HOSỌ OPLỌN TỌN 29

Nọ Nọgodona Jesu Nukọntọ Mítọn

“Aṣẹ lẹpo ko yin nina mi to olọn mẹ podọ to aigba ji.”—MAT. 28:18.

OHÀN 13 Klisti, Apajlẹ Mítọn

BLADOPỌa

1. Etẹwẹ yin ojlo Jehovah tọn to egbehe?

TO EGBEHE, ojlo Jiwheyẹwhe tọn wẹ yindọ wẹndagbe Ahọluduta lọ tọn ni yin lilá to aigba lọ blebu ji. (Malku 13:10; 1 Tim. 2:3, 4) Azọ́n Jehovah tọn wẹ, podọ azọ́n ehe yin nujọnu na ẹn sọmọ bọ e biọ to Visunnu yiwanna etọn si nado deanana ẹn. Na Jesu wẹ to anadena mí wutu, mí gán kudeji dọ azọ́n yẹwhehodidọ tọn lọ na yin tadona dile Jehovah jlo do whẹpo opodo lọ nido wá.—Mat. 24:14.

2. Etẹwẹ mí na gbadopọnna to hosọ ehe mẹ?

² To hosọ ehe mẹ, mí na mọ lehe Jesu nọ yí “afanumẹ nugbonọ podọ nuyọnẹntọ” etọn zan nado wleawuna núdùdù gbigbọmẹ tọn, podọ nado basi tito na hodotọ etọn lẹ na azọ́n nujijla yẹwhehodidọ tọn daho hugan whenuho tọn lọ do. (Mat. 24:45) Mí nasọ mọ nuhe dopodopo mítọn gán wà nado nọgodona Jesu po afanumẹ nugbonọ lọ po.

JESU NỌ DEANANA AZỌ́N YẸWHEHODIDỌ TỌN LỌ

3. Aṣẹ tẹwẹ ko yin nina Jesu?

³ Jesu wẹ to anadena azọ́n yẹwhehodidọ tọn lọ. Nawẹ mí gán kudo enẹ ji gbọn? Ojlẹ vude whẹpo Jesu nido yì olọn mẹ, e pli hẹ delẹ to hodotọ nugbonọ etọn lẹ mẹ to osó de ji to Galili. E dọna yé dọmọ: “Aṣẹ lẹpo ko yin nina mi to olọn mẹ podọ to aigba ji.” Enẹgodo tlolo, e dọna yé dọmọ: “Enẹwutu, mì yì bo hẹn gbẹtọ lẹ sọn akọta lẹpo mẹ zun devi lẹ.” (Mat. 28:18, 19) Gbọnmọ dali, aṣẹ ko sọ yin nina Jesu nado deanana azọ́n yẹwhehodidọ tọn lọ.

4. Naegbọn mí gán kudeji dọ Jesu gbẹ́ to anadena azọ́n yẹwhehodidọ tọn lọ?

⁴ Jesu dọ dọ azọ́n yẹwhehodidọ po mẹhẹnzun devi po tọn lọ na yin wiwà to “akọta lẹpo” mẹ, bọ emi nasọ tin hẹ hodotọ emitọn lẹ “to azán lẹpo gbè kakajẹ vivọnu titonu lọ tọn.” (Mat. 28:20) Hogbe enẹlẹ dohia hezeheze dọ azọ́n yẹwhehodidọ tọn lọ na zindonukọn to anademẹ Jesu tọn glọ kakajẹ azán mítọn gbè.

5. Adà tẹ yiwà wẹ mí te to hẹndi Salmu lẹ 110:3 tọn mẹ?

⁵ Jesu ma hanú dọ azọ́nwatọ lẹ na hán to vivọnu titonu lọ tọn. E yọnẹn dọ hogbe dọdai tọn salmu-kantọ lọ tọn lẹ na mọ hẹndi, he dọmọ: “Omẹ towe lẹ na ze yede jo sọn ojlo mẹ wá to azán awhànpa towe tọn gbè.” (Salm. 110:3) Eyin a to mahẹ do to azọ́n yẹwhehodidọ tọn lọ mẹ, be a to godonọna Jesu po afanumẹ nugbonọ lọ po niyẹn bosọ to alọgọ nado hẹn dọdai enẹ di. Azọ́n lọ to nukọnzindo, amọ́ avùnnukundiọsọmẹnu lẹ ma nọ hán.

6. Etẹwẹ yin dopo to avùnnukundiọsọmẹnu he wẹnlatọ Ahọluduta lọ tọn lẹ nọ pehẹ to egbehe lẹ mẹ?

⁶ Dopo to avùnnukundiọsọmẹnu he wẹnlatọ Ahọluduta lọ tọn lẹ nọ pehẹ lẹ mẹ wẹ nukundiọsọmẹ. Atẹṣitọ lẹ, nukọntọ sinsẹ̀n tọn lẹ po tonudọtọ lẹ po ko hẹn lalo susu lẹ gbayipe gando azọ́n mítọn go. Eyin hẹnnumẹ, mẹyinyọnẹn po azọ́nwatọgbẹ́ mítọn lẹ po yin kiklọ gbọn lalo enẹlẹ dali, yé gán gbidikọna mí nado doalọtena Jehovah sinsẹ̀n po yẹwhehodidọ po. To otò delẹ mẹ, nukundiọsọmẹ lọ nọ bẹ budonamẹ, adánsin-namẹ, mẹwiwle podọ etlẹ yin mẹsúsú do gànmẹ hẹn. Nuyiwa ehelẹ ma nọ paṣa mí. Jesu dọ dọdai dọmọ: “Akọta lẹpo na gbẹwanna mì, na oyín ṣie tọn wutu.” (Mat. 24:9) Nugbo lọ dọ mí nọ tindo numimọ wangbẹna mọnkọtọn tọn ko yin kunnudenu lọ dọ mí tindo nukundagbe Jehovah tọn. (Mat. 5:11, 12) Lẹgba wẹ yin adọ̀ nukundiọsọmẹ ehe tọn. Amọ́, Jesu dohuhlọn hú i taun! Po alọgọ Jesu tọn po, wẹndagbe lọ to gbẹtọ lẹ sọn akọta lẹpo mẹ dè jẹ. Lẹnnupọndo kunnudenu delẹ ji.

7. Kunnudenu tẹwẹ dohia we dọ Osọhia 14:6, 7 to hẹndi mọ?

⁷ Taidi wẹnlatọ Ahọluduta lọ tọn lẹ, avùnnukundiọsọmẹnu devo he mí nọ pehẹ wẹ nado dọyẹwheho na mẹhe nọ do ogbè voovo lẹ. To numimọ he Jesu dohia apọsteli Johanu mẹ, e dọ dọdai dọ to azán mítọn gbè, mí na duto avùnnukundiọsọmẹnu mọnkọ ji dile mí to wẹndagbe lọ lá. (Hia Osọhia 14:6, 7.) Gbọnna? Mí nọ hùn dotẹnmẹ dote na gbẹtọ susu lẹ nado kẹalọyi owẹ̀n Ahọluduta lọ tọn. To egbehe, gbẹtọ lẹ lẹdo aihọn pé gán hia owe sinai do Biblu ji lẹ to jw.org ji, na nọtẹn Intẹnẹt tọn ehe bẹ nudọnamẹ lẹ hẹn to ogbè 1000 linlán mẹ wutu! Nado hẹn gbẹtọ lẹ zun devi lẹ, Hagbẹ Anademẹtọ lọ ko nagbè dọ yè ni lẹ́ owe lọ Duvivi Ogbẹ̀ Tọn Kakadoi! do ogbè 700 linlán mẹ! Núdùdù gbigbọmẹ tọn ko sọ yin hinhẹn tin-to-aimẹ na tókunọ lẹ to video hoyidokanji tọn lẹ mẹ, podọ na nukuntọ́nnọ lẹ to owe he bẹ nukinkàn nukuntọ́nnọ lẹ tọn hẹn lẹ mẹ. Mí to hẹndi dọdai Biblu tọn lẹ tọn mọ. Gbẹtọ lẹ “sọn ogbè akọta lẹ tọn lẹpo mẹ” to pinplọn nado do “ogbè wiwe-ṣeke” nugbo Biblu tọn lọ tọn. (Zek. 8:23; Zef. 3:9) Onú ehe lẹpo to yinyin wiwadotana to anademẹ nukọntọ he pegan lọ Jesu Klisti tọn glọ.

8. Kọdetọn tẹlẹ wẹ azọ́n yẹwhehodidọ tọn míton ko to hinhẹnwa sọn ojlẹ dindẹn die?

⁸ To egbehe, gbẹtọ livi 8 linlán to otò 240 mẹ wẹ to awukọndopọ hẹ titobasinanu Jehovah tọn, podọ to owhe dopodopo mẹ, gbẹtọ fọtọ́n susu lẹ wẹ nọ yí baptẹm! Amọ́ gbọnvona sọha lẹ, nudevo he yin nujọnu taun wẹ jẹhẹnu Klistiani tọn lẹ, yèdọ “gbẹtọ-yinyin yọyọ lọ” he devi yọyọ enẹlẹ nọ wleawuna. (Kol. 3:8-10) Mẹsusu ko dealọ sọn walọ mawé, danuwiwa, nuvẹun po akọ̀ ṣinṣinyan po mẹ. Dọdai Isaia 2:4 tọn he dọ dọ yé ma “nasọ plọn awhànfunfun ba” to hẹndi mọ. Dile mí to azọ́n sinsinyẹn wà nado ze gbẹtọ-yinyin yọyọ lọ do, mí nọ gọalọ nado dọ̀n gbẹtọ lẹ wá titobasinanu Jehovah tọn mẹ, podọ mí nọ dohia dọ mí to nukọntọ mítọn Klisti Jesu hodo. (Joh. 13:35; 1 Pita 2:12) Depope to onú ehelẹ mẹ ma yin gbọn kosọ dali. Jesu to alọgọ he sin hudo mí do na mí.

JESU DE AFANUMẸ DE

9. Sọgbe hẹ Matiu 24:45-47, dọdai tẹwẹ yin didọ gando ojlẹ opodo tọn lọ go?

⁹ Hia Matiu 24:45-47. Jesu dọ dọdai dọ to ojlẹ opodo tọn mẹ, emi na de “afanumẹ nugbonọ podọ nuyọnẹntọ” de nado nọ wleawuna núdùdù gbigbọmẹ tọn. Enẹwutu, mí na donukun dọ afanumẹ enẹ ni nọ wazọ́n sinsinyẹn to azán mítọn gbè. E ka yinmọ nugbo. Nukọntọ mítọn Jesu nọ yí pipli pẹvi sunnu yiamisisadode tọn de zan nado wleawuna “núdùdù” gbigbọmẹ tọn na omẹ Jiwheyẹwhe tọn lẹ po jlodotọ lẹ po “to ojlẹ sisọ mẹ.” Sunnu enẹlẹ ma nọ duklunọ do yise mẹdevo lẹ tọn ji. (2 Kọl. 1:24) Kakatimọ, yé nọ kẹalọyi dọ Jesu Klisti wẹ yin ‘nukọntọ po awhàngán’ omẹ etọn lẹ tọn po.—Isa. 55:4.

Yẹdide: Owe voovo he yin yiyizan to owhe susu lẹ gblamẹ nado plọnnu hẹ jlodotọ lẹ. 1. 1946: “Que Dieu soit reconnu pour vrai.” Mẹmẹyọnnu de to owe lọ dogbonu na asu po asi po de to lizọnyizọn lọ mẹ. 2. 1968: “Nugbo he Nọ Planmẹ Sọyi Ogbẹ̀ Mavọmavọ Mẹ.” Dawe de to owe lọ hia to owhé etọn gbè. 3. 1982: “Hiẹ Sọgan Nọgbẹ̀ Kakadoi to Paladisi mẹ to Aigba Ji.” Mẹmẹsunnu de to anadena oplọn dawe de tọn. 4. 1995: “Oyọnẹn He Nọ Planmẹ Sọyi Ogbẹ̀ Madopodo Mẹ.” Mẹmẹsunnu de to anadena oplọn azọ́nwatọgbẹ́ de tọn to gbọjẹ núdùdù tọn whenu. 5. 2005 po 2015 po: Owe lọ lẹ “Etẹwẹ Biblu Plọn Mí Taun?” po “Etẹwẹ Biblu Sọgan Plọn Mí?” po. Mẹmẹyọnnu de to anadena oplọn nawe de tọn. 6. 2021: “Duvivi Ogbẹ̀ Tọn Kakadoi!” Mẹmẹyọnnu de to anadena oplọn nawe de tọn gbọn hodọdopọ video ji tọn gblamẹ.

10. Detẹ to owe he yin didohia to yẹdide lọ mẹ lẹ mẹ wẹ gọalọna we nado jẹ Jehovah sẹ̀n ji?

¹⁰ Sọn 1919, afanumẹ nugbonọ lọ nọ wleawuna owe po video voovo lẹ po he nọ hùn dotẹnmẹ dote na jlodotọ yọyọ lẹ nado dùnú to gbigbọ-liho whla tintan. To 1921, afanumẹ lọ wleawuna owe lọ, La Harpe de Dieu nado gọalọna jlodotọ lẹ nado plọn nugbo dodonu tọn Biblu tọn lẹ. Dile ojlẹ to yìyì, owe devo lẹ yin awuwlena. Owe tẹwẹ gọalọna we nado wá yọ́n Otọ́ olọn mẹ tọn mítọn bosọ yiwanna ẹn? Be owe lọ “Que Dieu soit reconnu pour vrai” wẹ ya, kavi Nugbo He Nọ Planmẹ Sọyi Ogbẹ̀ Mavọmavọ Mẹ, Hiẹ Sọgan Nọgbẹ̀ Kakadoi to Paladisi mẹ to Aigba Ji, Oyọnẹn He Nọ Planmẹ Sọyi Ogbẹ̀ Madopodo Mẹ, Etẹwẹ Biblu Plọn Mí Taun?, Etẹwẹ Biblu Sọgan Plọn Mí?, kavi Duvivi Ogbẹ̀ Tọn Kakadoi! he yin owe yọyọ mítọn? Owe ehe lẹpo wẹ yin awuwlena nado súdo nuhudo tangan de tọn to whenue yé yin didetọn.

11. Naegbọn e do yin nujọnu dọ mímẹpo ni nọ dùnú to gbigbọ-liho?

¹¹ E ma yin jlodotọ yọyọ lẹ kẹdẹ wẹ do hudo núdùdù gbigbọmẹ tọn sinsinyẹn tọn. Mímẹpo wẹ do hudo etọn. Apọsteli Paulu dọmọ: “Núdùdù sinsinyẹn yin mẹhe ko whẹ́n lẹ tọn.” E yidogọ dọ nuhe mí plọn sọn Biblu mẹ lẹ yíyí-do-yizan mẹ na gọalọna mí nado nọ “yọ́n vogbingbọn to dagbe po oylan po ṣẹnṣẹn.” (Heb. 5:14) To ojlẹ awusinyẹn tọn he mẹ walọ dagbe fọ́n bo to doyi hugan gbede pọ́n te ehe mẹ, e gán vẹawu taun nado nọgbẹ̀ sọgbe hẹ nujinọtedo Jehovah tọn lẹ. Amọ́, Jesu nọ hẹn ẹn diun dọ mí tindo núdùdù he sin hudo mí do to gbigbọ-liho nado mọ huhlọn yí. Ohó gbọdo Jiwheyẹwhe tọn Biblu wẹ asisa núdùdù ehe tọn. Afanumẹ nugbonọ lọ nọ wleawuna núdùdù ehe bosọ nọ má ẹn to anademẹ Jesu tọn glọ.

12. Taidi Jesu, nawẹ mí nọ do gbégbò hia na oyín Jiwheyẹwhe tọn gbọn?

¹² Taidi Jesu, mí nọ na oyín Jiwheyẹwhe tọn gbégbò he e jẹna. (Joh. 17:6, 26) Di apajlẹ, to 1931 mí kẹalọyi oyín sinai do Owe-wiwe lẹ ji lọ Kunnudetọ Jehovah tọn, bo gbọnmọ dali dohia dọ mí jlo na yin yinyọnẹn gbọn oyín Otọ́ olọn mẹ tọn mítọn tọn dali. (Isa. 43:10-12) Podọ sọn octobre owhe enẹ tọn, oyín Jiwheyẹwhe tọn nọ sọawuhia to wepa tintan zinjẹgbonu linlinwe ehe tọn lẹpo ji. Humọ, Lẹdogbedevomẹ Aihọn Yọyọ Tọn ko gọ̀ oyín Jiwheyẹwhe tọn do otẹn etọn mẹ to Ohó etọn mẹ. Lehe ehe gbọnvo taun na ṣọṣi Mẹylọhodotọklisti tọn lẹ tọn he ko de oyín Jehovah tọn sẹ̀ sọn lẹdogbedevomẹ Biblu tọn lẹ mẹ do sọ!

JESU NỌ BASI TITO NA HODOTỌ ETỌN LẸ

13. Etẹwẹ hẹn we kudeji dọ Jesu to “afanumẹ nugbonọ podọ nuyọnẹntọ lọ” yizan to egbehe? (Joh. 6:68)

¹³ Gbọn “afanumẹ nugbonọ podọ nuyọnẹntọ lọ” gblamẹ, Jesu ko basi tito na hodotọ etọn lẹ do titobasinanu ayidego tọn de mẹ to aigba ji nado ze sinsẹ̀n-bibasi wiwe-ṣeke daga. Etẹwẹ nọ yin numọtolanmẹ towe gando titobasinanu enẹ go? Nado na gblọndo, vlavo a gán lẹnnupọndo hogbe apọsteli Pita tọn lẹ ji, mẹhe dọna Jesu dọmọ: “Mẹnu dè wẹ mí na yì? Hiẹ wẹ tindo ohó ogbẹ̀ madopodo tọn lẹ.” (Joh. 6:68) Fitẹ wẹ mí na ko te to egbehe, eyin mí ma ko tin to titobasinanu Jehovah tọn mẹ? Gbọn titobasinanu lọ gblamẹ, Klisti nọ hẹn ẹn diun dọ mí dùnú ganji to gbigbọ-liho. E sọ nọ plọnazọ́n mí nado hẹn lizọnyizọn mítọn di po kọdetọn dagbe po. Humọ, e nọ gọalọna mí nado ze “gbẹtọ-yinyin yọyọ lọ” dogo, na mí nido sọgan hẹn homẹ Jehovah tọn hùn.—Efe. 4:24.

14. Ale tẹlẹ wẹ a ko mọyi to azọ̀n bẹplamẹ COVID-19 tọn whenu na a tin to titobasinanu Jehovah tọn mẹ wutu?

¹⁴ Jesu nọ wleawuna anademẹ nuyọnẹn tọn lẹ to ojlẹ awusinyẹn tọn lẹ mẹ. Dagbe he anademẹ enẹlẹ nọ wà họnwun whenue azọ̀n bẹplamẹ lọ COVID-19 gbajẹgbonu. Whenue mẹsusu to aihọn lọ mẹ tin to bẹwlu mẹ gando nuhe yé na wà go, Jesu nọ hẹn ẹn diun dọ mí nọ mọ anademẹ he họnwun lẹ yí nado basi hihọ́ na mí. Mí ko yin tulina nado nọ ṣinyọnnudo awọntin whenue mí to mẹmẹ, podọ nado setonuna osẹ́n olá ninọ na mẹnọzo tọn. Mẹho agun tọn lẹ ko yin nuflin nado nọ kàn hagbẹ agun lọ tọn lẹpo biọ whẹwhẹ, podọ nado nọ yọ́n nuhudo he yé do to agbasa-liho podọ to gbigbọ-liho lẹ. (Isa. 32:1, 2) Linlin Hagbẹ Anademẹtọ lọ tọn lẹ sọ nọ na mí anademẹ po tuli devo lẹ po.

15. Anademẹ tẹlẹ wẹ yin nina gando opli lẹ po lizọnyizọn lọ hinhẹndi po go to azọ̀n bẹplamẹ lọ whenu, podọ etẹwẹ yin kọdetọn lọ lẹ?

¹⁵ To azọ̀n bẹplamẹ lọ whenu, mí sọ mọ anademẹ he họnwun lẹ gando lehe mí na nọ basi opli agun tọn lẹ bosọ nọ do mahẹ to azọ́n yẹwhehodidọ tọn lọ mẹ do go. Diblayin to zánto dopo mẹ, mí jẹ opli Klistiani tọn lẹ po plidopọ lẹ po basi ji gbọn nuyizan Intẹnẹt tọn lẹ gblamẹ. Mí sọ jẹ kunnude ji diblayin gbọn wekanhlanmẹ po alokan po kẹdẹ gblamẹ. Jehovah dona vivẹnudido mítọn lẹ. Alahọ susu ko na linlin dọ sọha wẹnlatọ lẹ tọn ko jideji to aliho ayidego tọn mẹ. Na nugbo tọn, mẹsusu ko tindo numimọ tulinamẹ tọn lẹ to ojlẹ ehelẹ mẹ.—Pọ́n apotin lọ “Jehovah Nọ Dona Azọ́n Yẹwhehodidọ Tọn Mítọn.”

Jehovah Nọ Dona Azọ́n Yẹwhehodidọ Tọn Mítọn

Asu po asi po de sọn Amérique centrale ko nọ Europe na owhe 15 linlán. Whenue azọ̀n bẹplamẹ lọ gbajẹgbonu, asu po asi po lọ basi nudide nado dekunnu na hẹnnumẹ gọna mẹyinyọnẹn yetọn he to Amérique centrale lẹpo. Na e nido pà yé, yé do wekanhlanmẹ 200 linlán hlan gbọn aplikasiọn wekanhlanmẹ tọn de gblamẹ. Yé basi gọyìpọn lẹ bosọ do owe po alọdlẹndonu video tọn lẹ po hlan mẹhe do ojlo lẹ. Jehovah dona vivẹnudido yetọn. To osun ṣinatọ̀n gblamẹ, asu po asi po lọ nọ deanana plọnmẹ Biblu 14!
To nujijla novembre 2020 tọn lọ whenu, enẹ wẹ whenue mí má Atọ̀họ̀-Nuhihọ́ lọ Tọn he hosọ etọn yin “Etẹwẹ Ahọluduta Jiwheyẹwhe Tọn Yin?,” mẹmẹsunnu de basi dide nado ylọ wehọmẹvigbẹ́ etọn hoho de. Dawe lọ kẹalọyi alọnuwe lọ bosọ yigbe nado dọhodeji hẹ mẹmẹsunnu lọ to osẹ he bọdego mẹ. To hodọdopọ yetọn he bọdego whenu, dawe lọ dọmọ: “Whẹpo a do ylọ mi, n’ko hodẹ hlan Jiwheyẹwhe dọ ni gọalọna mi nado yọ́n nuhe e to nukundo sọn asi e.” Dawe lọ yigbe nado plọn Biblu bosọ jẹ opli lẹ yì ji, podọ e nọ yí nuhe e to pinplọn lẹ do yizan mẹ. E dọna mẹmẹsunnu lọ to nukọn mẹ dọmọ: “To dai, n’nọ mọdọ nude to whiwhè to gbẹzan ṣie mẹ. Todin, n’wá mọdọ Jehovah wẹ. N’nọ yọ́n pinpẹn etọn to whelẹponu dọ a gọalọna mi nado dọnsẹpọ ewọ.”

16. Nujikudo tẹwẹ mí gán tindo?

¹⁶ Mẹdelẹ gán nọ mọdọ titobasinanu lọ nọ to aṣeji zẹjlẹgo gando azọ̀n bẹplamẹ lọ go. Amọ́, whlasusu wẹ e ko họnwun dọ anademẹ he mí nọ mọyi lẹ yin nuyọnẹn tọn. (Mat. 11:19) Podọ, eyin mí lẹnayihamẹpọndo aliho owanyinọ he mẹ Jesu to anadena omẹ etọn lẹ te ji, mí nọ deji dọ mahopọnna nuhe na jọ to sọgodo Jehovah po Visunnu yiwanna etọn po na tin hẹ mí.—Hia Heblu lẹ 13:5, 6.

17. Nawẹ e nọ ṣí na we nado wazọ́n to anademẹ nukọntọ mítọn Jesu tọn glọ?

¹⁷ Homẹ mítọn nọ hùn taun nado wazọ́n to anademẹ Jesu he yin nukọntọ mítọn tọn glọ! Mí yin apadewhe titobasinanu de tọn he aṣa, otò po dogbó ogbè tọn depope po ma nọ klan. Mí nọ dùnú gọ́ho to gbigbọ-liho, podọ mí nọ mọ azọ́nplọnmẹ he mí do hudo etọn yí nado wazọ́n yẹwhehodidọ tọn lọ. Dopodopo mítọn wẹ nọ yin pinplọn nado ze gbẹtọ-yinyin yọyọ lọ dogo, podọ nado nọ yiwanna ode awetọ. Mí tindo whẹwhinwhẹ́n lẹpo nado doawagun dọ Jesu wẹ nukọntọ mítọn!

OHÀN 16 Mì Pà Jehovah Na Ovi Yiamisisadode Etọn

a To egbehe, sunnu, yọnnu po ovi livi susu lẹ po wẹ nọ yí zohunhun do dọyẹwheho wẹndagbe lọ tọn. Be a to yé mẹ ya? Eyin mọ wẹ, be a to azọ́nwa to anademẹ Oklunọ mítọn Jesu Klisti tọn glọ. To hosọ ehe mẹ, mí na gbadopọnna kunnudenu delẹ he dohia dọ Jesu wẹ to anadena azọ́n yẹwhehodidọ tọn lọ to egbehe. Nulinlẹnpọn do nudọnamẹ ehe ji na gọalọna mí nado magbe nado zindonukọn to Jehovah sinsẹ̀n mẹ to anademẹ Klisti tọn glọ.