Hlọnhuhu to Hùnwhẹ Jijizan Tọn de Whenu

To whenue apọsteli Jesu tọn lẹ to lizọnyizọn yetọn hẹndi to Galili, mẹhe do Jesu hia gbẹtọ lẹ ma tindo mẹdekannujẹ mọnkọtọn. E ko diblayi owhe awe todin bọ Johanu Baptizitọ to gànmẹ.

Johanu dọ to aliho he họnwun mẹ dọ e ma sọgbe dọ Ahọlu Hẹlọdi Antipa ni yí Hẹlọdia, yèdọ asi nọvisunnu daa etọn Filippi tọn. Hẹlọdi ko gbẹ́ asi etọn tintan dai nado wlealọ hẹ Hẹlọdia. Sọgbe hẹ Osẹ́n Mose tọn, he Hẹlọdi nọ sọalọakọ́n dọ emi to hihodo, ayọdide wẹ alọwle ehe yin bo ma sọgbe hẹ osẹ́n. Na nugbẹnamẹ Johanu tọn wutu, Hẹlọdi wle e do gànmẹ, vlavo na Hẹlọdia sisẹ́ ẹ nado wàmọ wutu.

Hẹlọdi ma yọ́n nuhe e na wà na Johanu, na gbẹtọ lẹ ‘nọ pọ́n ẹn di yẹwhegán de’ wutu. (Matiu 14:5) Ṣigba, Hẹlọdia ma yiwanna awuwhiwhle mọnkọtọn paali. Hẹlọdia “hẹn ewọ do homẹ,” bo to dindin mapote dọ e ni yin hùhù. (Malku 6:19) To godo mẹ, dotẹnmẹ lọ wá hundote.

Ojlẹ vude jẹnukọnna Juwayi owhe 32 W.M. tọn, Hẹlọdi wleawuna hùnwhẹ daho de, na jijizan etọn wutu. Azọ́nwatọ po awhàngán Hẹlọdi tọn gboogbo lẹpo po gọna omẹ nukundeji Galili tọn lẹ pli dopọ na hùnwhẹ lọ. To hùnwhẹ lọ whenu, Salome, yèdọ viyọnnu he Hẹlọdia ji na Filippi asu etọn dai tọn lọ, yin didohlan nado dúwe na jonọ lẹ. Wedudu etọn vivi na omẹ lọ lẹ taun.

Homẹ hùn Hẹlọdi do viyọnnu asi etọn tọn go sọmọ bọ e dọna ẹn dọmọ: “Biọ mi nudepope he a jlo, yẹn nasọ na we.” E tlẹ whlé dọmọ: “Nudepope he a biọ mi, yẹn na na we, yèdọ kakajẹ odaa ahọluduta ṣie tọn ji.” Whẹpo Salome nado biọ nude, e tọ́nyi bo dọna onọ̀ etọn dọmọ: “Etẹwẹ yẹn na biọ?”—Malku 6:22-24.

Dotẹnmẹ hundote he Hẹlọdia ko to dindin lọ die! E gblọn madọngbàn dọmọ: “Ota Johanu Baptizi tọn.” To afọdopolọji, Salome lẹkọwa Hẹlọdi dè po obiọ etọn po dọmọ: “Yẹn jlo dọ hiẹ ni na mi ota Johanu Baptizitọ lọ tọn to agbánvla de mẹ tlolo din.”—Malku 6:24, 25.

Ehe blawuna Hẹlọdi sinsinyẹn, ṣigba e ko whlé na Salome to jonọ etọn lẹ nukọn. Winyan zọ́n bọ e ma sọgan gbẹ́, eyin ehe na tlẹ biọ dọ homẹvọnọ de ni yin hùhù. Enẹwutu, Hẹlọdi do dopo to mẹhe nọ basi hihọ́na ẹn lẹ mẹ hlan gànpa lọ mẹ po anademẹ kanlinjọmẹ tọn lọ lẹ po. E ma dẹn bọ mẹhe nọ basi hihọ́na ahọlu lọ lẹkọwa po ota Johanu tọn po to agbánvla de mẹ. E ze e na Salome bọ ewọ ze e yì na onọ̀ etọn.

To whenue devi Johanu tọn lẹ sè nuhe jọ lọ, yé wá ze oṣiọ etọn sẹ̀ bo dì i. Enẹgodo, yé dọ nuhe ko jọ lọ na Jesu.

Obu di Hẹlọdi taun to whenue e wá sè dọ Jesu to azọ̀nhẹngbọna gbẹtọ lẹ bo to aovi lẹ yàn jẹgbonu. E to kinkanse ede eyin vlavo mẹhe to onú ehelẹ wà—enẹ wẹ Jesu—ma yin Johanu Baptizitọ he ko yin “finfọn sọn oṣiọ lẹ mẹ.” (Luku 9:7) Enẹwutu, Hẹlọdi Antipa to dindin vẹkuvẹku nado mọ Jesu. E họnwun dọ e ma yin nado sè yẹwhehodidọ Jesu tọn gba. Kakatimọ, Hẹlọdi jlo na mọ Jesu nado yọnẹn eyin vlavo nuhe lẹn emi te yin nugbo kavi lala.