Lẹndai Jiwheyẹwhe Tọn Na Aigba Na Mọ Hẹndi to Madẹnmẹ

TO WHENUENA Adam po Evi po gbẹ́ pò to Paladisi mẹ, yé mọ gbedide de yí sọn Jiwheyẹwhe dè he dọmọ: “Mì yin sinsẹ́nnọ, bo sudeji, bosọ gọ́ aigba ji, bo dugán do e ji: bo duahọlu to whèvi ohù tọn ji, podọ to ohẹ̀ aga tọn ji, [podọ] to nuhe to ogbẹ̀ lẹpo ji he nọ lìn to aigba ji.”—Gẹnẹsisi 1:28.

Nado dugán do aigba ji ma zẹẹmẹdo nado pọ̀ kavi penukundo adà aigba tọn pẹvi de go poun gba. Adam po Evi po, gọna kúnkàn yetọn lẹ dona hẹn Paladisi lọ gblodeji kaka bọ e na gọ́ aigba blebu ji. Nalete, asu po asi po tintan lọ waylando bo yin yinyan jẹgbonu sọn jipa Edẹni tọn mẹ. (Gẹnẹsisi 3:23, 24) Ṣigba, enẹ ma zẹẹmẹdo dọ aigba ma na yin gandudeji gbede gba.

Na gbẹtọvi tonusetọ lẹ na yin didona gbọn Jiwheyẹwhe dali wutu, yé na penugo nado dugán do aigba ji. To whenuena omẹ Islaeli hohowhenu tọn lẹ mọ dona Jiwheyẹwhe tọn yí, ogle yetọn lẹ de jinukun dagbe lẹ tọ́n bọ jipa yetọn lẹ de atin-sinsẹ́n dagbedagbe lẹ tọ́n. Ninọmẹ mọnkọtọn lẹ na wá tin dile aigba mítọn na to lilẹzun paladisi vudevude. Dile Ohó gbọdo Jiwheyẹwhe tọn, Biblu, dopagbe etọn do, “whenẹnu wẹ aigba na hẹn jideji etọn wá; Jiwheyẹwhe, yèdọ Jiwheyẹwhe mítọn lọsu, na dona mí.” (Psalm 67:6) Na nugbo tọn, danji po osó aigba tọn lẹ po, atin po vounvoun etọn lẹ po, tọ̀sisa po ohù etọn lẹ po na jaya. (Psalm 96:11-13; 98:7-9) Aigba na gọ́ na amakikọ susugege, ohẹ̀ whanpẹnọ lẹ, kanlin he jiawu lẹ, po gbẹtọ he jọmẹ lẹ po.

Aihọn Yọyọ de to Yakẹ!

Mí tin to bẹbẹnu aihọn yọyọ he Jehovah Jiwheyẹwhe dopagbe etọn lọ tọn todin. Apọsteli Pita wlan dọmọ: “Di opagbe etọn, míwlẹ to nukundo olọn yọyọ lẹ, po aigba yọyọ de po, fihe dodo nọ nọ̀.” (2 Pita 3:13) To hogbe Pita tọn enẹlẹ hihia godo, mẹdelẹ sọgan wá tadona kọ̀n dọ planẹti ehe ma na lẹzun paladisi pọ́n gbede. Yé sọgan lẹndọ olọn yinukundomọ lẹ po aigba po na yin didiọ. Be enẹ sọgan jọ ya?

Etẹlẹ wẹ yin “olọn yọyọ lẹ”? E ma yin olọn yinukundomọ he Jiwheyẹwhe dá gba. (Psalm 19:1, 2) Pita ṣẹṣẹ dọhodo “olọn” yẹhiadonu tọn lẹ ji wẹ—yèdọ gandudu gbẹtọvi tọn he yiji kavi yiaga hú mẹjidugando yetọn lẹ. (2 Pita 3:10-12) “Olọn” ehelẹ ko gboawupo to gandudu do gbẹtọvi lẹ ji mẹ bo na juwayi. (Jẹlemia 10:23; Daniẹli 2:44) “Olọn yọyọ lẹ” he na diọtẹnna yé wẹ Ahọluduta Jiwheyẹwhe tọn he bẹ Ahọlu Jesu Klisti po whédutọgbẹ́ etọn 144 000 he yin finfọnsọnku do ogbẹ̀ olọn tọn mẹ lẹ po hẹn.—Lomunu lẹ 8:16, 17; Osọhia 5:9, 10; 14:1, 3.

“Aigba yọyọ” he go Pita donù ma yin planẹti yọyọ de gba. Jehovah dá aigba taidi nọtẹn he sọgbe de na gbẹninọ kakadoi gbẹtọvi lẹ tọn. (Psalm 104:5) To whedelẹnu, Biblu nọ yí hogbe lọ “aigba” zan nado dlẹnalọdo gbẹtọ lẹ. (Gẹnẹsisi 11:1, NW ) Aigba lọ he na yin vivasudo to madẹnmẹ bẹ mẹhe hẹn yede zun apadewhe aihọn ylankan ehe tọn lẹ hẹn. Mọdopolọ, aihọn mẹylankan lẹ tọn de yin vivasudo to Singigọ azán Noa gbè tọn mẹ. (2 Pita 3:5-7) To whelọnu lo, etẹwẹ yin “aigba yọyọ” lọ? Pipli gbẹtọ lẹ tọn yọyọ de wẹ—yèdọ sinsẹ̀ntọ nugbo Jiwheyẹwhe tọn, he yin “tenọglinọ to ayiha mẹ lẹ.” (Psalm 125:4; 1 Johanu 2:17) Osẹ́n “aihọn yọyọ” lọ tọn lẹpo na wá sọn “olọn yọyọ lẹ” mẹ. Sunnu nugbonọ lẹ to aigba ji na hẹn ẹn diun dọ anademẹ ehelẹ yin hihodo.

Diọdo Yọyọ Podọ Jiawu lẹ Na Tin!

Ayihaawe ma tin dọ Jehovah na mí owhé whanpẹnọ de to whenuena e wleawuna aigba na gbẹninọ gbẹtọvi tọn. Ewọ lọsu dọ dọ azọ́n he e wà do aigba go lẹpo “yọ́n tlala.” (Gẹnẹsisi 1:31) Satani Lẹgba sisẹ́ Adam po Evi po nado ṣiatẹ. (Gẹnẹsisi 3:1-5; Osọhia 12:9) Etomọṣo, Jiwheyẹwhe na hẹn ẹn diun dọ dodonọ lẹ mọ “ogbẹ̀ nugbonugbo” yí to madẹnmẹ. Enẹ wẹ “ogbẹ̀ madopodo” to ninọmẹ pipé lẹ glọ to Paladisi mẹ. (1 Timoti 6:12, 19) Todin, mì gbọ mí ni gbadopọnna delẹ to dona he gbẹtọvi lẹ na duvivi etọn to whenẹnu lẹ mẹ.

To Gandudu Owhé Fọtọ́n Klisti tọn whenu, Satani na yin alọhẹndotena bo ma na penugo nado hẹn dindọn wá gbẹtọvi lẹ ji. Apọsteli Johanu dọmọ: “Yẹn sọ mọ angẹli de [angẹligán Mikaẹli, kavi Jesu Klisti] jẹte sọn olọn mẹ ja odò, e tindo họnhungan odò mapote lọ tọn, kọgàn daho de sọ tin to alọ etọn mẹ. E sọ de alọ bo hẹn dlagọni lọ, odàn hoho lọ, he yin Lẹgba, Satani, bo dogàn ẹn họ̀ owhe fọtọ́n, bosọ dọ̀n ẹn dlan odò mapote lọ mẹ, bo súnudo e, bo yí hiadonu do tlẹ́ ẹ, na e klọ akọta lẹ ba blo, kaka owhe fọtọ́n nado pé.” (Osọhia 20:1-3; 12:12) Gbọnvona dọ gbẹtọvi lẹ na jẹ mẹdekannu sọn nuyiwadomẹji Satani tọn glọ to whenuena ewọ yin dindlan do odò mapote mẹ, yé nasọ duvivi dona susu devo lẹ tọn to gandudu Ahọluduta lọ tọn glọ.

Kanyinylan, danuwiwa, po awhàn po ma nasọ tin ba. Biblu dopagbe dọmọ: “Na whenu pẹẹde, mẹylankan lẹ ma na tin ba: nugbo, hiẹ na yí sọwhiwhe do lẹn otẹn etọn pọ́n, e ma nasọ tin. Ṣigba homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ. Dodonọ wẹ na dugu aigba tọn, bo nasọ nọ nọ̀ e mẹ kakadoi.” (Psalm 37:10, 11, 29) Jehovah Jiwheyẹwhe ‘na hẹn awhàn gbọ kakajẹ opodo aigba tọn lẹ.’ (Psalm 46:9) Jidenamẹ hihọ́ po jijọho po tọn jiawu nankọ die!

Núdùdù hunsindagbe tọn he dojo susugege na tin-to-aimẹ. “Gbado susugege na tin finẹ to osó lẹ ji,” wẹ psalm-kàntọ lọ jihàn dọ. (Psalm 72:16) To ojlẹ enẹ mẹ, mẹdepope ma na jiya awufiẹsa sinsinyẹn he huvẹ nọ hẹnwa lẹ tọn ba.

Mẹdepope ma na jiya manọna kavi azọ̀n tọn. Na nugbo tọn, “finẹnu lẹ ma to na dọmọ, yẹn to azọ̀njẹ.” (Isaia 33:24; 35:5, 6) To whenuena Jesu Klisti tin to aigba ji, e hẹnazọ̀ngbọna pòtọnọ lẹ, sẹkunọ lẹ po nukuntọ́nnọ lẹ po. (Matiu 9:35; Malku 1:40-42; Johanu 5:5-9) Yí nukun homẹ tọn do pọ́n nuhe e na wà to aihọn yọyọ lọ mẹ! Lẹnnupọndo ayajẹ he na tin to whenuena nukuntọ́nnọ lẹ, tókunọ lẹ, sẹkunọ lẹ, po unbọpẹn lẹ po na yin azọ̀nhẹngbọna ji.

Dile gbẹtọvi tonusetọ lẹ to nukọnyi jẹ pipé-yinyin kọ̀n, nugandomẹgo yọnhowhe tọn lẹ na busẹ. Nuhudo ma nasọ tin na gànnukun lẹ, opò zọnlinzinzin tọn lẹ, opò po kẹkẹ sẹkunọ tọn lẹ po, dotowhé lẹ po amasin lẹ po ba. Diọdo nankọtọn die e na yin dile huhlọn jọja-whenu tọn mítọn gọwá! (Job 33:25) Mí na nọ damlọn ganji to ozán dopodopo mẹ, bo na nọ fọ́n jogún-jogún to afọnnu-afọnnu nado bẹ azán devo jẹeji he na gọ́ na nuwiwa he nọ namẹ ayajẹ lẹ.

Fọnsọnku mẹyiwanna lẹ po mẹdevo lẹ po tọn na hẹn ahun mítọn jaya. (Johanu 5:28, 29; Owalọ lẹ 24:15) Lehe e na yin ayajẹnu do sọ nado dokuavọna Abẹli, Noa, Ablaham, Sala, Job, Mose, Luti, Davidi, Elija, Ẹsteli, po mọmọ po sọyi! Omẹ livi susu devo lẹ nasọ yin finfọnsọnku ga. Suhugan yetọn ma ko sèhó gando Jehovah go pọ́n gbede, ṣigba yé na yin kuavọdona gbọn mẹhe to jejeji nado plọnnu yé gando Jiwheyẹwhe, lẹndai etọn lẹ, po Ovi etọn, Jesu Klisti po go lẹ dali. To whenuena mẹhe yin finfọnsọnku lẹ wá yọ́n Mẹdatọ yetọn, oyọnẹn Jehovah tọn na gọ́ aigba ji na nugbo tọn.

Hú popolẹpo, mí na penugo nado sẹ̀n Jiwheyẹwhe nugbo dopo kẹdẹ lọ kakadoi. Mí na tindo lẹblanulọkẹyi lọ nado “yí homẹhun do sẹ̀n” Jehovah, podọ mí na wazọ́n to kọndopọ mẹ dile mí to owhé whanpẹnọ lẹ gbá, to aigba lọ pọ̀, bo wá dugán do aigba lọ pete ji to godo mẹ. (Psalm 100:1-3; Isaia 65:21-24) Homẹhunnu nankọtọn die he e na yin nado nọgbẹ̀ kakadoi to paladisi sinsẹ́nnọ, jijọhonọ, podọ whanpẹnọ de mẹ, he nọ hẹn gbégbò wá na oyín wiwe Jehovah tọn!—Psalm 145:21; Johanu 17:3.

Mẹwhlepọn Godo Tọn Na Gbẹtọvi Lẹ

To Gandudu Owhe Fọtọ́n tọn etọn whenu, Jesu na yí ale avọ́sinsan ofligọ etọn tọn lẹ zan na gbẹtọvi tonusetọ lẹpo. Gbọnmọ dali, ylando lẹpo na yin didesẹ to godo mẹ, bọ gbẹtọvi lẹ na yin zizedaga jẹ pipé-yinyin kọ̀n. (1 Johanu 2:2; Osọhia 21:1-4) Na nuyiwadomẹji ylando Adam tọn lẹ ko busẹ mlẹnmlẹn wutu, gbẹtọvi pipé lẹ na jẹ nujinọtedo Jiwheyẹwhe tọn lẹ kọ̀n, to agbasa mẹ, to apọ̀nmẹ, to walọyizan-liho, podọ to gbigbọ-liho. Gbọnmọ dali yé na wá “tin to ogbẹ̀” to linlẹn gigọ́ hogbe lọ tọn mẹ to whenuena yé jẹ pipé-yinyin kọ̀n bo ma tindo ylando depope. (Osọhia 20:5) Lehe ehe po Paladisi aigba ji tọn lọ po na pagigona Jehovah do sọ!

Na ojlẹ gli de to vivọnu Gandudu Owhe Fọtọ́n Klisti tọn godo, Satani Lẹgba gọna aovi etọn lẹ, kavi angẹli ylankan lẹ, na yin didesọn odò mapote he mẹ yé yin ginglọndo nudi owhe fọtọ́n die wayi. (Osọhia 20:1-3) Dotẹnmẹ na yin nina yé nado tẹnpọn whla godo tọn nado gọkọna gbẹtọ lẹ sọn Jiwheyẹwhe dè. Dile etlẹ yindọ mẹdelẹ na joawuna ojlo ylankan lẹ, atẹṣiṣi ehe ma na tindo kọdetọn dagbe. Jehovah na và atẹṣitọ ṣejannabinọ lẹ sudo to pọmẹ hẹ Satani po aovi etọn lẹpo po. Kanyinylan ma nasọ tin pọ́n gbede ba. Ylanwatọ lẹpo na busẹ sọn aimẹ kakadoi, podọ dodonọ lẹ na mọ ogbẹ̀ madopodo yí.—Osọhia 20:7-10.

Be Hiẹ Na Tin to Finẹ Ya?

Todido ayajẹ madopodo tọn tin to nukọn na mẹhe yiwanna Jehovah Jiwheyẹwhe lẹ. Ogbẹ̀ madopodo to Paladisi mẹ ma na ṣiapọmẹ to aliho depope mẹ. Na taun tọn, ogbẹ̀ na nọ to ojlofọndotenamẹ dogọ dile ojlẹ to yìyì, na dogbó depope ma tin na oyọnẹn Jehovah Jiwheyẹwhe tọn. (Lomunu lẹ 11:33) Hiẹ na nọ mọ onú yọyọ de plọn to whepoponu janwẹ, podọ hiẹ na tindo whenu susu nado plọnnu. Etẹwutu? Na hiẹ na nọgbẹ̀, e ma yin na owhe 70 kavi 80 poun gba, ṣigba kakadoi.—Psalm 22:26; 90:10; Yẹwhehodọtọ 3:11.

Eyin hiẹ yiwanna Jiwheyẹwhe, ojlo etọn wiwà na nọ hẹn homẹ hùn we taun to whepoponu. Apọsteli Johanu wlan dọmọ: “Ehe wẹ owanyi Jiwheyẹwhe tọn, dọ mí ni yìn osẹ́n etọn: osẹ́n etọn masọ yin nupẹnagbanmẹ gba.” (1 Johanu 5:3) Enẹwutu, a dike nudepope glọnalina we nado hẹn homẹhun Jehovah Jiwheyẹwhe bo wà nuhe sọgbe blo. Hẹn todido jiawu he Ohó Jiwheyẹwhe tọn, Biblu, zedonukọnna we do ayiha mẹ. Magbe nado wà ojlo Jehovah tọn, bo ma tọ́nsọn aliho enẹ ji gbede blo. Gbọnmọ dali, hiẹ na tin to finẹ to whenuena lẹndai Jiwheyẹwhe tọn na aigba na mọ hẹndi bọ owhé mítọn na lẹzun paladisi madopodo de.

[Yẹdide to weda 4]

Po dona Jiwheyẹwhe tọn po, ogle Islaeli tọn lẹ de sinsẹ́n susugege tọ́n

[Yẹdide to weda 7]

Dona tẹlẹ wẹ hiẹ to nukundo nado duvivi yetọn to Paladisi mẹ?