzun hodotọ Jesu tọn lẹ, suhugan mẹyiamisisadode lẹ tọn tindo nutindo agbasa tọn vude bo nọ yin nukunpẹvi yí do pọ́n gbọn aihọn dali. (1 Kọlintinu lẹ 1:26) Ṣigba yé sọgan jaya na ‘zize daga’ yetọn hlan nọtẹn whédutọgbẹ́ Ahọluduta tọn wutu. (Lomunu lẹ 8:16, 17) To vogbingbọn mẹ, adọkunnọ lẹ he to ojlẹ de mẹ wayi nọ yin gbégbòna to numimọ ‘mẹdèpo’ tọn tindo taidi hodotọ Klisti tọn lẹ na yinyin nukunpẹvi yí do pọ́n gbọn aihọn dali wutu. (Johanu 7:47-52; 12:42, 43) Nalete, taidi devizọnwatọ Jehovah tọn lẹ mímẹpo sọgan jaya na adọkun aihọn mẹ tọn lẹ po otẹn yiaga lẹ po mayin nudepope to yijlẹdo adọkunnu gbigbọmẹ tọn he mí nọ duvivi etọn lẹ go gba. Podọ lehe mí yin homẹhunnọ do sọ dọ to ṣẹnṣẹn mítọn otẹn depope matin na goyiyi taidi otẹn ogbẹ́ gbẹtọvi lẹ tọn!—Howhinwhẹn lẹ 10:22; Owalọ lẹ 10:34, 35.
10. Nawẹ Klistiani de dona pọ́n adọkunnu agbasa tọn hlan gbọn?
10 Jakobu gọalọna mí nado mọ dọ ogbẹ̀ mítọn ma sinai do adọkun po kọdetọn dagbe aihọn mẹ tọn tintindo po ji gba. Dile whanpẹ vounvoun tọn ma sọgan glọnalina ẹn ma nado kú to “yózo” owhè tọn mẹ, mọdopolọ wẹ adọkun adọkunnọ tọn ma sọgan hẹn ogbẹ̀ etọn dite do. (Psalm 49:6-9; Matiu 6:27) E sọgan kú to whenuena e to afọdona ‘aliho gbẹzan’ etọn tọn lẹ, vlavo to mahẹ tintindo to ajọwiwa mẹ. Enẹwutu, onú titengbe lọ wẹ nado yin “adọkunnọ gbọn Jiwheyẹwhe dali” podọ nado wà nuhe go mí pé lẹpo nado nọgodona dagbenu Ahọluduta tọn lẹ.—Luku 12:13-21; Matiu 6:33; 1 Timoti 6:17-19.
Ayajẹnọ Wẹ Mẹhe Doakọnna Whlepọn Lẹ
11. Etẹwẹ yin nukundido lọ na mẹhe tẹdo yise yetọn go to whlepọn lẹ nukọn?
11 Adọkunnọ kavi wamọnọ, mí sọgan yin ayajẹnọ eyin mí doakọnna whlepọn mítọn lẹ kẹdẹ. (Jakobu 1:12-15) Eyin mí doakọnna whlepọn lẹ po yise mawhango mítọn po, mí sọgan yin lilá taidi ayajẹnọ, na ayajẹ tin to wiwà nuhe sọgbe to nukun Jiwheyẹwhe tọn mẹ. Gbọn titẹdo yise yetọn go kakajẹ okú dali, Klistiani yí gbigbọ do ji lẹ mọ “ojẹgbakun ogbẹ̀ tọn” yí, yèdọ jọmakú to olọn lẹ mẹ. (Osọhia 2:10; 1 Kọlintinu lẹ 15:50) Eyin mí tindo todido aigba ji tọn bo hẹn yise mítọn go to Jiwheyẹwhe mẹ, mí sọgan pọ́n nukọn hlan ogbẹ̀ madopodo to paladisi aigba ji tọn de mẹ. (Luku 23:43; Lomunu lẹ 6:23) Lehe Jehovah yin dagbe hlan mẹlẹpo he yí yise zan to ewọ mẹ do sọ!
12. To whenuena mí to numimọ yajiji tọn tindo, naegbọn mí ma dona dọmọ: ‘Yẹn to yinyin whiwhlepọn gbọn Jiwheyẹwhe dali’?
12 Be e yọnbasi dọ Jehovah lọsu ni whle mí pọ́n po yajiji po ya? Lala, mí ma dona dọmọ: ‘Yẹn yin whiwhlepọn gbọn Jiwheyẹwhe dali gba.’ Jehovah ma to tintẹnpọn nado hẹn mí wà ylando gba ṣigba po jide po nado gọalọna mí bo na mí huhlọn he nuhudo tin na nado doakọnna whlepọn lẹ eyin mí gbọṣi tenọgligo-hinhẹn to yise mẹ. (Filippinu lẹ 4:13) Wiwe wẹ Jiwheyẹwhe, enẹwutu e ma nọ ze mí do ninọmẹ he na hẹn agbọ́pé nugopipe mítọn nado nọavunte sọta ylanwiwa mẹ gba. Eyin mí hẹn míde biọ ninọmẹ jijọ-madi-Jiwheyẹwhe tọn de mẹ bo wà ylando delẹ, mí ma dona gblewhẹdo e gba, “na yè ma sọgan yí oylan do whle Jiwheyẹwhe pọ́n gba, mọ e ma sọ nọ whle mẹdepope pọ́n.” Dile etlẹ yindọ Jehovah sọgan jó dotẹnmẹ na whlepọn de nado do mẹplọnlọ mí go na dagbe mítọn, e ma nọ tẹ́n mí pọ́n po ojlo ylankan po gba. (Heblu lẹ 12:7-11) Satani sọgan whle mí pọ́n nado wà oylan, ṣigba Jiwheyẹwhe sọgan whlẹn mí sọn mẹylankan enẹ si.—Matiu 6:13.
13. Etẹwẹ sọgan jọ eyin mí ma gbẹ́ ojlo agọ̀ dai?
13 Mí dona gbọṣi odẹ̀ mẹ na ninọmẹ delẹ sọgan planmẹ jẹ ojlo agọ̀ he sọgan klọ mí nado waylan kọ̀n wutu. Jakobu dọmọ: “Omẹ dopodopo wẹ yè whlepọn, whenuena yè gbọn wantuntun etọn titi dali dọ̀n ẹn yì.” Mí ma sọgan gblewhẹdo Jiwheyẹwhe na ylando mítọn eyin mí ko dike na ahun mítọn ni gbọṣi ojlo ylankan ji. Eyin mí ma dè ojlo agọ̀ sẹ̀, ‘e na mọho,’ bo na whẹ́n to ahun lọ mẹ, bo na “ji ylando.” To whenuena ylando ko yin wiwà pó godo, e “ji okú.” E họnwun dọ, mí dona basi hihọ́ na ahun mítọn bo nọavunte sọta ayilinlẹn ylando tọn lẹ. (Howhinwhẹn lẹ 4:23) Kaini yin avase na dọ ylando ko dibla duto e ji, ṣigba e ma nọavunte gba. (Gẹnẹsisi 4:4-8) Enẹwutu, to whelọnu lo, etẹwẹ eyin mí bẹ afọdona yanwle he ma sọgbe hẹ owe wiwe lẹ jẹeji? Na jide tọn mí dona yin homẹhunnọ eyin mẹho Klistiani lẹ dovivẹnu nado vọ́ mí jlado na mí ni ma do wà ylando sọta Jiwheyẹwhe blo.—Galatianu lẹ 6:1.
Jiwheyẹwhe—Asisa Onú Dagbe lẹ Tọn
14. To linlẹn tẹmẹ wẹ e sọgan yin didọ te dọ nunina Jiwheyẹwhe tọn lẹ yin ‘pipé’?
14 Mí dona flin dọ Jehovah wẹ Asisa lọ, e mayin whlepọn lẹ tọn gba, ṣigba onú dagbe lẹ tọn. (Jakobu 1:16-18) Jakobu dlẹnalọ do yisenọ hatọ lẹ taidi ‘mẹmẹsunnu yiwanna lẹ’ bo dohia dọ Jiwheyẹwhe wẹ Nunamẹtọ ‘onú dagbedagbe po nunina he sọgbe lẹpo tọn po.’ Nunina gbigbọmẹ po agbasamẹ tọn po Jehovah tọn lẹ “sọgbe,” kavi pé, ma gbọ̀agba nudepope tọn. Yé wá ‘sọn aga,’ sọn fininọ Jiwheyẹwhe tọn to olọn lẹ mẹ. (1 Ahọlu lẹ 8:39) Jehovah wẹ “Otọ́ hinhọ́n lẹ tọn”—yèdọ owhè, osun, po sunwhlẹvu lẹ po. E sọ nọ na mí hinhọ́n gbigbọmẹ po nugbo po tọn. (Psalm 43:3; Jẹlemia 31:35; 2 Kọlintinu lẹ 4:6) Ma taidi owhè he nọ hẹn oyẹ̀ diọada dile e to mizọnmizọn ji bo nọ vẹadi to whèmẹ ṣlala kẹdẹ, Jiwheyẹwhe nọ jideji to whepoponu to awuwlena nuhe yin dagbe mẹ. Na jide tọn e na wleawuna mí nado pannukọn whlepọn lẹ eyin mí yí dotẹnmẹ hundote gigọ́ awuwledainanu gbigbọmẹ tọn etọn lẹ he nọ yin nina gbọn Ohó po “afanumẹ nugbonọ nuyọnẹntọ” etọn po dali zan.—Matiu 24:45.
15. Etẹwẹ yin dopo to nunina dagbe hugan Jehovah tọn lẹ mẹ?
15 Etẹwẹ ko yin dopo to nunina dagbe hugan Jiwheyẹwhe tọn lẹ mẹ? Hinhẹn visunnu gbigbọmẹ tọn lọ lẹ wá gbọn gbigbọ wiwe dali, he to azọ́nwa to kọndopọmẹ hẹ wẹndagbe lọ, kavi “ohó nugbo tọn.” Mẹhe to numimọ jiji gbọn gbigbọ dali tọn tindo lẹ yin “sinsẹ́n tintan,” heyin dide sọn gbẹtọvi lẹ ṣẹnṣẹn nado yin ‘ahọluduta po yẹwhenọ’ olọn mẹ tọn lẹ po. (Osọhia 5:10; Efesunu lẹ 1:13, 14) Jakobu sọgan ko to nulẹnpọn do sinsẹ́n tintan agbado balle tọn ji he yin yiyido sanvọ́ to 16 Nisan, ehe yin azán he gbè Jesu yin finfọnsọnku, podọ heyin nunina aklahihi likun tọn awe to azán Pẹntikọsti tọn gbè, to whenuena gbigbọ wiwe yin kinkọnjẹgbonu. (Levitiku 23:4-11, 15-17) To whẹho enẹ mẹ, Jesu na yin sinsẹ́n tintan po whédutọgbẹ́ ‘sinsẹ́n tintan nujọnu tọn’ etọn lẹ po. Etẹwẹ eyin mí tindo todido aigba ji tọn? Eyọn, hinhẹn ẹn do ayiha mẹ na gọalọna mí nado tẹdo yise mítọn go to Nunamẹtọ ‘nunina dagbedagbe lẹpo’ tọn mẹ, mẹhe ko hẹn ogbẹ̀ madopodo yọnbasi to gandudu Ahọluduta tọn glọ.
Yin “Basitọ Ohó lọ Tọn”
16. Naegbọn mí dona yin ‘awuyatọ nado sè ṣigba whleawu dogbọn hodidọ po homẹgble po dali’?
16 Vlavo mí to numimọ whlepọn yise mítọn tọn tindo to alọnu din kavi lala, mí dona yin “basitọ ohó lọ tọn.” (Jakobu 1:19-25) Mí dona yin ‘awuyatọ dogbọn sisè’ Ohó Jiwheyẹwhe Tọn dali, bo yin basitọ tonusetọ etọn tọn. (Johanu 8:47) To alọ devo mẹ, mì gbọ mí ni “whleawu nado gblọn,” bo yin sọwhiwhenọ dogbọn nuhe mí nọ dọ lẹ dali. (Howhinwhẹn lẹ 15:28; 16:23) Jakobu sọgan to tudohomẹna mí ma nado nọ yawu nado dọ dọ whlepọn mítọn lẹ wá sọn Jiwheyẹwhe dè. Mí sọ yin ayinamẹ na nado nọ “whleawu nado gblehomẹ: na homẹgble gbẹtọ tọn ma nọ wazọ́n dodo Jiwheyẹwhe tọn gba.” Eyin mí gblehomẹ gbọn nuhe mẹde dọ dali, mì gbọ mí “ni whleawu” nado sọgan dapana gblọndo ahọsuyíyí tọn. (Efesunu lẹ 4:26, 27) Gbigbọ homẹgble tọn he sọgan hẹn nuhahun lẹ wá na mí bo lẹzun whlepọn yise tọn na mẹdevo lẹ ma sọgan wleawuna walọyizan he sọgbe na mẹhe tindo yise to Jiwheyẹwhe dodonọ mítọn mẹ gba. Humọ, eyin mí ‘sugege to wuntuntun mẹ,’ mí na “whleawu nado gblehomẹ,” podọ mẹmẹsunnu po mẹmẹyọnnu mítọn lẹ po na dọnsẹpọ mí.—Howhinwhẹn lẹ 14:29.
17. Etẹwẹ yin wiwadotana gbọn dide oylan sọn ahun po ayiha po mẹ dali?
17 Na jide tọn mí dona vò sọn ‘dihó lẹpo’ mẹ—nulẹpo heyin osùnú na Jiwheyẹwhe bo ze homẹgble daga. Humọ, mí dona ‘nọla na oylan wazẹjlẹgo enẹ.’ Mímẹpo dona gbẹ́ nuwiwa mawé agbasa kavi gbigbọ tọn lẹ dai. (2 Kọlintinu lẹ 7:1; 1 Pita 1:14-16; 1 Johanu 1:9) Dide oylan sẹ̀ sọn ahun po ayiha po mẹ nọ gọalọna mí nado ‘yí walọmimiọn do yí ohó nugbo heyin dido lọ.’ (Owalọ lẹ 17:11, 12) Mahopọnna lehe e dẹnsọ bọ mí yin Klistiani lẹ, mí dona zindonukọn to didike na nugbo Owe wiwe lẹ tọn ni yin dido do mí mẹ. Etẹwutu? Na gbọn gbigbọ Jiwheyẹwhe tọn dali, ohó heyin dido lọ nọ wleawuna “gbẹtọ yọ́yọ́ lọ” he nọ hẹn mẹ jẹ whlẹngán kọ̀n.—Efesunu lẹ 4:20-24.
18. Nawẹ mẹhe yin sisètọ ohó lọ tọn poun gbọnvo na mẹhe sọ yin basitọ etọn gbọn?
18 Nawẹ mí nọ dohia dọ ohó lọ yin anademẹ mítọn gbọn? Gbọn yinyin tonusetọ ‘basitọ ohó lọ tọn, bo mayin sisètọ kẹdẹ’ dali. (Luku 11:28) “Basitọ” tindo yise he nọ wleawuna azọ́n mọnkọtọn lẹ taidi nuwiwa zohunhun tọn to lizọnyizọn Klistiani tọn mẹ po mahẹ gbesisọ tọn tintindo po to opli omẹ Jiwheyẹwhe tọn lẹ tọn mẹ. (Lomunu lẹ 10:14, 15; Heblu lẹ 10:24, 25) Sisètọ ohó lọ tọn poun “taidi dawe de he to nukunmẹ etọn yè ji po e po pọ́n to mẹpọ́nnu mẹ.” E pọ́n ede, enẹgodo tọ́n yì bo wọnji nuhe sọgan yin nuhudo nado vọ́ awusọhia etọn jlado go. Taidi “basitọ ohó lọ tọn,” mí nọ plọn bo nọ na sisi ‘osẹ́n pipé’ Jiwheyẹwhe tọn po sọwhiwhe po, ehe bẹ onú lẹpo he e biọ to mí si hẹn. Gbọnmọ dali mẹdekannujẹ he mí nọ duvivi etọn gbọnvona kanlinmọ-yinyin hlan ylando po okú po, na e nọ planmẹ jẹ ogbẹ̀ kọ̀n. Enẹwutu mì gbọ mí ni ‘sinyẹnlin to osẹ́n pipé lọ mẹ,’ bo to dogbapọn na ẹn gbọzangbọzan bo na ẹn sisi. Podọ lẹnnupọndeji! Taidi ‘basitọ azọ́n lọ tọn, bo mayin sisètọ nuwọntọ lẹ,’ mí tindo ayajẹ he nọ dekọtọn sọn nukundagbe Jiwheyẹwhe tọn mẹ.—Psalm 19:7-11.
Hugan Sinsẹ̀n-basitọ Aṣa Tọn Yinyin
19, 20. (a) Sọgbe hẹ Jakobu 1:26, 27, etẹwẹ sinsẹ̀n-bibasi madodiho biọ to mí si? (b) Etẹwẹ yin apajlẹ sinsẹ̀n-bibasi ma gblezọn tọn delẹ?
19 Eyin mí na duvivi nukundagbe sọn olọn mẹ wá tọn, mí dona flin dọ sinsẹ̀n-bibasi nugbo ma yin nuwiwa mọmọ poun tọn gba. (Jakobu 1:26, 27) Mí sọgan lẹn dọ mí yin ‘sinsẹ̀n-basitọ aṣa’ tọn he Jehovah kẹalọyi lẹ, ṣigba linlẹn etọn gando dopodopo mítọn lẹ go wẹ yin onú titengbe lọ. (1 Kọlintinu lẹ 4:4) Nugomape tangan dopo sọgan yin awugbopo nado “dogàn odẹ́.” Mí na to mídelẹ klọ eyin mí lẹndọ homẹ Jiwheyẹwhe tọn hun do sinsẹ̀n-bibasi mítọn go eyin mí nọ sawhẹdokọna mẹdevo lẹ, do lalo, kavi nọ ṣi odẹ́ zan to aliho devo lẹ mẹ. (Levitiku 19:16; Efesunu lẹ 4:25) Na jide tọn, mí ma jlo dọ ‘wunmẹ sinsẹ̀n-bibasi tọn’ mítọn ni yin “ovọ́” bo ma nado yin alọkẹyi hlan Jiwheyẹwhe na whẹwhinwhẹ́n depope wutu gba.
20 Dile etlẹ yindọ Jakobu ma donù adà sinsẹ̀n-bibasi madodiho tọn lẹpo go, e dọ dọ e bẹ ‘pinpọn tọṣiọvi lẹ po asuṣiọsi lẹ po go to nukunbibia yetọn mẹ’ hẹn. (Galatianu lẹ 2:10; 6:10; 1 Johanu 3:18) Agun Klistiani tọn do ojlo vonọtaun hia to awuwiwlena asuṣiọsi lẹ mẹ. (Owalọ lẹ 6:1-6; 1 Timoti 5:8-10) To whenuena e yindọ Jiwheyẹwhe wẹ Hihọ-basinamẹtọ asuṣiọsi po tọṣiọvi lẹ po tọn, mì gbọ mí ni kọngbedopọ hẹ Ẹ gbọn wiwà nuhe go mí pe nado gọalọna yé to gbigbọliho podọ to agbasaliho dali. (Deutelonomi 10:17, 18) Sinsẹ̀n-bibasi wiwe sọ zẹẹmẹdo ‘nado whlá mẹde madodiho sọn aihọn dè,’ yèdọ ogbẹ́ gbẹtọvi mawadodonọ he mlọnai to huhlọn Satani tọn mẹ. (Johanu 17:16; 1 Johanu 5:19) Enẹwutu mì gbọ mí ni nọla sọn walọyizan aihọn he mayọn Jiwheyẹwhe tọn mẹ na mí nido sọgan pagigona Jehovah bo yọn-na-yizan to sinsẹ̀nzọn etọn mẹ.—2 Timoti 2:20-22.
21. To kọndopọmẹ hẹ wekanhlanmẹ Jakobu tọn, kanbiọ dogọ tẹlẹ wẹ jẹ na dogbapọnnanu mítọn?
21 Gbọnmọ dali ayinamẹ Jakobu tọn he mí ko gbadopọnna dona gọalọna mí nado doakọnna whlepọn lẹ bo tẹdo yise mítọn go. E dona hẹn pinpẹn-nutọn-yinyọnẹn mítọn siso na Nunamẹtọ owanyinọ nunina dagbe lẹ tọn. Podọ ohó Jakobu tọn lẹ gọalọna mí nado yí sinsẹ̀n-bibasi madodiho zan. Onú devo tẹwẹ e hẹn wá ayidonugo mítọn mẹ? Afọdide dogọ tẹlẹ wẹ mí sọgan ze nado dohia dọ mí tindo yise nugbo to Jehovah mẹ?
[Nudọnamẹ Odò Tọn]
a To oplọn mẹdetiti kavi whẹndo tọn do hosọ ehe po awe he na bọdego po ji whenu, hiẹ na mọ ẹn yin alemọyinu titengbe nado hia adà dopodopo wekanhlanmẹ yise hẹnlodo Jakobu tọn.
Nawẹ Hiẹ Na Na Gblọndo Gbọn?
◻ Etẹwẹ na gọalọna mí nado doakọnna whlepọn lẹ?
◻ Mahopọnna whlepọn lẹ, naegbọn Klistiani lẹ sọgan jaya?
◻ Nawẹ mí sọgan yin basitọ ohó lọ tọn gbọn?
◻ Etẹwẹ sinsẹ̀n-bibasi madodiho bẹhẹn?
[Yẹdide to weda 5]
To whenuena mì to whlepọn mẹ, mì yí yise zan to huhlọn Jehovah tọn mẹ nado na gblọndo odẹ̀ lẹ
[Yẹdide to weda 6]
“Basitọ ohó lọ tọn” lẹ to Ahọluduta Jiwheyẹwhe Tọn lá lẹdo aihọn pé