Weta 44
Osọhia po Hiẹ Po
1. (a) Mẹhẹndeji tẹwẹ angẹli lọ na Johanu na nuhe du opagbe jiawu lẹ to Osọhia mẹ? (b) Mẹnu wẹ dọmọ, “Yẹn ja yiyayiya,” podọ whetẹnu wẹ “wiwá” ehe yin?
TO ZẸẸMẸ vivi Jelusalẹm Yọ́yọ́ lọ tọn lẹ hihia godo, hiẹ sọgan yin whinwhan nado kanse: ‘Be onu jiawu mọnkọtọn de sọgan wá tin nugbo?’ Johanu na gblọndo hlan kanbiọ enẹ dogbọn linlin bibasi na hogbe he bọdego angẹli lẹ tọn dali: “E sọ dọ hlan mi, dọ, Dódó po nugbo po wẹ oho helẹ: [Jehovah] Jiwheyẹwhe yẹwhegan wiwe lẹ tọn wẹ do angẹli etọn hlan nado do onu he to na wá jọ dinvie hia hlan devi etọn lẹ. Do ayi e go, yẹn ja yiyayiya; [ayajẹnọ] wẹ ewọ he to oho dọdai tọn he tin to owe he mẹ lẹ tọn yìn.” (Osọhia 22:6, 7) Dọdai jiawu Osọhia tọn lẹpo na mọ hẹndi yetọn yí nugbo! To hodọ to oyin Jesu tọn mẹ, angẹli lọ dọ dọ Jesu ja to madẹnmẹ, “yiyayiya.” Ehe dona ko yin wiwá Jesu tọn “taidi ajotọ de” nado va kẹntọ Jehovah tọn lẹ sudo bo hẹn Osọhia wá hẹndi pete ayajẹnọ tọn lọ mẹ. (Osọhia 16:15, 16) Enẹwutu mí dona yí gbẹzan mítọn lẹ sọgbe hẹ hogbe “owe he” tọn lẹ, yedọ Osọhia, nado yin yiylọ dọ ayajẹnọ to ojlẹ enẹ mẹ.
2. (a) Nawẹ Johanu yinuwa hlan nuhọakuẹ-yinyin Osọhia lọ tọn gbọn podọ etẹwẹ angẹli lọ dọ na ẹn? (b) Etẹwẹ mí plọn sọn hogbe angẹli lọ tọn lẹ mẹ he yin, “Hiẹ wà mọ blo!” po “litaina Jiwheyẹwhe” po?
2 To osọhia adọkunnọ mọnkọtọn de godo, e yin nukunmọjẹemẹ dọ Johanu tindo numọtolanmẹ dutomẹji zẹjlẹgo lọ tọn: “Podọ yẹn Johanu wẹ ewọ he sè bo sọ mọ onu helẹ. Whenuena yẹn sè bo mọ, yẹn jẹklo nado litai to afọ angẹli lọ tọn nukọn, he do onu helẹ hia mi. Whenẹnu wẹ e dọ hlan mi, dọ, Pọn, hiẹ wà mọ blo: devi hatọ de wẹ yẹn po hiẹ po, po yẹwhegan mẹmẹsunnu towe lẹ po, po ye he to oho he tin to owe he mẹ tọn yìn lẹ po: litaina Jiwheyẹwhe.” (Osọhia 22:8, 9; yijlẹdo Osọhia 19:10 go.) Nugbẹnamẹ he yin didọ whlaawe ma nado sẹ̀n angẹli lẹ yin nuhe wá to ganmẹ to ojlẹ Johanu tọn mẹ, whenuena e sọawuhia dọ mẹdelẹ nọ basi sinsẹ̀n mọnkọtọn lẹ kavi nọ dọ dọ ye tindo osọhia vonọtaun lẹ sọn angẹli lẹ de. (1 Kọlintinu lẹ 13:1; Galatianu lẹ 1:8; Kọlọsinu lẹ 2:18) Egbehe, e zinnudo nugbo lọ ji dọ mí dona sẹ̀n Jiwheyẹwhe kẹdẹ. (Matiu 4:10) Mí ma dona hẹn sinsẹ̀n-bibasi wiwe gble po sinsẹ̀n-bibasi na mẹdevo kavi onu devo po gba.—Isaia 42:5, 8.
3, 4. Etẹwẹ angẹli lọ zindonukọn nado dọ na Johanu, podọ nawẹ pipotọ yiamisisadode lọ setonuna hogbe etọn lẹ gbọn?
3 Johanu zindonukọn: “E sọ dọ hlan mi, dọ, Hiẹ yí hiadonu do tlẹ́ oho dọdai tọn he tin to owe he mẹ lẹ blo: na ojlẹ lọ to sisẹpọ. Ewọ he yin mawàdódónọ gbọ ni to mawàdódó wà zọnmii: podọ ewọ he yin dihonọ, gbọ e ni to dihonọ yin zọnmii: podọ ewọ he yin dódónọ, gbọ e ni to dódó wà zọnmii: podọ ewọ he yin wiwe, gbọ e ni to wiwe yin zọnmii.”—Osọhia 22:10, 11.
4 Pipotọ yiamisisadode lọ to egbe ko setonuna ogbè angẹli lọ tọn lẹ. Ye ma tlẹ́ oho dọdai lọ tọn lẹ gba. Etẹ, zinjẹgbonu tintan taun Zion’s Watch Tower and Herald of Christ’s Presence (juillet 1879) tọn jẹ zẹẹmẹ lẹ basi ji na wefọ Osọhia tọn susu lẹ. Dile mí doayi e go do to weta bẹjẹeji tọn mítọn mẹ, Kunnudetọ Jehovah tọn lẹ to owhe lẹ gblamẹ ko zin owe hinhọ́n hẹnwanamẹtọ devo lẹ jẹgbonu do Osọhia ji. Todin mí ko sọ dọn ayidonugo mẹhe yiwanna nugbo lẹpo tọn hlan dọdai huhlọnnọ Osọhia tọn lẹ po hẹndi yetọn po.
5. (a) Etẹwẹ lo eyin gbẹtọ lẹ jlo na yi nukun pẹvi do pọn nugbẹnamẹ po ayinamẹ lẹ po he tin to Osọhia mẹ? (b) Etẹwẹ dona yin gbeyiyi homẹmimiọnnọ po dódónọ lẹ po tọn?
5 Eyin gbẹtọ lẹ jlo na yi nukun pẹvi do pọn nugbẹnamẹ lẹ po ayinamẹ lẹ po to Osọhia mẹ, eyọn, ye sọgan to mọ wà! “Ewọ he yin mawàdódónọ, gbọ e ni to mawàdódó wà zọnmii.” Eyin e yin nudide yetọn, enẹnọ he to bibli to diho ojlẹ gbeyina nulẹpo tọn ehe mẹ lẹ sọgan ku to diho enẹ mẹ. To madẹnmẹ, whẹdida Jehovah tọn lẹ na yin bibasi jẹ opodo, bo bẹsọn vasudo Babilọni Daho lọ tọn ji. Na omẹ homẹmiọnnọ lẹ ni gbọn vivẹnu dali do dotoai hlan ogbè yẹwhegan lọ tọn lẹ: “Mì din [Jehovah] . . . mì din dódó, mì din homẹmiọn: e sọgan yin mì na yin whiwhla to azan adi [Jehovah] tọn tọn gbe.” (Zẹfania 2:3) Na nuhe du enẹnọ he ko klan yede do wiwe na Jehovah lẹ, “ewọ he yin dódónọ, gbọ e ni to dódó wà zọnmii: podọ ewọ he yin wiwe, gbọ e ni to wiwe yin zọnmii.” Nuyọnẹntọ lọ yọnẹn dọ ale ojlẹ gli tọn he nọ wá sọn ylando mẹ depope ma sọgan yin yiyijlẹdo dona madopodo lẹ go gba he na yin vivi etọn du dogbọn enẹnọ he hodo dódó po wiwe-yinyin po lẹ dali. Biblu dọmọ: “Mì dindona mìde, eyin mì tin to yise mẹ; mì dindona mìde dagbedagbe.” (2 Kọlintinu lẹ 13:5) Sinai do walọyizan he hiẹ basi nudide etọn bo gbọṣi e mẹ tọn ji, hiẹ na mọ ale towe yí.—Psalm 19:9-11; 58:10, 11.
6. Etẹwẹ Johanu dọ dile e to hodọ hlan Osọhia hiato lẹ na ojlẹ godo tọn lọ to dọdai lọ mẹ?
6 Jehovah, Ahọlu madopodo, to hodọ na Osọhia hiatọ lẹ whla godo tọn lọ to dọdai lọ mẹ, dọmọ: “Bo do ayi e go, yẹn ja yiyayiya; ale ṣie sọ tin to dee, nado na mẹdopodopo kẹdẹdile azọn etọn lẹ na te. Yẹn wẹ Alfa, yẹn wẹ Omẹga, odòdo po opodo po, nukọntọ, godotọ. [Ayajẹnọ] wẹ yé he yan awugbo yetọn lẹ, na yé nido tindo ojlọjẹ nado wá atin ogbẹ̀ tọn lọ kọn, bo do sọgan gbọn họngbo lọ ji biọ otodaho lọ mẹ. Gbonu wẹ avún lẹ te, owọntọ lẹ, ayọdetọ lẹ, hlọnhutọ lẹ, boṣiọsẹ̀ntọ lẹ, podọ omẹ depope he yiwanna lalo bo sọ to lalo de basi lẹ.”—Osọhia 22:12-15.
7. (a) Na etẹ wẹ Jehovah “ja yiyayiya”? (b) Etẹwutu nukọntọ Mẹylọhodotọklisti tọn lẹ ma na tindo mahẹ de to Jelusalẹm Yọ́yọ́ lọ mẹ?
7 Whladopo dogọ, Jehovah Jiwheyẹwhe zinnudo nupojipetọ-yinyin madopodo etọn ji po nugbo lọ po dọ nuhe e ko lẹndai tintan lọ, emi na basi i to godomẹ. E “ja yiyayiya” nado dawhẹ bo yi ale na enẹnọ he to dindin in vẹkuvẹku lẹ. (Heblu lẹ 11:6) Nujinọtedo etọn lẹ nọ dohia mẹhe na mọ ale yí po mẹhe na yin gbigbẹdai po. Nukọntọ Mẹylọhodotọklisti tọn lẹ ko yinuwa taidi “avún unbọpẹn” lẹ, bo yi nukun pẹvi do pọn fẹnnuwiwa he Jehovah basi zẹẹmẹna tofi lẹ. (Isaia 56:10-12; pọn Deutelonomi 23:18 ga, New World Translation Reference Bible, nudọnamẹ odo tọn.) Na nugbo tọn, ye ko ‘yiwanna bo ko zindonukọn’ to sinsẹ̀nnuplọnmẹ po nuyise lalo tọn lẹ po mẹ bo ko yi nukun pẹvi pete do pọn ayinamẹ Jesu tọn hlan agun ṣinawe lẹ. Enẹwutu ye ma tindo mahẹ depope to Jelusalẹm Yọ́yọ́ lọ mẹ gba.
8. (a) Mẹnu lẹ kẹdẹ wẹ nọ “yì atin ogbẹ̀ tọn lọ kọn,” podọ etẹwẹ ehe zẹẹmẹdo? (b) Nawẹ gbẹtọ susugege lọ “yan aṣọvọ yetọn lẹ” gbọn podọ nawẹ ye hẹn teninọ wiwe de go gbọn?
8 Klistiani yiamisisadode enẹlẹ kẹdẹ he “yan aṣọvọ yetọn lẹ” nugbo nado yin wiwe to nukun Jehovah tọn lẹ mẹ wẹ tindo lẹblanulọkẹyi lọ nado “yì atin ogbẹ̀ tọn lẹ kọn.” Enẹ wẹ yindọ, ye mọ jlọjẹ po oylọ lọ po yí hlan ogbẹ̀ jọmaku to teninọ olọn mẹ tọn yetọn mẹ. (Yijlẹdo Gẹnẹsisi 3:22-24; Osọhia 2:7; 3:4, 5 go.) To oku yetọn taidi gbẹtọ lẹ godo, ye nọ biọ Jelusalẹm Yọ́yọ́ lọ mẹ dogbọn fọnsọnku dali. Angẹli 12 lẹ nọ jo ye do biọ e mẹ, bo nọ hẹn enẹnọ lẹ do ola he nọ to lalo do kavi nọ to mawe lẹ basi dile etlẹ yindọ ye dọ dọ ye tindo todido olọn mẹ tọn de. Gbẹtọ susugege lọ to aigba ko “yan aṣọvọ yetọn bo ko hẹn ye zun wewe to ohùn Lẹngbọvu lọ tọn mẹ” ga bo tindo nuhudo nado hẹn teninọ wiwe yetọn go. Ye sọgan wà ehe dogbọn hinhọ̀nna fẹnnuwiwa lẹ he Jehovah ko gbẹnunamẹ deji tofi dali, podọ dogbọn tudohomẹnamẹ Jesu tọn to wẹndomẹ ṣinawe etọn lẹ hlan agun lẹ hinhẹn do ayihamẹ dali.—Osọhia 7:14; weta 2 po 3 po.
9. Hogbe tẹlẹ wẹ Jesu dọ, podọ mẹnu lẹ wẹ wẹndomẹ po Osọhia blebu lọ po yin didọ hlan tintan?
9 To Jehovah godo, Jesu dọho. E dọ hogbe tulinamẹ tọn ehelẹ hlan omẹ ahun jijlọnọ lẹ he hia Osọhia, dọmọ: “Yẹn Jesu ko do angẹli ṣie hlan nado dekunnu onu helẹ tọn hlan mì to agun lẹ mẹ. Yẹn wẹ adọ ovi Davidi tọn, podọ sunwhlẹvu hinhọ́n afọnnu lọ tọn.” (Osọhia 22:16) Mọwẹ, hogbe ehelẹ tin “na agun lẹ” whẹ. Tintan whẹ, ehe yin wẹndomẹ de na agun Klistiani yiamisisadode lẹ tọn to aigba ji. Nuhe tin to Osọhia mẹ lẹpo wẹ yin didọ hlan Klistiani yiamisisadode lẹ whẹ, he na nọ Jelusalẹm Yọ́yọ́ lọ mẹ. Gbọn agun enẹ gblamẹ, gbẹtọ susugege lọ nọ tindo lẹblanulọkẹyi nado mọ nukunmọjẹnumẹ nugbo dọdai tọn họakuẹ ehelẹ tọn yí ga.—Johanu 17:18-21.
10. Etẹwutu Jesu ylọ ede dọ (a) “adọ ovi Davidi tọn” lọ? (b) “sunwhlẹvu afọnnu tọn”?
10 Jesu Klisti wẹ ye deazọnna nado hẹn Osọhia wá na Johanu podọ gbọn ewọ dali hlan agun lọ. Jesu yin “adọ ovi Davidi tọn.” To agbasaliho e wá sọn Davidi mẹ bo gbọn mọ dali do jẹ nado yin Ahọlu Ahọluduta Jehovah tọn tọn. E na sọ lẹzun “Otọ́ Madopodo” Davidi tọn ga, bo gbọn mọ dali do hẹn “adọ” Davidi tọn. (Isaia 9:6; 11:1, 10) E yin Ahọlu jọmaku whepoponu tọn to hukan Davidi tọn ji, bo hẹn alẹnu Jehovah tọn hẹ Davidi di, podọ “sunwhlẹvu” lọ he yin didọdai to azan Moṣe tọn gbe. (Sọha lẹ 24:17; Psalm 89:34-37) Ewọ wẹ “sunwhlẹvu afọnnu” tọn lọ, he fọnṣite, bo hẹn okle nado wá. (2 Pita 1:19) Vivẹnudido kẹntọ daho Babilọni Daho lọ tọn lẹpo ma penugo nado hẹnalọtena finfọn gigonọ ehe gba.
Dọ: “Wá!”
11. Oylọ gbangba tọn tẹwẹ Johanu zedonukọnnamẹ todin, podọ mẹnu wẹ sọgan yigbe na ẹn?
11 Todin ojlẹ Johanu tọn wẹ wá nado dọho. Sọn ahun he yin gigọ po pinpẹn nutọn yinyọnẹn po mẹ na onu he e mọ bo sè lẹ, e dọmọ: “Gbigbọ po asiyọyọ po dọmọ, Wá. Ewọ he to sise ni dọmọ, Wá. Podọ mẹhe nugbla hù gbọ e ni wá. Ewọ he jlo, gbọ e ni yí osin ogbẹ̀ tọn lọ vọnu.” (Osọhia 22:17) Alemọyinu avọsinsan fligọ Jesu tọn tọn lẹ ma na nọte do 144 000 lẹ kẹdẹ ji gba, na oylọ gbangba die tin tofi. Gbigbọ mẹwhantọ Jehovah tọn to azọnwa gbọn asiyọ́yọ́ lọ tọn gblamẹ, bọ wẹndomẹ lọ to nukọnzindo nado yin lila jẹgbonu po hinhọ́n lẹpo po: “Yí osin ogbẹ̀ tọn lọ vọnu.” (Pọn Isaia 55:1; 59:21 ga.) Mẹdepope he nugbla dódó tọn to hùhù yin yiylọ nado “wá” bo mọ ale yí sọn nunamẹtọ-yinyin Jehovah tọn mẹ. (Matiu 5:3, 6) Lehe hagbẹ aigba tọn sọgodo tọn lẹpo he yigbe na oylọ ehe he yin hagbẹ Johanu tọn lẹ tọn yin lẹblanulọkẹyinọ sọ!
12. Nawẹ gbẹtọ susugege lọ yigbe na oylọ lọ he yin Osọhia 22:17 tọn gbọn?
12 Sọn bẹjẹeji owhe 1930 tọn lẹ mẹ, sọha he to agayi gbẹtọ susugege lẹ tọn ko to “sisè”—yedọ ko to pipayi oylọ lọ go. Taidi hagbẹ afanumẹ yiamisisadode yetọn lẹ, ye ko wá jẹ teninọ wiwe tọn de kọn to Jehovah nukọn. Yé to nukundo ojlẹ lọ whenuena Jelusalẹm Yọ́yọ́ lọ na jẹte sọn olọn mẹ nado kọn dona lẹ do gbẹtọvi lẹ ji. Whenuena ye ko sè wẹndomẹ mẹfọndotetọ he yin Osọhia lọ tọn godo, gbẹtọ susugege lọ ma nọ dọ “wá!” kẹdẹ gba ṣigba nọ gbọn nuyiwa dali do bẹ mẹdevo lẹ pli hlan agun Jehovah tọn, bo nọ plọn omẹ ehelẹ ga nado lá dọmọ: “Mẹhe nugbla hù gbọ e ni wá.” Nalete, sọha gbẹtọ susugege lọ tọn lọ to nukọnzindo to whinwhẹn mẹ, dile e ko yindọ hugan 6 000 000 yetọn to aigba 235 lẹ ji lẹdo aigba pe to mahẹ tindo po hagbẹ asiyọ́yọ́ yiamisisadode he whe hugan 9 000 lẹ tọn po to oylọ lọ hinhẹn gblo mẹ nado “yí osin ogbẹ̀ tọn lọ vọnu.”
13. Nugbẹnamẹ tẹwẹ Jesu dọ jẹgbonu?
13 Enẹgodo, Jesu wẹ sọ dọho whladopo dogọ, dọmọ: “Na yẹn sakunnu hlan ye he to oho dọdai tọn he tin to owe he mẹ se lẹ dọmọ, Eyin mẹdepope na de dogọ onu helẹ, Jiwheyẹwhe na de azọ̀nylankan he yè wlan do owe he mẹ dogọ hlan ẹn: eyin mẹdepope na depò sọn oho he tin to owe dọdai tọn he mẹ, Jiwheyẹwhe na de otẹn etọn sọn owe ogbẹ̀ tọn mẹ, sọn otodaho wiwe lọ mẹ, podọ sọn onu he yè wlan do owe he mẹ lẹ mẹ.”—Osọhia 22:18, 19.
14. Nukun tẹwẹ hagbẹ Johanu tọn yi do pọn “dọdai” Osọhia tọn lọ?
14 Enẹnọ he yin hagbẹ Johanu tọn lẹ dona dọn ayidonugo mẹtọn hlan “dọdai” Osọhia tọn lọ. E ma dona whla ẹ kavi yidogọ na ẹn gba. Wẹndomẹ etọn dona yin yẹwheho etọn dọ to gbangba, “to ohọta lẹ.” (Matiu 10:27) Osọhia yin gbingbọn sọn Jiwheyẹwhe de. Mẹnu wẹ sọgan tindo adọgbigbo nado diọ hogbe de he yin nuhe Jiwheyẹwhe lọsu ko dọ bo yí namẹ gbọn omẹ he ko to gandu taidi Ahọlu, Jesu Klisti gblamẹ? Na nugbo tọn, omẹ mọnkọtọn de na jẹ nado gboawupo to ogbẹ̀ dindin etọn mẹ bo jiya azọ̀nylankan he dona wá Babilọni Daho lọ po aihọn lọ blebu po ji tọn.
15. Etẹwẹ yin zẹẹmẹ hogbe Jesu tọn lẹ tọn dọ e “sakunnu onu helẹ tọn” podọ “yẹn ja yiyayiya”?
15 Todin Jesu yi hogbe tulinamẹ tọn godo tọn de dogọ dọmọ: “Ewọ he sakunnu onu helẹ tọn dọmọ, Mọwẹ, yẹn ja yiyayiya.” (Osọhia 22:20a) Jesu wẹ “Kunnudetọ dódónọ, nugbonọ” lọ. (Osọhia 3:14) Eyin e dekunnu na numimọ Osọhia tọn lẹ, ye dona yin nugbo. Ewọ po Jehovah Jiwheyẹwhe lọsu po zinnudo nugbo lọ ji whlasusu dọ ye ja “yiyayiya,” kavi to madẹnmẹ, yedọ Jesu dọ enẹ tofi whla-atọ́ntọ. (Osọhia 2:16; 3:11; 22:7, 12, 20) “Wiwá” lọ yin nado dawhẹna ayọdetọ daho lọ, “ahọlu” tonudidọ tọn lẹ po omẹ devo lẹpo po he diọnukunsọ “ahọludu Oklunọ [Jehovah] mítọn tọn po Klisti etọn tọn po.”—Osọhia 11:15; 16:14, 16; 17:1, 12-14.
16. To yinyọnẹn mẹ dọ Jehovah Jiwheyẹwhe po Jesu po ja niyaniya, nuwiwà nujikudo tọn tẹwẹ mí dona basi?
16 Yinyọnẹn towe dọ Jehovah Jiwheyẹwhe po Jesu Klisti po ja to niyaniya mẹ dona na we tuli nado “to nukundo, bo sọ to mizọn mizọn ji hlan wiwá azan [Jehovah] tọn tọn.” (2 Pita 3:12) Nuhe taidi jlẹkaji-ninọ aihọn tọn he yin titonu Satani tọn tọn ma yin nugbo gba. Nuhe taidi kọdetọn dagbe depope he olọn gandudu aihọn tọn lẹ tọn to Satani glọ sọgan basi yin nuhe ma na nọ aimẹ dẹn. Onu ehelẹ to jujuwayi. (Osọhia 21:1) Onu nọ aimẹ dẹn dopo kẹdẹ lọ na yin mimọ to Jehovah, Ahọluduta etọn to Jesu Klisti glọ, po aihọn opagbe tọn etọn po mẹ. A de ayidonugo towe sọn enẹ go gbede blo!—1 Johanu 2:15-17.
17. Nawẹ pinpẹn nutọn yinyọnẹn mítọn na wiwe-yinyin Jehovah tọn dona yinuwà do mí go gbọn?
17 Whelọnu lo, na hiẹ ni jo dotenmẹ do na nuhe hiẹ plọn sọn nupinplọn Osọhia tọn mẹ nado yinuwa do gbẹzan towe go sisosiso. Be pinpọn hlan tintin to finẹ olọn mẹ tọn Jehovah tọn ma du to ji we na nuhe du gigo po wiwe-yinyin daho hugan Mẹdatọ mítọn tọn ya? (Osọhia 4:1 jẹ 5:14) Lẹblanulọkẹyi tẹ die nado wadevizọn hlan Jiwheyẹwhe mọnkọtọn de! Na pinpẹn nutọn yinyọnẹn na wiwejininọ etọn ni whan we nado yi ayinamẹ Jesu tọn hlan agun ṣinawe lẹ ylọ dọ nujọnu bo dapana onu mọnkọtọn lẹ taidi owanyi na agbasanu lẹ, boṣiọ-sinsẹ̀n, fẹnnuwiwa, gbigbọjọ, plọngiglọ atẹṣiṣi tọn lẹ, kavi onu devo depope he sọgan hẹn sinsẹ̀nzọn towe ma yin alọkẹyi hlan Jehovah. (Osọhia 2:1 jẹ 3:22) Hogbe apọsteli Pita tọn lẹ hlan hagbẹ Johanu tọn sọ vọ gando gbẹtọ susugege lọ go to nunọwhinnusẹn-liho ga: “Le ewọ he ylọ mì yin wiwe do, mọwẹ mì ni yin wiwe do to owalọ alọpalọpa popo mẹ.”—1 Pita 1:15, 16.
18. To etẹ mẹ wẹ hiẹ dona yinuwa to gigọmẹ te dile e yọnbasi do, podọ etẹwutu azọ́n ehe yin niyaniya tọn todin?
18 Dogọ, na hiẹ ni yin whinwhan nado vọ zohunhun towe jlado dile hiẹ to “owhe alọkẹyi [Jehovah] tọn, podọ azan ahọsuyi Jiwheyẹwhe mítọn tọn” lá. (Isaia 35:4; 61:2) Eyin vlavo hiẹ yin apo pẹvi lọ tọn kavi gbẹtọ susugege lọ tọn, na hiẹ ni tindo mahẹ gigọ hugan dile e sọgan yọnbasi do to lilá tuntun jẹgbonu ogò ṣinawe homẹgble Jiwheyẹwhe tọn lẹ tọn mẹ, bo dọ whẹdida Jiwheyẹwhe tọn lẹ do aihọn Satani tọn ji. To ojlẹ dopolọ mẹ, yí ogbè dogọ na lila ayajẹnọ wẹndagbe madopodo lọ tọn he gando Ahọluduta zedai Jehovah po Klisti etọn tọn po go. (Osọhia 11:15; 14:6, 7) Tin to azọ́n ehe kọn po niyaniya po. Podọ ayidonugo de dọ mí tin to azan Oklunọ tọn lọ gbe ni whan susu omẹ he ma ko to Jiwheyẹwhe sẹ̀n lẹ tọn nado kọnawudopọ to azọn lọ mẹ he yin wẹndagbe lọ lilá tọn. Na omẹ ehelẹ ga ni zindonukọn hlan gbẹzan yetọn kinklandowiwe na Jiwheyẹwhe po baptẹm po to pọndohlan mẹ. Flin, “whenu to sisẹpọ”!—Osọhia 1:3.
19. Etẹwẹ yin hogbe tadona tọn lẹ he yin apọsteli yọnhonọ Johanu tọn, podọ nawẹ hiẹ nọ yigbena yé gbọn?
19 Nalete, po Johanu po, mí hodẹ vẹkuvẹku dọmọ: “Niṣẹ. Wá, Jesu Oklunọ.” Podọ Johanu, apọsteli yọnhonọ lọ yidogọ: “Ojọmiọn Jesu Klisti Oklunọ mítọn tọn ni tin po mẹwiwe lẹ po.” (Osọhia 22:20b, 21) Na ni tin po mìmẹpo he to owe ehe hia po ga. Na mì ni tindo yise dọ hẹndi pete Osọhia tọn lọ tin to yakẹ, na mìwlẹ ga nido sọgan kọnawudopọ hẹ mí to “Niṣẹ!” de didọ sọn ahun mẹ wá mẹ.
[Yẹdide to weda 314]
“Gbonu wẹ avún lẹ te . . . ”
[Yẹdide to weda 315]
‘Ayajẹnọ wẹ yé he gbọn họngbọ lẹ ji biọ otòdaho lọ mẹ’