• Be Kunnudetọ Jehovah Tọn lẹ Yin Klistiani Nugbo lẹ Ya?
    Duvivi Ogbẹ̀ Tọn Kakadoi!—Hodọdopọ Sinai Do Biblu Ji

    • 3. Nawẹ Kunnudetọ Jehovah tọn lẹ nọ do owanyi hia taidi Jesu gbọn?

      Jesu yiwanna devi etọn lẹ sọmọ bọ yé taidi whẹndo etọn. (Hia Malku 3:35.) Mọdopolọ, Kunnudetọ Jehovah tọn lẹ yin whẹndo he to kọndopọ mẹ lẹdo aihọn pé de. Enẹ wẹ zọ́n bọ mí nọ ylọ ode awetọ mítọn dọ mẹmẹsunnu po mẹmẹyọnnu po. (Filemọni 1, 2) Mí sọ nọ setonuna gbedide lọ he dọmọ: “Mì tindo owanyi na pipli mẹmẹsunnu lẹ tọn pete.” (1 Pita 2:17) Kunnudetọ Jehovah tọn lẹ nọ do owanyi enẹ hia to aliho susu mẹ, taidi alọgigọna yisenọ hatọ mítọn lẹ lẹdo aihọn pé to ojlẹ nuhudo tọn lẹ mẹ.

  • Baptẹm—Yanwle He Nọ Hẹn Ale Wá De!
    Duvivi Ogbẹ̀ Tọn Kakadoi!—Hodọdopọ Sinai Do Biblu Ji

    • 6. Baptẹm yíyí nọ hẹnmẹ zun hagbẹ whẹndo Jehovah tọn

      Eyin mí yí baptẹm, mí nọ lẹzun hagbẹ whẹndo he tin lẹdo aihọn pé bosọ to pọninọ mẹ de tọn. Mahopọnna dọ otò voovo mẹ wẹ mí wá sọn bọ ninọmẹ mítọn lẹ sọ gbọnvo, nuyise dopolọ lẹ wẹ mímẹpo tindo bosọ nọ setonuna nujinọtedo walọ dagbe tọn dopolọ lẹ to gbẹzan mítọn mẹ. Hia Salmu lẹ 25:14 gọna 1 Pita 2:17, enẹgodo dọhodo kanbiọ ehe ji:

      • Nawẹ baptẹm nọ yinuwado haṣinṣan he mẹde tindo hẹ Jehovah podọ hẹ mẹdevo he nọ sẹ̀n Jiwheyẹwhe lẹ ji gbọn?

      Bẹplidopọ yẹdide tọn: Yọnnu he ko yí baptẹm de gọ́ na ayajẹ dile e to nulẹnpọn do haṣinṣan he sin vivi e nọ dù hẹ mẹdevo lẹ to agun lọ mẹ ji. 1. E to nuhe to ahun ji na ẹn lẹ dọna mẹmẹyọnnu de. 2. E to alọgọna mẹmẹyọnnu mẹhomẹ de nado zinzọnlin. 3. E to núdù dopọ hẹ họntọn etọn lẹ he bẹ jọja po mẹhomẹ lẹ po hẹn. 4. E to yẹwhehodọ na dawe de, bọ mẹmẹyọnnu devo zọnhẹ ẹ. 5. E to fọto de dopọ hẹ Kunnudetọ awe devo lẹ he wá sọn akọ̀ voovo mẹ to plidopọ de ji.
  • Nọ Yidogọna Pọninọ Agun lọ Tọn
    Duvivi Ogbẹ̀ Tọn Kakadoi!—Hodọdopọ Sinai Do Biblu Ji

    • Eyin mí topọ hẹ yisenọ hatọ mítọn lẹ, mí nọ tindo numọtolanmẹ Ahọlu Davidi tọn nkọ, mẹhe dọ dọ: “Pọ́n! Lehe e yọ́n bo vivi do sọ dọ mẹmẹsunnu lẹ ni nọ nọpọ́ to kọndopọ mẹ!” (Salmu lẹ 133:1) Pọninọ he to ṣẹnṣẹn mítọn ma wá gbọn kosọ dali. E nọ biọ dọ dopodopo mítọn ni yí adà etọn wà wẹ.

      1. Etẹwẹ nọ jẹna ayidego to omẹ Jiwheyẹwhe tọn lẹ ṣẹnṣẹn?

      Eyin a ko tọ́nwhẹ̀n bo basi opli to lẹdo devo mẹ pọ́n, a sọgan nọma mọnukunnujẹ ogbè agun enẹ tọn mẹ, etomọṣo a na voawu ganji. Etẹwutu? Na Biblu gọna owe sinai do Biblu ji dopolọ lẹ wẹ mí nọ plọn lẹdo aihọn pé. Mí sọ nọ dovivẹnu nado do owanyi hia ode awetọ. Mahopọnna fidepope he mí nọ nọ̀, mímẹpo wẹ “nọ dawhá ylọ oyín Jehovah tọn, nado nọ basi sinsẹ̀n hlan ẹn to pọninọ mẹ.”—Zefania 3:9, po nudọnamẹ odò tọn po.

      2. Etẹwẹ a sọgan nọ wà nado hẹn pọninọ tin-to-aimẹ?

      “Mì yiwanna ode awetọ mìtọn sisosiso sọn ahun mẹ wá.” (1 Pita 1:22) Nawẹ a sọgan yí ayinamẹ ehe do yizan mẹ gbọn? Ma nọ to nulẹnpọn mapote do awugbopo mẹdevo lẹ tọn ji blo, amọ́ nọ na ayidonugo jẹhẹnu dagbe he yé tindo lẹ. Kakati nado nọ wanu dopọ hẹ mẹhe po hiẹ po tindo nususu to kọndopọ mẹ lẹ kẹdẹ, tẹnpọn nado nọ jẹakọ hẹ mẹmẹsunnu gọna mẹmẹyọnnu he po hiẹ po gbọnvona mìde to adà susu mẹ lẹ ga. Podọ mí sọgan nọ dovivẹnu nado họ̀nadọna numọtolanmẹ nuvẹun tọn depope he sọgan to ahun mítọn mẹ.—Hia 1 Pita 2:17.a

      3. Nawẹ a na yinuwa do eyin gbemanọpọ de fọ́n to hiẹ po Klistiani hatọ de po ṣẹnṣẹn?

      Mí tin topọ nugbo, amọ́ mapenọ lẹ wẹ mímẹpo. E nọ wá jọ bọ mí nọ tùnafọ afọ ji na ode awetọ kavi gbleawuna mínọzo. Enẹwutu, Ohó Jiwheyẹwhe tọn dọna mí nado “nọ to . . . jijona ode awetọ,” bosọ yidogọ dọ: “Kẹdẹdile Jehovah jona mì sọn ojlo mẹ wá do, mọ wẹ mì dona nọ wà do ga.” (Hia Kolosinu lẹ 3:13.) Whla madosọha lẹ wẹ mí ko hẹn awugblena Jehovah, ṣogan ewọ jona mí. Enẹwutu, e nọ donukun dọ mílọsu ni jona mẹmẹsunnu mítọn lẹ. Eyin a doayi e go dọ a ko hẹn awugblena mẹde, ze afọdide tintan lọ nado gbọwhẹ hẹ mẹlọ.—Hia Matiu 5:23, 24.b

      DINDONANU DOGỌ

      Lẹnnupọndo nudelẹ ji he a sọgan nọ wà nado hẹn pọninọ po jijọho po tin to agun mẹ.

      Bẹplidopọ yẹdide tọn: Mẹmẹsunnu de doafọna jijọho. 1. Mẹmẹsunnu etọn de ṣì hodọna ẹn. 2. E to nulẹnpọndo nuhe mẹmẹsunnu lọ dọna ẹn ji. 3. E dín ayinamẹ Biblu tọn nado yọ́n nuhe e dona wà to whenue mẹde gbleawuna ẹn. 4. E wá do dopé hẹ mẹmẹsunnu diẹ lọ na yé nido nù kafe dopọ podọ nado dín jijọho hẹ ẹ.

      Etẹwẹ a na wà nado hẹn jijọho tin-to-aimẹ?

      4. Nọ nọavùnte sọta nuvẹun

      Ojlo mítọn wẹ nado yiwanna mẹmẹsunnu mítọn lẹpo. Amọ́, e gán nọ wá vẹawuna mí nado kẹalọyi mẹhe aṣa po ninọmẹ yetọn po gbọnvona mítọn lẹ. Etẹwẹ sọgan gọalọna mí? Hia Owalọ lẹ 10:34, 35, enẹgodo dọhodo kanbiọ ehelẹ ji:

      • To whenuena e yindọ gbẹtọ wunmẹ lẹpo wẹ Jehovah nọ kẹalọyi nado lẹzun Kunnudetọ etọn lẹ, nawẹ enẹ dona yinuwado nukun he hiẹ lọsu nọ yí do pọ́n mẹhe aṣa po ninọmẹ yetọn lẹ po gbọnvona towe lẹ ji gbọn?

      • Nuvẹun wunmẹ tẹwẹ mẹsusu nọ tindo to lẹdo towe mẹ, ehe hiẹ jlo na dapana?

      Hia 2 Kọlintinu lẹ 6:11-13, enẹgodo dọhodo kanbiọ ehe ji:

      • Etẹwẹ a lẹndọ a sọgan nọ wà nado jẹakọ hẹ mẹmẹsunnu gọna mẹmẹyọnnu he aṣa po ninọmẹ yetọn lẹ po gbọnvona towe lẹ dogọ?

      5. Nọ jonamẹ sọn ojlo mẹ wá bo nọ dín jijọho

      Jehovah nọ jona mí sọn ojlo mẹ wá, dile etlẹ yindọ e ma gán jọ gbede bọ e na wá biọ dọ míwlẹ ni jona ewọ. Hia Salmu lẹ 86:5, enẹgodo dọhodo kanbiọ ehelẹ ji:

      • Obá tẹ mẹ wẹ jonamẹ Jehovah tọn gbloada jẹ?

      • Be a yọ́n pinpẹn etọn dọ Jehovah nọ jonamẹ ya? Etẹwutu?

      • Ninọmẹ tẹlẹ mẹ wẹ e gán nọ vẹawuna mí nado nọ jijọho mẹ hẹ mẹdevo lẹ te?

      Nawẹ mí sọgan hodo apajlẹ Jehovah tọn bo hẹn pọninọ he tin to mẹmẹsunnu po mẹmẹyọnnu mítọn lẹ po ṣẹnṣẹn dote gbọn? Hia Howhinwhẹn lẹ 19:11, enẹgodo dọhodo kanbiọ ehe ji:

      • Eyin yè hẹn we jẹflumẹ kavi hẹn homẹgble we, etẹwẹ a gán wà nado didẹ nuhahun lọ?

      To whedelẹnu, nuyiwa mítọn lẹ nọ hẹn homẹgble mẹdevo lẹ. Eyin enẹ jọ, etẹwẹ mí dona nọ wà? Hò VIDEO lọ, enẹgodo dọhodo kanbiọ he bọdego ji.

      VIDEO: Afọdidona Jijọho Nọ Hẹn Dona lẹ Wá (6:01)

      • To video lọ mẹ, etẹwẹ mẹmẹyọnnu lọ wà nado dín jijọho?

      6. Nọ ze ayiha do jijọ dagbe mẹmẹsunnu po mẹmẹyọnnu towe lẹ po tọn ji

      To whenue mí vẹ́ hẹ mẹmẹsunnu po mẹmẹyọnnu mítọn lẹ po, mí nọ yọ́n nugopipe yetọn lẹ gọna awugbopo yetọn lẹ. Etẹwẹ gán gọalọna mí nado nọ ze ayiha do nugopipe yetọn lẹ ji? Hò VIDEO lọ, enẹgodo dọhodo kanbiọ he bọdego ji.

      VIDEO: Dike Jijọ Towe Ni Dọnmẹdogo! (5:10)

      • Etẹwẹ sọgan gọalọna we nado nọ na ayidonugo jẹhẹnu dagbe mẹmẹsunnu po mẹmẹyọnnu towe lẹ po tọn?

      Jehovah nọ na ayidonugo jẹhẹnu dagbe mítọn lẹ. Hia 2 Otànnugbo lẹ 16:9a, enẹgodo dọhodo kanbiọ ehe ji:

      • Numọtolanmẹ tẹwẹ a tindo todin he a yọnẹn dọ Jehovah nọ na ayidonugo jijọ dagbe he a do lẹ?

      Alọkẹ he yè yí zannu diamọndi tọn do basi de.

      Eyin zannu diamọndi tọn de tlẹ do oblọ, e gbẹ́ nọ họakuẹ. Mọdopolọ, mahopọnna dọ mẹmẹsunnu po mẹmẹyọnnu mítọn lẹpo po wẹ yin mapenọ, yé gbẹ́ họakuẹ taun to nukun Jehovah tọn mẹ

      MẸDELẸ NỌ DỌ DỌ: “Eyin n’jona ẹn tlolo domọ, e ma na yọ́n obá he mẹ nuhe e wà lọ vẹna mi jẹ.”

      • Naegbọn mí dona nọ yawu jona mẹdevo lẹ sọn ojlo mẹ wá?

      BLADOPỌ

      A sọgan gọalọ nado hẹn pọninọ agun lọ tọn go, eyin a nọ jonamẹ bosọ nọ do owanyi hia mẹmẹsunnu po mẹmẹyọnnu towe lẹpo po.

      Dogbapọn

      • Nawẹ a sọgan nọavùnte sọta nuvẹun gbọn?

      • Etẹwẹ a na wà eyin gbemanọpọ de fọ́n to hiẹ po Klistiani hatọ de po ṣẹnṣẹn?

      • Naegbọn a na jlo nado nọ jona mẹdevo lẹ dile Jehovah nọ wà do?

      Yanwle

      PỌ́N NUDỌNAMẸ DEVO LẸ

      Pọ́n lehe dopo to apajlẹ he Jesu na lẹ mẹ sọgan gọalọna mí nado dapana whẹdidana mẹdevo lẹ do.

      De Atinpo lọ Sẹ̀ (6:56)

      Be e biọ dọ mí ni nọ vẹvẹ namẹ eyin mí lẹndọ mí ma ko ṣì nude wà ya?

      “Ovẹvivẹ—Aliho Dagbe de Nado Dín Jijọho” (Atọ̀họ̀-Nuhihọ́ lọ Tọn, 1er novembre 2002 tọn)

      Pọ́n lehe mẹdelẹ ko plọn nado nọ yinuwa hẹ mẹdevo lẹ matin mẹnukuntahihopọn do.

      Ma Pọ́n Awusọhia Gbonu Tọn Do Dawhẹ Blo (5:06)

      Gbadopọnna aliho delẹ he mẹ a sọgan nọ didẹ gbemanọpọ he a tindo hẹ mẹdevo lẹ te whẹpo nido wá bẹpla jijọho agun lọ tọn.

      “Nọ Didẹ Gbemanọpọ lẹ po Gbigbọ Owanyi Tọn Po” (Atọ̀họ̀-Nuhihọ́ lọ Tọn, mai 2016 tọn)

      a Pọ́n Ayidonugo 6tọ mẹ nado mọ lehe owanyi nọ whàn Klistiani lẹ ma nado nọ do azọ̀n bẹplamẹ mẹdevo lẹ do.

      b Pọ́n Ayidonugo 7tọ mẹ nado mọ lehe mí sọgan nọ didẹ whẹho he gando azọ́n po ajọwiwa po gọna whẹdidọgbo go lẹ do.