Weta 29

Ohan Yọ́yọ́ Awhangbigbà Tọn lọ Jiji

Numimọ 9—Osọhia 14:1-20

Hosọ: Omẹ 144 000 lẹ tin po Lẹngbọvu lọ po to Osó Ziọni ji; nulila angẹli tọn lẹ dọnu gbọn aigba ji; ojijẹ lẹ yin gbingbẹ̀n

Ojlẹ hẹndi tọn: 1914 jẹ nukunbibia daho lọ kọn

 1. Etẹwẹ mí ko plọn dogbọn Osọhia weta 7, 12, po 13 po dali, podọ etẹwẹ mí na plọn todin?

LEHE e fahomẹnamẹ sọ nado lẹ́hlan numimọ Johanu tọn he bọdego lọ! Gbọnvona agun hiọawu taidi kanlin dlagọni lọ tọn lẹ, mí to mimọ devizọnwàtọ nugbonọ Jehovah tọn lẹ todin po azọnwiwa yetọn po to azan Oklunọ tọn gbe. (Osọhia 1:10) Osọhia 7:1, 3 ko dohia mí dọ jẹhọn ẹnẹ vasudo tọn lẹ yin hinhẹndote kaka jẹ whenuena afanumẹ yiamisisadode 144 000 ehe lẹpo yin ohia do ogo na. Osọhia 12:17 ko hẹn yọnẹn dọ “pipotọ okun [yọnnusi] lọ tọn” ehelẹ lẹzun yanwle vonọtaun Satani, dlagọni lọ tọn to ojlẹ enẹ mẹ. Podọ Osọhia weta 13 ko dohia mí hezeheze ogbẹ́ tonudidọ tọn lẹ he yin finfọndote to aigba ji dogbọn Satani dali nado hẹn awusinyẹnnamẹnu daho po homẹkẹn sinsinyẹn po wá devizọnwàtọ nugbonọ Jehovah tọn lẹ ji. Ṣigba kẹntọ daho enẹ ma sọgan gọkọna lẹndai Jiwheyẹwhe tọn gba! Mí na plọn todin dọ mahopọnna azọnwiwà ylankan Satani tọn, 144 000 lẹpo wẹ yin bibẹpli to awhangbigbà mẹ.

 2. Pọndohlan jẹnukọn opodo ayajẹnọ tẹ tọn wẹ Johanu na mí to Osọhia 14:1 mẹ, podọ mẹnu wẹ Lẹngbọvu lọ?

² Johanu, podọ hagbẹ Johanu tọn po e po todin yin nina pọndohlan kọdetọn ayajẹnọ enẹ tọn tọn: “Yẹn sọ pọn, do ayi e go, Lẹngbọvu de ṣite to osó Ziọni ji, po gbẹtọ fọtọ́n kantọ̀nkonukunẹnẹ po e po, yé sọ tindo oyin Otọ́ etọn tọn he yè wlan do nukọn yetọn.” (Osọhia 14:1) Dile mí ko mọ do, Lẹngbọvu ehe yin dopolọ po Mikaẹli po he klọ olọn lẹ wé dogbọn Lẹgba po aovi etọn lẹ po yinyan jẹgbonu dali. Ewọ wẹ Mikaẹli lọ he Daniẹli basi zẹẹmẹ na taidi mẹhe “ṣite na ovi [omẹ Jiwheyẹwhe] tọn lẹ” tọn dile e to awuwle nado “ṣite” to whẹdida dódó tọn Jehovah tọn lẹ hinhẹnṣẹ mẹ. (Daniẹli 12:1; Osọhia 12:7, 9) Sọn 1914, Lẹngbọvu Jiwheyẹwhe tọn he nọ yi ede do sanvọ ehe ko to teṣi to Osó Ziọni ji taidi Ahọlu Mẹssia lọ.

 3. Etẹwẹ “Osó Ziọni” lọ yin he ji Lẹngbọvu lọ po 144 000 lẹ po “ṣite” te?

³ E yin kẹdẹdile Jehovah dọdai do: “Mọ yẹn ko ze ahọlu ṣie do Ziọni osó wiwe ṣie ji.” (Psalm 2:6; 110:2) Ehe ma sọ to hodọ do Osó Ziọni aigba tọn ji gba, yedọ nọtẹn he yin Jelusalẹm aigba ji tọn, he sin otò mẹ wẹ ahọlu gbẹtọ lẹ to hukan Davidi tọn ji nọ dugan te. (1 Otannugbo lẹ 11:4-7; 2 Otannugbo lẹ 5:2) Lala, na Jesu, to oku po fọnsọnku etọn po to 33 W.M. tọn godo, yin zizedai taidi osé lọnglọnẹn dòdonu tọn de to Osó Ziọni olọn mẹ tọn ji, yedọ nọtẹn olọn tọn lọ fie Jehovah basi nudide nado ze “otò daho Jiwheyẹwhe ogbẹ̀nọ tọn, Jelusalẹm olọn tọn” lọ do. Nalete, “Osó Ziọni lọ” tofi nọtena teninọ yiaga Jesu po wheduhẹmẹtọ etọn lẹ po tọn, he wleawuna Jelusalẹm olọn tọn lọ, he yin Ahọluduta lọ. (Heblu lẹ 12:22, 28; Efesunu lẹ 3:6) E yin ninọmẹ ahọlu tọn gigonọ lọ he mẹ Jehovah ze yé daga jẹ to azan Oklunọ tọn gbe. To owhe kanweko lẹ gblamẹ, Klistiani yiamisisadode lẹ, taidi “zannu ogbẹnọ lẹ,” ko to nukọn pọn hlan vẹkuvẹku nado nọte to Osó Ziọni olọn tọn enẹ ji, bo kọnawudopọ hẹ Oklunọ Jesu Klisti pagigona lọ to Ahọluduta gigonọ etọn mẹ.—1 Pita 2:4-6; Luku 22:28-30; Johanu 14:2, 3.

 4. Nawẹ e yin gbọn dọ 144 000 lẹpo tin to ote to Osó Ziọni ji?

⁴ Johanu mọ, e ma yin Jesu kẹdẹ gba ṣigba pipli blebu hagbẹ whéduhẹmẹtọ 144 000 lẹ tọn he yin Ahọluduta olọn mẹ tọn tọn to ote to Osó Ziọni ji. To ojlẹ he yin didohia dogbọn numimọ lọ dali, susu, ṣigba e ma yin polẹpo gba, 144 000 lẹ tọn ko tin to olọn mẹ. To nukọnmẹ to numimọ dopolọ mẹ, Johanu plọn dọ delẹ to mẹwiwe lẹ mẹ na gbẹ sọ jiya bo ku to nugbonọ-yinyin mẹ. (Osọhia 14:12, 13) Whelọnu lo, na nugbo tọn, delẹ to 144 000 lẹ mẹ gbẹ sọ pò to aigba ji. Nalete nawẹ e yin gbọn dọ Johanu mọ yemẹpo to ote po Jesu po to Osó Ziọni ji?a To enẹ mẹ dọ, taidi hagbẹ agun Klistiani yiamisisadode lọ tọn lẹ, omẹ ehelẹ todin “ko sẹpọ osó Ziọni . . . podọ, otò daho Jiwheyẹwhe ogbẹ̀nọ lọ tọn, Jelusalẹm olọn tọn.” (Heblu lẹ 12:22) Taidi Paulu whenuena e gbẹ pò to aigba ji, yewlẹ—to zẹẹmẹ gbigbọmẹ tọn de mẹ—ko yin finfọn daga nado tin to kọndopọ mẹ po Jesu Klisti po to nọtẹn olọn tọn lẹ mẹ. (Efesunu lẹ 2:5, 6) Dogọ, to 1919, yé ko yigbe hlan oylọ lọ, “Mì hẹji wá ofi,” podọ to yẹhiadonu-liho “yé sọ hẹji yì olọn to aslọ mẹ.” (Osọhia 11:12) To pọndohlan Owe wiwefọ ehelẹ tọn mẹ, mí sọgan mọ dọ 144 000 lẹpo to ninọmẹ gbigbọmẹ tọn de mẹ—ko tin to Osó Ziọni ji po Jesu Klisti po.

 5. Mẹnu lẹ sin oyin wẹ yin winwlan do nukọn 144 000 lẹ tọn, podọ etẹwẹ yin zẹẹmẹ oyin dopodopo tọn?

⁵ Omẹ 144 000 lẹ ma tindo mahẹ de po sinsẹ̀ntọ kanlin ylankan lọ tọn lẹ po gba, he yin ohia do ogo na po sọha yẹhiadonu tọn 666 lọ po. (Osọhia 13:15-18) To vogbingbọn mẹ, nugbonọ ehelẹ tindo oyin Jiwheyẹwhe tọn po Lẹngbọvu lọ tọn po yin winwlan do nukọn yetọn. Matin ayihaawe Johanu, Ju de, mọ oyin Jiwheyẹwhe tọn to wekun Heblu tọn lẹ mẹ, yedọ יהוה.b To oyin Otọ́ Jesu tọn tọn tintindo he yin winwlan do nukọn yetọn dali to yẹhiadonu-liho mẹ, omẹ do ohia ogo na ehelẹ hẹn yọnẹn hlan omẹ lẹpo dọ yé yin Kunnudetọ Jehovah tọn lẹ, yedọ afanumẹ Etọn lẹ. (Osọhia 3:12) Oyin Jesu tọn tintindo yetọn he sọawuhia to nukọn yetọn lẹ dohia dọ yé yigbe dọ yé yin tintindo dogbọn ewọ dali. Ewọ wẹ “asu” opagbe tọn yetọn, podọ yewlẹ wẹ yin “asi” sọgodo tọn etọn, yedọ “nudida yọ́yọ́ de” he to Jiwheyẹwhe sẹ̀n po ogbẹ̀ olọn mẹ tọn po to pọndohlan mẹ. (Efesunu lẹ 5:22-24; Osọhia 21:2, 9; 2 Kọlintinu lẹ 5:17) Haṣinṣan vivẹ yetọn hẹ Jehovah po Jesu Klisti po nọ gando lẹnpọn po nuyiwa yetọn lẹpo po go.

Ohanjiji Di Ohan Yọ́yọ́ De

 6. Ohanjiji tẹwẹ Johanu sè, podọ nawẹ e basi zẹẹmẹ na ẹn do?

⁶ To kọndopọ mẹ po ehe po, Johanu na linlin: “Yẹn se ogbè de sọn olọn mẹ taidi ogbè otọ̀ susu tọn, podọ di wanyinyẹn daho osò tọn: yẹn sọ sè ogbè ajalẹnhotọ lẹ tọn, yé to ajalẹn yetọn lẹ hò: yé sọ to hanji di ohan yọ́yọ́ de to ofin lọ nukọn, to mẹdida ẹnẹ lẹ lọ po mẹho lẹ lọ po nukọn; mẹde ma sọ sọgan plọn ohan lọ, adavo gbẹtọ fọtọ́n kantọ̀nkonukunẹnẹ lẹ, he yè fligọ sọn aigba ji.” (Osọhia 14:2, 3) E ma yin nupaṣamẹ de gba dọ Johanu, whenuena e sè ogbè 144 000 lẹ tọn kọnawudopọ to ohan jiji vivi dopo mẹ, flin otọ̀sisa daho lẹ po wanyinyẹn osò tọn lẹ po. Lehe ajalẹnhiho họnwun enẹ vivi sọ! (Psalm 81:2) Ohan jiji to pọmẹ to aigba ji tẹwẹ sọgan sọzẹn hẹ daho-yinyin ohanjiji dagbe enẹ tọn?

 7. (a) Etẹwẹ yin ohan yọ́yọ́ lọ he yin Osọhia 14:3 tọn? (b) Nawẹ e yin gbọn dọ ohan Psalm 149:1 tọn lọ yin yọ́yọ́ to azan mítọn gbe?

⁷ Podọ etẹwẹ “ohan yọ́yọ́” ehe yin? Dile mí doayi e go to hodọdopọ do Osọhia 5:9, 10 ji mẹ do, ohan lọ tindo nude nado yiwà po lẹndai Ahọluduta Jehovah tọn lẹ tọn po nuwleawudaina jiawu etọn po, gbọn Jesu Klisti gblamẹ, na Islaeli gbigbọmẹ tọn yíyí do “duahọlu podọ yẹwhenọ hlan Jiwheyẹwhe mítọn.” E yin ohan mẹpipa tọn de na lila pe onu yọ́yọ́ Jehovah tọn lẹ tọn he e to bibasi dogbọn yizan Islaeli Jiwheyẹwhe tọn dali podọ na dagbe etọn. (Galatianu lẹ 6:16) Hagbẹ Islaeli gbigbọmẹ tọn ehelẹ yigbe hlan oylọ psalmkantọ lọ tọn he yin: “Hallelujah. Mì jihan yọ́yọ́ de hlan [Jehovah], podọ pipa etọn to oplitò mẹwiwe lẹ tọn mẹ. Mì gbọ Islaeli ni jaya to ewọ he da ẹ mẹ: Mì gbọ ovi Ziọni tọn lẹ ni yin ayanọ to ahọlu yetọn mẹ.” (Psalm 149:1, 2) Nugbo, hogbe ehelẹ ko yin winwlan owhe kanweko lẹ die, ṣigba to azan mítọn gbe, yé yin jiji po nukunmọjẹnumẹ yọ́yọ́ de po. To 1914 Ahọluduta Mẹssia tọn lọ yin jìjì. (Osọhia 12:10) To 1919 omẹ Jehovah tọn lẹ to aigba ji jẹ “oho ahọluduta tọn lọ” lá ji po zohunhun hinhẹnzun yọ́yọ́ de po. (Matiu 13:19) Yinyin zodolanmẹna dogbọn wefọ owhe tọn na 1919 (Isaia 54:17) dali bo yin tulina dogbọn hinhẹngọwá Paladisi gbigbọmẹ tọn yetọn tọn dali, yé bẹjẹeji to owhe enẹ mẹ nado ‘jihan hlan Jehovah po ohunhiho to ahun yetọn lẹ mẹ po.’—Efesunu lẹ 5:19.

 8. Etẹwutu 144 000 lẹ kẹdẹ wẹ penugo nado plọn ohan yọ́yọ́ Osọhia 14:3 tọn lọ?

⁸ Ṣigba etẹwutu e yin dọ 144 000 lẹ kẹdẹ wẹ penugo nado plọn ohan he yin hodọdego to Osọhia 14:3 mẹ lọ? Na e tindo nude nado yiwà po numimọ yetọn lẹ po taidi whéduhẹmẹtọ didè Ahọluduta Jiwheyẹwhe tọn po wutu wẹ. Yewlẹ kẹdẹ wẹ yin sisọdodovi taidi ovi Jiwheyẹwhe tọn lẹ bo yin amisana po gbigbọ wiwe po. Yewlẹ kẹdẹ wẹ yin fifligọ sọn aigba ji nado lẹzun apadewhe Ahọluduta olọn tọn enẹ tọn, podọ yewlẹ kẹdẹ wẹ “na yin yẹwhenọ lẹ . . . bo dugan taidi ahọlu lẹ” po Jesu Klisti po na owhe fọtọ́n de nado hẹn gbẹtọvi lẹ jẹ pipe kọn. Yewlẹ kẹdẹ wẹ yin mimọ nado to “hanji di ohan yọ́yọ́ de” to Jehovah lọsu nukọn.c Numimọ po todido vonọtaun po ehelẹ na yé pinpẹn nutọn yinyọnẹn Ahọluduta lọ tọn vonọtaun de bo hẹn yé penugo nado jihan dogbọn dali etọn to aliho he mẹ mẹdevo de ma sọgan te.—Osọhia 20:6; Kọlọsinu lẹ 1:13; 1 Tẹsalonikanu lẹ 2:11, 12.

 9. Nawẹ gbẹtọ susugege lọ yigbena ohanjiji mẹyiamisisadode lẹ tọn lọ gbọn, podọ tudohomẹnamẹ tẹwẹ yé gbọn mọ dali do hẹndi?

⁹ Etomọṣo, mẹdevo lẹ sè bo yigbena ohanjiji yetọn. Sọn 1935 gbẹtọ susugege he to agayi lẹngbọ devo lẹ tọn ko sè ohan awhangbà tọn yetọn bo yin whinwhan nado kọnawudopọ hẹ yé to Ahọluduta Jiwheyẹwhe tọn lilá mẹ. (Johanu 10:16; Osọhia 7:9) Nugbo, omẹ yọ́yọ́ ehelẹ ma sọgan plọn nado jì ohan yọ́yọ́ dopolọ kẹdẹdile ogán sọgodo tọn Ahọluduta Jiwheyẹwhe tọn lẹ nọ jì do gba. Ṣigba yewlẹ ga nọ jihan vivi de to pọmẹ he yin pipa hlan Jehovah tọn he yin ohangbè de he nọ ze Jehovah daga na onu yọ́yọ́ lẹ he e to bibasi. Yé gbọn mọ dali do hẹn tudohomẹnamẹ psalmkantọ lọ tọn di he yin: “Mì ji ohan yọ́yọ́ de hlan [Jehovah]: mì jihan hlan [Jehovah], mì aigba lẹpo. Mì jihan hlan [Jehovah], mì dona oyin etọn; mì nọ dọyẹwheho whlẹngan etọn tọn gbepogbe. Mì lá gigo etọn to kosi lẹ ṣẹnṣẹn, azọn jawu etọn to gbẹtọ lẹ ṣẹnṣẹn. Mì na hlan [Jehovah], mì hẹnnu gbẹtọ lẹ tọn lẹ emi, mì na gigo po huhlọn po hlan [Jehovah]. Mì dọ to kosi lẹ ṣẹnṣẹn, dọ, [Jehovah] duahọlu.”—Psalm 96:1-3, 7, 10; 98:1-9.

10. Nawẹ e yọnbasi na 144 000 lẹ nado jihan to mẹho 24 yẹhiadonu tọn lẹ “nukọn” gbọn?

¹⁰ Nawẹ 144 000 lẹ sọgan jihan to mẹho lẹ “nukọn” gbọn, dile e ko yindọ mẹho 24 lẹ wẹ 144 000 lẹ to teninọ olọn mẹ tọn gigonọ yetọn mẹ? To bẹjẹeji azan Oklunọ tọn lọ gbe, “oṣiọ he tin to Klisti mẹ” nẹlẹ yin finfọnsọnku taidi nudida gbigbọnọ lẹ. Nalete, Klistiani yiamisisadode nugbonọ he ko gbawhan lẹ tin to olọn mẹ todin, bo gbọn yẹhiadonu dali do to azọn lẹ wà he yin jijlẹdo enẹnọ he yin mimá 24 mẹho yẹwhenọ enẹlẹ tọn go. Yé yin zize do numimọ agun olọn mẹ tọn Jehovah tọn mẹ. (1 Tẹsalonikanu lẹ 4:15, 16; 1 Otannugbo lẹ 24:1-18; Osọhia 4:4; 6:11) Nalete pipotọ 144 000 lẹ tọn he gbẹ pò to aigba ji to ohan yọ́yọ́ de ji to nukọn, kavi to pọndohlan, mẹmẹsunnu fọnsọnku yetọn lẹ tọn to olọn mẹ.

11. Etẹwutu awhangbàtọ yiamisisadode lẹ yin hodọdego taidi mẹho 24 lẹ po 144 000 lẹ po?

¹¹ To fie mí jẹ ehe mí sọgan kanse ga: Etẹwutu yè dọho awhangbàtọ yiamisisadode ehelẹ tọn taidi mẹho 24 yẹhiadonu tọn lẹ po 144 000 lẹ po ga? Nuhe zọn lọ wẹ yindọ Osọhia to pipli dopo ehe pọn sọn teninọ vovo awe mẹ. Mẹho 24 lẹ nọ yin didohia to whepoponu to otẹn tangan yetọn mẹ lẹdo ofin Jehovah tọn, bo sinai taidi ahọlu po yẹwhenọ lẹ po to olọn lẹ mẹ. Yé nọtena pipli blebu 144 000 lẹ tọn to teninọ olọn mẹ tọn yetọn mẹ, dile etlẹ yindọ pipotọ pẹvi ehelẹ tọn de gbẹ pò to aigba ji. (Osọhia 4:4, 10; 5:5-14; 7:11-13; 11:16-18) Ṣigba Osọhia weta 7 zinnùdo 144 000 lẹ ji taidi mẹhe yin hinhẹnwá sọn gbẹtọvi lẹ mẹ, bo zinnùdo lẹndai daho Jehovah tọn nado do ohia ogo na sọha blebu omẹ dopodopo Islaeli gbigbọmẹ tọn lẹ tọn bo hẹn whlẹngan wá na gbẹtọ susugege madosọha de. Osọhia weta 14 wleawudaina yẹdide de he zinnùdeji dọ hagbẹ Ahọluduta tọn blebu awhangbàtọ 144 000 lẹ tọn na yin hinhẹn plidopọ po Lẹngbọvu lọ po to Osó Ziọni ji. Jẹhẹnu he kọn yé dona jẹ nado yin hihia do 144 000 lẹ mẹ sọ yin hinhẹn yọnẹn ga, dile mí na mọ do todin.d

Hodotọ Lẹngbọvu Lọ Tọn Lẹ

12. (a) Nawẹ Johanu zindonukọn to zẹẹmẹ etọn he yin 144 000 lẹ tọn mẹ gbọn? (b) To zẹẹmẹ tẹ mẹ wẹ 144 000 lẹ yin hodọdego taidi awhli lẹ te?

¹² To nukọnzinzindo to zẹẹmẹ etọn he yin 144 000 lẹ tọn he “yè fligọ sọn aigba ji” tọn mẹ, Johanu dọ na mí: “Ehelẹ wẹ yé he yè ma ko yi yọnnu do flu; na awhli wẹ yé. Ehelẹ wẹ nọ hodo Lẹngbọvu lọ to godo yì fidepope e jei. Ehelẹ wẹ yè fligọ sọn gbẹtọ lẹ mẹ, nado yin sinsẹ́n tintan hlan Jiwheyẹwhe podọ hlan Lẹngbọvu lọ. Yè ma sọ mọ bublu de to onù yetọn mẹ: na ye tin to mawàylan mẹ to ofin Jiwheyẹwhe tọn nukọn.” (Osọhia 14:4, 5) Nugbo lọ dọ “awhli” wẹ 144 000 lẹ ma zẹẹmẹdo dọ yé yin tlẹnnọ to agbasa mẹ dandan gba. Apọsteli Paulu kanwe hlan Klistiani lẹ he tindo oylọ olọn mẹ tọn dọ, dile etlẹ yindọ ale lẹ tin na Klistiani tlẹnnọ lẹ, alọwiwle yin nuhe pọnte hugan to ninọmẹ delẹ glọ. (1 Kọlintinu lẹ 7:1, 2, 36, 37) Nuhe do ohia ogo na hagbẹ ehe wẹ awhli-yinyin gbigbọmẹ tọn. Yé ko dapana ayọdide gbigbọmẹ tọn hẹ tonudidọ aihọn mẹ tọn po sinsẹ̀n lalo tọn po. (Jakobu 4:4; Osọhia 17:5) Taidi asi to ali ji Klisti tọn, yé hẹn yede do wiwe, “madowhẹ to okọ to akọta jijọ gbingbannọ po bublunọ po ṣẹnṣẹn.”—Filippinu lẹ 2:15.

13. Etẹwutu 144 000 lẹ yin asi he jẹ de na Jesu Klisti, podọ nawẹ yé nọ “hodo Lẹngbọvu lọ to godo yì fidepope e jei” gbọn?

¹³ Dogọ, “yè ma sọ mọ bublu de to onù yetọn mẹ.” To ehe mẹ, yé taidi Ahọlu yetọn, Jesu Klisti. Taidi gbẹtọ pipe de, e “ma wàylando depope, bọ yè ma sọ mọ oklọ de to onù etọn mẹ.” (1 Pita 2:21, 22) Na yemẹpo nọpọ do yin madowango po nugbonọ po wutu, 144 000 lẹ yin awuwlena taidi awhli wiwe de na Yẹwhenọ Daho Jehovah tọn. Whenuena Jesu tin to aigba ji, e ylọ ahun jijlọnọ lẹ nado hodo e. (Malku 8:34; 10:21; Johanu 1:43) Enẹnọ he yigbe lẹ hodo apajlẹ aliho gbẹzan tọn etọn tọn bo setonuna nuplọnmẹ etọn lẹ. Nalete, to gbẹzan aigba ji tọn yetọn whenu, yé “nọ hodo Lẹngbọvu lọ to godo yì fidepope e jei” dile e to anadena yé gbọn aihọn Satani tọn gblamẹ.

14. (a) Nawẹ e yin gbọn dọ 144 000 lẹ yin “sinsẹ́n tintan hlan Jiwheyẹwhe podọ hlan Lẹngbọvu lọ”? (b) To zẹẹmẹ tẹ mẹ wẹ gbẹtọ susugege lọ yin sinsẹ́n tintan lẹ te ga?

¹⁴ Omẹ 144 000 lẹ yin mẹhe yè “fligọ sọn aigba ji,” “fligọ sọn gbẹtọ lẹ mẹ.” Yé yin sisọdodovi taidi ovi Jiwheyẹwhe tọn lẹ, podọ to fọnsọnku yetọn godo, yé ma sọ nọ yin gbẹtọ agbasa-po-ohùnnọ po tata lẹ gba. Dile e yin didọ to wefọ ẹnẹ lọ mẹ do, yé lẹzun “sinsẹ́n tintan hlan Jiwheyẹwhe podọ hlan Lẹngbọvu lọ.” Nugbo, to owhe kanweko tintan lọ mẹ, Jesu yin “sinsẹ́n tintan yé he damlọn lẹ tọn.” (1 Kọlintinu lẹ 15:20, 23) Ṣigba 144 000 lẹ yin “sinsẹ́n tintan delẹ” he yin gbẹtọ mape lẹ tọn, he yin hihọ̀ dogbọn yizan avọsinsan Jesu tọn dali. (Jakobu 1:18) Etomọṣo, bibẹpli sinsẹ́n lẹ tọn sọn gbẹtọvi lẹ mẹ ma doalọte po yé po gba. Owe Osọhia tọn lọ ko dlẹnalọ hlan gbingbẹ̀n gbẹtọ susugege madosọha lẹ tọn he to awhado po ogbè lele po dọmọ: “Whlẹngan hlan Jiwheyẹwhe mítọn he sinai to ofin lọ ji, podọ hlan Lẹngbọvu lọ.” Gbẹtọ susugege ehe na lun nukunbibia daho lọ tọ́n, podọ dile yé to nukọnzindo nado yin kọfana dogbọn “asisa otọ̀ ogbẹ̀ tọn lẹ tọn” dali, yé na yin finfọndote hlan pipe gbẹtọ tọn to aigba ji. To ojlẹ de mẹ to nukunbibia daho lọ godo, Hadès na yin hinhẹn jẹvọ, podọ livilivi madosọha gbẹtọ devo lẹ tọn na yin finfọnsọnku bo tindo dotẹnmẹ hundote lọ nado nù sọn osin ogbẹ̀ tọn dopo enẹlẹ mẹ. Po ehe po to ayiha mẹ, e na yin nuhe jlọ nado ylọ gbẹtọ susugege lọ dọ sinsẹ́n tintan lẹngbọ devo lẹ tọn—yedọ yewlẹ wẹ yin omẹ tintan lẹ nado ‘yan aṣọvọ yetọn bo hẹn yé zun wewe to ohùn Lẹngbọvu lọ tọn mẹ’ po todido lọ po nado nọgbẹ̀ kakadoi to aigba ji.—Osọhia 7:9, 10, 14, 17; 20:12, 13.

15. Nujlẹdonugo tẹlẹ wẹ tin to sinsẹ́n tintan vovo atọ̀n lẹ po hunwhẹ he nọ yin bibasi to Osẹ́n Moṣe tọn glọ lẹ po ṣẹnṣẹn?

¹⁵ Sinsẹ́n tintan atọ̀n ehelẹ (Jesu Klisti, 144 000 lẹ, po gbẹtọ susugege lọ po) tindo apajlẹ ojlo fọndotenamẹtọ lẹ to hunwhẹ lẹ mẹ he yin bibasi sọgbe hẹ Osẹ́n Moṣe tọn fliflimẹ tọn. To 16 Nisan, to Hunwhẹ Akla Madotọ́nnọ tọn gbe, okọ̀ sinsẹ́n tintan ojijẹ agbado balle tọn lẹ tọn nọ yin zizedo nukọnna Jehovah. (Levitiku 23:6-14) Azan 16 Nisan gbe wẹ Jesu yin finfọnsọnku sọn oṣiọ lẹ mẹ. To azan 50tọ lọ gbe sọn 16 Nisan, to osun atọ̀ntọ lọ mẹ, Islaelivi lẹ nọ basi hunwhẹ ojijẹ sinsẹ́n bibia tintan lẹ tọn he yin ojijẹ likun tọn. (Eksọdusi 23:16; Levitiku 23:15, 16) Hunwhẹ ehe wá yin yiylọ dọ Pẹntikọsti (sọn hogbe Glẹki tọn lọ mẹ he zẹẹmẹdo “kandeaotọ”), podọ to Pẹntikọsti 33 W.M. tọn wẹ hagbẹ tintan 144 000 lẹ tọn yin amisana po gbigbọ wiwe po. To godomẹ, to osun ṣinawetọ lọ mẹ whenuena ojijẹ lọ pete yin bibẹplido họmẹ, Hunwhẹ Gohọtuntun tọn nọ tin, ojlẹ pẹdido ayajijẹ tọn de whenuena Islaelivi lẹ nọ yi osẹ dopo zan to gohọ lẹ mẹ he yin bibasi to onu devo lẹ mẹ, po dema lẹ po. (Levitiku 23:33-43) To gbesisọ mẹ, gbẹtọ susugege lọ, he yin apadewhe bibẹpli daho lọ tọn, to pẹdo to ofin lọ nukọn po “dema lẹ po to alọ yetọn mẹ.”—Osọhia 7:9.

Wẹndagbe Madopodo Lilá

16, 17. (a) Johanu mọ angẹli de he to zinzlọn to fie, podọ nulila tẹwẹ angẹli lọ to bibasi? (b) Mẹnu lẹ wẹ to mahẹ tindo to azọ́n yẹwhehodidọ-Ahọluduta tọn lọ mẹ, podọ numimọ tẹlẹ wẹ do ehe hia?

¹⁶ Bọdego Johanu wlan: “Yẹn sọ mọ angẹli devo de to zinzlọn to olọn ṣẹnṣẹn, bo tindo wẹndagbe madopodo de to alọ mẹ, nado dọyẹwheho hlan ye he tin to aigba ji lẹ, hlan akọta lẹpo, hlan hẹnnu lẹpo, hlan ogbè lẹpo, hlan gbẹtọ lẹpo, bo to didọ to ogbè lele mẹ, dọmọ, Mì dibusi Jiwheyẹwhe, bo sọ na gigo e; na whẹdida whenu etọn wá; mì sọ litaina ewọ he da olọn, aigba, ohù, po asisa otọ̀ tọn lẹ po.” (Osọhia 14:6, 7) Angẹli lọ to zinzlọn “to olọn ṣẹnṣẹn,” fie ohẹ lẹ nọ zlọn te. (Yijlẹdo Osọhia 19:17 go.) Nalete ogbè etọn sọgan yin sisè lẹdo globu pe. Lehe lilá lẹdo aihọn pe angẹli ehe tọn yin nuhe gblo susu hugan linlin nina télévision tọn depope sọ!

¹⁷ Yè dotuhomẹna omẹ lẹpo nado dibusi, e ma yin kanlin lọ po boṣiọ etọn po gba, ṣigba Jehovah, he yin huhlọnnọ susu hugan kanlin yẹhiadonu tọn depope he yin anadena dogbọn Satani dali. Etẹ, Jehovah ko da olọn po aigba po, podọ todin ojlẹ lọ ko wá na ẹn nado dawhẹna aigba! (Yijlẹdo Gẹnẹsisi 1:1; Osọhia 11:18 go.) Whenuena e tin to aigba ji, Jesu dọdai dogbọn azan mítọn dali: “Podọ yè nasọ dọ yẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” (Matiu 24:14) Agun Klistiani yiamisisadode lẹ tọn to azọndenamẹ ehe hẹndi. (1 Kọlintinu lẹ 9:16; Efesunu lẹ 6:15) Osọhia sọhia tofi dọ angẹli mayinukundomọ lẹ to mahẹ tindo to azọ́n yẹwhehodidọ tọn ehe mẹ. Lehe anademẹ angẹli lẹ tọn nọ yawu sọawuhia sọ to hinhẹn dopo to Kunnudetọ Jehovah tọn lẹ mẹ jẹ owhé de gbe fie alindọn ayihamajainọ lẹ to hunwẹ̀n te bo tlẹ to dẹ̀ho na alọgọ gbigbọmẹ tọn!

18. Sọgbe hẹ angẹli he to zinzlọn to olọn ṣẹnṣẹn lọ, whenu na etẹ wẹ wá, podọ mẹnu lẹ wẹ na nọ basi nulila lẹ dogọ?

¹⁸ Dile angẹli he to zinzlọn to olọn ṣẹnṣẹn lọ dọ do, whẹdida whenu lọ ko wá. Whẹdida nankọ wẹ Jiwheyẹwhe na basi todin? Otó lẹ na dọnu to lilá lẹ mẹ he na yin bibasi todin dogbọn angẹli awetọ de, atọ̀ntọ de, ẹnẹtọ de po atọ́ntọ de po dali.—Jẹlemia 19:3.

[Nudọnamẹ Odò Tọn]

[Yẹdide lẹ to weda 202, 203]

144 000

Mẹho 24 lẹ

Whéduhẹmẹtọ Lẹngbọvu, Klisti Jesu lọ tọn lẹ, dile yé yin pinpọn sọn teninọ vovo awe mẹ do