Weta 31
Azọ́n Jehovah Tọn lẹ Klo bo sọ Jiawu
Numimọ 10—Osọhia 15:1 jẹ 16:21
Hosọ: Jehovah to tẹmpli etọn mẹ; ogò ṣinawe lẹ he yin homẹgble etọn tọn yin tuntun do aigba ji
Ojlẹ hẹndi tọn: Sọn 1919 jẹ Amagẹdọni
1, 2. (a) Ohia atọ̀ntọ tẹwẹ Johanu na linlin etọn? (b) Azọngban angẹli tọn tẹwẹ ko yin yinyọnẹn whenu dindẹn dogbọn devizọnwatọ Jehovah tọn lẹ dali?
YỌNNUSI de he to ovisunnu de jì! Dlagọni daho de to dindin nado tlẹn ovi enẹ dù! Ohia olọn tọn awe enẹlẹ he yin zẹẹmẹ basina hezeheze sọmọ to Osọhia weta 12 mẹ hẹn mí mọnukunjẹemẹ dọ avunhiho dindẹn lọ he tin to Okun yọnnusi Jiwheyẹwhe tọn po Satani po okun aovi tọn etọn lọ po ṣẹnṣẹn to sisẹpọ opodo etọn. To nuzindo yẹhiadonu ehelẹ ji mẹ, Johanu dọmọ: “Ohia daho de sọ yin mimọ to olọn mẹ . . . Ohia devo sọ yin mimọ.” (Osọhia 12:1, 3, 7-12) Todin Johanu basi linlin ohia atọ̀ntọ de tọn: “Yẹn sọ mọ ohia devo de to olọn mẹ, e klo bo sọ jawu, angẹli ṣinawe he tindo azọ̀nylankan godomẹ tọn ṣinawe lẹ; na ye homẹ wẹ yè hẹn homẹgble Jiwheyẹwhe tọn vọ te.” (Osọhia 15:1) Ohia atọ̀ntọ ehe sọ tindo zẹẹmẹ tangan de na devizọnwatọ Jehovah tọn lẹ ga.
2 Doayi azọngban nujọnu tọn lọ go he angẹli lẹ tindo whladopo dogọ to ojlo Jiwheyẹwhe tọn bibasi mẹ. Nugbo ehe ko yin yinyọnẹn whenu dindẹn dogbọn devizọnwatọ Jehovah tọn lẹ dali. Etẹ, to gbigbọ glọ, psalmkantọ hoho tọn lọ tlẹ dọho dogbọn angẹli mọnkọtọn lẹ dali, bo dotuhomẹna yé dọmọ: “Mì dona [Jehovah], mì angẹli etọn lẹ emi; mì hlọnhlọnnọ to huhlọn mẹ lẹ emi, he to oho etọn basi, he to tótunai hlan ogbè oho etọn tọn”! (Psalm 103:20) Todin, to nujijọ yọ́yọ́ ehe mẹ, angẹli lẹ yin azọndena nado kọn azọ̀nylankan ṣinawe godo tọn lẹ jẹgbonu.
3. Etẹwẹ azọ̀nylankan ṣinawe lẹ yin, podọ etẹwẹ tuntun jẹgbonu yetọn dohia?
3 Etẹwẹ azọ̀nylankan ehelẹ yin? Taidi opẹn kunkun ṣinawe lẹ, yé to nulila whẹdida tọn lẹ he to linlẹn Jehovah hlan ninọmẹ vovo aihọn ehe tọn lẹ tọn hẹn gbayipe bo to avase na hlan kọdetọn godo tọn lọ he yin nudide whẹdida tọn etọn lẹ tọn. (Osọhia 8:1 jẹ 9:21) Kinkọ̀njẹgbonu yetọn dlẹnalọ hlan hinhẹnṣẹ whẹdida enẹlẹ tọn, whenuena omẹ he ji homẹgble Jehovah tọn te lẹ yin vivasudo to azan homẹgble zogbe etọn tọn mẹ. (Isaia 13:9-13; Osọhia 6:16, 17) Nalete, dogbọn yizan yetọn dali wẹ “yè hẹn homẹgble Jiwheyẹwhe tọn vọ te.” Ṣigba whẹpo nado basi zẹẹmẹ na kinkọ̀njẹgbonu azọ̀nylankan lẹ tọn, Johanu dọho na mí do gbẹtọ lẹ ji he ma yin gingandego sinsinyẹn dogbọn yé dali gba. Na yé gbẹ hiadonu kanlin lọ tọn lẹ wutu, nugbonọ ehelẹ to ohan pipa tọn lẹ ji hlan Jehovah dile na yé to azan ahọsuyi tọn etọn lá.—Osọhia 13:15-17.
Ohan Moṣe Tọn Po Lẹngbọvu Lọ Tọn Po
4. Etẹwẹ Johanu to pinpọn dohlan todin?
4 Numimọ-dohlan sọawuhia de tin to Johanu nukọn todin: “Yẹn sọ mọ di ohù mẹpọnnu tọn de he flusọ po miyọn po; podọ yé he gọ̀ to awhangba mẹ sọn kanlin lọ de, sọn boṣiọ etọn de, podọ sọn sọha oyín etọn tọn de, ṣite to ohù mẹpọnnu lọ tọn ji, ye tindo ajalẹn Jiwheyẹwhe tọn lẹ.”—Osọhia 15:2.
5. Etẹwẹ yin yẹdena dogbọn “ohù mẹpọnnu tọn de he flusọ po miyọn po” lọ dali?
5 “Ohù mẹpọnnu tọn” lọ yin onu dopolọ he Johanu ko mọ dai, he tin to ofin Jiwheyẹwhe tọn nukọn. (Osọhia 4:6) E taidi “ohù kinkọ̀n” (osin-hẹ̀nnu) tẹmpli Sọlọmọni tọn tọn, fie yẹwhenọ lẹ nọ da osin te nado lawu. (1 Ahọlu lẹ 7:23) Nalete, e nọtena “awulilẹ̀ osin tọn” lọ ganji, enẹ wẹ yin, Ohó Jiwheyẹwhe tọn, he Jesu yizan do klọ agun Klistiani yiamisisadode yẹwhenọ tọn lọ wé. (Efesunu lẹ 5:25, 26; Heblu lẹ 10:22) Ohù mẹpọnnu tọn ehe yin “flusọ po miyọn po,” he dohia dọ mẹyiamisisadode ehelẹ yin whiwhlepọn bo yin kiklọwe dile na yé to tonusena nujinọtedo yiaga he yin zizedai na yé lẹ. Dogọ, e sọ vọ flin mí dọ Ohó Jiwheyẹwhe tọn bẹ hodidọ whẹdida zogbe tọn lẹ hẹn ga sọta kẹntọ etọn lẹ. (Deutelonomi 9:3; Zẹfania 3:8) Delẹ to whẹdida zogbe ehelẹ mẹ sọawuhia to azọ̀nylankan ṣinawe godo tọn he to na yin kinkọn jẹgbonu lẹ mẹ.
6. (a) Mẹnu wẹ ohanjitọ lẹ he tin to ote to ohù mẹpọnnu tọn olọn tọn lọ pa, podọ nawẹ mí yọnẹn gbọn? (b) To aliho tẹ mẹ wẹ yè “gọ̀ to awhangbigba mẹ” te?
6 Nugbo lọ dọ ohù kinkọn lọ to tẹmpli Sọlọmọni tọn mẹ tin na yizan yẹwhenọ lẹ tọn dohia dọ ohanjitọ lẹ he tin to ote to ohù mẹpọnnu tọn olọn tọn nukọn lẹ yin hagbẹ yẹwhenọ tọn de. Yé tindo “ajalẹn Jiwheyẹwhe tọn lẹ,” podọ nalete mí yi yé gando mẹho 24 lẹ po 144 000 lẹ po go, dile e ko yindọ pipli ehelẹ to ohanji po ajalẹn de po ga. (Osọhia 5:8; 14:2) Ohanjitọ he Johanu mọ lẹ “gọ̀ to awhangba mẹ sọn kanlin lọ de, sọn boṣiọ etọn de, podọ sọn sọha oyin etọn tọn de.” Enẹwutu yé dona yin enẹnọ lẹ he wá sọn 144 000 lẹ mẹ he tin to aigba ji to azan godo tọn lọ whenu. Taidi pipli de, yé gọ̀ po awhangbigba po nugbo. Na nudi owhe 90 sọn 1919, yé ko gbẹ nado kẹalọyi ohiadonu kanlin lọ tọn kavi pọn hlan boṣiọ etọn taidi todido na jijọho dopo kẹdẹ gbẹtọvi lẹ tọn. Susu to yé mẹ ko doakọnnanu po nugbonọ-yinyin po biọ oku mẹ, podọ ehelẹ, todin to olọn mẹ, matin ayihaawe, to hihodo ohanjiji mẹmẹsunnu yetọn lẹ tọn he gbẹ pò to aigba ji po awuvivi vonọtaun de po.—Osọhia 14:11-13.
7. Nawẹ ajalẹn yin yiyizan to Islaeli hohowhenu tọn mẹ gbọn, podọ nawẹ tintin to finẹ ajalẹn Jiwheyẹwhe tọn tọn to numimọ Johanu tọn mẹ dona gando mí go gbọn?
7 Awhangbatọ nugbonọ ehelẹ tindo ajalẹn Jiwheyẹwhe tọn lẹ. To ehe mẹ, yé taidi Levinu tẹmpli tọn hohowhenu tọn lẹ he nọ sẹ̀n Jehovah po ohan he yin jiji po ajalẹn po lẹ po. Delẹ to yé mẹ sọ nọ dọ dọdai po ajalẹn po ga. (1 Otannugbo lẹ 15:16; 25:1-3) Nudidọ whanpẹnọ ajalẹn tọn sọ nọ hẹn ohanjiji ayajẹ tọn po odẹ̀ mẹpipa tọn po opẹdido tọn lẹ po he yin Islaelivi lẹ tọn tọn hlan Jehovah yọnwhanpẹ hugan. (1 Otannugbo lẹ 13:8; Psalm 33:2; 43:4; 57:7, 8) To ojlẹ ayimajai kavi kanlinmọgbenu tọn whenu, ogbè ajalẹn tọn ma nọ yin sisè gba. (Psalm 137:2) Tintin to finẹ ajalẹn Jiwheyẹwhe tọn tọn to numimọ ehe mẹ dona dozolanmẹna nukundido mítọn hlan ohanjiji ayajẹ tọn awhangbatọ tọn he yin pipa po pẹdido hlan Jiwheyẹwhe mítọn tọn po.a
8. Ohan tẹwẹ yin jiji, podọ etẹwẹ yin hogbe etọn lẹ?
8 Enẹ wẹ yin nuhe Johanu basi linlin etọn: “Yé sọ to ohan Moṣe devi Jiwheyẹwhe tọn tọn ji, po ohan Lẹngbọvu lọ tọn po, dọmọ, Kiklo po nujawu po wẹ azọn towe, [Jehovah] E Jiwheyẹwhe Ganhunupo; dódó po nugbo po wẹ ali towe, hiẹ Ahọlu mẹwiwe lẹ tọn. Mẹnu wẹ ma na dubusi we, [Jehovah] E, bo ma na pagigona oyin towe? Na hiẹ dopokẹdẹ wẹ wiwe; na akọta lẹpo wẹ na wá bo litai to nukọn towe; na yè ko do whẹdida towe lẹ hia.”—Osọhia 15:3, 4.
9. Etẹwutu ohan lọ yin yiylọ to apadewhe, dọ “ohan Moṣe tọn”?
9 Awhangbatọ ehelẹ to “ohan Moṣe tọn” ji, enẹ wẹ yindọ, ohan de he taidi dehe Moṣe ji to ninọmẹ mọnkọtọn lẹ mẹ. To whenuena Islaelivi lẹ ko yin kunnudetọ na azọ̀nylankan ao lẹ to Egipti po vasudo awhanpa Egiptinu lẹ tọn po to Ohù Vẹẹ lọ mẹ godo, Moṣe plan yé biọ ohanjiji mẹpipa awhangbigba tọn de mẹ hlan Jehovah, dọmọ: “[Jehovah] na to ahọludu kakadoidoi.” (Eksọdusi 15:1-19) Lehe e jẹ sọ dọ ohanjitọ lẹ to numimọ Johanu tọn mẹ, he yin awhangbatọ sọn kanlin lọ mẹ bo tindo mahẹ to lila azọ̀nylankan ṣinawe godotọ lẹ tọn mẹ, dona ji ohan hlan “Ahọlu madopodo” lọ ga!—1 Timoti 1:17.
10. Ohan devo tẹwẹ yin awuwlena dogbọn Moṣe dali, podọ nawẹ wefọ godo tọn etọn gando gbẹtọ susugege lọ go todin gbọn?
10 To ohan devo mẹ, he yin awuwlena whenuena Islaeli to awuwle nado yí otò Kenani tọn, Moṣe yọnhonọ lọ dọ na akọta enẹ: “Na yẹn na lá oyin [Jehovah] tọn lọ: mì jo kiklo hlan Jiwheyẹwhe mítọn!” Wefọ godo tọn ohan ehe tọn sọ na tuli mẹhe ma yin Islaelivi lẹ ga, podọ hogbe gbọdo Moṣe tọn lẹ dlẹnkan jẹ gbẹtọ susugege lọ kọn to egbehe: “Mì to ayajẹ hẹ omẹ etọn lẹ mì akọta lẹ emi.” Podọ etẹwutu yé dona jaya? Na todin Jehovah “na yiahọsu ohùn devi etọn lẹ tọn lọ, bo na gọ̀ ahọsu jo hlan mẹglatọ etọn lẹ.” Hinhẹnṣẹ whẹdida dódó tọn ehe lẹ tọn na hẹn ayajẹ wá na enẹnọ lẹpo he tindo todido to Jehovah mẹ.—Deutelonomi 32:3, 43; Lomunu lẹ 15:10-13; Osọhia 7:9.
11. Nawẹ ohan he Johanu se lọ to nukọnzindo nado tindo hẹndi de gbọn?
11 Lehe Moṣe lọsu na ko jaya sọ eyin e tin to azan Oklunọ tọn lọ gbe todin, bo to ohanji to pọmẹ po ohanjiji olọn mẹ tọn lọ po: “Akọta lẹpo wẹ na wá bo litai to nukọn towe”! Ohanjiji he to agayi enẹ to nukọnzindo nado tindo hẹndi jiawu de to egbehe dile mí mọ do, e ma yin to numimọ tata mẹ ṣigba to nujijọ yinukun tata do mọ de mẹ, yedọ livi lẹ sọn “akọta lẹ” mẹ he to sisà po ayajẹ po todin hlan agun aigba ji tọn Jehovah tọn.
12. Etẹwutu ohan awhangbatọ lẹ tọn sọ yin yiylọ dọ “ohan Lẹngbọvu lọ tọn”?
12 Ṣogan, ehe yin ohan, e ma yin Moṣe tọn kẹdẹ gba ṣigba “Lẹngbọvu lọ tọn” ga. Nawẹ e yin mọ gbọn? Moṣe yin yẹwhegan Jehovah tọn na Islaeli, podọ Moṣe lọsu dọdai dọ Jehovah na fọn yẹwhegan de taidi ewọ dote. Omẹ ehe sọawuhia nado yin Lẹngbọvu lọ, Jesu Klisti. Dile e yindọ Moṣe yin “devi Jiwheyẹwhe tọn,” Jesu yin Ovi Jiwheyẹwhe tọn, na nugbo tọn, Moṣe Daho Hugan lọ. (Deutelonomi 18:15-19; Owalọ lẹ 3:22, 23; Heblu lẹ 3:5, 6) Nalete, ohanjitọ lẹ ji “ohan Lẹngbọvu lọ tọn” ga.
13. (a) Nawẹ e yin gbọn dọ Jesu, dile etlẹ klo hugan Moṣe sọ, tin taidi ewọ? (b) Nawẹ mí sọgan kọnawudopọ hẹ ohanjitọ lẹ gbọn?
13 Taidi Moṣe, Jesu jihan pipa Jiwheyẹwhe tọn lẹ tọn to gbangba bo dọdai dogbọn awhangbigba Etọn to kẹntọ lẹpo ji dali. (Matiu 24:21, 22; 26:30; Luku 19:41-44) Jesu ga to pinpọnhlan ojlẹ lọ whenuena akọta lẹpo na biọ whegbe nado pa Jehovah, podọ taidi “Lẹngbọvu Jiwheyẹwhe tọn” mẹdeyídosanvọtọ lọ, e yi ogbẹ̀ gbẹtọ tọn etọn liai nado hẹn ehe yọnbasi. (Johanu 1:29; Osọhia 7:9; yijlẹdo Isaia 2:2-4; Zekalia 8:23 go.) Podọ kẹdẹdile Moṣe wá yọn pinpẹn oyin Jiwheyẹwhe tọn tọn, yedọ Jehovah, bo ze oyin enẹ daga, mọdopolọ, Jesu hẹn oyin Jiwheyẹwhe tọn sọawuhia. (Eksọdusi 6:2, 3; Psalm 90:1, 17; Johanu 17:6) Dile e ko yindọ Jehovah yin nugbonọ, opagbe gigonọ etọn lẹ na mọ hẹndi yí dandan. Whelọnu lo, na nugbo tọn, mí yin dopo hẹ ohanjitọ nugbonọ ehelẹ, podọ po Lẹngbọvu lọ po, podọ po Moṣe po, to alọkẹyi hogbe ohan lọ tọn lẹ mẹ: “Mẹnu wẹ ma na dibusi we, [Jehovah] E, bo ma na pagigona oyin towe?”
Angẹli Lẹ Po Ogò Lẹ Po
14. Mẹnu lẹ wẹ Johanu mọ he to tintọ́n sọn tẹmpli lọ mẹ podọ etẹwẹ yin yiyi na yé?
14 E yin nuhe jẹ dọ mí se ohan awhangbatọ yiamisisadode ehelẹ tọn. Etẹwutu? Na yé ko lá whẹdida he tin to ogò lẹ mẹ he yin gigọ po homẹgble Jiwheyẹwhe tọn po to aigba ji wutu. Ṣigba tuntun jẹgbonu ogò ehelẹ tọn bẹ hugan gbẹtọ tata lẹ hẹn, dile Johanu zindonukọn nado dohia do: “Enẹgodo yẹn sọ pọn, do ayi e go, yè hun tẹmpli gohọtuntun okunnuho lọ tọn lọ do nuvo to olọn mẹ: angẹli ṣinawe lẹ sọ tọ́n sọn tẹmpli mẹ, yé po azọ̀nylankan ṣinawe lẹ po, he yè ṣinyọn alavọ wewe tete na, bo sọ yí gbaja sika tọn do gbàn akọnnu na ye. Dopo to mẹdida ẹnẹ lẹ mẹ sọ yí ogò sika tọn ṣinawe na angẹli ṣinawe lẹ lọ, he gọna homẹgble Jiwheyẹwhe mẹhe tin to ogbẹ̀ kakadoi tọn.”—Osọhia 15:5-7.
15. Etẹwutu e ma yin nupaṣamẹ de dọ angẹli ṣinawe lẹ tọ́n sọn tẹmpli lọ mẹ?
15 Na nuhe du tẹmpli Islaelivi lẹ tọn, he bẹ yẹdide onu olọn mẹ tọn lẹ tọn hẹn, yẹwhenọ daho lọ kẹdẹ wẹ sọgan biọ Ofi Wiwe Hú Popolẹpo lọ mẹ, he yin yiylọ tofi dọ “tẹmpli lọ.” (Heblu lẹ 9:3, 7) E nọtena nọtẹn tintin-to-finẹ Jehovah tọn tọn to olọn mẹ. Ṣigba to olọn lọ lọsu mẹ, e ma yin Yẹwhenọ Daho, Jesu Klisti kẹdẹ wẹ tindo lẹblanulọkẹyi nado biọ e mẹ to Jehovah nukọn gba ṣigba angẹli lẹ lọsu ga. (Matiu 18:10; Heblu lẹ 9:24-26) Whelọnu lo, e ma yin nupaṣamẹ de gba dọ angẹli ṣinawe lẹ sọgan yin mimọ to wiwá sọn tẹmpli lọ mẹ to olọn mẹ. Yé tindo azọndenamẹ de sọn Jehovah Jiwheyẹwhe lọsu de: Tuntun jẹgbonu ogò lẹ tọn he yin gigọ po homẹgble Jiwheyẹwhe tọn po.—Osọhia 16:1.
16. (a) Etẹwẹ dohia dọ angẹli ṣinawe lẹ pegan ganji na azọn yetọn? (b) Etẹwẹ dohia dọ mẹdevo lẹ gando azọ́n daho he yin tuntun jẹgbonu ogò yẹhiadonu tọn lẹ tọn go?
16 Angẹli ehelẹ pegan ganji na azọn ehe. Yé yin alavọ wéwé tete ṣinyọnna, he dohia dọ yé wé bo yin wiwe to gbigbọ-liho, podọ dódónọ ga to Jehovah nukunmẹ. Dogọ, yé sọ bla gbaja sika tọn lẹ. Gbaja nọ yawu yin yiyizan whenuena omẹ de blagona ede na azọ́n de nado yin wiwà. (Levitiku 8:7, 13; 1 Samuẹli 2:18; Luku 12:37; Johanu 13:4, 5) Nalete angẹli lẹ yin gbaja blana nado yi azọndenamẹ de wà. Dogọ, gbaja yetọn yin sika tọn. To gohọtuntun hohowhenu tọn lọ mẹ, sika yin yiyizan nado nọtena onu sọn olọn mẹ wá lẹ. (Heblu lẹ 9:4, 11, 12) Enẹ zẹẹmẹdo dọ angẹli ehelẹ tindo azọndenamẹ họakuẹ, sọn olọn mẹ wá de nado wà. Mẹdevo lẹ ga yin gingandego dogbọn azọn daho ehe dali. Dopo to nudida ẹnẹ lẹ mẹ wẹ yí ogò lẹ na yé. Matin ayihaawe, ehe na ko yin nudida tintan lọ, he di kinnikinni de, he nọtena adọgbigbo po tuli matin awetọ po he yin nuhudo nado lá whẹdida Jehovah tọn lẹ.—Osọhia 4:7.
Jehovah To Tẹmpli Etọn Mẹ
17. Etẹwẹ Johanu dọ na mí dogbọn tẹmpli lọ dali, podọ nawẹ enẹ flin mí tẹmpli he tin to Islaeli hohowhenu tọn mẹ lọ gbọn?
17 To godo mẹ, to tadona ada numimọ lọ tọn ehe mẹ, Johanu dọ na mí: “Ohò tẹmpli lọ tọn mẹ sọ gọ na azọ sọn gigo Jiwheyẹwhe tọn mẹ, podọ sọn huhlọn etọn mẹ; mẹde ma sọ sọgan biọ tẹmpli lọ mẹ, kaka yè na do hẹn azọ̀nylankan ṣinawe angẹli ṣinawe lẹ lọ tọn vọ.” (Osọhia 15:8) Ojlẹ delẹ tin to whenuho Islaeli tọn mẹ whenuena azọ de gọ tẹmpli agbasanu tọn lọ mẹ, podọ dohia gigo Jehovah tọn ehe hẹn alọdotena yẹwhenọ lẹ sọn bibiọ e mẹ. (1 Ahọlu lẹ 8:10, 11; 2 Otannugbo lẹ 5:13, 14; yijlẹdo Isaia 6:4, 5 go.) Ehelẹ yin ojlẹ lẹ whenuena Jehovah tindo mahẹ tangan to nujijọ lẹ mẹ to aigba ji.
18. Whetẹnu wẹ angẹli ṣinawe lẹ na lẹ́gọwá nado basi linlin de na Jehovah?
18 Jehovah tindo ojlo siso to nuhe to jijọ to aigba ji todin lẹ mẹ. E jlo dọ angẹli ṣinawe lẹ ni dotana azọndenamẹ yetọn. E yin ojlẹ whẹdida tọn godo tọn de, dile e yin zẹẹmẹ basina do to Psalm 11:4-6 mẹ: “[Jehovah] tin to tẹmpli wiwe etọn mẹ, ofin [Jehovah] tọn tin to olọn mẹ: nukun etọn to pinpọn, nukundama etọn to ovi gbẹtọ tọn lẹ whlepọn. [Jehovah] to dódónọ lẹ whlepọn: ṣigba mẹylankan po mẹhe yiwanna adingbandido po ayiha etọn gbẹwanna. Do mẹylankan ji wẹ e na ja zokan zozo tọn do, ozo po whemi po, po oyu miyọnawu po, ehe wẹ na yin jlẹka yetọn.” Kaka jẹ whenuena azọ̀nylankan ṣinawe ehelẹ na yin tuntun jẹgbonu do mẹylankan lẹ ji godo, angẹli ṣinawe lẹ ma na lẹ́gọwá nukọn gigonọ Jehovah tọn gba.
19. (a) Gbedide tẹwẹ yin nina, podọ dogbọn mẹnu dali? (b) Whetẹnu wẹ tuntun jẹgbonu ogò yẹhiadonu tọn lẹ tọn dona ko bẹjẹeji?
19 Gbedide dabla lọ dọnu jẹgbonu: “Yẹn sọ se ogbe lele de sọn tẹmpli lọ mẹ, to didọ hlan angẹli ṣinawe lẹ, dọmọ, Mì yì, bo tuntun ogò homẹgble Jiwheyẹwhe tọn tọn lẹ do aigba mẹ.” (Osọhia 16:1) Mẹnu wẹ degbe ehe? E dona yin Jehovah lọsu, dile e ko yindọ sisẹ́ gigo po huhlọn etọn tọn po ma na dotẹnmẹ mẹdevo depope nado biọ tẹmpli lọ mẹ gba. Jehovah wá tẹmpli gbigbọmẹ tọn etọn mẹ na whẹdida to 1918. (Malaki 3:1-5) Whelọnu lo, e dona ko yin to madẹnmẹ to owhe enẹ godo wẹ e degbe nado tuntun ogò homẹgble Jiwhẹyẹwhe tọn lẹ jẹgbonu. Na nugbo tọn, whẹdida lẹ he tin to ogò yẹhiadonu tọn lẹ mẹ jẹ yinyin lilá ji po huhlọn po to 1922. Podọ lila yetọn to agayi madoalọte to egbehe.
Ogò Lẹ Po Opẹn Kunkun Lẹ Po
20. Etẹwẹ ogò homẹgble Jehovah tọn tọn lẹ sọhia bo na avase mẹ na, podọ nawẹ yé yin tuntun jẹgbonu gbọn?
20 Ogo homẹgble Jiwheyẹwhe tọn tọn do ninọmẹ nujijọ aihọn tọn lẹ tọn hia dile Jehovah mọ yé do bo na avase mẹ dogbọn whẹdida he Jehovah na basi lẹ dali. Angẹli lẹ tuntun ogò lẹ jẹgbonu gbọn yizan agun Klistiani yiamisisadode lẹ tọn to aigba ji gblamẹ, yedọ omẹ he to ohan Moṣe tọn po ohan Lẹngbọvu lọ tọn po ji lẹ. Whenuena yé to Ahọluduta lọ lá taidi wẹndagbe de, hagbẹ Johanu tọn lọ ko dohia po adọgbigbo po nuhe ogò homẹgble tọn ehelẹ bẹhẹn. (Matiu 24:14; Osọhia 14:6, 7) Nalete, wẹndomẹ to alọ awe mẹ yetọn ko yin jijọho tọn to tundote lilá na gbẹtọvi lẹ mẹ ṣigba taidi awhan to avase nina dogbọn “azan ahọsuyi Jiwheyẹwhe mítọn tọn” tọn mẹ.—Isaia 61:1, 2.
21. Nawẹ yanwle ogò ẹnẹ tintan homẹgble Jiwheyẹwhe tọn lẹ tọn sọzẹn hẹ enẹnọ he yin opẹn kunkun ẹnẹ tintan lẹ tọn gbọn, podọ fie wẹ yé tindo vogbingbọn te?
21 Yanwle ogò ẹnẹ tintan he yin homẹgble Jiwheyẹwhe tọn tọn sọgbe hẹ dehe yin opẹn kunkun ẹnẹ tintan lẹ tọn lẹ, enẹ wẹ yindọ, aigba, ohù, asisa otọ̀ lẹ tọn, po asisa hinhọ́n olọn mẹ tọn lẹ tọn po. (Osọhia 8:1-12) Ṣigba opẹn kunkun lẹ lá azọ̀nylankan do “dadatọ̀ntọ” de ji whenuena e ko yindọ blebu pete yetọn wẹ yin gingandego dogbọn tuntun jẹgbonu ogò homẹgble Jiwheyẹwhe tọn tọn dali. Nalete, whenuena Mẹylọhodotọklisti, taidi dadatọ̀ntọ de, ko mọ ayidonugo tintan yí to azan Oklunọ tọn lọ whenu, ada depope titonu Satani tọn ma yin jijodo sọn yinyin hihò dogbọn wẹndomẹ whẹdida homẹgble Jehovah tọn lẹ po awubla he yé hẹnwa lọ po dali gba.
22. Nawẹ opẹn kunkun atọ̀n godo tọn lẹ gbọnvo gbọn, podọ nawẹ yé gando ogò atọ̀n godo tọn lẹ he yin homẹgble Jehovah tọn go gbọn?
22 Opẹn kunkun atọ̀n godo tọn lẹ gbọnvo, na yé yin yiylọ dọ dindọn lẹ wutu. (Osọhia 8:13; 9:12) Awe tintan ehelẹ tọn bẹ owẹ̀n lẹ po awhan osọ́nọ lẹ tọn po hẹn titengbe, whenuena atọ̀ntọ lọ do jìjì Ahọluduta Jehovah tọn tọn hia. (Osọhia 9:1-21; 11:15-19) Dile mí na mọ do, ogò atọ̀n godo tọn lẹ he yin homẹgble etọn tọn sọ gando delẹ to ninọmẹ ehelẹ go ga, ṣigba yé yin nuhe gbọnvo vude na dindọn atọ̀n lẹ. Mì gbọ na mí ni doayi sisọhia wadohia tọn lọ go pẹkipẹki he dekọtọn sọn tuntun jẹgbonu ogò homẹgble Jehovah tọn tọn lẹ mẹ.
[Nudọnamẹ Odò Tọn]
a Yè dona doayi e go dọ to 1921, hagbẹ Johanu tọn lọ dè alọgọ plọnmẹ Biblu tọn de tọ́njẹgbonu he yin La Harpe de Dieu (Ajalẹn Jiwheyẹwhe Tọn) he vọkan hugan livi atọ́n etọn lẹ yin hinhẹn gbayipe to hugan ogbè 20 lẹ mẹ. E gọalọ nado hẹn ohanjitọ yiamisisadode dogọ wá.